Rogon ni Ngam Athamgil u Fithik’ e Magafan’ Rom

MAGAFAN’ e rayog ni nge tomalnag lanin’dad. (Prov. 12:25) Bay yu ngiyal’ ni ma gafgow lanin’um ni bochan e magafan’, fa? Bay yu ngiyal’ ni ga ma lemnag ndabkiyog ni ngam athamgil u fithik’ e magafan’ rom, fa? Faanra bay, ma gathi kemus ni yigoo gur e bay e biney e magawon rom. Boor i gadad e boor fan nrayog ni nge aw parwon, me magafan’, me kireban’. Bod ni bay boch i gadad ni be pigpig ngak be’ u lan e tabinaw rok ni ke m’ar, ma boch e ke yim’ be’ nib t’uf rorad, ma boch e kar gafgowgad ni bochan e yoko’, ara durru’, ara boch ban’en ni ma buch ni yima gafgow riy. Machane mang e rayog ni nge ayuwegdad ni ngad athamgilgad u fithik’ e magafan’ rodad?a

Gad ra beeg murung’agen David ni Pilung, ma boor ban’en nrayog ni ngad filed riy u murung’agen rogon ni ngad athamgilgad u fithik’ e magafan’ rodad. Boor e magawon nib mo’maw’ ni mada’nag u lan e yafos rok ni kub muun ngay in yay ni chugur ni nge yim’. (1 Sam. 17:34, 35; 18:10, 11) Ere uw rogon ni athamgil u fithik’ e magafan’ rok? Ma uw rogon nrayog ni ngad folwokgad rok?

ROGON NI ATHAMGIL DAVID U FITHIK’ E MAGAFAN’ ROK

Boor e magawon ni yib ngak David ni taab yay. Am lemnag e n’en ni buch rok u nap’an ni be mil rok Saul ni Pilung ko ngiyal’ ni be guy rogon ni nge thang e fan rok. Nap’an nra sulod e pi salthaw rok ko mahl nga taferad u Ziklag, mar gingad ya ke iring e pi toogor rorad e chugum rorad, ma kan urfiy e naun rorad nga but’, ma kan fek chon e tabinaw rorad. Ere mang e rin’ David? Ra tababgad e pi salthaw rok “ko meyor nge taw ko ngiyal’ ni ke thay parowrad ko meyor.” Ma n’en nri yon’ daken e magafan’ rok e aram e pi pumoon nem ni yad be yog ni “ngar malangniged.” (1 Sam. 30:1-6, BT) Ere dalip e magawon nib ga’ ni mada’nag David ni taab yay. Bay e yafos rok chon e tabinaw rok u thatharen e riya’, ma be rus nri thang e pi salthaw rok e fan rok, ma bay Saul ni Pilung ni ka be lol’og. Dabisiy nrib gel e magafan’ ni i tay David!

Mang e migid ni rin’ David? Ka chingiyal’ nem me sap ngak Jehovah ni Got rok ni nge “pi’ e athamgil nga laniyan’.” Uw rogon nrayog ni rin’ David e re n’ey? Gad manang nib ga’ ni ma meybil David ngak Jehovah ni nge ayuweg, maku ma lemnag rogon ni i ayuweg Jehovah kafram. (1 Sam. 17:37; Ps. 18:2, 6) Manang nib t’uf ni nge ning e ayuw ngak Jehovah, ere aram fan ni fith ngak ko mang e susun ni nge rin’. Tomuren ni nang e n’en baadag Jehovah ni nge rin’, ma aram me rin’ ban’en ni ka chingiyal’ nem. Angin ni yib riy e aram e tow’athnag Jehovah nge pi salthaw rok, me yag ni ngar sulweged chon e tabinaw nge pi chugum rorad. (1 Sam. 30:7-9, 18, 19) Kam tay fanam i yan u dalip ban’en ni rin’ David, fa? I meybil ngak Jehovah ni nge ayuweg, me lemnag rogon ni i ayuweg Jehovah kafram, ngemu’ me rin’ e n’en ke yog Jehovah. Uw rogon nrayog ni ngad folwokgad rok David? Ngad weliyed dalip e kanawo’.

