Rayog Ni Ngam Sulweg Walagem

“Mman, ni goo gur, ngam nonow ni goo gimew. Ma faanra fol ko tin ni ga be yog, ma aram e kam sulweg walagem.”​—MATTHEW 18:15.

1, 2. Mang e ke weliy Jesus u murung’agen rogon ni ngan pithig e magawon?

BA LICH ko reb e duw ni ka bay ni nge machib Jesus, ma bay boch ban’en ni baga’ fan ni nge fil ngak pi gachalpen. Rayog ni ngam poy u murung’agen u Matthew guruy ni 18. Baga’ fan ni nge sobut’an’dad ni bod e bitir. Nge migid, me tamilangnag ni thingar dabda waliyed “reb e pi bitir ney” ma ngad athamgilgad ni ngad ayuweged e “pi bitir” ndabra maloggad ma aram e dabra m’ad. Ma aram me fil Jesus ngorad ko uw rogon ni ngan pithig e magawon u thilin e Kristiano.

² Ke weliy ni gaar: “Faanra ngongliy be’ ni walagem e denen nib togopluw ngom, ma ga yan mu guy nga mog ngak e kireb ni ke rin’ nge nang. Machane mman ni goo gur, ngam nonow ni goo gimew. Ma faanra fol ko tin ni ga be yog, ma aram e kam sulweg walagem. Ma faanra dabi fol rom ma ga fek taabe’ fa l’agruw ni’ ngar unew ngom, ya nge urngin e tin ni ka mog ni ke rin’ nib togopluw ngom ma nge yog ni micheg l’agruw fa dalip ni’, ni bod ni be yog e babyor nib thothup. Ma faanra dabi fol rorad, me ere mog fapi thin ni urngin ngak e ulung. Ma faanra dabi fol rok e ulung, ma ga tay ni gowa be’ u yugu reb e nam fa re e tamukun tax.” (Matthew 18:15-17) Wuin ni susun ni ngad folgad ko pi thin ney, ma susun uw rogon e lem rodad?

3. Mang e susun ni ngad rin’ed nfaanra ke oloboch be’?

³ Fa binem e article e ke tamilangnag ni gad gubin ma bay thibngidad, ma gad ma oloboch, me ere ba t’uf ni ngad athamgilgad ni ngad n’aged fan e kireb ko girdi’. Ma ri aram rogon u nap’an ni ke kireban’um ni bochan ban’en ni yog reb e Kristiano ara ban’en ni ke rin’ ngom. (1 Peter 4:8) Ba fel’ ni ngam pag e n’en ni kan rin’​—ngam n’ag fan u wan’um mag pag talin. Ma aram e gad be fl’eg e gapas u lan e ulung ko Kristiano. (Psalm 133:1; Proverbs 19:11) Machane sana ra sum e magawon ma ba t’uf rom ni ngam weliy ngak e ani ke kirebnagan’um ni ir reb e walag. Faanra arrogon, ma ra ayuwegem e pi thin ni yog Jesus.

4. Uw rogon ni ngad puluwnaged e pi thin ko Matthew 18:15 ko piin ni kar olobochgad?

⁴ Yog Jesus ni ngam “man ni goo gur, ngam nonow ni goo gimew.” Aram rogon e gonop. Boch e Bible nthin ni German e piliyeg e pi thin ney ni gaar, ngam weliyew fare magwon “u tan aningeg e lan mit,” ni aram e ba sor fan nga lan owchem nge lan owchen facha’. Ya faanra gmew ra weliy fare magawon ni goo gimew mab mom ni ngan pithig. Ma faanra yog reb e walag ban’en ni ke kireban’um ngay ara ke rin’ ban’en ngom nde gol, ma ra mom rok ni nge siro’ ngom nfaanra goo gimew. Ma faanra kan rin’ u fithik’ e girdi’ ma dabi yog ni ke rin’ ban’en nib kireb ara ra guy rogon ni nge yog nib sorok. Ma faanra ga ra fek iyib fare magawon “nga tan aningeg e lan mit” ma ga ra pirieg ni sana ban’en ni kan rin’ ni dan lemnag. Ma faani tamilang u wan’mew ni kam olobochgow, ma rayog ni ngam pithigew, ma dam pagew ni nge ubchiya me kireb thilmew. Ere rayog ni ngan fol ko pi thin ni bay ko Matthew 18:15 ni mus ko tin ba achig ban’en ni ma buch u reb e rran nge reb.

