Bay Ba Got ni Ma T’ufegey Nra Pi’ e Tin nib T’uf Rom Me Yororiyem Ndariy N’umngin Nap’an

• Ga ma yim’ ni bochan ni manga yugum par u ba fayleng ndanir mahl riy, maku danir cham, ara un gafgownag e girdi’ riy, fa?

• Ga ma athapeg ni nge chuw e m’ar, nge gafgow, nge yam’, fa?

• Ga ma athapeg ni manga yugum par ndakuriy ban’en ni be magafan’um ngay, fa?

• Ga ma athapeg ni ngam par u bang nder yib e yoko’ ara durru’ riy, fa?

Got rodad nri gad ba t’uf rok maku Ir e Ke Sunmiy e re fayleng ney ni gad be par riy nrib fel’ yaan e ke micheg nra ayuweg e girdi’ ni ngar pared u fithik’ e gapas nge felfelan’ ndariy n’umngin nap’an. Re n’ey e gathi ba athap ndariy angin.

Nap’an ni ga ra beeg e tin migid e article, ma gamad be pi’ e athamgil ngom ni ngam lemnag e pi n’en ni baaray:

• Rogon e girdi’ u wan’ e En Ke Sunmiy urngin ban’en

• N’en ni be tamilangnag e Thin rok Got ngodad ni kan yoloy

• N’en ke yog e pi profet rok Got u murung’agen e pi tow’ath ni ke micheg

• Rogon nra ayuwegdad Got ni ngad pirieged e felfelan’ e chiney nge boch nga m’on

Ere som’on e ngad weliyed murung’agen e pi n’en ke pi’ Got ngodad ni be dag ni gad ba t’uf rok.