Uw Rogon ni Ngan Poy e Baan Riyul’ e Teliw

YOOREN e teliw e yad ma yog ni n’en ni yad ma fil ko girdi’ e yib rok Got. Ere, ba t’uf ni ngaud folgad ko thin rok John ni apostal rok Jesus, ni faani gaar: “Pi tafager rog nri gimed ba t’uf rog, dabi pagan’med ngak urngin e piin ni yad be yog ni ba’ fare Kan ni Thothup rorad, ya ngam skengnaged yad ngam nanged ko re kan ni ba’ rorad e yib rok Got fa dangay. Ya boor e profet ni yugu ban’en ni kar wergad nga urngin yang.” (1 John 4:1) Uw rogon ni ngad skengnaged ban’en ngad nanged ko riyul’ ni yib rok Got, fa?

Urngin ban’en ni yib rok Got e ma m’ug fel’ngin riy, ni ba ga’ ni t’ufeg ni ir fel’ngin nrib gagiyel. Bod rogon gelngidad i faray bon ban’en, ni ma ayuwegdad ni ra felfelan’dad nga bon e woldug nib fel’ bon, nge floras, ara flowa ni kefin ni lith, e bochan e t’ufeg rok Got. Gelngidad ni ngad guyed yaan e yal’ ni be aw, borag, ara siminmin rok bochi tir e be dag e t’ufeg rok Got ngodad. Maku aram rogon gelngidad i rung’ag e musik nib fel’, nge arche’ ni be non, ara laman be’ nib t’uf rodad. Mus nga rarogodad e girdi’ ndaworda flontgad ma be m’ug e t’ufeg rok Got riy. Arfan ni ma buch rodad e n’en ni yog Jesus ni gaar: “Ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.” (Acts 20:35) Gad ma felfelan’ ni ngad daged e t’ufeg ya kan sunumiydad ni “bod yaan Got.” (Genesis 1:27) Yugu aram rogon ni bay fel’ngin Jehovah ni boor, ma t’ufeg e ir e bin nrib gagiyel riy.

Yol ni yib rok Got e susun ni nge dag e t’ufeg rok. Pi teliw nu fayleng e bay boor e babyor rorad ni ke kakrom. Uw rogon ma pi babyor nem e kari dag e t’ufeg rok Got?

Tin riyul’ riy, e yooren e babyor ko pi teliw e gathi ri be weliy ko uw rogon ni ma t’ufegdad Got ara uw rogon ni ngad t’ufeged. Ere, bokum milyon e girdi’ e danir fulweg taban ngorad u nap’an ni yad ra fith ko, “Mang fan ni gad be guy e t’ufeg rok Got u fithik’ e pi n’en ni ke sunmiy ma ka be ul’ul e gafgow nge kireb i yan?” Machane, fare Bible, e kemus e re ke babyor nrayog ni nge weliy murung’agen e t’ufeg rok Got nib tamilang. Maku ma fil ngodad rogon ni ngad daged e t’ufeg.

Babyor u Murung’agen e T’ufeg

Thin rok Got, ni fare Bible, e be dag ni “gadad ba t’uf rok” Jehovah. (2 Korinth 13:11) Bible e be weliy rogon ni k’aring e t’ufeg Jehovah nge pi’ e yafas ndariy e m’ar nge yam’ riy ngak fagal nsom’on e girdi’ ni sunmiy. Machane bochan e togopuluw ni ta’ nga mat’awun Got ma ir e k’aring ni ngeb e gafgow ngak e girdi’. (Deuteronomy 32:4, 5; Roma 5:12) Ke maruweliy Jehovah nge sulweg boch ban’en nga rogon. Thin rok Got e be gaar: “Yi Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.” (John 3:16) Thin rok Got e be dag e t’ufeg rok Got nib tamilang u nap’an ni weliy rogon ni pi’ Got e am nrib fel’ u tan pa’ Jesus ni nge sulweg e gapas ngak e girdi’ ni ma fol.​—Daniel 7:13, 14; 2 Peter 3:13.

