Gur Ba Pasigan’med ni Nge Bigimed Mi i Tayfan Bigimed?
“Nge pasigan’med ngay ni nge bigimed mi i ta’ fan bigimed.”—ROM. 12:10.
1. Mang e n’en ni gathi ri ki yima rin’ e ngiyal’ ney u yu yang u fayleng?
YU YANG u fayleng e bay e yalen riy ni ma ragbug e piin bitir nga but’ ngaur ted fan e piin piilal ko ngiyal’ ni bay e piilal. Bochan e re n’ey e nge dabi m’ug ni yad ba tolang ngak e piin piilal. Ma pi binaw ney e kub kireb riy ni nge pi’ e bitir keru’ ngak be’ nib piilal. Yugu aram rogon nib thilthil rogon e tayfan u boch e yalen, ma re tayfan nem ni yibe dag e be puguran ngodad fare Motochiyel ni pi’ Got ngak piyu Israel. Ba muun ngay fare motochiyel ni gaar: “Mu tiyed fan e girdi’ ni kar pilibthirgad.” (Lev. 19:32) Machane, boor e binaw ni gathi ri ki yima dag e tayfan riy ngak e girdi’. Rogon riy e ke yoor e girdi’ e ngiyal’ ney nder ma tayfan e girdi’.
2. Mini’ e be tay e Bible chilen ni ngad ted fan?
2 Thin rok Got e be dag nrib ga’ fan ni ngan dag e tayfan. Be yog ngodad ni ngad ted fan Jehovah nge Jesus. (John 5:23) Maku Thin rok Got e be tay chilen ngodad ni ngad ted fan girdien e tabinaw rodad nge girdi’ u lan e ulung rodad nge girdi’ ni gathi yad bang ko ulung rodad. (Rom. 12:10; Efe. 6:1, 2; 1 Pet. 2:17) Mang boch e kanawo’ ni ngad ted fan Jehovah riy? Uw rogon ni nge gel i tayfan rodad pi walagdad u lan e ulung? Ngad weliyed e pi n’ey nge boch e deer ni kub l’ag ngay.
Mu Tayfan Jehovah nge Fithingan
3. Mang reb e kanawo’ nib ga’ fan ni ngad ted fan Jehovah riy?
3 Reb e kanawo’ nib ga’ fan ni ngan tayfan Jehovah riy e ngan dag e tayfan nga fithingan. Mab puluw e re n’ey, ya gadad e girdi’ ni gad be fek fithingan. (Acts 15:14; Rom. 10:13) Riyul’ nib tow’ath ni ngan fek fithingan Got nth’abi gel gelngin, ni Jehovah. I gaar Mikah ni profet: “Ra reb e nam ma yad be meybil ma yad be fol rok e birorad e kan, machane gadad e bay ud meybilgad ngak Somol ni Got rodad ma gadad be fol rok ndariy n’umngin nap’an.” (Mik. 4:5) Gad ra “fol rok” Jehovah ni faan gad ra athamgil nga i m’ug ko ngongol rodad ni gubin e rran ni gad be tayfan fare ngochol ni bay u dakendad. Ba puluw ko thin ni ke yog Paul ngak e Kristiano u Roma, faanra dab da ngongolgad nib puluw ko thin nib fel’ ni gad be machibnag, ma ra ‘kireb’ fithingan Got ni aram e ra kireb u wan’ e girdi’.—Rom. 2:21-24.
4. Uw rogon u wan’um fare maruwel ni ngan machibnag ngak e girdi’ murung’agen Jehovah?
4 Maku gad ma tayfan Jehovah u daken e machib ni gad ma ta’. Kakrom e pining Jehovah yu Israel ni ngar manged e pi mich rok, machane de yog ni ngar lebguyed e re maruwel nem. (Isa. 43:1-12) Boor yay ni ur togopuluwgad ngak Jehovah ngaur ‘amithniged laniyan’ fare Got nib thothup rok yu Israel.’ (Ps. 78:40, 41) Munmun ma ri dabuy Jehovah e re nam nem. Ma ngiyal’ ney e gad ba felfelan’ ko fare maruwel ni yibe weliy ni ngan nang murung’agen Jehovah nge fithingan. Gad ma un ko re maruwel ney ni bochan e ba t’uf rodad ma gad baadag ni ngan thothupnag fithingan. Dabiyog ni nge dab da weliyed ngak e girdi’ e tin riyul’ u murung’agen e Chitamangidad nu tharmiy nge tin nib m’agan’ ngay ni kad nanged. Gad be lem ni bod Paul u nap’an ni yog ni gaar: “Faan mange da gu machibnag ngak e girdi’ e Thin Nib Fel’ ni yib rok Got ma ri gu ra gafgow!”—1 Kor. 9:16.
