Reference ko Fare Babyor ni Tin Gad Ma Rin’ nge Machib Rodad
© 2024 Watch Tower Bible and Tract Society of Pennsylvania
MAY 6-12
TIN NIB GA’ FAN KO THIN ROK GOT PSALMS 36-37
“Kireb ni Be Ngongliy e Girdi’ ni Kireb e Dab Mpag Nge Wagageynag Lanin’um”
Mang e Ra Chuw u Nap’an Nra Yib Gil’ilungun Got?
4 Uw rogon ni be magawonnagdad e girdi’ nib kireb e ngiyal’ ney? Tomuren ni yog apostal Paul nra taw ko ngiyal’ ney ma ra “mo’maw’” e par, ma aram min thagthagnag nga laniyan’ ni nge yoloy ni gaar: “Girdi’ nib kireb nge piin ni yad be dake girdien Kristus e bayi gel farad kireb.” (2 Tim. 3:1-5, 13) Kam guy e pi thin ney ni ke riyul’, fa? Boor i gadad e be gafgow u pa’ e piin ni yad ma gafgownag yugu boch e girdi’, nge piin ni yad ma sap nga but’ ngak e piin nib thil ramaen dowrad ara nam rorad, nge girdi’ ni kireb ni yad ma rin’ boch e ngongol nib kireb nib togopuluw ko motochiyel. Boch e pi girdi’ ney e darur mithaged e kireb ni yad ma rin’; machane boch i yad e ma guy rogon ni nge mithag e ngongol nib kireb ni be rin’. Bayi n’en mu ur dake yad be ayuweg e girdi’, machane bin riyul’ riy e yad ba kireb. Mus ni faanra dawori gafgownagdad e pi girdi’ ney, machane ku ma magawonnagdad e kireb ni yad ma rin’. Ri gad ma fanenikan e pi kireb ni gad ma rung’ag ni yad ma rin’. Kub ga’ ni gad ma rus u nap’an ni gad ra rung’ag rogon e gafgow ni yad be tay ko bitir, nge pilibthir, nge boch e girdi’ ndabiyog ni ngar ayuweged yad u pa’ e pi girdi’ ney. Pi girdi’ ney e ke taareb rogon e ngongol rorad ko gamanman ni maloboch ara pi moonyan’. (Jas. 3:15) Machane, gad ba felfelan’ ni bochan e be yog e Thin rok Jehovah ni bay e athap rodad.
Ma Tow’athnag Jehovah e Piin Yad Ma N’ag Fan e Kireb
10 Gad ra par ni gad ba damumuw ma gadad e gad ra gafgow. Damumuw e bod ban’en nib tomal ni gad be fek, ma baadag Jehovah ni ngad thamiyed e gapas ni ma yib ngak e piin yad ma tal ndab kur damumuwgad. (Mu beeg e Efesus 4:31, 32.) Be yog ngodad ‘ndab da damumuwgad; ma dabi yib e puwan’ ngodad!’ (Ps. 37:8) Faan gad ra fol ko re fonow ney, ma ra ayuwegdad. Gad ra par ni gad ba damumuw ngak be’ ni ke kirebnag lanin’dad, ma rayog ni ngad k’aringed e m’ar ngodad miki magawonnag lanin’dad. (Prov. 14:30) Maku reb e, gad ra par ni gad ba damumuw ngak be’ ma dabi gafgow facha’ ni taareb rogon ni faan gad ra unum ban’en ni bay e yub riy, maku dariy ban’en nra buch rok. Machane, nap’an ni gad ra n’ag fan e kireb rok yugu boch e girdi’, ma gadad e ra yib angin ngodad. (Prov. 11:17) Ra gapas lanin’dad nge gum’ircha’dad me yag ni ngad ululgad ko pigpig rodad ngak Jehovah.
“Ngari Falan’um Ngak Jehovah”
20 Ma, “piin nib sobut’an’rad e yad ra tafanay e fayleng.” (Psalm 37:11a) Machane mini’ e “piin nib sobut’an’rad”? Fare bugithin ni kan thiliyeg ni “sobutan’”, i yib ko likngin fan ni “ngan gafgow, sobut’, ngan tamra’nag.” Arrogon, “piin nib sobut’an’rad” e yad e piin yad be sonnag Jehovah u fithik’ e sobut’an ni nge yal’uweg urngin ban’en nde mat’aw ni kan pi’ ngorad. “Ma ur pired u fithik’ e gapas ni yad be falfalan’.” (Psalm 37:11b) Mus ko chiney gad ra pirieg e gapas ni boor u lan e paradis nib spiritual nib peth ko ulung ko tin riyul’ e Kristiano.
Ngan Fil Ban’en Riy
it-2-E 445
Burey
Ba mudugil, ara ra par ndariy n’umngin nap’an, ara ba tolang. Yima fanay fare bugithin nib mudugil nge ra par ndariy n’umngin nap’an u nap’an ni yibe weliy murung’agen e pi burey. (Isa 54:10; Hab 3:6; mu taarebrogonnag ko Ps 46:2.) Ere nap’an ni yog fare psalmist ni feni mat’aw Jehovah e bod e “burey rok Got” (Ps 36:6, NW) ma rayog ni be yip’ fan nrogon feni mat’aw Jehovah e dabi thil. Fa reb e bochan nib tolang e pi burey, ma aram e rayog ni be yip’ fan nrogon feni mat’aw Got e rib thil nga rogon feni mat’aw e girdi’. (Mu taarebrogonnag ko Isa 55:8, 9.) Be weliy e Revelation 16:20 murung’agen fa bin medlip e plet ni bay e damumuw rok Got riy ni yira puog nga daken e fayleng ni gaar: “Urngin e burey ni yan nga bang.” Re n’ey e be yip’ fan ni mus ko tin th’abi tolang ban’en ni bod e burey ndabiyog ni nge thay ko damumuw rok Got.—Mu taarebrogonnag ko Jer 4:23-26.
MAY 13-19
TIN NIB GA’ FAN KO THIN ROK GOT PSALMS 38-39
Dabi Magawon Lanin’um nib Pag Rogon ko Kireb ni Ka Um Rin’
“Mu Dugliy e Changar Rom” ko Pi N’en Bay Nga M’on
12 Mu beeg e 1 John 3:19, 20. Gad gubin ni bay yu ngiyal’ ni ma magawon lanin’dad ni bochan e kireb ni kad rin’ed. Bod ni bay boch e girdi’ ni ma magawon lanin’rad ni bochan e kireb ni ur rin’ed u m’on ni ngar filed e tin riyul’. Ma boch e ma magawon lanin’rad ni bochan e kireb ni kar rin’ed u tomuren ni kar uned ko taufe. (Rom. 3:23) Riyul’ ni gad baadag ni ngad rin’ed e tin nib mat’aw. Machane “gadad gubin ni ba ga’ ni gadad ma oloboch.” (Jas. 3:2; Rom. 7:21-23) Yugu aram rogon ndubdad ni nge magawon lanin’dad ni bochan e kireb ni kad rin’ed, machane bay yu ngiyal’ nib fel’ ni ngaud lemgad ni aram rogon. Mang fan? Bochan ni faanra i magawon lanin’dad ni bochan e kireb ni kad rin’ed, ma ra k’aringdad ni ngad yal’uweged e kireb rodad ma gad dugliy u wan’dad ndab kud rin’ed bayay.—Heb. 12:12, 13.
