‘Mpired ni Kam Fl’eged Rogomed ni Ngam Rin’ed e Tin nib Fel’’

¹ Nap’an ni tababnag Jesus e maruwel rok ni machib miki tay e tayim ni nge fal’eg rogon pi gachalpen. (Matt. 10:5-14) Yugu aram rogon ni boor pa’ u puluwdad, machane faan gad ra tay buchuuw ko tayim rodad ni ngad fl’eged rogodad riy ni fan ko machib ma ra yib angin ngodad nib fel’.​—2 Kor. 9:6.

² Rogon ni Ngan Fl’eg Rogoy: Faanra ngad fl’eged rogodad nib fel’ rogon ma som’on e ba t’uf ni ngad nanged e n’en ni be weliy e pi babyor ni gad ra wereg ko girdi’. Susun ni ngkud lemnaged e girdi’ ko gin ni gad ma machib riy. Mang boch ban’en ni be magawonnag lanin’rad? Mang boch ban’en ni ke michan’rad ngay nib ga’ ni yad ra weliy? Rayog ni ngad guyed e pi presentation ni bay ko Machib Rodad Ni Fan Ko Gil’ilungun Got nge fare babyor ni Reasoning From the Scriptures.

³ Maku faan gad ra motoyil nib fel’ rogon ko pi demonstration ni yima pi’ u nap’an e Service Meeting ma rayog ni nge ayuwegdad. Nap’an ni gad ra salap i fanay e presentation rodad ma aram e ra buchuuw e tayim nib t’uf ni ngad fl’eged rogodad. Maku gad ra salap ko machib ni faanra gubin ngiyal’ u m’on ni nga darod ko machib ma gad lemnag e n’en ni gad ra yog ko girdi’. Ma susun ni ngkud ted e tayim ni ngad yaliyed e kabang rodad ko bay gubin ban’en riy nib t’uf ko machib fa.

⁴ Mang e ra ayuwegdad nge dab da paged talin e n’en ni gad ra yog u nap’an e machib? Reb e kanawo’ nra ayuwegdad e nguud sulod u daken nib ga’ lamdad. Boch e girdi’ e yad ma fal’eg rogorad u nap’an e fol babyor u tabinaw. Ma boch e ba mom ngorad ni ngar yoloyed e n’en ni yad ra yog nga daken bochiyang i babyor, mi yad sap u daken u m’on ni nga ranod nga reb e naun.

⁵ Fan Nra Yib Angin: Rad fl’eged rogodad nib fel’ rogon u m’on ni nga darod ko machib ma ra ayuwegdad ni ngad felfelan’gad ma gad salap ko machib ni gad be tay. Ra achignag e marus rodad u nap’an ni gad be non ko girdi’. Maku ra ayuwegdad ni ngad tedan’dad ko n’en ni be yog faen ni kad mada’naged u nap’an e machib ndab da lemnaged e n’en ni gad ra yog ko migid. Maku faanra gad manang nib fel’ rogon e n’en ni be weliy fare babyor ni gad be wereg ma ra ayuwegdad ni ngad passiggad i wereg ko girdi’.

⁶ Be yog e Bible ni ‘ngad pired ni kad fl’eged rogodad ni ngad rin’ed e tin nib fel’.’ (Titus 3:1) Dariy ba maruwel ni kab fel’ ko fare maruwel ni ngan wereg fare thin nib fel’. Faan gad ra fl’eg rogodad nib fel’ rogon ma aram e gad be dag ni gad be tay fan faen ni gad be machibnag ni ke m’agan’ ngay ni nge motoyil, nge Jehovah ni fare Got ni gad e be yan ni owchen.​—Isa. 43:10.