5. Uw rogon ni nge mich Jehovah u wan’uy e ba peth ko ngan tayfan?
5 Fare psalmist ni David e gaar: “A Jehovah, piin ni yad manang fithingam e ra pagan’rad ngom ya ri dab mu pag e piin ni be gayem.” (Ps. 9:10, NW) Faanra riyul’ ni gad manang Jehovah ma gad be tayfan fithingan ma ra pagan’dad ngak ni bod e n’en ni rin’ e pi tapigpig rok kakrom. Faanra be pagan’dad ngak Jehovah ma ke mich u wan’dad maku ireray reb e kanawo’ ni gad tayfan riy. Mu guy rogon ni be puthuy e Thin rok Got e pagan’ ngak Jehovah nge ngan tayfan. Nap’an ndaki pagan’ yu Israel ngak Jehovah, me fith ngak Moses ni gaar: “Uw n’umngin nap’an ni nge par e pi girdi’ ney ni yad be darifannigeg? Uw n’umngin nap’an ni nguur pired ndaburad ni nge pagan’rad ngog, ni yugu aram rogon ni ke pire’ bogi maang’ang ni kug ngongliy u fithik’rad?” (Num. 14:11) Faanra pagan’dad ngak Jehovah nra yororiydad ma ra ayuwegdad u nap’an nra yib e skeng ngodad ma aram e gad be dag ni gad be tayfan.
6. Mange ra k’aringdad ni ngar da ted fan Jehovah?
6 I yog Jesus ni rogon ni ngan tayfan Jehovah e thingari yib u gum’irchadad. U nap’an ni be non Jesus ngak e piin nder ma pigpig ngak Jehovah u fithik’ e yul’yul’, me sul u daken e thin rok Jehovah ni gaar: “Pi girdi’ ney e yad be ta’ fag ko thin ni yad be yog, machane rib mal’af lanin’rad rog.” (Matt. 15:8) Tayfan ngak Jehovah nib gel e ma sum ko t’ufeg nib riyul’. (1 John 5:3) Maku dabda paged talin e n’en ni ke micheg Jehovah ni gaar: “Bay gu tayfan e piin ni yad be tay fag.”−1 Sam. 2:30.
Piin Ma Yog e Thin e Yad Ma Tayfan e Girdi’
7. (a) Mang fan ni walag ni pumoon ni ma yog e thin u lan e ulung e ngar ted fan e pi walag ni yad be ayuweg? (b) Uw rogon ni dag Paul e tayfan ngak pi walagen u lan e ulung?
7 I fonownag apostal Paul e Kristiano ni gaar: “Nge pasigan’med ngay ni nge bigimed mi i ta’ fan bigimed.” (Rom. 12:10) Pi walag ni pumoon ni ma yog e thin u lan e ulung e thingar ra daged ni yad be tayfan e girdi’ u lan e ulung ni—‘nge pasigan’rad ngay’—ni ngar daged e tayfan ngak e piin yad be ayuwegrad. Pi cha’ nem e thingar ra folgad ko tin ni i rin’ Paul. (Mu beeg e 1 Thessalonika 2:7, 8.) Pi walag u lan e pi ulung ni yan Paul i guyrad e yad manang ndabiyog Paul ban’en ngorad ni ngar rin’ed ni ir rok ma dabun ni nge rin’. I dag Paul e tayfan ngak e pi walag u lan e ulung mu kur ted fan. Nap’an ni gaar Paul: “Gu be wenig ngomed ni ngam folwokgad rog,” ma gad manang ni boor e girdi’ ni kar folgad riy ya ba fel’ e ngongol ni i dag ngorad.—1 Kor. 4:16.
8. (a) Mang reb e kanawo’ nib ga’ fan ni i dag Jesus riy ni be tayfan pi gachalpen? (b) Uw rogon ni nge fol e piin piilal rok Jesus e ngiyal’ ney?