13 Machane rayog ni nga i magawon lanin’dad nib pag rogon ni bochan e kireb ni ud rin’ed ni yugu aram rogon ni kad kalgadngan’dad ma ke n’ag Jehovah fan rodad. Re n’ey e rayog ni nge gafgownagdad. (Ps. 31:10; 38:3, 4) Ni uw rogon? Am lemnag e n’en ni buch rok reb e walag nib pin ni bochan e i par ni be lemnag e kireb ni i rin’ kafram. I gaar: “Ug lemnag ndakuriy fan ni nggu tiyan’ug ko pigpig ni gu be tay ngak Jehovah ni bochan e sana dabki yag e yafos ngog.” Boor i gadad e sana ma lem ni aray rogon. Ere rib t’uf ni ngad kol ayuwgad ndab ud pared ni be magawon lanin’dad ko kireb ni ud rin’ed kafram. Mang fan? Bochan nra felfelan’ Satan ni faan gad ra tal ko pigpig ngak Jehovah ni yugu aram rogon ni ke n’ag fan e kireb rodad!—Mu taarebrogonnag ko 2 Korinth 2:5-7, 11.
w02-E 11/15 20 ¶1-2
Uw Rogon ni Nge Yib Fan e Yafos Rodad u Wan’ Jehovah?
BOD nib ngoch nap’an e yafos rodad. Nap’an ni fal’eg i lemnag David ni fare psalmist e re n’ey, ma aram me meybil ni gaar: “Somol, bu uw n’umngin nap’an ni ngkug par ni gub fos? Wuin e nggum’? Mog ngog ko uw feni ke chugur ni nge mus e yafos rog.” Ka rim ngochnag nap’an e yafos rog! Dariy n’umngin nap’an e yafos rog u puluwom.” Baadag David ni nge rin’ e n’en nib m’agan’ Got ngay u daken e thin nge ngongol rok. I weliy rogon ni be taga’ ngak Got u nap’an ni gaar: “Gur e ke l’agan’ug ngom.” (Psalm 39:4, 5, 7, BT) I motoyil Jehovah ngak. I yaliy rogon e tin ni i rin’ David, me tow’athnag.
Ba mom ni nge yoor pa’ u puluwdad. Re n’ey e rayog ni nge k’aring e magafan’ ngodad nib ga’ ni faanra boor ban’en ni ngad rin’ed mab lich e tayim ni ngad rin’ed riy. Gad ma lem ni bod David ni aram e ngaud ngongolgad u reb e kanawo’ nra m’agan’ Got ngay, fa? Ma fal’eg Jehovah i yaliydad ni be’ nge be’. Sogonap’an 3,600 e duw ni ke yan me yog Job ni ir be’ ni bay madgun Got u wan’ ni manang Jehovah urngin e tin ma rin’ ma be guy urngin yay ni be yif ay. I fith Job ni gaar: “Faan mang e yib Got ni nge pufthinnigeg, ma mang e gu ra yog?” (Job 31:4-6, 14) Rayog ni nge yib fan e yafos rodad u wan’ Got ni faan gad ra m’oneg e tirok ban’en u wan’dad, ma gad be fol ko pi motochiyel rok, ma gad be maruwel ko tayim rodad nib fel’ rogon. Ere chiney e ngad weliyed murung’agen e pi n’ey.
Mu Fal’eg Bayay e Tha’ u Thilmew Jehovah
Um meybil ngak Jehovah ni gubin ngiyal’. Manang e Chitamam ni bay u tharmiy ni faanra um par ni ga be lemnag e kireb ni um rin’, ma rayog ni nge mo’maw’ ngom ni ngam meybil ngak. (Rom. 8:26) Machane ‘um meybil ni gubin ngiyal’’ ni ga be yog ngak Jehovah gelngin nri ga baadag ni ngam mang fager rok. (Rom. 12:12) I yog Andrej ni gaar: “Ug par ni yug gu be lemnag e kireb ni kug rin’ ma gu be tamra’ ngay. Machane gubin yay ni gu ra meybil, me war boch e re lem ney rog miki gapas lanin’ug.” Faanra dam nang e n’en nga mog u lan e meybil rom, mag beeg fa gal meybil rok David ni Pilung ni bay ko Psalms 51 nge 65.
Ngan Fil Ban’en Riy
Mu Dag Nrayog ni Ngan Pagan’uy Ngom
16 Faanra gad baadag ni nge pagan’ e girdi’ ngodad, ma rib ga’ fan ni ngaud t’ared lanin’dad. Re fel’ngin ney e ra ayuwegdad ndab dogned ban’en u nap’an ni gad baadag ni nga dogned ban’en ni ke yog be’ ngodad ndab dogned. (Mu beeg e Proverbs 10:19.) Ku rayog ni nge mo’maw’ ngodad ni ngad t’ared lanin’dad u nap’an ni gad be non ngak yugu boch e girdi’ ko Internet. Faanra dab da kol ayuwgad, ma rayog ni nga dogned boch ban’en nsusun e dab nog ngak boor e girdi’ ni gathi lem rodad. Ma nap’an ni yug gad ra weliy murung’agen boch ban’en ko Internet ma dabkiyog ni ngad gagiyegnaged rogon ni yira fanay ara wenegan nra yib nga tomuren. T’ar laniyan’ e ku ra ayuwegdad ndab dogned ban’en u nap’an ni be guy e piin yad be togopuluw rogon ni ngar bannaged gadad ya nga dogned boch ban’en u murung’agen pi walagdad nra tay e yafos rorad nga thatharen e riya’. Rayog ni nge buch e re n’ey u nap’an ni be fith e polis boch e deer ngodad u reb e nam ni kan taleg e machib rodad riy ara kan taleg boch ban’en ko maruwel rodad riy. Ireray e ngiyal’ nrayog ni ngad folgad ko fare kenggin e motochiyel ni be yog ni ngad ‘pared ni dab dogned ban’en.’ Ku bay boch ban’en ni ma buch nrayog ni ngad folgad ko re kenggin e motochiyel ney riy. (Ps. 39:1) Ba t’uf ni ngad daged nrayog ni nge pagan’ urngin e girdi’ ngodad, ndemtrug ko girdien e tabinaw rodad, ara pi fager rodad, ara pi walagdad, ara yugu boch e girdi’. Ma ra ngan pagan’uy ngodad, mab t’uf ni ngaud t’ared lanin’dad.
MAY 20-26
TIN NIB GA’ FAN KO THIN ROK GOT PSALMS 40-41
Mang Fan ni Ngan Ayuweg Yugu Boch e Girdi’?
Ba Felfelan’ e Piin ni Yad Ba Gol
16 Girdi’ nriyul’ ni yad ba gol e darur pied ban’en ko girdi’ ni bochan e yad be lemnag ni nge yag ban’en riy ngorad. I gaar Jesus: “Faan mu ngongliy e mur, ma ga non ngak e piin ni gafgow, nge piin ni marwoth, nge piin ni mugutgut, nge piin ni malmit, ma aram me fal’eg Got waatham; ni fan e dabiyog rorad ni ngar fulweged taban e magar rom.” (Luke 14:13, 14) Ku be gaar e Bible: “Mu gol . . . ma gur e ra fel’ waatham riy.” Ku be ulul ngay ni gaar: “Nge felan’ e piin ma magafan’rad ko piin gafgow.” (Prov. 22:9, BT; Ps. 41:1, BT) Arrogon, susun ni ngad rin’ed e re n’ey ni bochan e gad ra felfelan’ ni faanra ud ayuweged e girdi’.
