Mu Tiyan’um Nga Rogon Ni Ga Be Machibnag E Girdi’

“Mu tiyan’um ngom, nge rogon ni ga be machibnag e girdi’. Um rin’ e pi n’ey iyan, ya faanra mu rin’ ma ga ra ayuwegem nge piin ni yad ma motoyil ngom ngar thapgad ngak Got.”​—1 TIMOTHY 4:16, New World Translation.

1, 2. Mang fan nib t’uf ko ngiyal’ ney e pi tamachib nib pasig?

“MMAROD ngak girdien e pi nam u gubin yang ngam pingeged yad ngar manged pi gachalpeg, . . . mi gimed fil ngorad rogon ni nguur folgad u gubin e tin ni ku gog ngomed ni nguum rin’ed.” (Matthew 28:19, 20) Bochan e re n’em ni tay Jesus chilen ko pi Kristiano, ma susun ni ngar athamgilgad ni ngar salapgad i machibnag e girdi’. Ba t’uf e pi tamachib nib pasig ni ngar ayuweged e piin nib yul’yul’ ni ngar filed e tamilangan’ rok Got u m’on ni ra taw ko tomur. (Roma 13:11) Yog apostal Paul ni gaar: “Ngam machibnag e thin rok Got ko girdi ndemtrug ko kari mab e kanawo’ ngom fa dawor.” (2 Timothy 4:2) Ere ba t’uf ni ngan machibnag e girdi’ ko ulung nge ku yugu boch e girdi’. Rriyul’, fre maruwel ko machib e gathi ke mus ni ngan wereg e thin rok Got. Ba t’uf ni ngan machibnag e girdi’ nib fel’ rogon ni nge yog ni ngar manged pi gachalpen Jesus.

² Gad be par ko ngiyal’ ni ba “mo’maw ni ngan par nrogon e tin riyul’ ni girdien Kristus.” (2 Timothy 3:1) Ya kari mich u wan’ e girdi’ e philosophy ni lem ko fayleng nge machib ngoogsur. Boor e girdi’ ni “lanin’rad e bay u fithik’ e lumor” ma “dakurir tamra’gad.” (Efesus 4:18, 19) Boch e girdi’ e kari gel ni kan kirebnagan’rad. Arrogon, be par e girdi’ ni “bod e saf nde moy rorad e en ni ma gafaliyrad.” (Matthew 9:36) Machane, faanra gad ra salap i machibnag e girdi’, ma rayog ni ngad ayuweged e piin nib yul’yul’ ni ngar thiliyeged boch ban’en nib t’uf.

Pi Tamachib u lan e Ulung

3. (a) Mang e ba muun ngay ko n’en ni tay Jesus chilen ni fan ko machib? (b) Mini’ e mmil fan ngak ni nge machibnag e girdi’ u lan e ulung?

³ U daken e yaram ko fol Bible u tabinaw, ma yibe ayuweg bokum milyon e girdi’ ni ta taareb. Machane tomren ni kar uned ko taufe mab t’uf ni nguun ayweg e pi girdi’ ney ni “nge yan lik’ngi[rad] nga fithik’ e t’ufeg nrogon ni nge t’uf Got ro[rad] nge girdi’, mi [yad] par riy me mang def ro[rad].” (Efesus 3:17) Nap’an ni gad be fol ko n’en ni yog Jesus u Matthew 28:19, 20 ma gad pow’iy e girdi’ ngar bad ko ulung rok Jehovah, ma ma yib angin ngorad ya yibe fil ban’en ngorad u nap’an e pi muulung. Rogon ni yog Efesus 4:11-13, ma kan dugliy e piin pumoon ni ngar manged “pi tachugol saf nge pi tamachib. I rin’ e re n’ey ni nge ngongliy rogon urngin e girdi’ rok Got ngar pigpiggad ngak ni aram e maruwel rok girdien Kristus, mi yad ayuweg girdien e dowef rok Kristus ngar ilalgad iyan.” Yu ngiyal’ ma ba t’uf ni ngan “fal owchen e girdi’ ko kireb ni yad be rin’, fa ngan pi’ e athamgil nga lanin’rad, ma nguun fil e thin rok Got ngorad u fithik’ e gum’an’.” (2 Timothy 4:2) Rib ga’ fan e marwel ko piin ni yad e ta machib me ere nap’an ni yol Paul ngak piyu Korinth ma ke tay e pi tamachib nib migid ko pi apostal nge profet.​—1 Korinth 12:28.