8 Reb e kanawo’ nra dag reb e walag ni ma yog e thin u lan e ulung e tayfan riy ngak e piin ni be ayuwegrad e nge yog ngorad fan ni ke yog ban’en ngorad ni ngar rin’ed. Ra rin’ ni aram rogon ma be folwok rok Jesus. Ni bod ni, nap’an ni yog ngak pi gachalpen ni ngar yibilayed nge yoor e pi ta mokun woldug me weliy Jesus fan ni gaar: “Woldug ni ngan kunuy ngan tay nga naun e ba ga’ ni ba ga’ yang, machane piin ni ngar maruweliyed nge thap nga naun e ba lich. Mu yibilgad ngak e en ni ir e suwon e re woldug nem ngki pi’ boch girdien e maruwel ngar maruweliyed e re woldug rok nem nge thap nga naun.” (Matt. 9:37, 38) Ku nap’an ni yog ngak pi gachalpen ni ngar, ‘fal’eged rogorad ngar pired’ me weliy ngorad fan ni gaar: “Ya da mu nanged e chirofen ni bay yib e Somol romed riy.” (Matt. 24:42) Boor yay ni gathi kemus ni i yog Jesus ngak pi gachalpen e n’en ni ngar rin’ed ya ki yog ngorad fan ni ngar rin’ed. Aram rogon ni dag ni be tay farad. Rib fel’ ni nge fol e piin piilal rok!
Mu Tayfan e Ulung rok Jehovah nge Rogon ni Be Pow’iyey
9. Gad ra tayfan e ulung ko Kristiano u ga’ngin yang e fayleng nge piin ni piilal ni bay riy ma gad be dag ni ku gad be tayfan mini’? Mu weliy.
9 Ra ngad ted fan Jehovah, ma kub t’uf ni ngad ted fan e ulung ko Kristiano u ga’ngin yang e fayleng, nge piin ni ma yog e thin riy. Gad ra fol ko fonow ni ma pi’ fare tapigpig nib yul’yul’ mab gonop ma aram e gad be dag ni gad be tayfan e yaram rok Jehovah. U lan e ulung ko Kristiano ko bin som’on e chibog, me guy apostal John nib t’uf ni ngan togopuluw ngak e piin ndar ted fan e piin ni kan tayrad ni ngar ayuweged e ulung. (Mu beeg e 3 John 9-11.) Thin rok John e be dag ni bay boch e girdi’ ni gathi kemus ndar ted fan e piin piilal ni bagayad nge bagayad ya kur darifannaged e machib rorad nge thin ni u rogned ko ulung. Bfel’ ya oren e Kristiano e ngiyal’ nem e gathi aram rogorad. Nap’an ni kab fas e pi apostal, ma walag ni gubin e ba gagiyel ni ur daged e tayfan ngak e piin ni u rogned e thin ko ulung.—Fil. 2:12.
10, 11. Mu weliy rogon ni bay ko Bible fan ni bay boch e girdi’ u lan e ulung ni kan pi’ mat’awrad ni nga u rogned e thin.
10 Boch e girdi’ e ka rogned ni bochan ni yog Jesus ngak pi gachalpen ni gaar, “gimed gubin nra bigimed ma walagen bigimed,” ma susun ndariy be’ u lan e ulung ni yira tay ni ir e nge yog e thin u lan e ulung. (Matt. 23:8) Machane, Bible ni polo’ e boor e thin riy ni be dag ni boor e girdi’ kakrom ni pi’ Got mat’awrad ni nga rogned e thin u lan e ulung. Chepin e pi patriarchs nge pi tapuf oloboch nge pi pilung rok piyu Hebrew e be micheg ni yog Jehovah e pi n’en ni baadag ni ngar rin’ed u l’ugun boch e girdi’. Nap’an ni darifannag e girdi’ e pi cha’ nem ni kan dugliyrad, me gechignagrad Jehovah.—2 Ki. 1:2-17; 2:19, 23, 24.