17 Nap’an ni sul Paul u daken fapi thin ni yog Jesus ni faani gaar, “ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom,” ma gathi be yip’ fan ni kemus ni yigoo chugum e ngaud pied ko girdi’. Ya kub muun ngay ni ngaud pied e athamgil nga lanin’rad, ma gad be pi’ boch e fonow ngorad u lan e Bible, maku gad ayuwegrad ko tin nib t’uf rorad. (Acts 20:31-35) I dag Paul u daken e thin nge ngongol rok rogon ni ngaud golgad u rogon ni gad ma fanay e tayim rodad, nge gelngidad, nge rogon ni gad ma tay e tayim ni fan ko girdi’, nge rogon ni gad ma dag e t’ufeg ngorad.
18 Bay boch e girdi’ ni yad ma gay murung’agen boch ban’en u rogon e ngongol ko girdi’ ni kar pirieged ni faanra ud golgad ko girdi’, ma aram e gad ra felfelan’. Be yog reb e babyor ni “ma yog e girdi’ nib gel e felfelan’ ni yad ma tay u nap’an ni yad ra rin’ boch ban’en nib fel’ ni fan ngak yugu boch e girdi’.” Ku bay boch e girdi’ ni yad ma gay murung’agen boch ban’en ni ka rogned nnap’an ni gad ra ayuweg be’, ma aram e gad ra guy ni ke yib fan e yafos rodad. Aram fan ni ma yog e girdi’ ni llowan’ ni ngad ognaged gadad ni ngad rin’ed boch e maruwel ni ngad ayuweged e girdi’, ya re n’ey e rayog ni nge fal’eg fithik’ i dowdad me yibnag e felfelan’ ngodad. Pi n’ey ni kan weliy murung’agen e susun e dab da gingad ngay ni bochan e Jehovah ni Ir e Sunmiydad e ke yog ni faan gad ra pi’ ban’en ngak be’ ma gad ra felfelan’.—2 Tim. 3:16, 17.
Ra Ayuwegem Jehovah
7 Yugu aram rogon ndakir ngongliy Got e maang’ang e ngiyal’ ney, machane nap’an ni gad ra m’ar ma rayog ni nge fal’eg lanin’dad, me pi’ e gonop ngodad, me ayuwegdad ni bod rogon ni i rin’ ko tin riyul’ e tapigpig rok kakrom. I yoloy David ni Pilung ni gaar: “Nge felan’ e piin ma magafan’rad ko piin gafgow; ya Somol e ra ayuwegrad ko ngiyal’ ni ke yib e oloboch ngorad. I Somol e ra yororiyrad me ayuweg e pogofan rorad.” (Ps. 41:1, 2, BT) Gathi be yog David u roy ni ngiyal’ i immoy riy e faanra i dag be’ ni be lemnag be’ ni ke gafgow ma aram e dabki yim’ facha’. Maku gathi be yip’ fan ni faen ni ke dag ngak facha’ ni be lemnag e ra tay Got nib fas ndab ki yim’ ara nge yag e yafas ndariy n’umngin nap’an ngak. Ya rayog ni be yip’ fan nra ayuweg Got faanem ni ke dag ngak be’ ni be lemnag. Ni uw rogon? I weliy David ni gaar: “I Somol e ra ayuwegrad ko ngiyal’ ni yad ba m’ar nge golnagrad.” (Ps. 41:3, BT) Arrogon, en nra dag ngak be’ ni ke gafgow ni be lemnag faanem e manang ndabi pag Got talin e n’en nib fel’ ni ke rin’ nge yul’yul’ ni ke tay. Maku dowef ko girdi’ ni ke pi’ Got e bay gelngin nrayog ni nge gol ko m’ar ni ir rok.
Mu Folwok rok Jehovah u Rogon ni Ma Dag e Runguy
17 Yugu aram rogon ni gad manang ni bay angin nra yib ngodad ni faan gad ra dag e runguy ngak yugu boch e girdi’, machane gathi ri aram e bin th’abi ga’ i fan ni ngad daged e re fel’ngin ney. Ya bin th’abi ga i fan ni ngad daged e re fel’ngin ney e bochan ni gad baadag ni ngad folwokgad rok Jehovah Got ni Ir e En ni Ke Yib fa gal fel’ngin rok ni t’ufeg nge runguy, ma gad pining e sorok ngak. (Prov. 14:31) Maku reb e, ir e ke dag e bin th’abi fel’ e kanawo’ nrayog ni ngad folwokgad riy. Ere, ngad athamgilgad u rogon nrayog rodad ngad folwokgad rok u rogon ni ma dag e runguy, ya faan gad ra rin’ ni aray rogon ma aram e rayog ni nge chugur e tha’ u thildad pi walagdad nge yugu boch e girdi’.—Gal. 6:10; 1 John 4:16.
Ngan Fil Ban’en Riy
it-2-E 16
Jehovah
Ba ga’ ni be weliy e Bible murung’agen rogon ni ngan tayfan mat’awun e gagiyeg rok Jehovah, ma re n’ey e be tamilangnag e n’en nib m’agan’ Jehovah Got ngay ni aram e ngan tayfan fithingan. Re n’ey e ba muun ngay urngin ban’en ni ka nog nib togopuluw nga fithingan Got. Machane n’en kab ga’ fan e ba t’uf ni nge tay urngin e engel u tharmiy nge girdi’ u fayleng fan e re ngachal ney nib thothup. Re n’ey e be yip’ fan ni nge m’agan’rad ngay ni ngar nanged, mar ted fan e liw rok Jehovah nib tolang, mar adaged ni ngar pigpiggad ngak, mar rin’ed e n’en nib m’agan’ ngay ni bochan e ba t’uf rorad. Meybil ni tay David ngak Jehovah ni bay ko Psalm 40:5-10 e be m’ug riy ni i lem ni aray rogon ma be tayfan fithingan Jehovah. (Mu tay fanam i yan u rogon ni fanay fare apostal yu yang ko re tang ney u nap’an ni be weliy murung’agen Kristus Jesus ko Heb 10:5-10.)
MAY 27–JUNE 2
TIN NIB GA’ FAN KO THIN ROK GOT PSALMS 42-44
Nge Yib Angin Ngom e Skul ni Ma Tay Got Ngodad
Thin ni Baga’ Fan ko Ken ni L’agruw e Babyor ko Psalms
42:4, 5, 11; 43:3-5. Faanra bochan boch ban’en ni dariy ban’en nrayog ni ngad rin’ed ngay ma kad paloggad ko ulung ko Kristiano, ma fare felfelan’ ni ke magey u laniyan’dad u nap’an ni ud chaggad kafram e ku rayog ni ayuwegdad. Sana som’on e ra gelnag e kireban’ rodad, maku rayog ni puguran ngodad ni Got e manaf rodad ma kub t’uf ni ngad sonnaged nge fal’eg laniyan’dad.
w12-E 1/15 15 ¶2
Ngan Adag e Fol Bible ni Yima Tay Me Yib Angin
1 MMEYBIL: N’en ngam rin’ nsom’on e aram e ngam meybil. (Ps. 42:8) Mang fan? Susun e ngad ted ni Thin rok Got ni gad ma fil e aram bang ko liyor rodad. Ere ba t’uf ni ngad weniggad ngak Jehovah ni nge yal’uweg e lem rodad me pi’ gelngin nib thothup ngodad. (Luke 11:13) Barbara ni ir be’ ni ke n’uw nap’an ni ir reb e missionary e yog ni gaar: “Gubin ngiyal’ nug ma meybil u m’on ni nggu beeg ara nggu fil e Bible. Tomuren ma gu ma thamiy ni bay Jehovah rog mab m’agan’ ko n’en nug be rin’.” Meybil ni gad ma tay u m’on ni ngad filed e Bible e ma bing lanin’dad nge gum’ircha’dad ni nge m’agan’dad ko pi n’en gad be fil.
