Mu Tayfan e Piin ni Bay Rogon ni Ngan Tay Farad

1. Mang fan ni bay boch e girdi’ ni bay rogon ni ngan tay farad? Mang e gad ra weliy ko re article ney?

RA NGAN tayfan be’ ma be yip’ fan ni ngan dag ngak facha’ ni ir be’ nib ga’ fan. Ere, ba puluw ni ngad lemnaged ni be’ ni aray rogon e bay ban’en ni ke rin’ nib manigil ni bay rogon ni ngan tayfan riy ara ir be’ ni bay u reb e liw nib tolang. Re article ney e gad ra weliy riy murung’agen e piin nsusun e ngaud ted farad nge fan ni bay rogon ni ngaun tay farad.

2, 3. (a) Mang fan nri bay rogon ni ngan tayfan Jehovah? (Mu guy e sasing ni bay u tabolngin e re article ney.) (b) Mini’ fare Fak e Saf ni kan weliy murung’agen ko Revelation 5:13, ma mang fan ni bay rogon ni ngan tayfan?

² Be yog e Revelation 5:13 ni bay fan ni ngad ted fan e “En ni ke par nga tagil’, nge fare Fak e Saf.” Gad ra guy e guruy ni 4 ko re ke babyor ko Bible nem, ma be weliy reb i fan ni bay rogon ni ngaun tayfan Jehovah. Be yog u rom ni pi engel u tharmiy e yad be tolul ni yad be pining e sorok ngak Jehovah ni ir e en ni be “par nib fos ndariy n’umngin nap’an.” Be lungurad: “Somol romad ma Got romad! Ba’ rogom ni nga nog e sorok ngom, min ta’ fam, ma ba’ rogom ni nge mil suwon urngin ban’en ngom. Yi gur e mu sunumiy urngin ban’en, yi gur e mu lemnag mi yad sum ni yad ba fos.”​—Rev. 4:9-11.

³ Fare Fak e Saf e aram Jesus Kristus ni ir “fare Fak e Saf rok Got ni ir e nge chuweg e denen rok e girdi’ nu fayleng!” (John 1:29) Be yog e Bible ni kab tolang Jesus Kristus ngak urngin e girdi’ ni yad ba pilung e chiney ara piin ni ka ur pilunggad kafram. Be gaar: “Ir e Pilung ko pi pilung nge Somol ko pi somol, ni ke mus ni go ir e dabi yim’; ma ma par ko tamilang ndariy be’ nrayog ni nge chugur ngay. Dariy be’ ni kaa guy, ma dariy be’ nrayog ni guy.” (1 Tim. 6:14-16) Kun pilung e ke yag ni nge m’agan’ ngay ni nge yim’ ni fan e nge biyuliy e denen rodad? Faan ga ra lemnag e re n’ey, mab mudugil nra k’aringem ni ngam un ko pi engel u tharmiy nge lungumed: “Fare Fak e Saf nli’ ngem’ e ba’ rogon ni nge mil suwon urngin ban’en ngak, min pi’ e flaab ngak, nge gonop, nge gelngin, min ta’ fan, min gilnag buguwan, mi nog e sorok ngak!”​—Rev. 5:12.

4. Mang fan nthingar ud ted fan Jehovah nge Kristus?

⁴ Thingar ud ted fan Jehovah nge Kristus, ya yafos ndariy n’umngin nap’an nra yag ngodad e be tor nga daken e re n’ey. Be ayuwegdad fapi thin ni yog Jesus ni bay ko John 5:22, 23 ni nge tamilang e re n’ey u wan’dad. Be gaar: “Ku er rogon ndabi pufthinnag e en ni Chitamangiy be’. Ya ke pi’ mat’awun e en ni Fak ni nge pufthinnag e girdi’, ya nge gubin e girdi’ me liyor ngak e en ni Fak Got ni bod rogon ni yad ma liyor ngak e en ni Chitamangiy. Ma en nder liyor ngak e en ni Fak Got e der liyor ngak e en ni Chitamangiy ni ir e l’og nge yib.”​—Mu beeg e Psalm 2:11, 12.