Mang Fan e pi Thin nem?

5, 6. Miti mang denen e be sor fan ko Matthew 18:15, ma mang e be tamilangnag e re n’em?

⁵ N’en ni yog Jesus ni ngan rin’ e fan ko pi magawon nib ga’ fan. I gaar Jesus: “Faanra ngongliy be’ ni walagem e denen.” Fare bugithin ni “denen” e rayog ni nge sor fan ko urngin mit e oloboch ara meewar. (Job 2:10; Proverbs 21:4; James 4:17) Machane, rogon fare denen ni be weliy Jesus u murung’agen e aram ban’en nib ubchiya. Ya rayog ni nge aw ni faanra dabi fol facha’ ni ke denen ma ran tay ni “gowa be’ u yugu reb e nam fa reb e tamukun tax.” Mang fan e re thin nem?

⁶ I weliy Jesus e pi thin nem ngak pi gachalpen ma goo kar nanged ni dabra chaggad ngak e girdi’ ni gathi yad piyu Israel. (John 4:9; 18:28; Acts 10:28) Ma dabra chaggad ngak e piin tamukun tax, ni yad piyu Jew machane kar sasalapiyed e girdi’. Ere pi thin ni bay ko Matthew 18:15-17 e ba sor fan ko denen nib ubchiya, ma gathi yugu boch ban’en nde ga’ fan ni ke kireban’um ngay machane mom ni ngam n’ag fan mag pag talin.​—Matthew 18:21, 22.a

7, 8. (a) Miti mang denen e ba t’uf ni ngan nog ko piin piilal? (b) Miti mang denen e susun ni ngan pithig u thilin l’agruw e Kristiano u rogon nib puluw ko Matthew 18:15-17?

⁷ U tan e Motochiyel ma bay boch e denen ni dabi gaman ni nge n’ag facha’ fan ni kan rin’ ngak. Ya bay boch e denen ni thingar nog ngak e piin piilal ko ulung (fa ngak e pi prist) ni bod e pi denen ni baaray ni blasphemy, nge apostasy, nge liyor ko liyos, nge ngongol ndarngal, nge be’ ni ke par ku be’ ni gathi mabgol rok, nge par ko pumoon nge pumoon. Ku aram rogon e ulung ko Kristiano e ngiyal’ ney. (Levitikus 5:1; 20:10-13; Numbers 5:30; 35:12; Deuteronomy 17:9; 19:16-19; Proverbs 29:24) Machane mu tiyan’um ngay ni fa miti denen ni be weliy Jesus u murung’agen e rayog ni nge pithig l’agruw ni’. Susun: Ke damumuw be’ ngak be’ ara ke awan’ ngak, ma aram me gathibthibnag. Fa reb e Kristiano e ke yog nra fl’eg ban’en ma ra fanay boch ban’en me mu’nag fare maruwel u ba ngiyal’ ni kan turguy. Fa ke ning be’ e salpiy me yog nra sulweg u ba ngiyal’ ni kan dugliy. Fa ke micheg be’ ni faanra un ko reb e maruwel ma ran skulnag riy, ma dabi digey e ani ke pi’ e maruwel ngak me chuw ko maruwel ara tagenging ngak me fl’eg e business rok ya kar turguyew u m’on riy ndabi chuw rok u ba ngiyal’ ma dabi fl’e g e business ntaareb rogon, ko gin’em.b Faanra dabi fol be’ ko n’en ni ke micheg nra rin’, ma de kalngan’ riy, ma aram e denen nib ubchiya. (Revelation 21:8) Machane ku rayog ni ngan pithig e pi magawon nem u thilin e girdi’.