“Dab Mu Pag Paam Nge Ul Nga But’!”
11 Maku reb e, pi muulung, nge assembly, nge convention, nge boch e skul ni gad ma un ngay e aram boch ban’en ni ku ma pi’ gelngidad. Pi n’ey e rayog ni nge ayuwegdad ni ngad pigpiggad ngak Got ni bochan e ba t’uf rodad, ma gad nameg boch ban’en ni fan ko tirok ban’en, ma gad rin’ e n’en nib milfan ngodad ni gadad e piin Kristiano. (Ps. 119:32) Ere, ga baadag ni nge pi’ Jehovah gelngim ko skul ni ma tay ngom, fa?
12 I ayuweg Jehovah piyu Israel ni ngar gelgad ko pi Amalekite nge piyu Ethiopia, me pi’ gelngin Nehemiah nge pi Jew ni ngar mu’naged i toy fare yoror nu Jerusalem. Ere, ku arrogodad nra pi’ Got gelngidad ni ngad ululgad i rin’ fare maruwel ni machib ni yugu aram rogon ni ma magafan’dad nga boch ban’en, ara bay boch e girdi’ ni yad ma togopuluw ngodad, ara dubrad ni ngar motoyilgad ngodad. (1 Pet. 5:10) Darud lemnaged ni nge ngongliy Jehovah e maang’ang ni nge ayuwegdad. Ya ba t’uf ni ngad rin’ed e n’en nib milfan ngodad. Re n’ey e ba muun ngay ni ngaud beeged e Thin rok Got ni gubin e rran, mu ud fal’eged rogodad ni fan ko pi muulung ni gad ma tay u gubin e wik, ma dab da paged e muulung, mu ud ted e fol Bible ni yigoo gadad, nge fol Bible ni tabinaw, ma gubin ngiyal’ ni ngaud taga’gad ngak Jehovah u daken e meybil. Ngad guyed rogon ndab da paged boch ban’en ni nge magawonnag e pi n’en ni ma fanay Jehovah ni nge pi’ gelngidad me pi’ e athamgil nga lanin’dad. Ma faanra kam guy ni bay boch e pi n’ey ni kam tal ndakumur rin’, ma gog ngak Got ni nge ayuwegem. Ya faan ga ra rin’ ni aray rogon, ma ga ra guy rogon nra fanay gelngin ni nge ‘maruwel u fithik’ i lanin’um ni nge pingeg lanin’um ni nge m’agan’um ngay ni ngam fol ko tin ni be finey.’ (Fil. 2:13) Machane, mang e rayog ni ngam rin’ ya nge yag nim pi’ e athamgil nga laniyan’ be’ ara ngam chibiy pa’ nga lang?
Ngan Fil Ban’en Riy
it-1-E 1242
Jackal
Boor yay ni yima weliy murung’agen e jackal u Bible nib fanathin. Nap’an ni be weliy Job murung’agen e kireban’ ni be tay me yog ni ke bod walagen e “pilis ni jackal.” (Job 30:29, BT) Nap’an ni be weliy fare psalmist murung’agen e gel ni kan tay ko girdi’ rok Got me yog ni gaar: “Kam pagmad u fithik’ e gamanman ni maloboch [“gin ma par e gamanman ni jackal riy,” NW] nde yag ni nggu ayuweged gamad.” (Ps 44:19, BT) Nap’an ni be weliy e pi thin ney ma rayog ni be yip’ fan e gin ni ka un mahl riy ni ke muulung e pilis ni jackal ngay yad be kay e ldow ko girdi’ (mu taarebrogonnag ko Ps 68:23). Nap’an ni longobiy yu Babylon yu Jerusalem ko duw ni 607 B.C.E., ma aram me yib e uyungol ma bochan e re n’ey mab gel e gafgow ni i tay e pi matin ngak pi fakrad. Ere ba puluw e n’en ni rin’ Jeremiah u nap’an ni tamilangnag rogon nib thil e ngongol nib kireb ni i rin’ e ‘girdi’ rok’ Got nga rogon ni ma ayuweg e pi jackal fakrad.—La 4:3, 10.
JUNE 3-9
TIN NIB GA’ FAN KO THIN ROK GOT PSALMS 45-47
Ba Tang ni Murung’agen e Mabgol ni Nge Tay Ba Pilung
Nge Felan’dad ko Mabgol Nra Tay fare Fak e Saf!
8 Mu beeg e Psalm 45:13, 14a. Rib “pidorang” fare pin ni kan fal’eg rogon ni ngar mabgolgow fare moon. U Revelation 21:2 e kan taareb rogonnag e re ppin ney riy nga ba mach, ni aram fare Jerusalem nib Beech, ma “ke yin’ e mad rok nib fel’ ni nge yan ngar mada’gow e pumoon rok.” Re mach ney ni bay u tharmiy e “be galgal ramaen nga ramaen Got” ma “be galgal ramaen ni gowa malang nib tolang puluwon, ni bod ba malang ni jasper, nra yan e changar u fithik’ ni bod e krystal.” (Rev. 21:10, 11) Rib fel’ yaan e re Jerusalem nib Beech ney ni kan weliy ko Revelation. (Rev. 21:18-21) Aram fan ni ke yog e en ni yoloy e psalm nrib “pidorang” e re ppin nem ni nge un ko mabgol! Bin riyul’ riy e yira tay e re madnom ko mabgol ney u tharmiy.
9 Faen ni kan fek fare pin i yan ngak e aram fare Moon ni Ngar Mabgolgow ara Faen ni Kan Dugliy ni Nge Mang Pilung. Kab kafram i yib ni ke fal’eg rogon e re ppin ney ni aram e ke ‘maluknag ko ran ke beech u daken e thin rok.’ Ere, ke par fare pin ni ke ‘machalbog ma dariy thibngin.’ (Efe. 5:26, 27) Fare pin e ku thingari chuw ko mad nib fel’ ni fan ko re madnom ney. Ma aram rogon e n’en ni ke rin’! “Mad rok nib n’uw e ni ngongliy ko tret nib gol,” ma yira “fek i yib ngak fare pilung ni bay u madan nib fel’ ramaen.” Bochan ni ngar mabgolgow fare Fak e Saf, ma aram fan ni “ka ni pi’ mat’awun ni nge yin’ e mad nib beech ma ba wechwech ni be galgal ramaen. Mad nib wechwech e ereram e ngongol nib mat’aw ni i rin’ e piin ni girdien Got.”—Rev. 19:8.
Mang Rogon Fare Babyor ni Revelation Ngom Boch Nga M’on?
10 Mang e ra rin’ Jehovah u nap’an ni yira cham ko girdi’ rok? Be gaar: “Bay gu damumuw.” (Ezek. 38:18, 21-23, BT) Be weliy e Revelation ko guruy ni 19 e n’en nra buch ni migid. Ra l’og Jehovah Fak ni nge yib i ayuweg e girdi’ rok me gel ko pi toogor rok. Ku ra un e pi “salthaw nu tharmiy” ni aram e pi engel ni yad ba yul’yul’ nge fare 144,000 ngak Jesus ko cham nra tay. (Rev. 17:14; 19:11-15) Mang e ra buch ni bochan e re mahl nem? Yira thang gubin e girdi’ nge ulung ni yad be togopuluw ngak Jehovah!—Mu beeg e Revelation 19:19-21.
