Ngad Mon’oggad ko Machib—Ngan Machibnag Be’ ko Intercom

Fan nib Ga’ Fan: Bay boch e walag ni faanra ngar machibnaged be’ ko intercom ma yad ma rus. Ere mang e gad ra rin’ ma gad par ni gadad ba pasig ko machib ni yugu aram rogon ni gad be rus? Dab da paged talin ni ireray kanawoen me yag ni nge thap murung’agen e thin nib fel’ ngak boch e girdi’. (Rom. 10:14) Bay boch e girdi’ ni kan machibnagrad u intercom ma ke yib angin ngorad. (Mu guy fare Yearbook ko duw ni 2011, pp. 65-66, nge fare Yearbook ko duw ni 2000, p. 54, par. 3.) Ere chiney e baaray boch ban’en ni gad ra weliy.

Rogon ni Ngan Rin’:

Dabi yoor ban’en ni ngam yoloy ni ir e nga mog ngak faen ni ir e ga ra machibnag ko intercom. Ga ra rin’ e re n’ey ma rayog ni nge ayuwegem ni nge pagan’um ko n’en ni nga mog. Som’on ni ngam tababgow ko numon, mag weliy ngak fan ni ka mub. Rayog ni nga mog fithingan facha’ ni faanra bay ko directory ko re apartment nem. Nap’an ni gimew ra mu’ ko numon, mag fith ngak ko baadag ni nge yay ni migid ni gimew ra mada’ mag pi’ reb e tract ara reb e babyor ngak ara ngam tay nga langan e mab rok.
Ba ga’ fan ni ngam lemnag nra yib angin e re n’em ni ga be rin’. Bfel’ ni ngam siminmin mag non ngak ni gowa gimew be sabol.
Dab mu rus mag non ngak ni gowa gimew be sabethin. Ba ga’ fan ni ngam non nib tamilang mab ga’ lamam. Mu guy rogon ni dab um tal ko numon nib n’uw nap’an mfin kum ulul maku dab mu non nib papey ni nge dabiyog ni nge nang fan e n’en ni ga be yog.
Mu rin’ e re n’ey u fithik’ e gonop. Nap’an ni yira machib ko pi apartment ara naun ni boor thal ma goo bay e intercom ko pi singgil nem. Sana rayog ni kemus ni in ko fapi apartment e ngam mel’eg ni ngam dil’iy e bell riy, mag tafinayem ko tin ni ka bay e apartment ndawor mu non ngak be’ riy, mag yan ngam chuw. Girdi’ ko pi apartment nem e nap’an ni yad ra guyem ni ga be yan yan u lan e hallway ma rayog ni ngar rusgad ara nge magafan’rad ni bochan ndar nanged ko mang fan ni ga bay u rom.

Mu Gay Rogon ni Ngam Rin’ e Re N’ey u Lan e Re Pul Ney:

Nap’an ni gimed be fol Bible girdien e tabinaw rom, ma gimed guy rogon ni ngam rin’ed e re n’ey. Rayog ni nge par l’agruw ni’ ndarur sabolgow ma ra bagayow mab sap nga bang, ni bay bagayow ni be machibnag bagayow.