⁸ Ma uw rogon ni ngam pithig fare magawon? Bay dalip ban’en ni yog Jesus ni ngan rin’. Ngad lemnaged ra fapi n’em. Ma dabda lemnaged ni aram ba motochiyel nib mudugil ya ngad guyed rogon ni ngad nanged fan e pi n’en nem, ma dabda paged talin e n’en ni gad be nameg u fithik’ e t’ufeg.

Mu Athamagil ni Ngam Sulweg Walagem

9. Mang e susun ni ngad lemnaged ni fan ko Matthew 18:15?

⁹ I gaar Jesus: “Faanra ngongliy be’ ni walagem e denen nib togopluw ngom, ma ga yan mu guy nga mog ngak e kireb ni ke rin’ nge nang. Machane mman ni goo gur, ngam nonow ni goo gimew. Ma faanra fol ko tin ni ga be yog, ma aram e kam sulweg walagem.” Ba tamilang ni gathi ngam rin’ e re n’ey ni faanra ke mus ni ga be lemnag ni ke rin’ ban’en. Ya susun ni rayog ni ngam pi’ e mich riy ngak ni ke rin’ ban’en nib kireb ma ga weliy ngak nib t’uf rok ni nge yal’uweg fare magawon. Mab fel’ ni ngam rin’ e re n’em nib pay ma dab mu pag nge ubchiya’ fare magawon fa ngam pag nge gel e lem rok faanem. Maku faanra ga ra par nib n’uw nap’an ni ga be lemnag e re n’em ma rayog ni nge kirebnagem. Ma ngam weliy fare magawon ni goo gimew, ma dab mu weliy ngak yugu boch e girdi’ u m’on ni fan ni ngan nog ni ba sorom. (Proverbs 12:25; 17:9) Mang fan? Bochan e n’en ni ga be nameg.

10. Mang e ra ayuwegdad nge sul walagdad ko ulung?

¹⁰ Susun ni ngam nameg ni ngam ayuweg walagem, ma gathi ngam gechignag, ara mu tamra’nag, ara ngam kirebnagan’. Ya faanra briyul’ ni ke rin’ ban’en nib kireb, ma ke magawon thilrow Jehovah. Dabi siy ni ga ba adag ni ngam ayuweg nge par ni ir walagem ni Kristiano. Mab fel’ ni ngam par nib mocha’ u nap’an ni gimew be non, ma dab mog e thin nib gel ngak. Ngam weliyew u fithik’ e t’ufeg ma dabmu pag talin ni gimew l’agruw e dam flontgow ma gimew ma denen. (Roma 3:23, 24) Ma faan ra nang e cha’ nem ni dam gathibthibnag ma be guy ni rriyul’ ni ga ba adag ni ngam ayuweg, ma rayog ni ngan pithig fare magawon. Ngam rin’ ni aram rogon nib gol, ma ra dag ni gab gonop ya rayog ni nge yan ni aw ni gimew l’agruw ma kireb romew fa de papuluw e thin romew ma aram fan ni sum fare magawon.​—Proverbs 25:9, 10; 26:20; James 3:5, 6.

11. Mus ni dabi fol fa en ni ke denen, ma mang e rayog ni ngad rin’ed?

¹¹ Faanra ngam ayuweg faanem ni nge nang ni ke rin’ ban’en nib kireb ni ba ubchiya’, ma sana ra k’aring ni nge kalngan’. Machane tolangan’ e riyul’ ni ra mang skeng. (Proverbs 16:18; 17:19) Ere mus ni dabi yog ni ke rin’ ban’en nib kireb, mag son boch u m’on ni ngam rin’ ban’en. De yog Jesus ni ngam ‘mman ntaab yay nga mog ngak e kireb ni ke rin’ nge nang.’ Aram ba miti denen ni rayog ni ngan pithig fare magawon, me ere mu sul ngak ni bod rogon ni be weliy ko Galatia 6:1 ma “u tan aningeg lan mit” ni be guy. Ma rayog ni nge yib angin. (Mu taarebnag ko Jude 22, 23.) Machane faanra ke mich u wan’um ni ke denen ma dabi kalngan’ facha’?