11 Am susunnag rogon laniyan’ e piin yad ba yul’yul’ u fayleng ni kar mageygad ni yad ba fos u tomuren ni kan thang e pi toogor rok Got! Gubin e girdi’ u fayleng ni yad ra felfelan’! Yugu aram rogon nib gel e felfelan’ ni yira tay u tharmiy u nap’an ni yira thang fare Babylon nib Gilbuguwan, machane ka bay ban’en nib gel e felfelan’ ni yira tay riy. (Rev. 19:1-3) Re n’em e aram e ‘mabgol nra tay fare Fak e Saf’ ni aram e n’en th’abi ga’ fan nra buch ni kan weliy murung’agen ko fare babyor ni Revelation.—Rev. 19:6-9.
12 Mingiyal’ e yira tay e re m’agpa’ ney? U m’on nra tabab fare mahl ni Armageddon ma ke yan urngin i girdien fare 144,000 nga tharmiy. Machane gathi aram e ngiyal’ nra mabgol fare Fak e Saf. (Mu beeg e Revelation 21:1, 2.) Tomuren ni ke m’ay fare mahl ni Armageddon ma kan thang urngin e pi toogor rok Got, ma aram e ngiyal’ nra mabgol fare Fak e Saf.—Ps. 45:3, 4, 13-17.
it-2-E 1169
Mahl
Nap’an nra mus e re mahl ney, ma ra par e fayleng ni bay e gapas riy u lan bbiyu’ e duw. Fare thin ko psalm ni be yog nra “taleg [Jehovah] e pi mahl ni yibe tay u fayleng i yan; be t’ar e gat’ing, ma be kirebnag e sarey, ma be urfiy e pi talin e cham” e lebug ko yay nsom’on u nap’an ni fek Got e gapas nga daken fare nam nu Israel u nap’an ni kirebnag talin e cham ko toogor rorad. Tomuren nra gel Kristus ngak e piin yad ra k’aring fare mahl u Har–Magedon, ma aram e ra gapas ga’ngin yang e fayleng. (Ps 46:8-10) Piin kar “pirdiiyed e pi sayden rorad ngar ngongliyed talin e maruwel riy ni ma gi’ e but’, mi yad yodoromnag e pi sarey rorad nge mang yar ni yima th’ab papa’ngin e woldug ngay” ma dakurur “fal’eged rogorad bayay ni fan ko mahl” e aram e piin nra yag e yafos ni manemus ngorad. “I Somol ni Gubin ma Rayog Rok e ke micheg e pi n’ey.”—Isa 2:4; Mik 4:3, 4.
Ngan Fil Ban’en Riy
Mang e Ra Chuw u Nap’an Nra Yib Gil’ilungun Got?
9 Mang e ra yan nga lon e pi ulung nib sasalap ni bay e ngiyal’ ney? Bay reb e ulung nra magey u roy u fayleng u tomuren e Armageddon, fa? Be gaar e Bible: “Bay sum e bin nib beech e lan e lang nge bin nib beech e fayleng, ni aram e tin nib mat’aw e ngongol e bay i par riy, ni ereray e pi n’en ni gadad be sonnag.” (2 Pet. 3:13) Ere, be yog e Bible nra chuw e bin kakrom e lan e lang ni aram e be yip’ fan e pi am nib sasalap ni be gagiyeg e ngiyal’ ney nge bin kakrom e fayleng ni be yip’ fan e girdi’ ni kar paged yad be mang am e ir e be gagiyegnagrad. Ere, mang e ra yan nga lon e gali n’ey? Aram e “bin nib beech e lan e lang nge bin nib beech e fayleng.” Bin nib beech e lan e lang e be yip’ fan e bin nib beech e am ara Gil’ilungun Got ni Jesus Kristus nge fare 144,000 e yad ra gagiyegnag. Ma bin nib beech e fayleng e be yip’ fan e piin e yad ra par u tan Gil’ilungun Got. Ere, nap’an nra tabab Gil’ilungun Got ko gagiyeg u fayleng u tan pa’ Jesus Kristus, ma aram e ra m’ug rarogon Jehovah Got riy ni ir reb e Got nib yaram. (1 Kor. 14:33) Ere, gubin ban’en u lan e “bin nib beech e fayleng” nra par nib yaram. Ku bay boch e pumoon ni yad ba manigil e ngiyal’ nem ni yad ra yarmiy rogon boch e maruwel ni ngan rin’. (Ps. 45:16) Pi pumoon nem e ra pow’iyrad Kristus nge fare 144,000. Am lemnag e re ngiyal’ i n’em u nap’an nra chuw gubin e pi ulung nib sasalap me par reb e ulung nga lon ndariy e sasalap riy, ma gubin e girdi’ riy nib taareban’rad!
JUNE 10-16
TIN NIB GA’ FAN KO THIN ROK GOT PSALMS 48-50
Piin Gallabthir—Mu Ayuweged e Tabinaw Romed ni Ngari Pagan’rad ko Ulung rok Jehovah
Bin Riyul’ e Liyor e Ra Gelnag e Felfelan’ Rom
11 Nap’an ni gad ra fil e Thin rok Jehovah ma gad fil murung’agen ngak pi fakdad, ma aram e gad be liyor ngak. Der ma maruwel piyu Israel ko rofen ni Sabbath, ya yad ma fanay e re rran nem ni ngar gelnaged e tha’ u thilrad Jehovah. (Ex. 31:16, 17) Piin nib yul’yul’ u Israel e yad ma fil murung’agen Jehovah ngak pi fakrad nge rogon feni manigil. Ngiyal’ ney e thingar kud ted e tayim ni ngad beeged ma gad be fil e Thin rok Got. Ireray bang ko liyor rodad ngak Jehovah nra ayuwegdad ni ngad chugurgad ngak. (Ps. 73:28) Ma nap’an ni gad ra fil chon e tabinaw rodad e Bible u taabang, ma aram e gad be ayuweg pi fakdad ni yad e bin migid e mfen ni ngari chugur thilrad e Chitamangidad ni bay u tharmiy.—Mu beeg e Psalm 48:13.
w11-E 3/15 19 ¶5-7
Bay Fan ni Ngam Felfelan’
“Girdien Got, mmarod ngam liyeged yu Zion ngam theeged e pi wulyang; mu yaliyed fapi rungrung mi gimed skengnag e pi yoror ni fan ko mahl, ya ngam gaargad ngak e bin migid e mfen.” (Ps. 48:12, 13, BT) I pi’ fare psalmist e athamgil nga laniyan’ piyu Israel ni ngar yaliyed rarogon yu Jerusalem nib fel’ rogon. Rayog ni ngam lemnag e pi n’en ni i buch ni yib ngan’ e pi tabinaw u Israel ni ur milekaggad ko fare mach nib thothup ni fan ko pi madnom ni yima tay ni gubin e duw mar guyed fare tempel nib manigil, fa? Dariy e maruwar riy ni k’aringrad e re n’ey ni ngar weliyed e pi n’ey ko “bin migid e mfen.”
Am lemnag fare pin ni pilung nu Sheba nsom’on e de mich u wan’ e n’en ni u nog u murung’agen feni manigil e gagiyeg rok Solomon nge feni ga’ e gonop rok. Mang e micheg nga laniyan’ nib riyul’ e pi n’en ni i rung’ag? I yog ni gaar: “De mich u wan’ug e n’en nnog ngog nge mada’ ko ngiyal’ ney ni ku gub gguy nga owcheg.” (2 Kron. 9:6, BT) Arrogon, pi n’en ni gad ma guy nga ‘owchedad’ e rayog ni ngari yib angin ngodad.
