Rayog ni Nge Yag Ngom e Pi Tow’ath Nra Par ni Manemus Nra Pi’ e En Ke Sunmiydad

I micheg Got ngak Abraham ni profet ni bay reb i owchen nra tow’athnag “urngin e nam nu fayleng.” (Genesis 22:18) Mini’ e cha’nem?

Ba chugur i gaman 2,000 e duw ni ke yan, me pi’ Got gelngin Jesus ni ir reb i owchen Abraham ni nge ngongliy boch e maang’ang. Pi maang’ang nem e be tamilangnag ni n’en kan micheg ngak Abraham e ra yib angin ngak e pi nam u daken Jesus.​—Galatia 3:14.

Pi maang’ang ni ngongliy Jesus e ayuweg e girdi’ ni ngar nanged ni ir e en ke mel’eg Got ni nge tow’athnag e girdi’. Pi maang’ang nem e ki dag rogon nra fanay Got Jesus ni nge tow’athnag e girdi’ ni manemus. Am tay fanam i yan u rogon ni gagiyel boch i fel’ngin Jesus u daken e pi maang’ang ni i ngongliy.

Ba sumunguy​—I golnag Jesus e m’ar.

Bay bayay ni wenig be’ nib daraw ngak Jesus ni nge golnag. Ere math Jesus ngak me gaar: “Mm’agan’ug ngay,” ma ka chingiyal’ nem me chuw e daraw rok fare moon.​—Mark 1:40-42.

Ba gol​—I duruw’iy Jesus e piin ke yim’ ko bilig.

Dabun Jesus ni nge yim’ e girdi’ ko bilig. Bay bayay ni ngongliy reb e maang’ang nge duruw’iy bokum biyu’ e girdi’ ni aram e yoornag in yal’ i flowa nge inochi nig. (Matthew 14:17-21; 15:32-38) Tomuren ni mu’ fapi girdi’ ko abich ma kar fosgad, ma ka boor e ggan ni ke magey.

Ma runguyey​—I faseg Jesus e yam’.

Bochan ni “taganan’” Jesus ngak be’ nib pin ni ke yim’ e pumoon rok ndakuriy be’ ni nge ayuweg, ma aram me faseg e taare pagel ni fak fare pin ni ke yim’.​—Luke 7:12-15.