Be’ nib Ilal e Ra Pi’ e Ayuw

12, 13. (a) Mang e bin l’agruw e n’en ni yog Jesus ni ngan rin’? (b) Mang boch ban’en ni ngan ayuw riy u nap’an ni ngan rin’ e re n’em?

¹² Ga ba adag ni ngan pagem nfaanra kam rin’ ban’en nib kireb? Danga’. Ere i dag Jesus ni tomren ni kam rin’ e bin som’on e n’en nke yog, ma susun ndab mu tal i athamgil ni ngam ayuweg walagem nge par romed nguum liyorgad ku Got u rogon nib mat’aw. Bin l’agruw e n’en ni yog Jesus ni ngan rin’ e baaray: “Ma faanra dabi fol rom ma ga fek taabe’ fa l’agruw ni’ ngar unew ngom, ya nge urngin e tin ni ka mog ni ke rin’ nib togopluw ngom ma nge yog ni micheg l’agruw fa dalip ni’, ni bod ni be yog e babyor nib thothup.”

¹³ I yog ni ngam fek “taabe’ fa l’agruw ni’.” Ma de yog ni tomren ni kam rin’ e bin’ som’on, ma aram e rayog ni ngam weliy fare magawon ngak yugu boch e girdi’, fa ngam mog ngak fare piilal ni ma lekag e ulung, fa ngam yoloy e babyor ngak e pi walag u murung’agen fare magawon. Demtrug ni kari mich u wan’um ni kan rin’ ban’en nib kireb, ma dawori mudugil. Ere susun damu wereg e thin nib togopluw nga faanem ya aram e ga be gathibthibnag. (Proverbs 16:28; 18:8) Ma ke yog Jesus ni ngam fek taabe’ ara l’agruw ni’ ngar unew ngom. Mang fan? Ma mini’ e rayog ni ngam mel’eg?

14. Mini’ e rayog ni ngad feked nge un ngodad u nap’an ni nga darod ko bin l’agruw?

¹⁴ Ga be guy rogon ni ngam sulweg walagem ya ngam micheg ngak ni ke denen mab t’uf ni nge kalngan’ ma aram e ra gapas thilmew nge Got. Me ere ffel’ ni ngam mel’eg “taabe’ ara l’agruw ni’” ni kar guyed facha’ u nap’an ni ke denen. Sana ur moyew u rom u nap’an ni ke buch, fa yow manang u murung’agen e n’en ni kan rin’ (fa n’en ndan rin’) ni fan nga ban’en nib l’ag ko business. Ma faanra dariy e pi mich riy, ma rayog ni ngam mel’eg e piin nib salap ko fare n’en ni kan magawon riy ma rayog ni ngar turguyew ni faanra rriyul’ ni kan rin’ ban’en nib kireb. Maku rayog ni ngar michegew e n’en ni ka nog, nge athamgil ni kan ta’ ni ngan yal’uweg fare magawon. (Numbers 35:30; Deuteronomy 17:6) Ere gathi ke mus ni yow e girdi’ ni be par u mathilin fare magawon, ya yow ra athamgil ni ngar ayuwegew faanem ni walagmed.

