Ngad Pininged e Magar ngak Got nge Kristus ko Puf Rogon Nra Yag Ngodad Boch Nga M’on

Mang boch e magawon ni ga ma mada’nag u reb e rran ngu reb? Gur reb i lolugen e tabinaw ni ga be athamgil ni ngam yognag e tin nib t’uf ko tabinaw rom, fa? Gur reb e gallabthir ni yigoo gur ni ga be ayuweg e tabinaw rom, fa? Gur reb e fel’ yangaren ma bay boch e bitir u skul rom ni be rin’ boch ban’en ni be k’aring e marus ngom ara yibe gafgownagem, fa? Gur be’ ni gab m’ar ara kam pilibthir, fa? Gad gubin ni bay e magawon rodad. Ma boch e Kristiano e yad be athamgiliy boor e magawon ni taab yay. Machane gad manang ndab ki n’uw nap’an ma yira chuweg e magawon rodad.​—2Ko 4:16-18.

Machane chiney ni gad be sonnag e re ngiyal’ i n’em, e be pagan’dad ni bochan e gad manang ni manang Jehovah e magawon ni gad be yan u fithik’, mab ga’ fan u wan’ e athamgil nge yul’yul’ ni gad be tay, ma ra tow’athnagdad boch nga m’on. (Jer 29:11, 12) Mus ngak Jesus nib ga’ fadad u wan’ ma ma lemnagdad. Ere nap’an ni gad ra rin’ e maruwel nib milfan ngak e piin Kristiano, ma ke micheg Jesus ngodad ni gaar: “Gubin ngiyal’ ma gu ba’ romed.” (Mt 28:20) Nap’an ni gad ra tal ngad fal’eged i lemnag e puf rogon nra yag ngodad u tan Gil’ilungun Got, ma ra gelnag e pagan’ rodad ko athap rodad boch nga m’on, nge rogon ni ngad athamgilgad u fithik’ e magawon rodad.​—Ro 8:19-21.

NGAN YALIY FARE VIDEO NI AS THE STORM APPROACHES, MAINTAIN YOUR FOCUS ON JESUS!​—FUTURE KINGDOM BLESSINGS, NGEMU’ MIN PI’ E FULWEG KO PI DEER NEY:

• Mang e ke rin’ ma daki fel’ e tha’ u thildad Got, ma mang wenegan ni yib riy?

• Mang athap e bay ni fan ngak e piin yad ba yul’yul’ ngak Jehovah?

• Uw rogon nra yag e biney e athap ngodad boch nga m’on?

• Mang boch e tow’ath nri ga be athapeg boch nga m’on?