Uw rogon nrayog ni ngam ayuweg pi fakam ni ngar guyed nga ‘owcherad’ feni manigil e ulung rok Jehovah? Faanra bay reb e branch ofis ko Pi Mich Rok Jehovah nib chugur ko gin ga ma par riy, mag guy rogon ni ngam marod ngaram ngam guyed boch ban’en ni yima rin’ u rom. Bod ni Mandy nge Bethany e ra ilalgow u bang nsogonap’an 900 e mayel palogin ko gin bay reb e Bethel riy ko nam rorow. Machane nap’an ni yow be ilal ma boor yay ni i fekrow e gallabthir rorow ngaram ni ngar guyew boch ban’en ni yima rin’ u rom. Rognew ni lungurow: “U m’on ni nggu warod nga Bethel, ma gamow ma lemnag ni gin’em e yigoo maruwel e yima tay riy ma danir rin’ boch ban’en riy ni ngan felfelan’ ngay ma yigoo pilibthir e ma pigpig u rom. Machane gu mada’nagew boch e fel’ yangaren nib gel e maruwel ni yad ma tay ni fan ngak Jehovah ma yad baadag e n’en yad be rin’! Gu nangew ni gathi kemus ni gin gamow ma par riy e bay e ulung rok Jehovah riy, ma urngin yay ni gamow ra yan nga Bethel ma ma yib e athamgil nga lanin’mow ni nggu rin’ew boch ban’en ni fan ko tirok Got ban’en.” Pi n’en ni guy Mandy nge Bethany nga owcherow ni be rin’ e ulung rok Got e k’aringrow ni ngar tababgow ko pioneer mu kun piningrow ni ngar pigpiggow u Bethel u lan ba ngiyal’.
Nge Par Pangimed ni Bod Rogon ni Be Yog e Thin Rok Kristus!
5 Ngan fil murung’agen chepin reb e am. En ni baadag ni nge mang girdien reb e am ko girdi’ e sana ba t’uf ni nge fil u murung’agen chepin e re am nem. Maku arrogon e piin ni yad ba adag ni ngar manged girdien Gil’ilungun Got e thingar ra filed murung’agen u rogon nrayog rorad. Mu lemnag e n’en ni rin’ pi fak Korah, ni yad be pigpig u Israel kakrom. Ba t’uf rorad fare mach nu Jerusalem nge gin ni yima liyor riy, ma yad baadag ni ngaur weliyed murung’agen ngak e girdi’ ni gathi bochan nib fel’ yaan, ya bochan ni aram “fare burey rok Got nib tolang ma ba gamog” ara gin ni yima liyor riy ngak Jehovah. Maku ireram e gin ni yima fil riy e Motochiyel rok Jehovah ngak e girdi’. Ngiyal’ nem, ma piin ni be gagiyegnagrad e Pilung nu Jerusalem e ri yad ba t’uf rok Jehovah. (Mu beeg e Psalm 48:1, 2, 9, 12, 13.) Gur, ga baadag ni ngam fil ma ngam weliy murung’agen chepin e ulung rok Jehovah u fayleng? Nap’an nra yoor e tamilangan’ rom u murung’agen e ulung rok Got nge u rogon ni be ayuweg e girdi’ rok, ma ra riyul’ Gil’ilungun Got u wan’um. Ma ra k’aringem ni ngam machibnag fare thin nib fel’ ni murung’agen Gil’ilungun Got u fithik’ e pasig.—Jer. 9:24; Luke 4:43.
Ngan Fil Ban’en Riy
it-2-E 805
Flaab
I yag ni nga i abich ma be garbod piyu Israel ni bochan e ba fel’ rogon e par ko nam rorad (1Ki 4:20; Ek 5:18, 19), ma flaab rorad e i yororiyrad ko gafgow. (Pr 10:15; Ek 7:12) Yugu aram rogon nib m’agan’ Jehovah ngay ni nge felfelan’ piyu Israel ko flaab ni ma yag ngorad ni bochan e maruwel nib gel ni yad ma tay (mu taarebrogonnag ko Pr 6:6-11; 20:13; 24:33, 34), machane i ginangrad ko riya’ nra yib ngorad ni faan yad ra pagtalin ni Ir e be flaabnagrad mar tababgad ni nge pagan’rad ko flaab rorad. (De 8:7-17; Ps 49:6-9; Pr 11:4; 18:10, 11; Jer 9:23, 24) Ni puguran ngorad ni flaab rorad e ba ngoch nap’an (Pr 23:4, 5), ma dabiyog ni ngan pi’ ku Got ni nge biyuliy be’ ko yam’ (Ps 49:6, 7), maku dariy angin ko piin kar m’ad (Ps 49:16, 17; Ek 5:15). Ku nog ngorad ni faanra pag feni ga’ fan e flaab u wan’rad ma rayog ni nge k’aringrad ni ngar uned ko sasalap ma dab kur fel’gad u wan’ Jehovah. (Pr 28:20; mu taarebrogonnag ko Jer 5:26-28; 17:9-11.) Kun pi’ e athamgil nga lanin’rad ni ngar pied e ‘tin nib th’abi fel’ rorad ngak Somol, ni aram e yad be tay fan.’—Pr 3:9.
JUNE 17-23
TIN NIB GA’ FAN KO THIN ROK GOT PSALMS 51-53
Rogon ni Ngam Siyeg Boch e Oloboch nib Gel e Kireb Riy
Uw Rogon Nrayog ni Ngam Ayuweg Gum’irchaem?
4 Fare bugithin ni ‘gum’ircha’’ ni bay ko Proverbs 4:23 (NW) e ba l’ag rogon nga ‘lanin’uy’ nrogon ni bay u yu yang ko Bible ni aram e be yip’ fan e tin ndabiyog ni nge guy e girdi’. (Mu beeg e Psalm 51:6.) Ku rayog ni nga nog ni ‘gum’ircha’’ e be yip’ fan e tin ni gad ma lemnag, ma gad ma thamiy, nge tin ni ma k’aringdad ni ngad rin’ed ban’en, nge tin ni gad baadag ndariy be’ ni manang. Gum’ircha’ e be yip’ fan e bin riyul’ i rarogodad ma gathi rogon rarogodad ni ma guy e girdi’.
5 Am lemnag rogon nrayog ni ngan susunnag rogon ni yima ayuweg fithik’ i dowey nga rogon feni ga’ fan e bin riyul’ i rarogodad. Bin som’on e, faanra nge par fithik’ i dowdad nib fel’ ma thingar da mel’eged e ggan nib fel’ ni ngad ked ma kub t’uf ni ngad rin’ed ban’en ni gubin e rran nib chamag nga fithik’ i dowdad. Ere ku taareb rogon ni faanra ngad pared ni gad ba gel ko tirok Got ban’en. Thingari gubin e rran ma ngad beeged e Bible rodad nge pi babyor nib puluw e thin riy ko Bible, ma gad maruweliy e michan’ rodad ngak Jehovah. Gad ma dag nib michan’dad ngak Jehovah ni faan gad ra fol ko tin ni gad be fil ma gad be weliy e tin ni ke michan’dad ngay. (Rom. 10:8-10; Jas. 2:26) Bin l’agruw e, rogon yaadad e rayog ni ngad lemnaged ni kab fel’ fithik’ i dowdad ni yugu aram rogon ni bay e m’ar rodad. Ere ku taareb rogon ko tin ni gad ma rin’ ni fan ko pigpig rodad ngak Got. Rayog ni ngad lemnaged nib gel e michan’ rodad machane rayog ni bay e ar’ar nib kireb ni be sum u gum’ircha’dad. (1 Kor. 10:12; Jas. 1:14, 15) Thingar dab da paged talin ni baadag Satan ni nge af e lem rok ngodad. Ere uw rogon ni ma gay rogon ni nge rin’ e re n’ey? Ma uw rogon ni ngad ayuweged gadad ko re n’ey?
