“Mu Liyor ko Chitamam nge Chitinam”

Nap’an ni immoy Jesus u fayleng me tamilangnag feni ga’ fan fare motochiyel ni: “Mu liyor ko chitamam nge chitinam.” (Ex 20:12; Mt 15:4) Fan nib puf mat’awun Jesus ni nge yog e re thin ney e bochan ni “i par ni be fol” rok e gallabthir rok u nap’an ni kab fel’ yangaren. (Lu 2:51) Mus nga nap’an ni ke ilal miki guy rogon be’ ni nge ayuweg e chitiningin u tomuren ni ke yim’.​—Joh 19:26, 27.

Ere ku arrogon e ngiyal’ ney ni ku ma dag e pi Kristiano nib fel’ yangarrad ni yad be tayfan e gallabthir rorad, ni aram e yad ma fol rorad ma yad ma non ngorad u fithik’ e tayfan. Bin riyul’ riy e, re motochiyel ney e dariy e ngiyal’ nra taw ngay ma dab kun fol riy. Ya mus nra pilibthir e gallabthir rodad, ma ka gad ra ulul i tay farad ni aram e ngad folgad ko fonow rorad ni bay e gonop riy. (Pr 23:22) Ku reb e kanawo’ u rogon ni ngad ted fan e gallabthir rodad riy u nap’an ni kar pilibthirgad e, aram e ngad pied e athamgil nga lanin’rad ma ngkud pied e salpiy ngorad ko ngiyal’ nra t’uf rorad. (1Ti 5:8) Ere, demtrug ko kab fel’ yangardad fa kad piilalgad, ma faanra ba fel’ e numon u thildad e gallabthir rodad, ma aram reb e kanawo’ ni gad be tay farad riy.

NGAN YALIY FARE VIDEO NI KAN ANIMATENAG NI KENNGIN E HOW CAN I TALK TO MY PARENTS? NGEMU’ MIN PI’ E FULWEG KO PI DEER NI BAARAY:

• Mang fan nrayog ni nge mo’maw’ ngom ni ngam non ngak e gallabthir rom?

• Uw rogon nrayog ni nge m’ug ni ga be tayfan e gallabthir rom u nap’an ni ga be non ngorow?

• Mang nib ga’ fan ni ngaum non ngak e gallabthir rom? (Pr 15:22)