11 Maku arrogon e piin Kristiano ko bin som’on e chibog ni ka ur ted fan mat’awun fapi apostal. (Acts 2:42) Bod ni yog Paul e pi n’en ni nge rin’ boch i walagen. (1 Kor. 16:1; 1 Thess. 4:2) Machane ki m’agan’ ngay ni nge fol ko piin ni bay mat’awrad ni nga rogned e n’en nge rin’. (Acts 15:22; Gal. 2:9, 10) Rriyul’ nib tamilang u wan’ Paul fan mat’awun boch e girdi’ ni kan pi’ u lan e ulung ko Kristiano.
12. Mang l’agruw ban’en ni bay u Bible nrayog ni ngad filed murung’agen?
12 N’en kad filed e l’agruw ban’en ni bay riy. Bin som’on e ba puluw ko Bible ni “fare tapigpig nib yul’yul’ ma ba gonop” u daken e Governing Body e ngar ted e pumoon ko liw ni ngar maruwelgad riy, ma boch e pumoon e ngan dugliyrad ni ngar gagiyegniged boch e pumoon ni kan dugliyrad. (Matt. 24:45-47; 1 Pet. 5:1-3) Bin l’agruw, gadad gubin nib muun ngay e piin ni kan pi’ mat’awrad ni nga rogned e thin u lan e ulung e thingar da ted fan e piin ni bay rogorad ni nga rogned e thin ngodad. Ere mang boch e kanawo’ ni ngad ted fan riy e piin ni kan pi’ mat’awrad ni nga rogned e thin u lan e ulung ko Kristiano u fayleng ni ga’ngin?
Ngan Tayfan e Piin Ma Lekag e Ulung
13. Uw rogon ni ngad ted fan e piin ma lekag e ulung ko Kristiano e ngiyal’ ney?
13 Yog Paul ni gaar: “Gamad be wenig ngomed, pi walagmad ni girdien Kristus, ni ngam tiyed fan e piin ni yad be maruwel u fithik’med, ni piin ni ke mel’egrad Somol ni ngar pow’iyed gimed mi yad fonownagmed. Ngari mu ted farad mi gimed t’ufegrad ni bochan e maruwel ni yad be rin’. Mu um pired nib fel’ thilmed.”(1 Thess. 5:12, 13) Piin ma lekag e ulung e yad ba muun ko “piin ni yad be maruwel” nib gel. Ere ngad “ted farad” nib gel. Reb riy e ngad folgad ko fonow ni yad ma pi’ ngodad u fithik’ e yul’yul’. Nap’an nra yog e pi cha’ nem e thin ni yib rok fare tapigpig nib yul’yul’ mab gonop, ma “fare gonop ni yib u tharmiy” e ra k’aringdad ni ngad ‘folgad’ riy.—Jas. 3:17.
14. Uw rogon ni nge dag girdien e ulung nri yad be tayfan e piin ma lekag e ulung, ma mang angin?
14 Machane uw rogon ni faanra ka nog ngodad ni ngad rin’ed ban’en nib thil ko tin ni gad ma rin’? Ra ngan dag e tayfan ma yu ngiyal’ e thingar dab da togopuluwgad nga dogned ni, “Gathi ireray e n’en ni gamad ma rin’ u roy” ara nga dogned ni, ‘Sana ra fel’ e re n’ey u bang ma dabi fel’ u lan e ulung romad.’ Danga’, ya ngad athamgilgad ni ngad folgad. Gad ra lemnaged ni fare ulung e fen Jehovah me Jesus Lolugen ma ra ayuwegdad ni ngad sumunguygad. Nap’an nra yog e en ma lekag e ulung e thin ni nge rin’ e ulung mar folgad riy u fithik’ e felfelan’, ma ireray e mich riy nri yad be tayfan. Yog apostal Paul ngak e pi walag nu Korinth nib fel’ e n’en ni kar rin’ed ya kar folgad ko thin ni ke yog Titus ngorad u fithik’ e tayfan. (2 Kor. 7:13-16) Ngiyal’ n’ey, e ku rayog ni nge pagan’dad ni gad ra fol ko thin ni yog e piin ma lekag e ulung ma ra gelnag e felfelan’ rodad u nap’an ni gad be wereg e machib.—Mu beeg e 2 Korinth 13:11.