4. Uw rogon nra ayuwegdad ni ngad folgad ko n’en ni yog Paul u Hebrews 10:24, 25, nfaanra gad ba salap ko machib?

⁴ Rriyul’ ni gathi urngin e Kristiano ma yad e piin piilal, ara overseers. Machane yibe pining urngin e girdi’ ni nge bagadad ma “ngi i lemnag bagadad, ma nge bagadad ma ngi i ayuweg bagadad ma be dag ngak nib t’uf rok ma be rin’ e tin nib fel’ ngak.” (Hebrews 10:24, 25) Rogon ni ngan rin’ e re n’em u nap’an e pi muulung e ngan fl’eg rogon e fulweg ni ngan pi’ ni ra ubing e girdi’ min pi’ e athamgil nga lanin’rad. Ma boch e publisher nib ilal ko tirok Got ban’en e rayog ni nge k’aring yugu boch e girdi’ nge “rin’ e tin nib fel’” nfaanra yad ra weliy e tamilangan’ rorad ngorad nge experience rorad ngak e piin ka fin ra uned ko machib u nap’an ni yad ma yan ko machib u mit e tabinaw u taabang. Yu ngiyal’ i n’em nge ku yugu ba ngiyal’ e rayog ni ngan pi’ e fonow. Baaray rogon, yibe yog ko piin ke puwelwol ni ngar “filed e tin nib fel’” ngak e girdi’.—Titus 2:3.

Kan Micheg nga Lanin’uy

5, 6. (a) Uw rogon nib math keru’ e tin riyul’ e Kristiano ko liyor ngoogsur? (b) Uw rogon ni ma ayuweg e piin piilal e tin nib biech e girdi’ ngar turguyed boch ban’en u fithik’ e gonop?

⁵ Tin riyul’ e Kristiano e ba lingagil u fithik’ e pi yuraba’ i teliw ni googsur ni be guy rogon ni ngar gagiyegnaged e lem ko girdi’ rorad. Nap’an ni immoy Jesus u fayleng, ma pi tayugang ko teliw e ur guyed rogon ni ngar gagiyegnaged e yafos ko girdi’ u daken e yalen ni kar sunmiyed. (Luke 11:46) Ku aram rogon e pi tayugang ko Kristendom.

⁶ Machane tin riyul’ e liyor e aram ba “pigpig nib thothup” ni gad ma tay u daken e “tafinay rodad.” (Roma 12:1) Pi tapigpig rok Jehovah e yad e piin ni kan micheg nga lanin’rad e tin riyul’ ke mich u wan’rad.” (2 Timothy 3:14, NW) Yu ngiyal’ ma piin ni be pow’iy e girdi’ u lan e ulung e ba t’uf ni ngar rogned boch ban’en ni ngan rin’ ni fan ni nge par e ulung nib yaram. Machane piin piilal e dabra turguyed boch ban’en ni fan ko pi Kristiano ya yad ma aywegrad ngar “nanged e tin nib fel’ ko tin nib kireb.” (Hebrews 5:14) Piin piilal e ma rin’ e re n’ey ya yad ma duruw’iy fre ulung ko “thin ko mich u wun’uy ngak Kristus nge bin nib riyul’ e machib.”​—1 Timothy 4:6.