5. Mang fan ni susun e ngaud ted fan e girdi’?

⁵ Girdi’ e ni sunmiyrad ni yad “bod yaan Got.” (Gen. 1:27) Ere, yooren i yad e bay boch i fel’ngin Got rorad ni yugu aram rogon nib thilthil rogon ni ma m’ug e pi fel’ngin ney rorad. Rayog ko girdi’ ni ngaur t’ufeged yad, ma yad be gol ngorad, ma yad be dag e runguy ngorad. Bochan ni kan sunmiyrad ni bay e nangan’ rorad, ma aram fan nrayog ni ngar nanged ko ba fel’ ban’en fa ba kireb, ara kan rin’ u fithik’ e yul’yul’ fa danga’, ara ba puluw ni ngan rin’ fa danga’, ni yugu aram rogon ni bay yu ngiyal’ nde puluw rogon ni yad ma lemnag e pi n’ey. (Rom. 2:14, 15) Yooren e girdi’ e yad baadag ban’en nib beech mab fel’ yaan. Kub ga’ ni yad baadag ni ngar pared yugu boch e girdi’ u fithik’ e gapas. Demtrug ko yad manang fa danga’, machane bin riyul’ riy e, ma m’ug rarogon Jehovah rorad. Ere, aram fan ni bay rogon ni ngan tay farad.​—Ps. 8:5.

ROGON NIB PULUW NI NGAUD TED FAN YUGU BOCH E GIRDI’

6, 7. Uw rogon nib thil rogon ni ma tay e Pi Mich Rok Jehovah fan e girdi’ nga rogon ni ma tay boor e girdi’ fan yugu boch e girdi’?

⁶ Ba t’uf ni ngad gonopiyed rogon ni gad ma tayfan yugu boch e girdi’ nge gin ni ngad musgad riy. Bochan ndawori flont e girdi’, ma yooren i yad e ke af e lem ko re fayleng rok Satan ney ngorad. Aram fan nib ga’ ni bayi n’en mi i n’uf e girdi’ boch e pumoon ara ppin nga lang nib pag rogon ko bin ni kemus ni ngar ted farad. Yad ma n’uf e pi tayugang’ ko teliw nge am, nge boch e girdi’ nib gilbuguwrad u boch e gosgos, ara piin ni yima pag yaarad u boch e kachido, ara yad ma tang, ara ba gilbuguwrad u boch ban’en, nge ku yugu boch e girdi’ nib gilbuguwrad u fayleng. Ku bayi n’en ma yad ma tay e pi girdi’ ney ni gowa yad ba thil ko tin ni ka bay e girdi’. Ere, aram fan ni piin ni kab fel’ yangarrad nge piin ni kar piilalgad e yad ma tay e pi girdi’ nem ni yad boch e girdi’ ni ngaun folwok rorad. Ere, ba ga’ ni yad ma folwok u rogon ni ma rin’ e pi girdi’ nem ban’en, ara rogon e munmad ni yad ma tay, ara rogon e ngongol rorad.

⁷ Tin riyul’ e Kristiano e darur n’ufed yugu boch e girdi’ nga lang nib pag rogon. Kari mus ni Kristus e ir e cha’ ni immoy u roy u fayleng ni ke dag e bin th’abi fel’ e kanawo’ nrayog ni ngad folwokgad riy. (1 Pet. 2:21) De m’agan’ Got ngay ni ngad ted fan be’ nge pag rogon. Ba t’uf ni ngad lemnaged e re thin ni baaray ni be gaar: “Ke denen urngin e girdi’, kar pired ni yad mmal’af rok Got ke mul e flaab rok u pa’rad.” (Rom. 3:23) Ere, riyul’ ndariy be’ ni bay rogon ni ngan n’uf nga lang nib pag rogon.

8, 9. (a) Uw rogon girdien e am u wan’ e Pi Mich Rok Jehovah? (b) Susun ni uw e gin ni nge mus riy e tayfan ni gad ma tay ko girdien e am?

