Gur e Ga Ra Mel’eg Rogon e Par Rom Boch Nga M’on!
GUR, RAYOG NI NGAM MEL’EG ROGON E PAR ROM BOCH NGA M’ON? Boch e girdi’ e ba mich u wan’rad ni kan mu’ i dugliy e n’en nra buch rorad nga m’on, ma gathi pi n’en ni yad ma mel’eg e ir e ra dugliy rogon e par rorad boch nga m’on. Ere, faanra de yag ngorad e n’en ni yad be nameg, ma aram ma rogned nre n’em e dariy ban’en nrayog ni ngar rin’ed ngay. Ba ga’ ni ma lungurad, “Re n’ey e ka wol rog!”
Ku bay boch e girdi’ nri ma kireban’rad ni bochan e yad be lemnag ndabkiyog ni ngan pithig e pi magawon ni be buch u lan e re fayleng ney ni ke gel e kireb riy ma boor ban’en ni be buch riy nde mat’aw. Sana rayog ni kar guyed rogon ni nge mon’og boch e par rorad, machane boor yay nder yag ni nge buch e re n’ey ni bochan e mahl, nge kireb ni yibe rin’ nib togopuluw ko motochiyel, nge yoko’, nge durru’, nge boch ban’en ni ma yib ni yima gafgow riy, nge m’ar. Ere bayi n’en me lungurad, ‘Mang ni ngguy rogon ni nge fel’ boch e par rog?’
Riyul’ ni pi n’en ni ma buch u lan e yafos rodad e rayog ni nge magawonnag rogon e pi n’en ni kad lemnaged ni ngad rin’ed. (James 4:14) Machane, gur e ga ra mel’eg ko nge yag e yafos ni manemus ngom boch nga m’on fa danga’. Bin riyul’ riy e, be tamilangnag e Bible ni pi n’en ni ga ma mel’eg e chiney e ir e ra dugliy rogon e par rom boch nga m’on. Am lemnag e n’en ni be yog.
Moses ni ir e i yog e thin rok piyu Israel kakrom e non ngorad u nap’an ni yad be n’en ni nga ranod nga lan fare Nam ni Kan Micheg ni gaar: “Chiney e kug taymed ni ngam dugliyed ko yafos e nge yib ngomed fa yam’, fa nge fal’eg Got waathmed fa nge bucheg waathmed. . . . Mu turguyed e yafos ni ir e nge yib ngomed. Nge t’uf romed Somol ni Got romed, um folgad rok ma gimed be par ni gimed ba yul’yul’ ngak.”—Deuteronomy 30:15, 19, 20.
“Chiney e kug taymed ni ngam dugliyed ko yafos e nge yib ngomed fa yam’, fa nge fal’eg Got waathmed fa nge bucheg waathmed. . . . Mu turguyed e yafos ni ir e nge yib ngomed.”—Deuteronomy 30:19
Arrogon, i chuweg Got piyu Israel ko sib u Egypt me yog ngorad nrayog ni nge yag e puf rogon nge felfelan’ ngorad u lan fare Nam ni Kan Micheg. Machane, pi flaab ney e yugu dabi yag ngorad nib tomgin, ya thingar ra mel’eged e “yafos.” Ni uw rogon? Thingari ‘t’uf rorad Somol ni Got rorad, mu ur folgad rok ma yad be par ni yad ba yul’yul’ ngak.’
Gubin e pi n’ey ni kan weliy e ku ireray e n’en nthingar mu mel’eg e chiney, ma n’en ni ga ra mel’eg e ra dugliy rogon e par rom boch nga m’on. Faan ga ra dugliy ni nge t’uf Got rom, mag fol rok, mag par ni gab yul’yul’ ngak, ma aram e kam mel’eg e yafos ni manemus u paradis u fayleng. Machane, mang e ba muun ko pi n’ey nthingar mu rin’?
MU DUGLIY NI NGE T’UF GOT ROM
T’ufeg e aram e bin th’abi lingagil i fel’ngin Got. Nni thagthagnag nga laniyan’ apostal John ni nge yoloy ni gaar, “Got e t’ufeg.” (1 John 4:16) Bochan e re n’ey, ma aram fan nnap’an ni fith be’ ngak Jesus ko bin ngan e motochiyel e ir e ba ga’ u fithik’ urngin e pi motochiyel, ma aram me yog ni gaar: “Thingari t’uf rom Somol ni ir e Got rom u polo’ i gum’irchaem, ngu polo’ i lanin’um, ngu polo’ i lem rom.” (Matthew 22:37) Faanra ngari fel’ e tha’ u thilin be’ nge Jehovah Got, ma tha’ u thilrow e thingari tor nga daken e t’ufeg rok facha’ ngak Got, ma gathi bochan e be rus ngak Got ara yugu be fol ni bochan e ban’en nthingari rin’. Ere, mang fan nsusun e ngad dugliyed ni nge t’uf Got rodad?
T’ufeg rok Jehovah ko girdi’ e bod rogon e t’ufeg rok e piin gallabthir ngak pi fakrad. Yugu aram rogon ndawori flont e piin gallabthir, machane yad ma skulnag pi fakrad, ma yad ma pi’ e athamgil nga lanin’rad, ma yad ma ayuwegrad, maku yad ma llowan’nagrad ni bochan e yad baadag ni ngar felfelan’gad me fel’ rogon e par rorad. Machane, mang e baadag e piin gallabthir ni nge rin’ pi fakrad? Yad baadag ni nge t’ufegrad pi fakrad mar ted u lanin’rad mar folgad ko pi n’en ni kar filed ngorad ya nge yag ni yib angin ngorad. Ere, gathi ba puluw ni nge lemnag e Chitamangidad ni bay u tharmiy ni ngaud daged e t’ufeg ngak ma gad be dag nib ga’ fan u wan’dad urngin ban’en ni ke rin’ ni fan ngodad?
