PI N’EN NI MA RIN’ E PIIN KRISTIANO
Gad Ra Fol u Rogon ni Ma Yal’uwegdad Jehovah Ma Aram e Gad Be Dag e T’ufeg
Fare yaram ni ngan tharbog be’ ko ulung e ma ayuweg e ulung, maku ma yal’uweg e piin kar denengad ndar kalgadngan’rad. (1Ko 5:6, 11) Nap’an ni gad ra fol ko biney e kanawo’ ni ma yal’uwegdad Jehovah riy, ma aram e gad be dag e t’ufeg. Machane, uw rogon ni nge m’ug ni gad be dag e t’ufeg ni faanra re yaram ney ni ngan tharbog be’ ko ulung e ma k’aring e amith nga laniyan’ e piin bay rogorad ngay, nib muun ngay e girdi’ rok facha’ ni kan tharbog nge fa dalip i piilal ni kar dugliyed ni ngan rin’ e re n’ey?
Bin th’abi ga’ fan riy e, gad be dag nib ga’ fan thin Jehovah u wan’dad nge pi motochiyel rok u rogon ni ngan par ni yib thothup. (1Pe 1:14-16) Ku gad be dag nib t’uf faen ni kan tharbog rodad. Yira yal’uweg be’ ni ke oloboch ma rayog ni nge kireban’ ngay, machane angin nra yib riy e aram e ra ‘gapas laniyan’ ma ra yal’uw pangin u mit Got.’ (Heb 12:5, 6, 11) Faan gad ra chag ngak be’ ni kan tharbog ko ulung ara be’ ni ke yog ni ngan chuweg fithingan ko ulung, ma aram e gad be togopuluw nga rogon ni be yal’uweg Jehovah faanem. Dab da paged talin nib “mat’aw rogon” ni ma yal’uweg Jehovah e girdi’ rok. (Jer 30:11, BT) Gad be athapeg ni faen kan tharbog e nge sul ngak e Chitamangidad ni ma runguydad. Machane nap’an ni gad be sonnag e re n’ey ni nge buch, ma ngad ululgad ngad folgad u rogon ni ma yal’uwegdad Jehovah, ma gad rin’ e tin nib t’uf ni ngad rin’ed ya nge yag ni par e tha’ u thildad Jehovah nib gel.—Isa 1:16-18; 55:7.
NGAN YALIY FARE VIDEO NI KENGGIN E MAINTAIN LOYALTY WITH A UNIFIED HEART, NGEMU’ MIN PI’ E FULWEG KO PI DEER NI BAARAY:
Uw rogon ni ma amith laniyan’ e piin gallabthir ni Kristiano u nap’an nra digey reb i fakrad Jehovah?
Uw rogon nrayog ni nge ayuweg e pi walag u lan e ulung e tin ka bay i girdien fare tabinaw ni yad ba yul’yul’?
Mang reb e ban’en ni kan weliy u Bible ni be tamilangnag feni ga’ fan ni nge m’on e yul’yul’ rodad ngak Jehovah ko yul’yul’ rodad ngak chon e tabinaw rodad?
Uw rogon ni ngad daged nib m’on e yul’yul’ rodad ngak Jehovah ko yul’yul’ rodad ngak chon e tabinaw rodad?