Mu Tiyan’um Nga Rogon ni Ga ma Machibnag e Girdi’

7, 8. (a) Uw rogon e girdi’ ni gathi ri yad ba salap ara ba cheg u ban’en machane ku rayog ni ngar pigpiggad ni yad e pi tamachib? (b) Mang e be dag ni ba t’uf ni nge athamgil be’ ni nge yog ni nge mang reb e tamachib ni bay angin e machib ni be tay?

⁷ Ngad lemnaged e n’en ni kan tay chilen ngodad ni aram e ngad machibnaged e girdi’. Ba t’uf ni ngan salap u ban’en, fa ba t’uf e skul nib tolang, fa ngan cheg i rin’ ban’en ni rayog ni ngan un ko re maruwel ney fa? Danga’. Ya piin ni be rin’ e re maruwel ney u fayleng iyan e gathi yad e tin nib baga’ fan e girdi’ ara tin nib lichow. (1 Korinth 1:26-29) I weliy Paul ni gaar: “Gamad e piin i ba’ romad e re n’ey nib fel’ [fare machib] ni pi’ fare kan ni thothup e gamad bod e rume’ ni but’ [dowef nde flont], ni nge m’ug ni re gelngin nem ni ir e ba th’abi gel e yib rok Got, ma gathi gamad e yib romad.” (2 Korinth 4:7) Rogon ni ke yib angin ko machib ko Gil’ilungun Got u ga’ngin e fayleng aram e be micheg gelngin e kan ni thothup rok Jehovah!

⁸ Machane, ba t’uf ni ngam athamgil nib gel ni nge “par e maruwel rom nrib fel’ u mit Got, ni bod rogon be’ ni girdien e maruwel nder tamra’ ko maruwel rok, ni ir be’ ni ma machibnag e thin rok Got nrogon.” (2 Timothy 2:15) Yog Paul ku Timothy ni gaar: “Mu tiyan’um ngom, nge rogon ni ga be machibnag e girdi’. Um rin’ e pi n’ey iyan, ya faanra mu rin’ ma ga ra ayuwegem nge piin ni yad ma motoyil ngom ngar thapgad ngak Got.” (1 Timothy 4:16) Uw rogon ni nge tiyan’ be’ ngak ko machib ni be tay, ni fan ko ulung nge yugu girdi’? Ma ba t’uf ni ngan salap u boch ban’en ni ngan machibnag e girdi’ fa?

9. Mang e kab baga’ fan ko rogon fene salap be’ u ban’en?

⁹ I dag Jesus ni ir be’ ni rib salap i skulnag ban’en ko girdi’ u nap’an ni ke pi’ fre Welthin u daken fre Burey. Nap’an ni ke mu’ ko welthin “me gin fapi girdi’ ni aram urngirad nga rogon e machib ni ke tay.” (Matthew 7:28) Machane dariy bagadad nrayog ni nge machib nrogon ni rin’ Jesus. Machane de t’uf ni ngad manged e girdi’ ni rib cheg ko welthin ni fan ni ngad salapgad i skulnag e girdi’. Ya rogon ni yog Job 12:7, ma mus ni “pi gamanman ni mongmur” nge “pi arche’” e rayog ni ngar skulnaged ban’en ni yugu aram rogon ndarir nonod! N’en ni baga’ fan e gathi tin ni gad ba cheg riy ya “miti mang girdi’” ni ngad boded​—ni miti mang felngidad nge uw rogon e wok rodad ko tirok Got ban’en ni rayog ni nge folwok e girdi’ rodad ko n’en ni gad be fil ngorad riy.​—2 Peter 3:11; Luke 6:40.

Pi Student ko Thin rok Got

10. Mang kanawo’ nib fel’ ni tay Jesus ni ir be’ ni ma fil e Thin Rok Got?

¹⁰ Be’ ni ir e tamachib ko thin riyul’ ko Bible e thingari mang be’ ni ma fil e Thin rok Got. (Roma 2:21) I tay Jesus Kristus e kanawo’ ko re n’ey. Nap’an e machib ni tay ma taab guruy ko l’agruw guruy ko thin ni bay ko Bin ni Hebrew e M’ag ko Bible ni ke weliy murung’agen.a Ma nap’an ni ke 12 e duw rok me m’ug riy ni ke nang e Thin rok Got, ya kan “pirieg u lan e tempel, ni kar pired e pi tamachib nu Israel nga but’, be motoyil ngorad ma be fithrad.” (Luke 2:46) Nap’an ni ke ilal, ma aram e yalen rok Jesus ni nge yan nga tafen e muulung, me rung’ag e Thin rok Got ni yibe bieg.​—Luke 4:16.

