Mu Ulul i Fanay e Pi Magazine Rodad

Ka nap’an e duw ni 2018, ma pi magazine rodad ni gad ma wereg ko girdi’ ni yoor e kan ngongliy nra ba ken ma taa ban’en e be weliy murung’agen. Gubin e pi magazine ney nib muun ko fare Tafen Talin e Maruwel ni Yima Fil Ban’en Riy ko Girdi’. Ere rayog ni ngad fanayed u nap’an e machib. Ku rayog ni ngad feked e pi magazine ney ni ngad pied ko girdi’ u nap’an ni gad be milekag, ara nap’an ni ka darod nga kantin. Darud fanayed e pi magazine ney ni ngad filed e Bible riy ngak e girdi’, machane rayog ni nge k’aring be’ ni nge adag ni nge fil murung’agen Got.

Tomuren ni kam nonow be’ ma kam beeg reb e thin nu Bible ngak, mag weliy ban’en ni bay u ba ken e magazine rodad nra adag ni nge nang murung’agen. Bod ni, faanra bay e tabinaw rok ara be athamgil u fithik’ e kireban’ ara mochuch ni be tay, ma rayog ni nge lungum ngak: “Kafin gu beeg reb e article nib manigil u murung’agen e re n’ir. Rayog ni nggu dag ngom?” Faanra ga be lemnag ni baadag facha’, ma rayog ni ngam pi’ ba ken e re magazine nem ngak ara mu pi’ e link riy ngak u online. Rayog ni ngan rin’ e re n’ey ni yugu aram rogon ni aram e yay nsom’on ni kan mada’nag be’. Yugu aram rogon ni gathi kemus ni gad be nameg ni ngan pi’ e babyor ko girdi’, machane pi magazine ney e rayog ni nge ayuwegdad ni ngad pirieged e piin nib m’agan’rad ngay ni ngar folgad ko n’en ni kar filed.​—Ac 13:48.

2018

2019

2020