Rayog ni Ngad Pared ni Gad Ba Machalbog
5 Reb e kanawo’ nrayog ni nge m’ug riy nri be pagan’dad ngak Jehovah e aram e ngaud meybilgad ngak ni nge ayuwegdad ni ngad siyeged e lem nib kireb. Faan gad ra athamgil ni ngad chugurgad ngak Jehovah u daken e meybil, maku ra chugur ngodad. Ma pi’ gelngin nib thothup ngodad, ma aram e n’en ni ma pi’ gelngidad ya nge yag nda siyeged e lem nib kireb ma gad par ni gad ba machalbog. Nga u dogned ngak Got ni gad baadag ni nga i par nib fel’ u wan’ e pi n’en ni gad ma lemnag. (Ps. 19:14) Ere, gad ma yog ngak u daken e meybil ni nge fal’eg i yaliy rarogodad ya nge yag ni ayuwegdad ni ngad nanged ko bay boch ban’en nib kireb ni gad ma ar’arnag nrayog ni nge waliydad i yan ko denen, fa? (Ps. 139:23, 24) Gad ma meybil ngak ni gubin ngiyal’ ni nge ayuwegdad ni ngad pared ni gad ba yul’yul’ u nap’an ni kad mada’naged boch ban’en nrayog ni nge waliydad i yan ko kireb, fa?—Matt. 6:13.
6 Rayog ni nge mo’maw’ ni ngad dabuyed boch e ngongol ndabun Jehovah ni bochan rogon nni chuguliydad ara rogon e ngongol rodad kafram. Yugu aram rogon, ma rayog ni nge ayuwegdad ni ngad thilyeged boch ban’en u rarogodad ya nge yag nda pigpiggad ngak u rogon nib m’agan’ ngay. Ireray reb e ban’en ni tamilang u wan’ David ni Pilung. Tomuren nra parew Bath-sheba ni gathi ppin rok, me wenig ngak Jehovah ni gaar: “Mu sunumeg e tafinay nib machalbog u fithik’ag, ma ga pi’ reb e tafinay ngog nib beech ma ba yul’yul’.” (Ps. 51:10, 12) Sana ba mom ni ngad adaged ni ngad rin’ed boch e ngongol nib kireb, machane rayog ni nge ayuwegdad Jehovah ni ngad gelgad ko pi ar’ar ney ma gad adag ni ngad rin’ed e tin nib m’agan’ ngay. Mus ni faanra immoy boch ban’en nib kireb ni ud ar’arnaged kafram ma gad be guy rogon ni ngad siyeged e chiney, ma rayog ni nge ayuwegdad Jehovah ni ngad folgad ko pi motochiyel rok me yib angin ngodad. Rayog ni nge taleg boch ban’en nib kireb ndab ki gagiyegnagdad.—Ps. 119:133.
Ngan Fil Ban’en Riy
it-1-E 644
Doeg
Ir be’ nu Edom ni ir e ba ga’ ko tagafal gamanman rok Saul ni Pilung. (1Sa 21:7; 22:9) Doeg e be’ ni ke pig ke un ko teliw rok e pi Jew. Immoy Doeg “u p’eowchen Somol” u Nob nrayog ni bochan ban’en ni ke micheg ni nge rin’, ara bochan ni ke taay, ara yibe lemnag ni ke yib e daraw ngak. Bochan e re n’ey, ma aram fan ni yag ni nge guy Ahimelek ni ir e Th’abi Tolang ko Prist ni pi’ fare flowa nib thothup nge sayden rok Goliath ngak David. Boch nga tomuren u nap’an ni be yog Saul ngak e pi tapigpig rok ni be lemnag ni yad be makath nib togopuluw ngak, ma aram me yog Doeg e n’en ni guy u nap’an ni bay u Nob. Tomuren ni yog Saul ngak e en ir e th’abi tolang ko prist nge tin ka bay e prist u Nob ni ngar bad ra guyed miki fithfith boch e deer ngak Ahimelek, ma aram me yog Saul ngak e pi matanag rok ni ngar thanged e fan rok fapi prist. Nap’an ni siyeg fapi matanag rok ni ngar rin’ed e re n’ey, ma aram me chel Doeg nge thang e fan rok 85 e prist nrogon ni ke yog Saul ngak. Tomuren ni rin’ Doeg e biney e ngongol nib kireb, ma aram me yan nga Nob nge thang e fan rok urngin e tin ka bay e girdi’ u rom ni piin bitir nge piin pilibthir ni kub muun ngay e gamanman rorad.—1Sa 22:6-20.
I weliy David murung’agen Doeg ko fapi thin ni kenggin e Psalm 52 ni gaar: “Ga be t’ar liben ni nge math owchen boch e girdi’; bolowthem e bod bangi resa nib m’uth. Gubin ngiyal’ ni ga ma tunguy e thin. Ba t’uf e kireb rom ko fel’ ma boor e tin malfith ni ga ma yog ko tin riyul’. Ga baadag ni ga ma kirebnag laniyan’ e girdi’ ko thin rom, gur e re malulifith langan nir!”—Ps 52:2-4, BT.
JUNE 24-30
TIN NIB GA’ FAN KO THIN ROK GOT PSALMS 54-56
Bay Got u Ba’ Rom
Mu Gonop—mu Madugdag Ku Got!
10 Ba bayay ni yan David ngak Achish ni ir e pilung ko binaw nu Gath, ni aram tafen Goliath ni nge ning e ayuw ngak. (1 Samuel 21:10-15) Pi tapigpig ko fare pilung e rogned ni David e ir reb e toogor ko nam rorad. Mang e n’en ni rin’ David ko ngiyal’ nem ni ke par u fithik’ e riya’? I meybil me yog ngak Jehovah e n’en ni bay u gum’irchaen. (Psalm 56:1-4, 11-13) Yugu aram rogon ni thingari dake aliliynag ir nge yog ni mil rorad, ma manang David ni Jehovah e ke ayuweg u daken e tow’ath ni ke pi’ ngak ni bochan e athamgil ni ke tay. Taga’ ni ke tay David ku Jehovah nge pagan’ ni dag ngak e ke dag nriyul’ ni bay madgun Got rok.—Psalm 34:4-6, 9-11.