11. Susun uw rogon e fol babyor nra tay be’ ni ir e tamachib?

¹¹ Gur be’ ni ga ma fil e Thin Rok Got fa? Ngam fl’eg i yaliy ma aram rogon ni ngam “nang fan ko mang madgun Jehovah u wun’uy, ma ga ra pirieg e tamilangan’ rok Got.” (Proverbs 2:4, 5, NW) Ere mu fil e Bible u gubin ngiyal’. Ngam athamgil n ngam bieg boch e thin ko Bible u gubin e rran. (Psalm 1:2) Ma ga poy gubin e babyor ni Wulyang Ntagil’ e Damit nge fre babyor ni Awake! e chi ngiyal’ ni kan pi’ ngom. Mu tiyan’um ko n’en ni yibe weliy u nap’an e pi muulung ko ulung. Mu fil rogon ni ngam fl’eg i gayiy boch ban’en. Faanra ngam fil rogon ni ngam ‘fal’eg i gayiy murung’’agen e pi n’ey ni gubin,’ ma rayog ni nge siy mu weliy boch ban’en nde puluw u nap’an ni ga be machibnag be’.​—Luke 1:3.

Ngam T’ufeg ma Ga Tay Fan e Piin ni Ga Be Skulnag

12. Uw rogon pi gachalpen u wan’ Jesus?

¹² Ku baga’ fan rogon lanin’um ngak e piin ni ga be machibnagrad. Pi Farise e ur sapgad nga but’ ko piin ni kar motoyilgad ku Jesus. Kar gaargad: “Pi girdi’ ney ni ara’ urngirad e dar nanged e Motochiyel rok Moses, ere ke bucheg Got waathrad.” (John 7:49) Machane i t’ufeg Jesus pi gachalpen mi i tay farad. I gaar ngorad: “Aram e dab ku gog ni gimed e tapigpig rog, ya be’ nib tapigpig e de nang e n’en ni be ngongliy e en ni masta rok. Machane nggog ni gimed e tafager rog, ni bochan e kug weliy ngomed urngin e tin ni kug rung’ag rok e Chitamag.” (John 15:15) Aram e be dag ko uw rogon nsusun ni nge ngongol pi gachalpen Jesus ngak e piin ni yad be machibnag.

13. Uw rogon u wan’ Paul e piin ni ke machibnagrad?

¹³ Baara’ rogon, ya rogon ni i ngongol Paul ngak e piin ni ke machibnag e gathi bod be’ ni be ngongliy e shiyobay u thilrow be’. I gaar ko piyu Korinth: “Ya yugu ra ragag i biyu’ e tamachib ni fonownagmed ko ngongol romed ko taab girdi’ ni kam tiyed Kristus, machane ri taareb e chitamangimed ni ba’. Ya ngongol romed ko taab girdi’ ni kam tiyed Kristus e kug mang chitamangimed riy ni fan e gag e gu fek i yib ngomed fare Thin Nib Fel’ ni yib rok Got.” (1 Korinth 4:15) Yu ngiyal’ ma ke yib e lu’ u owchen Paul u nap’an ni be fonownag e piin ni be machibnagrad! (Acts 20:31) Miki dag ni kari gum’an’ mab gol. Ere bay rogon ni nge yog ko piyu Thessalonika ni gaar: “Nggu pired romed ni gamad mmunguy ni bod feni munguy ba matin ngak pi fak ni be ayuwegrad.”​—1 Thessalonika 2:7.

