Ngan Machib ni Yibe Fanay fare Babyor ni Thin nib Fel’

1. Uw rogon ni kan fal’eg fare babyor ni Thin nib Fel’?

¹ Rogon ni kan weliy ko fare Machib ko Gil’ilungun ko July e reb e talin e maruwel nib ga’ fan ni gad ma fek e aram fare babyor ni Thin nib Fel’ ni Yib rok Got! Yooren e thin nu Bible riy e dan yoloy nga lan e paragraph, ere rayog ni ngan beeg u Bible. Ba ga’ ni yooren e babyor rodad e kan fal’eg nnap’an nra beeg be’ ma rayog ni nge fil boch ban’en riy ni yigoo ir, machane faanra ngan fil e biney e babyor ma bay reb e walag ni nge ayuwegey ko fol Bible. Aram fan nap’an ni gad ra pi’ e re babyor ney ngak be’, ma thingar da daged rogon ngak feni rib manigil ni nge fil fare thin nib fel’ ni bay u lan e Bible.​—Matt. 13:44.

2. Uw rogon ni ngad fanayed fare brochure ni Thin nib Fel’ u nap’an ni kad mada’naged be’ u nap’an e machib?

² Nap’an ni Kam Mada’gow Be’: Sana rayog ni nge lungum: “Ku gub ni ngad weliyew murung’agen e n’en ni be magafan’ e girdi’ ngay ni fan ko re fayleng ney nge n’en nra buch boch nga m’on. Uw rogon u wan’um, rayog ni nge fel’ boch rogon e fayleng, fa? [Mmotoyil ko n’en nra yog.] Boor e girdi’ e kar gingad ngay u nap’an ni kar nanged ni bay e thin nib fel’ u Bible nrayog ni nge pi’ e athap ngodad. Baaray boch e deer ni be pi’ e Bible e fulweg riy.” Mu pi’ reb e brochure ngak, ma gog ngak ni nge mel’eg reb e deer nri baadag ni bay u keru’ fare brochure. Mag pithig ko fare guruy ngam dag ngak rogon e fol Bible. Maku reb e ngam fith reb e deer ngak faen ni gimew be non ni be yan u rogon reb fare guruy ni kam mel’eg, mag dag ngak rogon nrayog ni nge fanay fare brochure ni nge pirieg e fulweg ko re deer ney nrogon nib puluw ko Bible. Ma faanra bay reb e video ko jw.org ni bay rogon ko n’en ni gimew be weliy, ma rayog ni ngam pag nge guy.

3. Mu weliy rogon nrayog ni ngan fil e Bible ngak be’ ni yibe fanay fare brochure ni Thin nib Fel’.

³ Rogon ni Ngan Fil e Bible Ngak Be’: (1) Ngan beeg e deer ni bay e namba riy nib gel ramaen ni nge ayuweg faen ni kam mada’gow ni nge fal’eg i lemnag murung’agen e n’en ni kam weliyew. (2) Mu beeg fare paragraph. (3) Mag beeg fapi thin nu Bible ni kan yoloy nib thig, mag fith boch e deer ngak nrayog ni nge ayuweg facha’ ni nge nang rogon ni be pi’ fapi thin nu Bible e fulweg ko fare deer. (4) Ma faanra gathi kemus ni taareb e paragraph e bay u tan fare deer mag sul u daken e bin 2 nge bin 3 kanawo’. Faanra bay reb e video ni bay rogon ko fare deer ndawori guy faen ni gimew be non, mag gay rogon ni ngam pag ni nge guy. (5) Me tomur riy ma gog ngak ni nge pi’ e fulweg ko fare deer nib gel ramaen, ya ngam nang ko ke nang fan nib fel’ rogon fa danga’.

4. Mang e rayog ni nge ayuwegdad ni ngad maruwelgad ko re talin e maruwel ney nib fel’ rogon?

⁴ Mu athamgil ngam nang rogon ni ngam maruwel ko re talin e maruwel ney nrib fel’. Mu fanay ko ngiyal’ nib puluw. U m’on ni ngam filew be’ e Bible, mag fal’eg i lemnag rarogon nge rogon ni ngam weliy fapi thin nu Bible ngak ni nge nang fan. (Prov. 15:28; Acts 17:2, 3) Nap’an ni ga ra mon’og u rogon ni ngam fanay e re talin e maruwel ney, ma dariy e maruwar riy ni ga ra nang ni ireray reb e ban’en nrib ga’ angin ngom u nap’an ni ga be fil e tin riyul’ ngak e girdi’!