Chon Mini’ e Ra Adag e Re N’ey?

1. Nap’an ni gad ra beeg Fare Wulyang ko Damit ara Awake! ma mang e gad ra lemnag, ma mang fan?

¹ Fare Wulyang ko Damit nge Awake! e ni ngongliy ni yibe lemnag e girdi’ u ga’ngin yang e fayleng. Ere, boor ban’en ni be weliy e pi article ney murung’agen. Ma nap’an nra beeg reb e walag e birok e babyor, mab fel’ ni nge lemnag ko mini’ e piin ni yad ra adag ni ngar beeged.

2. Mang boch ban’en ni bay ko pi babyor rodad ni baadag e girdi’ ni ngar nanged murung’agen?

² Bay ban’en ko Wulyang ko Damit ni be weliy murung’agen reb e chep nu Bible ni kaam weliyew e en ni gimew ma maruwel u taabang? Bay reb e re babyor nem ni be weliy murung’agen e tabinaw nrayog ni nge ayuweg reb e girdi’ rom? Bay be’ ni ga manang ni be lemnag ni nge yan nga reb e nam ko chur, ma bay murung’agen e re nam nem ko Awake!? Bay e siyobay ara maruwel ko am ko binaw rom nra adag reb fare magazine? Ni bod nrayog ni nge adag reb e nursing home ni ngar beeged e magazine ni be weliy murung’agen e pi magawon ni ma mada’nag e piin pilibthir. Ofis ko Police e dabisiy ni yad baadag ni ngar beeged e pi magazine ni murung’agen e piin ni yad be th’ab e motochiyel ko am.

3. Mu weliy reb e ban’en ni ke buch ni be m’ug riy feni rib ga’ fan ni ngan pi’ e pi magazine ngak e piin nib t’uf rorad.

³ Angin ni ke yib: U Tomuren ni ke yag fare Awake! ni kenggin e “How to Raise Responsible Children” ko pul ni October 2011, ngak ba wu’ i mabgol u South Africa mar callnigew 25 e skul ko binaw rorow. Reliw’ nge l’agruw e skul e ra feked e pi babyor nem mar pied ngak e bitir ko fare skul. Ku bay ba wu’ i mabgol ni ku aram e n’en ni kar rin’ew. Pi sensey u reb e skul e kar dugliyed ni ngar fanayed fare magazine ni nge ayuwegrad u rogon ni ngar skulnaged e bitir. Fare wu’ i mabgol e kar weliyew e re n’em ngak e circuit overseer rorow. Ma aram me pi’ e athamgil ngak e pi ulung ko fare binaw rok ni ngkur pied boch e babyor ko pi skul rorad. Boor e girdi’ ni ka rogned ko fare branch ofis ni yad baadag ni nge yag ba ken e re magazine nem ngorad. Mab t’uf ni ngkun fal’eg boch.

4. Mang fan ni gad baadag ni ngad wereg fare magazine ngak gubin e girdi’?

⁴ Pi magazine rodad e ma weliy fan ni ma buch boch ban’en e ngiyal’ ney nge thin nu Bible ni ngan guy nge murung’agen Gil’ilungun Got. Kemus e pi babyor u ga’ngin yang e fayleng ni be weliy “murung’agen e yafas.” (Isa. 52:7) Ere, aram fan ni gad baadag ni ngad pied e pi babyor ney ngak gubin e girdi’. Reb e kanawo’ nrayog ni ngam rin’ e re n’ey riy e ngam fithem, ‘Mini’ e ra adag ni nge beeg e re magazine ney?’