⁸ Bay boch e girdi’ u roy u fayleng nib t’uf ni ngaud ted farad ni bochan e liw ni yad bay riy. Bod ni, bay boch i girdien e am ni yad e yad ma guy rogon ni nge par e motochiyel u gil’ me par gubin ban’en u daken e nam nib yaram, maku yad e yad ma pi’ e tin nib t’uf ko girdien e nam. Pi n’ey ni yad ma rin’ e ma yib angin ngak urngin e girdi’. Ere, aram fan ni yog apostal Paul ngak e piin Kristiano ni ngaur ted girdien e “am” ni yad boch e girdi’ nib ga’ lungurad nsusun e ngaun fol rorad. I yog ngorad ni gaar: “Mpied e salpiy ni ngam pied ngorad, ni urngin e tax ni yima pi’, . . . mi gimed tay farad ni yad gubin.”​—Rom. 13:1, 7. 

⁹ Aram fan nib m’agan’ e Pi Mich Rok Jehovah ngay ni ngar ted fan e pi girdi’ ney u rogon nsusun e ngar rin’ed ngu rogon ni yima rin’ ko nam rorad. Gad ma tay farad ko maruwel ni yad ma rin’. Machane, tayfan ni gad ma dag ngorad nge ayuw ni gad ma pi’ ngorad e bay e gin nsusun e nge mus riy nrogon nib puluw ko Bible. Dabiyog ni ngad ted farad nge yan i taw nga reb e dodow ni gad ra togopuluw riy ngak Got ara dab kud pared u mathilin ngongolen e am.​—Mu beeg e 1 Peter 2:13-17.

10. Uw rogon ni dag e pi tapigpig rok Jehovah ni ur moyed kakrom e kanawo’ nrayog ni ngad folwokgad riy e ngiyal’ ney?

¹⁰ Pi tapigpig rok Jehovah kakrom e ra daged e kanawo’ nrayog ni ngad folwokgad riy u rogon e ngongol ni ur daged ko am nge piin ni yad ma yog e thin ko am. Nap’an ni yog e Am nu Roma ko girdi’ ko pi binaw ni bay u tan pa’rad ni ngan matheeg girdi’, ma aram me fol Josef nge Maria ko n’en nnog ni ngan rin’. Ra milekaggow nga Bethlehem ni yugu aram rogon nib diyen Maria ni ke chugur nga nap’an ni nge gargel. (Luke 2:1-5) Boch nga tomuren u nap’an ni weliy e girdi’ bogi ban’en nib kireb nib togopuluw ngak Paul, ma aram me guy rogon ni nge ayuweg ir miki dag ni be tayfan Herod Agrippa ni Pilung nge Festus ni governor nu Judea nreb e binaw ni bay u tan pa’ yu Roma.​—Acts 25:1-12; 26:1-3.

11, 12. (a) Mang fan nib thil rogon e ngongol rodad ngak e piin ni yad ma yog e thin ko am ko ngongol rodad ngak e pi tayugang’ ko teliw? (b) Mang angin ni yib u nap’an ni dag reb e Pi Mich u Austria ngak reb i girdien e am ni be tayfan?

¹¹ Machane, Pi Mich Rok Jehovah e darur n’ufed e pi tayugang’ ko pi yurba’ i teliw nga lang ni yugu aram rogon ni baadag e pi tayugang’ nem ni ngaun n’ufrad nga lang. Pi yurba’ i teliw ni googsur e yad ma machibnag boch ban’en nde riyul’ u murung’agen Got, ma yad ma pingeg fan e Thin rok nga bang. Yugu aram rogon ni gad ma tayfan e pi tayugang’ ko teliw ni bod rogon ni gad ma rin’ ko tin ni ka bay e girdi’, machane dariy rogon ni ngan n’ufrad nga lang. Gad manang ni i yog Jesus ni pi girdi’ nem e yad e piin ni yad ma dake modingniged yad ma yad be pow’iy e girdi’ nga bang. (Matt. 23:23, 24) Machane, faanra ud ted fan e piin ni yad ma yog e thin ko am nrogon nsusun e ngad rin’ed ngorad, ma bay yu ngiyal’ nrayog ni nge yib angin nib fel’.

