Ngad Mon’oggad ko Machib—Ngad Daged ko Girdi’ ni Gad Be Lemnag Rarogorad

Fan nib Ga’ Fan: Ma lemnag Jesus e girdi’ ni be’ nge be’, ma ma dag ngorad ni ma lemnag rarogorad. Immoy bayay ni nang Jesus ni be tamra’ be’ nib moon nib biling nga rarogon nib m’ar. Ere, pining nga bang ni yigoo yow nib palog ko girdi’ me golnag e m’ar rok. (Mark 7:31-35) Ku i dag ni be lemnag rarogon pi gachalpen ni bochan e i dag ngorad ni manang e tin ndabiyog rorad, ma da i weliy boch ban’en ngorad ni yugu ba pag rogon ndabiyog ni ngar nanged fan. (John 16:12) Mus nga nap’an ni ke sul nga tharmiy, ma ka i dag ni ma lemnag rarogon e girdi’. (2 Tim. 4:17) Ere, ku arrogodad nthingar ku ud folgad ko n’en ni i rin’ Kristus ni bochan e gad boch i gachalpen. (1 Pet. 2:21; 1 John 3:16, 18) Maku reb e, faanra ud lemnaged rarogon e piin ni gad ma machibnag, nge pi n’en ni yad baadag ni ngan weliy murung’agen, nge pi n’en ni yad be lemnag, ma aram e rayog ni nge yib angin e machib ni gad ma tay. Ku ra adag e girdi’ ni ngar motoyilgad ngodad ni faanra kar guyed ni gathi kemus ni ka darod nga taferad ni ngad machibnaged yad ara ngad pied e babyor ngorad, ya ku gad be lemnag rarogorad.

Rogon ni Ngan Rin’:

Mu fal’eg rogom u m’on riy. Dab mu tinna’, mu siminmin, ma ga dag e sumunguy.
Mu yaliy rarogon fare tabinaw. Ga be guy facha’, ma ga be lemnag ni bay e bitir rok, fa dariy? Baadag e milay’, fa danga’? Bay e gamanman rok, fa dariy? Sana rayog ni ngam puluwnag e n’en ni nga mog nga rarogon facha’.
Mu fith rogon laniyan’ u ban’en, mag motoyil ngak nib fel’ rogon. Mu sap ngak ya nge nang ni ga be motoyil. Mu pining e magar ngak ko n’en ni ke yog. Mu guy rogon ndab mu luagew e thin.
Mu thilyeg boch ban’en u rogon e n’en ni ngam weliy ya nge m’ag ko n’en nib t’uf rok facha’. Faanra rayog, mag thilyeg e n’en ni ga be lemnag ni ngam weliy ngak facha’, ya nge yag nim weliyew e pi n’en ni be lemnag. Rayog ni ga be lemnag nib mo’maw’ e re n’ey. Machane, bin riyul’ riy e ba mom ni bochan e boor ban’en ni kan tay murung’agen ko pi tract rodad, nge brochure, nge magazine. Faanra kam man ma dabiyog ni ngam nonow nib fel’ rogon ni bochan e boor pa’ u puluwon, ma gog ngak ni ga manang ni boor pa’ u puluwon e rofen nem, ngemu’ mag ngochnag e n’en ni ngam weliy ngak.

Mu Gay Rogon ni Ngam Rin’ e Re N’ey u Lan e Re Pul Ney:

Ngan gay rogon ni ngan rin’ e pi n’ey u nap’an e fol Bible ni tabinaw ara u nap’an ni yibe yan ko machib ma kan mada’nag be’ ni aray rogon.
Rayog ni nge weliy ara dag e re walag ni ma yarmiy e machib boch e kanawo’ nrayog ni ngan rin’ e re n’ey riy u nap’an boch e muulung ni yima tay ni fan ko machib.