Bible e be yog e n’en nib milfan ko girdi’ ni ngar rin’ed ni gaar: “Thingari t’uf rom Somol ni ir e Got rom u polo’ i gum’irchaem, ngu polo’ i lanin’um, ngu polo’ i lem rom. Ereray e bin th’abi ga’ nge bin th’abi ga’ fan e motochiyel. Ma bin migid ngay e motochiyel ni ku ba ga’ fan e bod e biney ni gaar, Gin’en ni ga ba’ riy e thingari t’uf rom e en ni ir e mmigid ngom ni gowe gur. Urngin e Motochiyel rok Moses nge tin i fil e pi profet ko girdi’ e be tor ko gali motochiyel ney.” (Matthew 22:37-40) Fare Bible e be yog ni Got e ke thagthagnag. Bochan nib tamilang ni be dag rarogon, mab mudugil ni ke yib rok fare ‘Got ni ma t’ufegey.’​—2 Timothy 3:16.

Gad ra fol ko re n’ey, ma rayog ni ngad nanged ko bin ngan e pi babyor ni ke kakrom e riyul’ ni yib rok Got. T’ufeg e ku ireray reb e pow ko tin riyul’ e Kristiano, ya bochan yad ma folwok rok Got rogon ni yad ma dag e t’ufeg.

Rogon ni Ngan Poy e Girdi’ ni Ma T’ufeg Got

Ba gagiyel e piin ni riyul’ nib t’uf Got rorad e ngiyal’ ney ko “tin tomren e rran” nrogon ni yog e Bible. Girdi’ ni “ke mus ni yad e yad be lemnagrad, ma kari gel e chogow rorad, . . . ma bayi t’uf e fafel rorad me tomur Got u wan’rad” e be yoor i yan.​—2 Timothy 3:1-4.

Uw rogon nrayog ni ngam nang e girdi’ nib t’uf Got rorad? Bible e be gaar: “Ya baaray fan ni nge t’uf Got rodad: fan e ngad folgad ko tin ni ke yog ni ngad rin’ed.” (1 John 5:3) T’ufeg ku Got e ma k’aring e girdi’ ni ngar ted fan e motochiyel u Bible. Ni bod ni, Thin rok Got e bay e motochiyel riy u murung’agen e par ko pumoon nge ppin nge mabgol. Par ko pumoon nge ppin e rayog ni ngan rin’ ni ke mus nu lan e mabgol, ma mabgol e susun ni nge par ni n’umngin e yafas. (Matthew 19:9; Hebrews 13:4) Nap’an ni un be’ ni ppin nu Spain ni ma fil murung’agen e theology nga reb e muulung ni be fil e Pi Mich Rok Jehovah murung’agen e pi motochiyel u Bible, me yog ni gaar: “Kug chuw u rom ni ke gel e michan’ rog, ni gathi ke mus nbochan ni kug rung’ag boch e welthin ni kan fek u Bible ya ku bochan e taareban’ ni bay u fithik’ e pi girdi’ nem, nge ngongol rorad nib fel’.”

Tin ni kub muun ko t’ufeg rok e tin riyul’ e Kristiano ku Got, e ba mom ni ngan poyrad nbochan rogon ni yad ma dag e t’ufeg ngak e piin ni buguli yoror rorad. Maruwel rorad nrib ga’ fan e ngar weliyed ngak e girdi’ murung’agen e athap ko girdi’, ni aram fare Gil’ilungun Got. (Matthew 24:14) Dariy ban’en ni rayog ni ngeb angin ndariy n’umngin nap’an ko piin buguli yoror rorad riy ya kemus ni goo tamilangan’ rok Got. (John 17:3) Tin riyul’ e Kristiano e ku yad ma dag e t’ufeg rorad u boch e kanawo’. Yad ma pi’ ayuw ngak e piin ni kar gafgowgad. Ni bod ni, nap’an ni ke kireb boch ban’en u Italy nbochan e durru’, ma reb e shimbung e yog ni Pi Mich Rok Jehovah e rib “fel’ e tin ni yad be rin’, yad be ayuweg e piin ni kar gafgowgad, ndemtrug e teliw rorad.”