¹² Leopold Engleitner ni ir reb e Pi Mich u Austria e kol e pi Nazi mar ted nga reb e train ngar pied nge yan nga reb e concentration camp ni bay u Buchenwald. Re train ni baaram ni yan riy e ngaram e ku immoy reb e kalbus riy nib togta ni ka nog Heinrich Gleissner ngak. Re pumoon nem e immoy ni ir reb i girdien e am nu Austria. Machane, ke dabuy e pi Nazi daken. Ere, nap’an ni yibe yan i yan ko re camp nem, ma aram me tabab Brother Engleitner i weliy e michan’ rok ngak Gleissner u fithik’ e tayfan, ma aram mi ri fal’eg Gleissner e motoyil ko n’en ni i weliy e re walag nem ngak. Tomuren e bin l’agruw e mahl ko fayleng, ma boor yay ni i fanay Gleissner mat’awun ni nge ayuweg e Pi Mich u Austria. Sana ku ra yib ngan’um boch i angin nrayog ni nge yib ni faanra i tay e Pi Mich fan e piin ni yad ma yog e thin ko am, mar rin’ed u rogon ni be yog e Bible nsusun e nga i rin’ e piin Kristiano.

YUGU BOCH E GIRDI’ NI BAY ROGON NI NGAUN TAY FARAD

13. Mini’ e piin nrib ga’ fan ni ngaun tay farad, ma mang fan?

¹³ Bay rogon ni ngaud ted fan e piin ni taareb e michan’ rodad. Ku arrogon e piin piilal ni yad ma yog e thin rodad nrib ga’ fan ni ngaud ted farad. (Mu beeg e 1 Timothy 5:17.) Gad ma tayfan e pi walag ney ni yugu demtrug rogon e nam ni kar bad riy, ara tolngin e skul rorad, ara rarogorad u fithik’ e girdi’, ara urngin e salpiy ni bay rorad. Be yog e Bible ni pi cha’ney e yad boch e “pumoon ni tow’ath,” mab ga’ farad u lan e ulung rok Got ni bochan e yad ma pi’ e tin nib t’uf ko girdi’ rok. (Efe. 4:8, NW) Am lemnag e piin piilal u lan e ulung, nge pi walag ni yad ma lekag e ulung, nge girdien e Branch Committee, nge girdien fare Ulung ni Ma Pow’iyey. Pi walag u nap’an e bin som’on e chibog e ri yad ma tayfan e piin ni kan tayrad ni nga u rogned e thin rorad, maku arrogodad e ngiyal’ ney. Machane, darud n’ufed e piin ni yad ma yog e thin u lan e ulung ni Kristiano ni boor e girdi’ ni manangrad ara da ngongolgad u toobrad ni gowa yad boch e engel. Yugu aram rogon, ma gad ma tayfan e pi walag ney ni bochan e maruwel nib gel ni yad ma rin’ nge rarogorad ni yad ba sobut’an’.​—Mu beeg e 2 Korinth 1:24; Revelation 19:10.

14, 15. Mu weliy e n’en nib thil u thilin e piin piilal ni Kristiano nge pi tayugang’ u boch e teliw.

¹⁴ Gad manang ni pi piilal ney ni yad ma gafaliy e pi saf rok Got e ba sobut’an’rad. Ere, bochan nib sobut’an’rad, ma aram fan ndubrad ni ngaun ngongol ngorad ni gowa yad boch e girdi’ nu fayleng nib gilbuguwrad. Bochan e re n’ey, ma aram fan ni yad ba thil ko pi tayugang’ ko pi yurba’ i teliw e ngiyal’ ney nge piin ni ur moyed u nap’an e bin som’on e chibog ni faani weliy Jesus murung’agrad ni gaar: “Yad ba adag e yungi n’en nth’abi fel’ ni yima par riy ko pi madnom ni yima tay nge chiya ni kan tay u lan tafen e muulung i yan nib mudugil e girdi’ ntagil’; yad ba adag ni ngan siro’ ngorad min ta’ farad ko yungi n’en ni bay e market riy.”​—Matt. 23:6, 7. 