11 Bod David, rayog ni ngad daged ni bay madgun Got rodad ni faanra pagan’dad ko n’en ni ke micheg nra ayuwegdad ni ngad gelgad ko magawon rodad. I gaar David: “Mu piem ngak Somol; mu pagan’um ngak, me ayuwegem.” (Psalm 37:5) Gathi be yip’ fan e re n’ey ni ngad digeyed urngin e magawon rodad ngak Jehovah ndab da rin’ed e tin nrayog rodad riy ma gad digey Jehovah ni ir e nge pithig. De meybil David ku Got ni nge ayuweg me digey gubin ban’en ngak Jehovah. I fanay gelngin nge lem rok ni ke pi’ Jehovah ngak me gay rogon ni nge pithig fare magawon. Machane, manang David ni athamgil ni ma tay e girdi’ ni dariy e ayuw ku Got riy e dabiyog ni nge gel. Ere susun e ku arrogodad. Nap’an ni kad rin’ed e tin nrayog rodad, ma thingar da paged e tin ni ka ba’ ngak Jehovah. Tin riyul’ riy, e ba dake gubin ngiyal’ ma dariy ban’en nrayog ni ngad rin’ed ya kemus ni ngad taga’gad ngak Jehovah. Ma ireray e ngiyal’ ni thingar da daged ni bay madgun Got rodad. Rayog ni nge gapaseg lanin’dad fapi thin ni yog David ni gaar: “Somol e tafager rok e piin ni yad be fol rok.”—Psalm 25:14.
cl-E 243 ¶9
Dariy Ban’en Nrayog ni Nge “Daregdad u Rogon ni Gadad Ba T’uf rok Got”
9 Kub ga’ fan u wan’ Jehovah e athamgil ni gad ma tay. (Matthew 24:13) Dab mu pagtalin ni baadag Satan ni ngam pi’ keruum ngak Jehovah. Gubin e rran ni ga ra par ni gab yul’yul’ ngak Jehovah, ma aram e ga be ayuweg ni nge pi’ e fulweg ko gathibthib ni be tay Satan ngak. (Proverbs 27:11) Yu ngiyal’ e de mom ni ngad athamgilgad. Rayog ni nge mo’maw’ ni ngad athamgilgad ni bochan e kad m’argad, ara gad be magawon ko salpiy, ara gad be mochuch, ara bochan yugu boch e magawon. Pi n’en gad be sonnag ndawori buch e ku rayog ni nge muleg lanin’dad. (Proverbs 13:12) Rogon ni gad be athamgiliy e pi magawon ney e ri kub ga’ fan u wan’ Jehovah. Aram fan ni yog David ni Pilung ngak Jehovah ni nge ‘yoloy nga but’ gubin gaf e lu’ rok ni ke map.’ Miki fith ni gaar: “Dariy u babyor rom ni kam yoloy?” (Psalm 56:8) Arrogon, dabi pag Jehovah talin urngin yay ni kad yorgad nge urngin e gafgow ni gad be athamgil u fithik’ machane ku gad be par ni gad ba yul’yul’ ngak. Re n’ey e rib ga’ fan u wan’.
Rogon Nra Ayuwegdad e T’ufeg ni Ngad Gelgad ko Marus
16 Manang Satan nib ga’ fan e yafos rodad u wan’dad. Machane ma yog ni gad ra pag fan gubin ban’en nib muun ngay e tha’ u thildad Jehovah ya nge yag nda ayuweged e yafos rodad. (Job 2:4, 5) De puluw e n’en ma yog Satan! Machane bochan ni ir e en “bay e yam’ u pa’,” ma aram fan ni ma guy rogon ni nge fanay e re n’ey ni gad ma rus ni ngad m’ad ni nge k’aringdad ni ngad digeyed Jehovah. (Heb. 2:14, 15) Piin yad bay u tan gelngin Satan e bay yu ngiyal’ ni yad ma yog ni yad ra thang e fan rodad ni faanra dab ddigeyed e michan’ rodad. Ma yu ngiyal’ e faanra kad m’argad ara kad maad’adgad nib tomgin, ma rayog ni nge fanay Satan e re n’ey ni nge k’aringdad ni ngad rin’ed ban’en nib togopuluw ko michan’ rodad. Rayog ni nge towasariydad e togta ara girdi’ rodad ndar nanged e tin riyul’ ni ngad fanayed e racha’ ni ban’en nib togopuluw ko motochiyel rok Got. Fa reb e rayog ni nge k’aringdad be’ ni nge m’agan’dad ngab mit e tafalay nib togopuluw ko pi kenggin e motochiyel u Bible.
17 Yugu aram rogon ni dubdad ni ngad m’ad, machane gad manang ni ka gad ra par ni gad ba t’uf rok Jehovah ni yugu aram rogon ni kad m’ad. (Mu beeg e Roma 8:37-39.) Nap’an nra yim’ e pi fager rok Jehovah, ma ma tayrad u laniyan’ ni gowa ka yad ba fos. (Luke 20:37, 38) Ma athapeg ni nge fasegrad ko yam’. (Job 14:15) Ba ga’ puluwdad ni ke pi’ ya nge “yog e yafos ndariy n’umngin nap’an” ngodad. (John 3:16) Gad manang nri gad ba t’uf rok Jehovah. Ere nap’an ni gad ra m’ar ara buch ban’en rodad nrayog ni ngad m’ad riy, ma gad ma taga’ ngak Jehovah ni nge fal’eg lanin’dad, me pi’ e gonop ngodad, nge gelngidad ko bin ngad digeyed. Ireray e n’en ni rin’ Valérie nge pumoon rok.—Ps. 41:3.
Ngan Fil Ban’en Riy
it-1-E 857-858
Ngan Nang e N’en Bay Nga M’on, Kan Dugliy u M’on Riy e N’en Nra Buch
N’en ni buch rok Judas Iskariot ni aram e yognag Jesus e lebguy e n’en ni yiiynag Got, miki dag nrayog rok Jehovah ni nge nang e n’en nra buch boch nga m’on ni kub muun Fak ngay. (Ps 41:9; 55:12, 13; 109:8; Ac 1:16-20) Machane dabiyog ni nga nog ni dugliy Got u m’on riy ni Judas e ra chel nge yognag Jesus. Nni yiiynag ni be’ nib chugur ngak Jesus e ra chel nge yognag, machane dan tamilangnag ko mini’ e cha’nem. Faanra dugliy Got u m’on riy nra chel Judas nge yognag Jesus, ma aram e re n’ey e ba togopuluw ko pi kenggin e motochiyel u Bible. I yog reb e apostal ni gaar: “Dab mu gur ngam tay paam nga daken be’ ngam yibiliy ni fan e nge muruwliy e maruwel rok Somol. Dab mu un ko denen ni be ngongliy boch e girdi’; mu tiyem ni gab machalbog.” (1Ti 5:22; mu taarebrogonnag ko 3:6.) Ba polo’ reb e nep’ ni meybil Jesus riy ngak e Chitamangin u m’on ni nge mel’eg fa 12 i pumoon ni ngar manged apostal rok. Re n’ey e be dag ni baadag ni nge rin’ e re n’ey u fithik’ e gonop nggu reb e kanawo’ nib puluw. (Lu 6:12-16) Faanra riyul’ ni kan dugliy u m’on riy ni Judas e ra chel nge yognag Jesus, ma aram e re n’ey e de puluw ko fonow rok Got, ma rogon ni be yog e motochiyel e aram e ke un Got ko denen ni ke ngongliy Judas.
Ere bod ni be m’ug riy nnap’an nni mel’eg Judas ni nge mang reb e apostal ma dawori sum e biney e lem ngak ni nge yognag Jesus. I pag ir ko ar’ar nib kireb ni yib ngak ni bod ‘ba ke pan nib mooy ni ilal’ u laniyan’ nge magawonnag rogon e lem rok. Bochan e re n’ey ma aram fan ndaki fol ko fonow rok Got me lek e kanawo’ rok Moonyan’ ni aram e n’en ni k’aring ni nga i moro’ro’ me yognag Jesus. (Heb 12:14, 15; Joh 13:2; Ac 1:24, 25; Jas 1:14, 15; mu guy e JUDAS No. 4.) Bay reb e dodow ni taw e ngongol rok Judas ngay, ma aram me nang Jesus e n’en bay u laniyan’ me yog u m’on riy ni ir e ra yognag.—Joh 13:10, 11.