MU FOLWOK ROK DAVID U NAP’AN NRA MAGAFAN’UM

1. Mmeybil. Nap’an ni gad ra thamiy rodad ni aram e ke tabab ni nge magafan’dad, ma rayog ni ngad meybilgad ngak Jehovah ngad ninged e ayuw nge gonop rok. Rayog ni nge baud lanin’dad u nap’an ni gad ra weliy ngak urngin ban’en ni be magafan’dad ngay. Fa reb e rayog ni ngad meybilgad u lanin’dad nib ngoch nap’an ni faanra kemus e n’en nrayog ni ngad rin’ed e ngiyal’ nem. Gubin yay ni gad ra ning e ayuw ngak Jehovah, ma aram e gad be dag ni be pagan’dad ngak ni bod David ni faani gaar: “Somol e ir e taayuw rog; I ir e yoror rog nib gel. Got rog e ir e yoror rog, ma ra gu bay rok ma dariy ban’en nra buch rog.” (Ps. 18:2, BT) Gur, ri ma yib angin e meybil? Kahlia nreb e walag nib pin nib pioneer e yog ni gaar: “Tomuren nug ra meybil, ma gu ma thamiy ni ke gapas lanin’ug. Meybil e ma ayuwegeg ni nggu lemnag boch ban’en ni bod rogon ni be lemnag Jehovah, me gel boch e pagan’ rog ngak.” Meybil e aram reb e tow’ath nib gel gelngin ni ke yib rok Jehovah ni ma ayuwegdad ni ngad athamgilgad u fithik’ e magafan’ rodad.

2. Mu lem. Nap’an ni ga ra sul ngam lemnag e n’en ni i buch rom kafram, ma rayog ni nge yib ngan’um boch e magawon ni yag ni ngam athamgil u fithik’ ni bochan e ayuw rok Jehovah, fa? Nap’an ni gad ra lemnag rogon ni ke ayuwegdad Jehovah nge rogon ni i ayuweg e pi tapigpig rok kakrom, ma aram e ra gel boch e gapas u lanin’dad nge pagan’ rodad ngak. (Ps. 18:17-19) Bay reb e piilal ni ka nog Joshua ngak ni yog ni gaar: “Kug yoloy nga but’ urngin e meybil rog ni kan fulweg taban. Re n’ey e ke ayuwegeg ni nge yib ngan’ug yu ngiyal’ ni kug ning ban’en ngak Jehovah u lan e meybil rog me pi’ ngog e n’en nrib t’uf rog.” Arrogon, nap’an ni gad ra lemnag rogon ni ke ayuwegdad Jehovah kafram, ma ra yib gelngidad ni ngad gelgad ko magafan’.

3. Mu rin’ ban’en. U m’on ni ngad dugliyed e n’en ngad rin’ed nga reb e ban’en, ma rayog ni ngad sapgad ko Thin rok Got ni nge pow’iydad. (Ps. 19:7, 11) Boor e girdi’ ni kar pirieged nnap’an ni yad ra gay murung’agen reb e thin nu Bible, ma ma ayuwegrad ni ngar nanged rogon nib l’ag fare thin nu Bible ngorad. Bay reb e piilal ni ka nog Jarrod ngak ni yog ni gaar: “Nap’an nug ra gay murung’agen reb e thin nu Bible, ma ma ayuwegeg ni ngkug nang boch ban’en u murung’agen mu kug nang e n’en be yog Jehovah riy ngog. Re n’ey e ma ayuwegeg ni ngari mich u wan’ug e n’en gu be beeg, ya nge yag ni nggu fol u rogon ni be pow’iyeg Jehovah.” Nap’an ni gad ra guy rogon ni ngad nanged rogon ni be pow’iydad Jehovah u daken e thin nu Bible ma gad fol riy, ma aram e ra mom ni nge gapas lanin’dad mad pared ni gad ba felfelan’ u nap’an ni be magafan’dad.

RA AYUWEGEM JEHOVAH NI NGAM ATHAMGIL

Manang David nra nge yag ni athamgil u fithik’ e magafan’ rok, mab t’uf ni nge ayuweg Jehovah. Rib ga’ fan u wan’ e ayuw ni pi’ Jehovah ngak. Aram fan ni gaar: “Ga ma pi’ . . . gelngig ni nggu buthug e yoror rorad. Ir fare Got ni ma gelnigeg.” (Ps. 18:29, 32, BT) Rayog ni ngad lemnaged ni kaygi ga’ e magawon rodad ndabiyog ni ngad pithiged ara da athamgilgad u fithik’. Machane faanra ayuwegdad Jehovah, ma demtrug feni ga’ e magawon rodad ma rayog ni ngad athamgilgad u fithik’! Arrogon, nap’an ni gad ra meybil ngak Jehovah ni nge ayuwegdad, ma gad lemnag urngin ban’en ni ke rin’ ni fan ngodad, ma gad fol u rogon ni be pow’iydad, ma aram e rayog ni nge pagan’dad nra pi’ gelngidad miki pi’ e gonop ngodad ya nge yag nda athamgilgad u fithik’ e magafan’ rodad!