Ngad Mon’oggad ko Machib—Machib ko Yungi N’en ni Ma Maruwel e Girdi’ Riy

Fan nib Ga’ Fan: Bochan ni boor e awa ni bay e girdi’ u tabon e maruwel rorad, ere bin nib puluw e kanawo’ u rogon ni ngan machibnagrad e aram e ngan yan ko gin ni yad ma maruwel riy. Ba ga’ ni faan yira machib u tabon e maruwel ma yira felfelan’ ni bochan ni boor e girdi’ ni yad ma motoyil ya yigoo bay e girdi’ ko yungi n’en ni yima maruwel riy, ma pi girdi’ ney e yad ba gol ngak e girdi’ ni yad be yan nga tabon e maruwel rorad. Faanra nge yib angin e machib ni yibe tay ma pi walag e thingar ra gonopiyed rogon ni ngar nonad ko girdi’ mang ki yaram rogon e munmad rorad. (2 Kor. 6:3) Ere, faen service overseer e thingari fal’eg i yaliy urngin yay ni yibe machib ko yungi n’en ni be maruwel e girdi’ riy nge mini’ e pi walag ni yad be rin’ e re maruwel ney.

Rogon ni Ngan Rin’:

Dabi yoor ban’en ni nga mog. Faan ga ra non ngak reb i girdien e maruwel nib n’uw nap’an, ma nap’an ni ga ra sul bayay ma dab kun pagem ni ngkum non ngak.
Mmel’eg ba ngiyal’ ni ngam machib u tabon e maruwel ndawori yoor e girdi’ ni bod u nap’an ni kafin nra tababgad ko maruwel.
Mu gay rogon ni ngam non ngak faen ni ir e ga’ ko fare maruwel nsom’on. Mu non u fithik’ e gol nge sumunguy. Sana rayog ni nge lungum, “Gamad baadag ni nggu mada’naged e girdi’ u tabon e maruwel rorad ni bochan nib mo’maw’ ni nggu mada’naged yad u tabinaw rorad.” Mu weliy murung’agen reb e thin ko Bible ma aram mag pi’ reb e tract ara magazine ara yugu reb e babyor ngak. Bfel’ ni dab da weliyed murung’agen e salpiy ni yima pi’ ni ayuw ni fan ko babyor rodad ya riy lemnag e pi girdi’ nem ni gad be pi’ boch ban’en ni chuway’, machane faan yad ra fith ko uw rogon ni be yag e salpiy ko re maruwel ney, ma aram ma gad weliy.
Faan ga be guy ni faen ni gimew be non e ir be’ nib gol, mag fith ngak ko rayog ni ngkum non ko tin ni ka bay e girdien e maruwel. U tabon boch e maruwel e sana bfel’ ni ngan fith ko rayog ni ngam tay boch e babyor ko yungi n’en ni ma par girdien e maruwel riy ni ngar toffangad.
Mu dugliy ni nga mog boch ban’en nib puluw. Bod ni faanra bay reb i girdien e maruwel ni be non ngak be’ ara ku bay yugu reb e maruwel ni be rin’, mab fel’ ni ngam son.

Mu Gay Rogon ni Ngam Rin’ e Re N’ey u Lan e Re Pul Ney:

Nap’an ni gimed ra tay chon e tabinaw rom e bin migid e fol Bible ni Tabinaw, ma rayog ni ngam marod u daken e n’en ni nga nog u nap’an ni yira yan ko machib ko yungi n’en ni ma maruwel e girdi’ riy.