NGAD FOLGAD ROK
Ba ga’ ni ma fanay e Bible fare bugithin ni “mmotoyilgad” nge “um folgad” ni nge yip’ fan taab n’en. Ere, nap’an ni yira gaar ngak reb e bitir, “Mmotoyil ko gallabthir rom,” ma aram e yibe yog ngak ni nge fol rorow. Ere, faanra ngad motoyilgad ngak Got ma aram e be yip’ fan ni ngad filed e thin rok ma gad fol riy. Gad manang ndabiyog ni ngad rung’aged laman Got. Ere rogon ni gad ma motoyil ngak e aram e ngad beeged e Thin rok ni aram e Bible, ma gad fol riy.—1 John 5:3.
Immoy bayay ni tamilangnag Jesus feni ga’ fan ni ngan motoyil ngak Got ni aram e gaar: “Girdi’ e dabiyog ni yigoo flowa e ra i kay mi i par nib fos, machane urngin bug e thin ni be yog Got e ir e ra i tay e girdi’ nib fos ndabi yim’.” (Matthew 4:4) Ba ga’ fan ni nge yag e tamilangan’ ngodad u murung’agen Got ni bod rogon nib t’uf ni ngaud abichgad, machane ri kab ga’ angin e tamilangan’ rok Got ko ggan ni gad ma kay. Mang fan? Solomon ni Pilung ni ir be’ nib gonop e yog ni gaar: “Gubin e piin kab fos ma ri dabisiy ni ngar gonopgad; ya bod feni fel’ ni kan thum’nag e gayog ngom ma ra yororiyem ni bod rogon e salpiy. Gonop e ra ayuwegem ndabi buch ban’en rom—ireray fel’ngin e llowan’.” (Eklesiastes 7:11, 12, BT) Tamilangan’ nge gonop rok Got e rayog ni nge yororiydad e ngiyal’ ney, miki ayuwegdad ni ngad mel’eged e n’en nth’abi fel’ ni ir e ra pow’iydad i yan ko yafos ni manemus boch nga m’on.
UM FOL ROK
Am lemnag fare fanathin rok Jesus ni kad weliyed ko fa binem e article ni ke yan ni be gaar: “Garog ko yafos e ba wen’in, ma kanawo’ ni yan ngay e mmo’maw’, ma ba lich e girdi’ ni be pirieg.” (Matthew 7:13, 14) Faanra nge yag nda milekaggad u daken e re pa’ i kanawo’ ney, ma aram e ba t’uf ni nge ayuwegdad be’ ni manang e kanawo’ ma gad fol u rogon ni be pow’iydad ya nge yag nda tawgad ko gin ni gad be nameg ni aram e gin ni bay e yafos ni manemus riy. Ere, ba puluw ni ngad pared ni gad ba chugur ngak Got. (Psalm 16:8) Uw rogon ni ngad rin’ed e re n’ey?
Boor ban’en nthingar da rin’ed u reb e rran ngu reb, maku boor ban’en ni gad baadag ni ngad rin’ed. Rayog ni ngad pared ni ireray e pi n’en ni gad be mit riy me buchuuw e tayim rodad ni ngad lemnaged e n’en ni baadag Got ni ngad rin’ed, fa reb e dakuriy e tayim rodad ni ngad rin’ed e re n’ey. Aram fan ni be puguran e Bible ngodad ni be gaar: “Um ayuwgad u rogon e ngongol romed. Dab um ngongolgad ni bod e girdi’ ndawori tamilangan’rad, machane nguum ngongolgad ni bod rogon e girdi’ nib gonop. Urngin yay nra mab e kanawo’ ngomed ma ngam maruwelgad ngay ni fan ko tin nib fel’ [“mmaruwelgad ko tayim romed nib fel’ rogon,” NW], ya tiney e rran e mmo’maw’.” (Efesus 5:15, 16) Faan gad ra tay ni tha’ u thildad Got e aram e n’en nth’abi ga’ fan u lan e yafos rodad, ma aram e rayog ni ngad pared ni gad ba chugur ngak.—Matthew 6:33.
GUR E GA RA MEL’EG
Yugu aram rogon ndabiyog ni ngam thilyeg e pi n’en ni ke thumur, machane bay boch ban’en nrayog ni ngam rin’ e chiney nra yib angin ngomed e piin ni yad ba t’uf rom boch nga m’on. Be yog e Bible nri gad ba t’uf rok Jehovah Got ni Chitamangidad ni bay u tharmiy, ma ke yog ngodad e n’en ni baadag ni ngad rin’ed. Mu tay fanam i yan ko thin ni yog Mikah ni profet ni be gaar:
“Ke yog Somol ngomed e tin nib fel’. Tin ni ke yog ngomed ni ngam rin’ed e baaray ni ke gaar: mu rin’ed e tin nib yal’uw, um pired nib t’uf Got romed nge girdi’, mu um folgad rok Got u fithik’ e sobut’an’.”—Mikah 6:8.
Ere ga ra rin’ e n’en ni be yog Jehovah, ni aram e ngam fol rok me yag e pi tow’ath ngom nra par ndariy n’umngin nap’an ni ke tay ni fan ngak e piin ni yad ra fol rok boch nga m’on, fa? Gur e ga ra mel’eg!