15. Mang fan nrayog ni nge pi’ e piin piilal ni Kristiano e ayuw nfaanra thingar darod ko bin l’agruw?

¹⁵ Ma gathi ba t’uf ni ngam fek e piin piilal ko ulung ngar unew ngom. Machane piin piilal e yad e girdi’ nib ilal ko tirok Got ban’en ma ke bung rogorad riy. Piin piilal ni aram rogon e yad bod “ba manaf ni ngan naf ngay ko nifeng nge yoko’. Yad ra bod e yu pa’ i lul’ ni bay u daken bangi ted nder tugul ban’en riy, ma yad bod e tagalul’ u ba war ni baga’ ni baga’ ni bay u daken bangi ted nder tugul ban’en riy.” (Isaiah 32:1, 2) Yad ba salap i ayuweg e pi walagey ni pumoon nge ppin. Ma bay fan ni fa en ni ke denen e nge pagan’ ngak e pi pumoon ni aram rogon ni yad e “taw’ath.”c (Efesus 4:8, 11, 12) Faanra ran weliy fare magawon u fithik’ e girdi’ nib ilal mu fithik’ e meybil ma rayog ni ngan puruynag nib fel’ rogon min pithig fare magawon.​—Mu taarebnag ko James 5:14, 15.

Bin Tomur e N’en ni Ngan Rin’ ni Ngan Sulweg Facha’

16. Mang e bin dalip e n’en ni yog Jesus ni ngan rin’?

¹⁶ Faanra dabi yib angin fa gali n’en ni ngan rin’ ko som’on, ma aram min ning e ayuw ko piin piilal ko ulung. “Ma faanra dabi fol rorad, me ere mog fapi thin ngak e ulung. Ma faanra dabi fol rok e ulung ma ga tay ni gowa be’ u yugu reb e nam fa reb e tamukun tax.” Mang fan e re n’ey?

17, 18. (a) Mang e be ayuwegdad ngad nanged fan e pi thin ni ‘ngan nog ngak fare ulung’? (b) Uw rogon nrayog ni ngad folgad ko re n’em ko ngiyal’ ney?

¹⁷ Gathi be yog ni ngan weliy fare denen ara kireb ni kan rin’ u nap’an e muulung ngak e ulung. Thin Rok Got e ra tamilangnag e n’en nib mat’aw ni ngan rin’. Ya baaray e n’en ni kan rin u Israel kakrom u nap’an ni ke togopuluw be’ ara ke abich nib pag rogon, ara ke chinggaw: “Faanra bay be’ ni pumoon ni bay reb e bitir rok ni pagal ni ba gelan’ mab ta togopluw, ma der ma fol rok e chitamangin nge chitingin, ma kar guyew rogon ni ngar yal’uwegew, ma dabi fol rorow ma aram ma yow ra fek fare pagal i yib ngak e piin piilal ko fare garog ko binaw rok, ma thingar rognew ngak e piin piilal ko re binaw nem ni gaar, ‘Re pagal ney ni bitir romow e ba gelan’ mab ta togopluw; ma der ma fol romow, ma ma abich nib pag rogon mab ta chingnag.’ Ma aram ma urngin e pumoon ko re binaw nem e thingara paged e malang ngak.”​—Deuteronomy 21:18-21, New World Translation.

¹⁸ Dan tamilangnag e denen rok facha’ ngak urngin e girdi’ ko re nam nem nge ganong rok. Ya “piin piilal” e yad owchen fare ulung mar pithiged fare magawon. (Mu taarebnag ko Deuteronomy 19:16, 17 ni be weliy u murng’agen e ‘pi prist nge pi tapuf oloboch ni yad e ngar maruwelgad e ngiyal’ nem.’) Ku arrogon e ngiyal’ ney, ma nap’an nib t’uf ni ngan fol ko fa bin dalip e n’en ni ngan rin’ ma piin piilal ni yad owchen fare ulung e yad ra pithig fare magawon. Ma taareb e n’en ni yad be nameg ni aram e ngar sulweged fare walag ni ir e Kristiano nfaanra rayog. Yad ma rin’ e re n’ey ya yad ma ngongol nib mat’aw ma dabra pared ni yad ba laniyan’.