¹⁵ Tin riyul’ e Kristiano ni yad ma gafaliy e pi saf rok Got e ba sobut’an’rad ma yad ma fol ko fapi thin ni yog Jesus ni gaar: “Thingari dab ni pining e ‘Tamachib’ ngomed, ya gimed gubin nra bigimed ma walagen bigimed, ma taareb e Tamachib romed ni ba’. Ma thingari dab mpininged be’ u roy u but’ ni ‘Chitamangiy,’ ya ri taareb e Chitamangimed ni bay u tharmiy. Ara ni pining e ‘Tayog e thin’ ngomed, ya taabe’ e ba’ ni ir e be yog e thin romed, ni aram fare Messiah. En nth’abi tolang u fithik’med e thingari mang tapigpig romed. Ma en nra tolangnag ir e yira sobut’nag nge sobut’an’, ma en nra sobut’nag ir e yira tolangnag.” (Matt. 23:8-12) Ere, aram fan ni Pi Mich e yad ma t’ufeg, ma yad ma tayfan e piin piilal ni yad ma yog e thin ko pi ulung rodad ni bay u ga’ngin yang e fayleng.

16. Mang fan nsusun e ngaud guyed rogon ni ngad nanged fan e n’en ni be yog e Bible u murung’agen rogon ni gad ma tayfan yugu boch e girdi’ ma gad fol riy?

¹⁶ Riyul’ nrayog ni nge mo’maw’ ngodad ni ngad gonopiyed rogon ni gad ma tayfan yugu boch e girdi’ nge piin ni ngaud ted farad. Ku arrogon e tin riyul’ e Kristiano ni ur moyed kakrom. (Acts 10:22-26; 3 John 9, 10) Machane, ba fel’ ni ngad athamgilgad ngad folgad ko n’en ni be yog e Bible u murung’agen rogon ni gad ma tayfan yugu boch e girdi’. Faan gad ra gonopiy rogon ni gad ma tayfan yugu boch e girdi’, ma boor angin nra yib ngodad.

ANGIN NRA YIB NGODAD NI FAANRA UD TED FAN YUGU BOCH E GIRDI’ U ROGON NSUSUN E NGAD RIN’ED

17. Mang boch i angin nra yib ni faanra un tayfan e piin ni yad ma tay murung’agen boch ban’en u roy u fayleng?

¹⁷ Faanra ud ted fan e piin ni yad ma tay murung’agen boch ban’en u roy u fayleng, mab mudugil ni yad ra tayfan mat’awdad ni ngad machibgad ndariy ban’en ni be magawonnagdad. Maku reb e, rayog ni nge fel’ u wan’rad e maruwel ni machib ni gad be rin’. Boch e duw ni ke yan ma immoy reb e pioneer u Chiyamen ni ka nog Birgit ngak ni un ko graduation rok reb e ppin ni fak. I yog e pi sensey ko re skul nem ngak e re walag ney ni yad ba felfelan’ ngay ni kar skulnaged e bitir ko Pi Mich Rok Jehovah u nap’an e pi duw ni ke yan. Ku rogned ngak nra kireban’rad ni faanra dakuriy reb e bitir ni fak e Pi Mich Rok Jehovah nra yib i un ko re skul nem. Ere, yog Birgit ngorad ni gaar, “Yima fil ngak pi fakmad ni ngaur folgad ko pi motochiyel rok Got u murung’agen e re miti ngongol ni ngaur daged, ma re n’ey e ba muun ngay ni ngaur ted fan e sensey rorad.” I yog reb e pi sensey nem ni gaar, “Faanra gubin e bitir ni bod pi fakmed, ma aram e gubin e sensey ni yad ra adag e maruwel rorad.” In e wik nga tomuren, ma aram me un reb e pi sensey nem nga reb e convention nni tay u Leipzig.

18, 19. Mang e susun ndab da paged talin u rogon ni gad ma tayfan e piin piilal?