“Mi Gimed Ta’ Fan Urngin e Girdi’”
15. Mang boch e kanawo’ ni ngad ted fan pi walagdad riy u lan e ulung?
15 Yoloy Paul ni gaar: “Dab mu puwan’ ngak be’ nib moon ni be’ ni ke pilibthir, machane ngam wenig ngak ni gowa ir e chitamam. Ma rogon e ngongol rom ni nguum tay ngak e piin ni pumoon ni ka yad ba pagel e nguum rin’ ngorad ni gowa yad pi walagem, ma ku er rogom ngak e piin ni puwelwol ni gowa yad pi chitinam, ma ku er rogon e ngongol rom ngak e piin nrugod ni ngar pired ni gowa yad pi walagem ni ppin nib machalbog lanin’um ngorad. Mu ta’ fan e piin ni ppin ni ke yim’ figirngirad, ni piin nri dariy be’ ni be ayuwegrad.” (1 Tim. 5:1-3) Arrogon, Thin rok Got e be fonownagdad ni ngad ted fan urngin e girdi’ u lan e ulung. Ere uw rogon nfaanra dabi taareban’mew reb e walag ni pumoon ara ppin nga ban’en? Dab kum tayfan ni bochan e re magawon nem, fa? Ara ga ra thilyeg e lem rom ngam lemnag fel’ngin nib fel’? Piin ma yog e thin u lan e ulung e thingar ra pared ngaur sapgad ngak e pi walagrad u fithik’ e tayfan ma dab ra ‘guyed rogon ni ngar suweyed e piin ni kan pi’rad ngorad ni ngar gafaliyed yad.’ (1 Pet. 5:3) Riyul’ ni lan e ulung ko Kristiano ni t’ufeg nriyul’ e ke mang pow rorad, e boor tapgin nra bagadad ma nge tayfan bagadad.—Mu beeg e John 13:34, 35.
16, 17. (a) Mang nib ga’ fan ni gathi kemus ni piin ni gad be machibnag e ngad ted farad ya ku arrogon e piin ma togopuluw? (b) Uw rogon ni ngad “ted fan urngin e girdi’”?
16 Riyul’ ni gathi kemus ni girdien e ulung ko Kristiano e ngad ted farad. Yol Paul ngak e Kristiano ni gaar: “Urngin ngiyal’ nra puf rogodad ma ngad ngongliyed e ngongol nib fel’ ngak urngin e girdi’.” (Gal. 6:10) Riyul’ nib mo’maw’ ni ngan dag e re ngongol ney nfaanra girdi’ ni gadad nga maruwel ara girdi’ ni gadad nga skul e yad ma dag e ngongol nib kireb ngodad. Ngiyal’ ni aram rogon e ba t’uf ni ngad lemnaged e thin nu Bible ni gaar: “Kireb ni be ngongliy e girdi’ ni kireb e dab mpag nge wagageynag lanin’um.” (Ps. 37:1) Gad ra fol ko re fonow ney ma ra ayuwegdad ni ngad ted fan e piin ma togopuluw. Maku, gad ra gum’an’ u nap’an ni gad be wereg e machib, ma ra ayuwegdad ni ngad pied e fulweg ko n’en nra fith be’ ngodad u fithik’ e gol ngu fithik’ e tayfan nib gel. (1 Pet. 3:15) Ki mada’ nga yaadad nge munmad rodad ma ra micheg ni gad be tayfan e piin ni gad be machibnag.
17 Riyul’ ni nap’an ni gad bay u charen girdien e ulung rodad ara girdi’ ni gathi yad bang ko ulung rodad ma gad baadag ni ngad athamgilgad ni ngad folgad ko fonow ni gaar: “Mi gimed ta’ fan urngin e girdi’, ma nge t’uf romed e pi cha’ ni gimed ni ke mich Got u wan’rad, nge yib madgun Got u wan’med, mi gimed ta’ fan e en ni ir e pilung ni ga’.”—1 Pet. 2:17.
Uw Rogon ni Ga Ra Fulweg?
Uw rogon ni ngam tay fan:
• Jehovah?
• Piin piilal nge piin ma lekag e ulung?
• Girdien e ulung ni be’ nge be’?
• Piin ni ga be machibnagrad?
[Picture on page 23]
Kristiano ko bin som’on e chibog e ur ted fan rogon ni i ayuwegrad fare governing body
[Picture on page 24]
Piilal ko ulung ni Kristiano u gubin yang e yad ma tayfan e piin ma lekag e ulung ni fare Governing Body e dugliyrad