Rayog ni Ngam Dugliy Rogon ni Nge Yan i Aw e Par Rom Boch Nga M’on

Sogonap’an 3,500 e duw ni ke yan, me yog Jehovah Got ngak e piin yad ma pigpig ngak e n’en nthingar rin’ed me fel’ e par rorad boch nga m’on ni gaar: “Kug taymed ni ngam dugliyed ko yafos e nge yib ngomed fa yam’, fa nge fal’eg Got waathmed fa nge bucheg waathmed. . . . Mu turguyed e yafos ni ir e nge yib ngomed.”​—Deuteronomy 30:19.

Ra nge fel’ e par rorad boch nga m’on, ma thingar ra mel’eged e n’en nib fel’ ni ngar rin’ed. Ku aram e n’en nib t’uf ni ngad dugliyed e ngiyal’ ney. Be weliy e Bible rogon ni ngad mel’eged e n’en nra fal’eg e par rodad boch nga m’on ni be gaar: “Nge t’uf romed Somol ni Got romed, um folgad rok.”​—Deuteronomy 30:20.

UW ROGON NI NGE T’UF JEHOVAH RODAD MA GAD FOL ROK?

MU FIL U BIBLE: Ra nge t’uf Jehovah rom, ma som’on e ngam fil murung’agen u Bible. Faan ga ra rin’, ma ga ra nang ni ir reb e Got ni ma t’ufegey ma baadag ni nge fel’ e par rom. Baadag ni ngam meybil ngak ni bochan e ‘be lemnag rogom.’ (1 Peter 5:7) Be micheg e Bible ni faan ga ra guy rogon ni ngam chugur ngak, ma aram e ra ‘chugur ngom.’​—James 4:8.

MU FOL KO N’EN KAM FIL: Ra ngam fol rok Got ma be yip’ fan ni ngam fol ko pi fonow rok ni bay u Bible ni bay e gonop riy. Faan ga ra rin’, ma aram e “pi n’en ni ga ra lemnag ngam dugliy e ra fel’, ma yira rin’ ma ra yan i fel’.”​—Joshua 1:8.