¹⁸ Pi kenggin e motochiyel ni bay ko Thin rok Got nib mat’aw ma bay e gonop riy e susun ni aram e n’en ni nge pow’iy rogon ni gad ma tayfan e piin piilal u lan e ulung. (Mu beeg e Hebrews 13:7, 17.) Rayog ni ngaud pininged e magar ngorad ko maruwel nib gel ni yad ma rin’, ma gad athamgil ni ngad folgad ko pi fonow ni yad ma pi’. Bin riyul’ riy e, aram e n’en nsusun e ngaud rin’ed. Faan gad ra rin’ e re n’ey, ma aram e rayog ni ngaur rin’ed e maruwel rorad u fithik’ e felfelan’. Machane, re n’ey e gathi be yip’ fan ni ngad folwokgad u gubin ban’en ni ma rin’ reb e piilal ni “boor e girdi’ ni manang,” ni bod rogon ni ngad folwokgad u rogon e munmad ni ma tay nge rogon ni ma fal’eg yaan, ara rogon ni ma pi’ e welthin, ara rogon ni ma non u nap’an ni yad be sabethin boch e girdi’. Ya faan gad ra rin’ ni aray rogon, ma rayog ni nge m’ug riy ni gad be folwok ko girdi’ ko bin ni ngad folwokgad rok Kristus. Ma susun e dab da paged talin nre walag nem e ku ir be’ ndawori flont ni bod gadad.

¹⁹ Faanra ud ted fan e piin piilal u rogon nsusun e ngad rin’ed, ma dab ud n’ufed yad nga lang ni gowa yad boch e girdi’ nu fayleng nib gilbuguwrad, ma aram e gad be ayuwegrad. Maku reb e, faan gad ra rin’ ni aray rogon ma aram e gad be ayuwegrad ni nge dabi tolangan’rad, ara ra lemnaged ni yad ba tolang ara ka yad ba fel’ ko tin ni ka bay e girdi’.

20. Faanra ud ted fan yugu boch e girdi’, ma uw rogon nra ayuwegdad e re n’ey?

²⁰ Faanra ud ted fan e piin nsusun e ngaud ted farad ma aram e rayog ni nge ayuwegdad ni nge dab ud pared ni yigoo gadad e gad be lemnagdad. Ra ayuwegdad ni nge dab ud lemnaged rarogodad nib pag rogon u nap’an nra tabab boch e girdi’ ni ngar n’ufed gadad nga lang. Ku ra ayuwegdad ni ngad folgad u rogon ni be pow’iydad e ulung rok Jehovah, ya ulung rok Jehovah e bay e gin ni ma mus riy u rogon ni ma tayfan yugu boch e girdi’, maku der ma n’uf e girdi’ nga lang ndemtrug ko yad bang ko ulung fa danga’. Maku reb e, faan gad ra rin’ e re n’ey ma aram e gad ba gonop, ma ra ayuwegdad ni nge dabi magawon lanin’dad u nap’an nra oloboch be’ ni gad ma tayfan.

21. Mang e bin th’abi ga’ i fan ni ngaud ted fan e piin ni bay rogon ni ngaud ted farad, mu kud rin’ed u rogon nsusun e ngaud rin’ed?

²¹ Bin th’abi ga’ fan riy e, faanra ud ted fan e piin ni bay rogon ni ngaud ted farad, mu kud rin’ed u rogon nsusun e ngaud rin’ed ma aram e gad ra felfelan’nag Got, ya gad be ngongol u rogon nib m’agan’ ngay maku gad be par ni gad ba yul’yul’ ngak. Ma re n’ey e ra micheg nde riyul’ e n’en ni be yog e piin ni yad ra guy rogon ni ngar moningniged Got. (Prov. 27:11) Re fayleng ney e ke sug ko piin ndar nanged rogon ni ngar ted fan yugu boch e girdi’ u rogon kanawoen nsusun e ngar rin’ed. Ere, ri gad ba felfelan’ ni kad nanged rogon ni ngaud ted fan yugu boch e girdi’ u rogon nib m’agan’ Jehovah ngay.