Uw Rogon ni Ngam Awnag e Gapas u Thilmew e Walagem?

Mu susunnag ni ga be par u lan fare binaw nu Galile ko ngiyal’ ni immoy Jesus riy. Ere nap’an ni taw ko ngiyal’ ni ngan madnomnag fare Madnom ko Nochi Naun, mag milekag ko fare mach nu Jerusalem ni bochan e ngam un i madnomnag e re madnom nem. Boor e girdi’ u boch e binaw nib palog ni kar bad ngaram ya ngkur liyorgad ngak Jehovah. Ma ga baadag ni ngam pi’ reb e maligach ngak Jehovah. Ere kam kol gufan e kaming rom gimew be yan u fithik’ e girdi’ ni kar apinpingad ni ga be guy rogon ni ngam tawgow ko gin ni bay e tempel riy. Ma nap’an nim tawgow ngaram, ma kab sug e girdi’ u rom ni kur bad ni ngkur pied e maligach rorad. Ere kam son nge mada’ ko ngiyal’ ni ngam pi’ e birom e gamanman ko fare prist. Ma ka chingiyal’ nem me yib ngan’um ni bay ban’en nib kireb u thilmew e walagem. Ma sana rayog ni bay u fithik’ fapi girdi’ ni kar bad ngaram ara bay u bang u lan e re mach nem. Baaray e n’en ni yog Jesus nsusun ni ngam rin’. (Mu beeg e Matthew 5:24.) Ere uw rogon ni ngam folgow walagem ko fonow ni yog Jesus ya nge yag ni ngam awnagew e gapas u thilmew? Mu yaliy fa gal list ni baaray u but’, mag mel’eg e bin nib puluw e fulweg.

SUSUN NI NGAM . . .

• non ngak e walagem ni mus ni faanra ga be lemnag ni bay fan ni ke puwan’

• gay rogon ni ngam yal’uweg e lem rok ni faanra ga be lemnag ni kaygi pag rogon ni be lemnag e re magawon nem, ara ga be lemnag ni ir e ba kireb e rok

• motoyil u fithik’ e gum’an’ u nap’an ni be weliy laniyan’ ngom ni yugu aram rogon ni gathi rib tamilang u wan’um e n’en ni be yog ngom. Mu kum siro’ ngak ni kam kirebnag laniyan’ ara bochan e n’en ni ke buch rok ni wenegan e ngongol rom

WALAGEM E SUSUN NI NGE . . .

• weliy ngak yugu boch e girdi’ e n’en ni kam rin’ ngak ni bochan e ngkur lemnaged ni gur e ba kireb e rom

• non ngom u fithik’ e damumuw miki weliy gubin ban’en ni kam rin’ ngak, me yog ngom ni thingar mog ni gur e ba kireb e rom

• pining e magar ngom ni bochan e kam sobut’nag lanin’um, ma kam athamgil ni ngam non ngak ndab mu rus, miki m’agan’ ngay ni nge n’ag fan e kireb rom

Yugu aram rogon ni dakurud pied e gamanman ni maligach u nap’an ni gad be liyor ngak Jehovah e ngiyal’ ney, machane mang e be fil Jesus ngodad u murung’agen rogon nib peth e liyor ni gad ma tay ngak nge gapas ni ngad awnaged u thildad e pi walag?