14. Mang fan ni ri baga’ fan ni ngad tedan’dad ko piin ni gad ma fil e Bible ngorad? Mu weliy.

¹⁴ Ga ma folwok rok Jesus nge Paul fa? Faanra riyul’ ni gad ma t’ufeg e piin ni gad ma machibnag, ma aram e ra fel’ ni yugu demtrug ni gathi gad ba cheg ko machib. Ere be lemnag e piin ni gad be fil e Bible ngorad ni riyul’ ni gad ba adag ni ngad ayuweged yad fa? Gad ma athamgil ni ngad nanged yad nge fel’ thildad fa? Bay reb e Kristiano ni ppin ni be fil e Bible ngak be’ ni dawori mon’og boch ko tirok Got ban’en, ma aram me fith ni gaar: “Bay ban’en ni be wageynag lanin’um fa?” Ma aram me yog fre ppin e n’e ni bay u laniyan’, me weliy boor boch ban’en ni ke maga’fan’ ngay. Ma bochan e re sabethin nem ma ke thil e lem ko re ppin nem me mon’og. Ara’ rogon ma ba puluw ni ngan weliy boch e thin ko Bible ni be fl’eg lanin’uy ma be pi’ e athamgil nga lanin’uy. (Roma 15:4) Machane mu ayuw riy: Sana be mon’og iyan be’ ni ga be fil e Bible ngak, machane ka bay boch ban’en ni be rin’ nde puluw ko Kristiano. Ere dariy e gonop riy ni ngan chag ko cha’ nem ni fan ko fafel. Susun ni ngan par ko gin ni ma mus e Kristiano riy.​—1 Korinth 15:33.

15. Uw rogon nrayog ni ngad ted fan e piin ni gad ma fil e Bible ngorad?

¹⁵ Ma rogon ni gad ra tay fan e piin ni gad ma fil e Bible ngorad e dabda guyed rogon ni ngad gagiyegnaged e yafas rorad. (1 Thessalonika 4:11) Baara’ rogon, sana gad be fil e Bible ngak be’ ni ppin ni be par ku be’ ni gathi mabgol rok. Ma sana bay e bitir rorow. Bochan ni ke fil e tamilangan’ rok Got ma ba adag fre ppin ni nge yal’uweg e par rok nge fel’ thilrow Jehovah. (Hebrews 13:4) Ere susun ni nge figirngiy fre moon fa nge chuw rok? Sana gad be lemnag ni dabi mon’og ko tirok Got ban’en nfaanra ra figirngiy fre moon ya dabun e machib. Ara gad be lemnag ni kab fel’ ni nge figirngiy fre moon ya ra ayuweg e bitir. Yugu demtrug, ma gathi gad be tay fan e en ni gad be fil e Bible ngorad ni faanra gad ra yog ngak e n’en ni nge rin’ ni tafinay rodad. Ya ir e ra yib wenegan ngak e n’en ni ke turguy ni nge rin’. Ere kab fel’ ni ngan skulnag fa en ni gad be fil e Bible ngak ni nge “nang e tin nib fel’ ko tin nib kireb” ma nge turguy e n’en ni nge rin’ fa?​—Hebrews 5:14.