19. Mang e ra rin’ e piin piilal ni kan dugliyrad ni ngar pithiged fare magawon?

¹⁹ Yad ra guy rogon ni ngar thabthabelnaged urngin ban’en nib l’ag ngay mar rung’aged e n’en ni yog e pi mich ni ngan turguy ko briyul’ ni kan denen fa danga’ (fa ka yibe rin’). Yad ba adag ni ngar ayuweged fare ulung ndabi yib e kireb ngay ma dabi kireb nga nifengin e fayleng. (1 Korinth 2:12; 5:7) Yad ba ilal ko tirok Got ban’en me ere yad ra athamgil ni ngar filed e “tin nib riyul’ ngak boch e girdi’ me pi’ e athamgil nga lanin’rad, me ki dag ngorad e oloboch ni ke tay e piin ni yad be togopluw ko re thin ney.” (Titus 1:9) Ma yibe athapeg ni fa en ni ke denen e dabi bod piyu Israel ni yog e profet u murung’agrad ni gaar: “Kug piningem ma dam fulweg; kug non ngom, ma dam motoyil; ma ka ga be rin’ e tin nib kireb u p’eowcheg, nge pi n’en nder ma felan’ug ngay.”​—Isaiah 65:12.

20. Mang e yog Jesus ni ngan rin’ nfaanra dabi fol facha’ ma dabi kalngan’?

²⁰ Ma yu ngiyal’ ma aram rogon fa en ni ke denen. Ma faanra arrogon ma ke yog Jesus ni gaar: “Ma ga tay ni gowa be’ u yugu reb e nam fa reb e tamukun tax.” De yog Somol ni ngan ngongliy e tin nib kireb ngak facha’. Machane gathi de tamilang e n’en ni yog apostal Paul ni ngan chuweg e en nib kireb ngongolen u lan e ulung. (1 Korinth 5:11-13) Ma sana ra yib angin riy me sul facha’.

21. Mang e rayog ni nge rin’ fa en ni kan chuweg ko ulung?

²¹ Fare fanathin ni weliy Jesus u murung’agen fare pagal ni ke yan nga bayang e be tamilangnag e re n’em. Ya ke chuw fare pagal ko tabinaw rok me munmun me “sulan’.” (Luke 15:11-18) I yog Paul ngak Timothy ni boch e piin ni kar denengad e ra “sulan’rad ngorad ngar milgad nga orel ko wup rok moonyan’.” (2 Timothy 2:24-26) Gad be athapeg ni piin ni kar denengad ma kan chuwegrad ko ulung e ra sulan’rad ngorad​—mi yad tawrengnag Got nge pi Kristiano nib yul’yul’.

22. Uw rogon nrayog ni nge sul faanem ni walagdad?

²² De lemnag Jesus ni girdien yugu boch e nam nge pi tamukun tax e dabiyog ni ngar fel’gad u wan’ Got. Ya Matthew Levi e ir reb e tamukun tax ma ke ‘lek Jesus’ ma kan mel’eg ni nge mang reb e apostal. (Mark 2:15; Luke 15:1) Ere faanra “dabi fol ko ulung” ma kan chuweg, ma gad ra son ya sana ra munmun me kalngan’ ma ra yal’uweg e kanawo’ rok. Ma nap’an ni ke sul ko ulung ma gad ra falfalan’ ni ke sul faanem ko bin riyul’ e liyor.

[Footnotes]

Ka Ga Manang?

◻ Miti mang denen e be weliy ko Matthew 18:15-17?

◻ Mang e susun ni ngad lemnaged nfaanra thingarda rin’ed e bin som’on e n’en ni yog Jesus?

◻ Mini’ e rayog ni ngar ayuweged gadad nfaanra thingarda rin’ed e bin l’agruw e n’en ni yog Jesus?

◻ Mini’ e ba l’ag ko bin dalip e n’en ni ngan rin’, ma uw rogon nrayog ni nge sul faanem ni walagdad?

[Picture on page 14]

De chag piyu Jew ngak e pi tamukun tax. Ke pi’ Matthew keru’ ko kanawo’ rok me lek Jesus

[Picture on page 16]

Rayog ni ngan pithig e magawon “u tan aningeg e lan mit” ni be guy