Tin riyul’ e Kristiano e gathi ke mus ni yad ma t’ufeg Got nge buguli yoror rorad, ya ku yad ma t’ufeged yad. I gaar Jesus: “Nggu pi’ reb e motochiyel nib beech ngomed, nge bigimed me t’uf bigimed rok. Rogon ni um pired ni gimed ba t’uf rog, e aram rogon nthingar um pired nra bigimed ma ba t’uf rok bigimed. Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.”​—John 13:34, 35.

Ba thil e t’ufeg ni bay u fithik’ e tin riyul’ e Kristiano, fa? Ema ni be’ ni ma maruwel u reb e naun e lemnag ni aram rogon. Cha’ ney e ma maruwel u La Paz, Bolivia, ma bochan nib thilthil raen dow nge yalen e girdi’ u rom ma ba ga’ ni dabiyog ni nge par e girdi’ nib fel’ rogon nge girdi’ nib gafgow u taabang. I gaar: “Yay ni som’on ni gu un nga reb e muulung ko Pi Mich Rok Jehovah, e gguy reb e pumoon nib fel’ rogon e munmad rok ni ke par nga chiya ni be non ngak reb e ppin nu India. Dawor gguy ban’en ni aram rogon. Ka chingiyal’ nem, mu gu nang ni yad e girdi’ rok Got.” Maku, reb e rugod nu Brazil ni Miriam fithingan e yog ni gaar: “Da gu nang rogon ni nggu pirieg e felfelan’, ni mus nga lan e tabinaw rog. Yay ni som’on ni gguy e t’ufeg ni kan dag ko ngongol e lan e ulung ko Pi Mich Rok Jehovah.” U Meriken, ma faen ni news director u reb e television station e yoloy ni gaar: “Faanra boor e girdi’ ni ra pared nib puluw ko teliw romed, ma re nam ney e dabi taareb rogon ko chiney. Gag reb e girdien e news ma gu manang ni def ko ulung romed e t’ufeg nge michan’ nib gel ngak e en Ke Sunmiydad.”

Mu Gay e Baan Riyul’ e Teliw

T’ufeg e ir e pow ko bin riyul’ e liyor. I taareb rogonnag Jesus e ngan gay e bin riyul’ e liyor ko ngan gay e kanawo’ nib puluw min mel’eg ni ngan yan riy. Ke mus ni ireray e kanawo’ ni ma pow’iyey i yan ko yafas ndariy n’umngin nap’an. I gaar Jesus: “Marod ko bin nib wen’in e garog, ya ba ga’ langan e garog ko nifiy, ma kanawo’ ni yan ngay e mmom, ma boor e girdi’ ni be yan u daken. Ma garog ko yafos e ba wen’in, ma kanawo’ ni yan ngay e mmo’maw’, ma ba lich e girdi’ ni be pirieg.” (Matthew 7:13, 14) Ke mus ni taareb e ulung ko tin riyul’ e Kristiano e yad be yan nga kanawoen e bin riyul’ e teliw ni ke taareban’rad ma be un Got ngorad. Ere, ba ga’ fan ko baan ngan e teliw e ga ra mel’eg. Faanra kam pirieg e re kanawo’ nem ma kam dugliy ni nga man riy, ma ga ra pirieg kanawoen e yafas nrib fel’, ya ireray kanawoen e t’ufeg.​—Efesus 4:1-4.

Mu lemnag feni gel e felfelan’ nra yib ngom u nap’an ni ga be yan u kanawoen e bin riyul’ e teliw! Bod ni gimew be yan Got u taabang. Rayog ni ngam fil e gonop nge t’ufeg rok Got ma ga felfelan’ ko tha’ nib fel’ u thilmed boch e girdi’. Rayog ni ngam fil murung’agen fan e yafas, ma ga ra nang fan e tin ni ke micheg Got me yog ngom e athap ko gabul nge langlath. Ri dabi kalngan’um ni ngam gay e bin riyul’ liyor.

[Picture on page 5]

U fithik’ e pi babyor ni ke kakrom, ma kemus ni Bible e be dag e t’ufeg rok Got

[Pictures on page 7]

Rayog ni ngan poy e tin riyul’ e Kristiano ya yad ma dag e t’ufeg ngak e girdi’