16. Uw rogon nrayog ni nge dag e piin piilal nib t’uf rorad e yu ran’ i saf rok Got mi yad ta’ farad?

¹⁶ Ri baga’ fan ko piin piilal ko ulung ni ngar ngongolgad ngak girdien e ulung u fithik’ e t’ufeg nge tay fan. I yoloy Paul ngak Filemon ni gaar: “Erera’ fan nrayog ni nge dab kug tamdag ni nggog ngom e n’en i ngam rin’, ya walageg gur u daken Kristus. Machane rogon nib gab t’uf rog e ke gagiyegnigeg ni nggu wenignag ngom ni ngam rin’.” (Filemon 8, 9) Yu ngiyal’ ma ra sum boch e magawon u lan e ulung. Ma ba t’uf ni ngan ngongol nib mudugil. Yog Paul ku Timothy ni: “thingar mu puwan’ ngorad [piin ni kar olobochgad] nib gel’, ni bochan e nge mich Kristus u wun’rad nib fel’ rogon.” (Titus 1:13) Machane thingari athamgil e piin piilal ni dab rogned boch e thin nde fel’ ngak e ulung. I yoloy Paul ni gaar: “Ya tapigpig rok Somol e thingari dabi un ko tugthin. Thingari munguy ngak urngin e girdi’, ma nge par ni ir reb e tamachib nib fel’ ma ba gum’an’.”​—2 Timothy 2:24; Psalm 141:3.

17. Mang e ke rin’ Moses nib oloboch, ma mang e rayog ni nge fil e piin piilal riy?

¹⁷ Thingar dabi pag talin e piin piilal ni yad be ayuweg fre “ran’ i saf rok Got.” (1 Peter 5:2, NW) Moses e be’ nib sobut’an’ machane bay biyay ni daki k’adan’. Ya piyu Israel e kar “k’aringed me kankanan’ ma aram me thay u l’ugun boch e thin nde fel’.” (Psalm 106:33) Ke dabuy Got rogon ni kan ngongol ngak e yu ran’ i saf rok, ni yugu aram rogon ni kar k’aringed. (Numbers 20:2-12) Nap’an ni yib boch e magawon ni aram rogon ko ngiyal’ ney ma susun ni nge athamgil e piin piilal ni ngar pied e fonow u fithik’ e gonop nge runguy. Pi walagdad e yad ra fol nfaan ran ngongol ngorad nib fel’ rogon min ayuwegrad ko magawon ma gathi ngan ngongol ngorad ni gowa dabiyog ni ngan sulwegrad nga rogon. Ba t’uf ko piin piilal ni ngar pared nib fel’ e lem rorad ni bod rogon apostal Paul faani gaar: “Ma ke pagan’mad ngak Somol nib mudugil ni gimed be rin’ e tin i kug weliyed ngomed ma bay um rin’ed i yan.”​—2 Thessalonika 3:4.

Ngan Pi’ e Tin nib T’uf e Ayuw

18, 19. (a) Susun uw rogon ni ngad ayuweged e piin ni gad ma fil e Bible ngorad ni yad e piin ni gathi rib salap? (b) Uw rogon nrayog ni ngad ayuweged e piin ni gad ma fil e Bible ngorad ma yad ba magawon ko boch ban’en?

¹⁸ Be’ ni ma yib angin e machib ni ma tay e ma ngongol u puluwon e en ni be machibnag uw rogon salpen nge tin nrayog ni nge rin’. (Mu taarebnag ko John 16:12.) Reb e fanathin ku Jesus u murung’agen fapi salpiy ni pi’ fre masta ngak e pi tapigpig rok ngar maruweliyed “nrogon e maruwel nrayog rok” ra reb e tapigpig. (Matthew 25:15) Rayog ni ngad folwokgad ko re n’em ko piin ni gad ma fil e Bible ngorad. Yi ba adag ni ngan fil e babyor ku be’ u lan ba ngiyal’ nib ngoch. Machane gathi gubin e girdi’ ni yad ba cheg i poy e babyor, ara yad ba lichow nrayog ni ngar nanged fan boch ban’en nib pay. Ere, ba t’uf ni ngan gonopiy n’umngin nap’an nib puluw ni ngan weliy yugu reb e ban’en ni ga be fil ngak be’ ma ngam guy ko kaygi papey ni ga be fil boch ban’en ngak mab mo’maw rok fa. Kab ga’ fan ni ngan ayuweg e girdi’ ngar nanged fan e tin ni yad be fil ko bin ni ngan fil boor e thin ngorad.​—Matthew 13:51.

