Rogon ni Ngan Fil e Bible Ngak Be’ Me Yib Angin
1. Mang e ba milfan ngak e piin ni yad ma fil e Bible ngak be’ ni ngar rin’ed?
1 Dariy be’ nrayog ni nge pigpig ngak Got ni faanra dabi “pow’iy” Jehovah ni nge yib ngak. (John 6:44) Yugu aram rogon ma piin ni yad ma machib e thingar ra rin’ed e tin rayog rorad ni ngar ayuweged e girdi’ ni ngar chugurgad ngak e Chitamangirad ni bay u tharmiy. (Jas. 4:8) Ra ngan rin’ e re n’ey mab t’uf ni ngan fal’eg rogoy. De gaman ni kemus ni ngan beeg e pi paragraph min fith e pi deer nib l’ag rogon ko fapi paragraph ni nge yag ni ngan ayuweg faen ni yibe fil e Bible ngak ni nge nang fan e pi n’en ni yibe fil me yag ngki mon’og.
2. Faanra yira fil e Bible ngak be’ nib fel’ rogon, ma mang angin nra yib?
2 Faanra nge mon’og e piin ni gad be fil e Bible ngorad, ma piin ni yad ma machib e thingar ra ayuweged e pi girdi’ ney ni ngar (1) nanged fan e n’en ni be fil e Bible, (2) me fel’ u wan’rad e pi n’en ni yad be fil, ma (3) ngar folgad ko pi n’en ni bay u Bible. (John 3:16; 17:3; Jas. 2:26) Rayog ni nge yan bokum e pul ni ngan ayuweg be’ ni nge yag ni nge rin’ e pi n’ey. Machane, gubin e pi n’ey nra rin’ e aram e be gelnag e tha’ u thilrow Jehovah me yag ni nge ognag ir ni nge pigpig ngak.
3. Mang fan ni piin ni yad ba salap i fil e Bible e yad ma fith e deer ya nge yag ni ngar nanged rogon laniyan’ faen ni yad be fil e Bible ngak?
3 Mang e Be Lemnag Faen ni Gad Be Fil e Bible Ngak?: Faanra ngam nang ko ke tamilang u wan’ faen ni ga be fil e Bible ngak e n’en ni gimew be weliy ma ke m’agan’ ngay, mab t’uf ni ngam pi’ e athamgil nga laniyan’ ni nge weliy e n’en ni be tafinaynag mag guy rogon ni gathi gubin ngiyal’ ni yigoo gur e ngaum non. (Jas. 1:19) Gur, ke tamilang u wan’ e n’en ni be yog e Bible u murung’agen e n’en ni gimew be weliy? Rayog ni nge weliy ko thin rok, fa? Mang e be lemnag u murung’agen e re n’em? Gur, ba mich u wan’ nib puluw e n’en ni be yog e Bible u murung’agen e re n’ey? (1 Thess. 2:13) Manang ni n’en ni be fil e thingari m’ug ko ngongol rok, fa? (Kol. 3:10) Ra ngad nanged e fulweg ko pi deer ney, mab t’uf ni ngad fithed boch e deer nra pug e tafinay rok be’ ma gad motoyil nib fel’ rogon ko n’en nra weliy.—Matt. 16:13-16.
4. Mang e susun ni ngan rin’ ni faanra be mo’maw’ ngak faen ni gad be fil e Bible ngak ni nge nang fan e n’en ni yibe fil ngak ara nge fol riy?
4 Ba t’uf e tayim ni ngan ayuweg be’ ni nge nang nde puluw rogon ni ma lemnag boch ban’en nge pi n’en ni ke mecham ngay. (2 Kor. 10:5) Ere, uw rogon ni faanra faen ni gad be fil e Bible ngak e der m’agan’ ko n’en ni be fil ara der fol riy? Ba t’uf ni ngad gum’an’gad ya nge yag ni maruwel e Thin rok Got nge gelngin nib thothup ya nge yag ni thilyeg rogon e lem rok faen ni gad be fil e Bible ngak. (1 Kor. 3:6, 7; Heb. 4:12) Faanra be mo’maw’ ngak ni nge nang fan ara nge fol ko n’en ni gad be fil, mab fel’ ni ngkud ululgad ko bin migid ko bin ni ngad towasariyed ni nge nang fan. Faan gad ra fil e Bible ngak facha’ u fithik’ e gum’an’ nge t’ufeg, ma ra munmun ma ra adag ni nge fol ko n’en ni be fil.