¹⁹ Ku aram rogon e piin ni gad ma fil e Bible ngorad ni ke mo’maw rorad ni nge michan’rad ni de puluw e machib ni Trinitas nge boch e madenom ko teliw. Baga’ ni de t’uf ni ngan fl’eg i gayiy yugu boch e babyor ni ngad weliyed ko piin ni gad ma fil e Bible ngorad, machane yu ngiyal’ mab puluw ni ngad rin’ed nfaanra be m’ug riy nra yib angin. Susun ni ngad gonopiyed e re n’em ma dabda rin’ed ban’en nra n’igin nge sagaal e mon’og ni be tay e en ni gad ma fil e Bible ngak.

Mu Par nib Pasig!

20. Mang kanawo’ ni dag Paul ya ke pasig ma kari mudugilan’ ko tin ni ke machibnag?

²⁰ “Mpigpiggad ngak Somol ni gimed ba pasig ngay u lanin’med,” e yog Paul. (Roma 12:11) Arrogon, demtrug ni gad be fil e Bible ngak be’ fa gad be rin’ ban’en u nap’an e muulung ko ulung, ma susun ni ngad rin’ed u fithik’ e pasig. Yog Paul ngak piyu Thessalonika ni gaar: “Ya gu feked i yib ngomed e Thin Nib Fel’ ni yib rok Got, ni gathi ke mus ni ug weliyed, ya ku er rogon gelngin Got nge fare kan ni thothup nib chagil ngay, ma ku er rogon nib mich u wun’mad nib riyul’.” (1 Thessalonika 1:5) Ere Paul nge piin ni yad e kar weliyed ko girdi’ ni “gathi ke mus ni Thin nib Fel’ ni yib rok Got e kar bad kar pied ngorad, machane ngkur pied yad nga pa’rad e girdi’ ngar ayuweged yad.”​—1 Thessalonika 2:8.

21. Uw rogon nrayog ni ngad pared nib pasig ko machib ni gad ma tay?

²¹ Pasig nib riyul’ e sum ko lem nib mudugil ni rib t’uf ko piin ni gad ma fil e Bible ngorad ni ngar rung’aged e n’en ni gad ra weliy. Dabda lemnaged ni dariy fan e machib ni gad be tay ku be’. Ezra ni tayol e kari tayan’ ko machib ni ke tay. Ya ke “par ni be fil urngin fapi motochiyel rok [Jehovah], ma be fol riy, ma be fil ngak yu Israel.” (Ezra 7:10) Susun ngad yodoromgad ma ngad fl’eged rogodad ma ngad fl’eged i lemnag ko uw fene ga’ fan e pi n’en ni gad be fil. Ngad yibilgad ku Jehovah ni nge n’igin nge michan’dad ngay ma nge mudugilan’dad. (Luke 17:5) Rogon ni gad be par nib pasig e rayog ni nge ayuweg e piin ni gad ma fil e Bible ngorad nge t’uf e thin riyul’ rorad. Ma rogon ni gad be tiyan’dad ko machib ni gad be tay e ba muun ngay boch kanawoen e machib. Bin migid e article e ra weliy boch e pi n’ey.

[Boch e Thin nra Tamilangnag Murung’agen]

Ka Ga Manang?

◻ Mang fan nib t’uf ko ngiyal’ ney e pi Kristiano nib salap i fil e Bible ngak e girdi’?

◻ Susun uw rogon e fol babyor ni gad ma tay?

◻ Mang fan nib ga’ fan ni nge t’uf rodad e piin ni gad ma fil e Bible ngorad ma gad tay farad?

◻ Uw rogon nrayog ni ngad ayuweged e piin ni gad ma fil e Bible ngorad ko tin nib t’uf rorad?

◻ Mang fan ni baga’ fan ni ngad machibnaged e girdi’ u fithik’ e pasig ma ngari mudugilan’dad?

[Sasing ko page 8]

Piin ni yad e tamachib nib fel’ e yad e piin ni ta ma fil e Thin Rok Got

[Sasing ko page 11]

Mu adag ni ngam ayuweg e piin ni ga ma fil e Bible ngorad