Ke T’ufegrad e Pi Walag

YOMARA nge l’agruw i pagel ni walagen ni ka nog Marcelo nge Hiver ngorow e yad ma par u bochi binaw u Guatemala. I tabab Yomara ni ngar filed e Pi Mich e Bible u taabang me munmun miki un fa gal pagel ni walagen ko fol Bible. Machane re dalip i walag ney e yad gubin ni yad ba malmit ma dabiyog ni ngar beeged e babyor ni fan ko piin nib malmit. Ere ba ga’ ni ma beeg e en ma fil e Bible ngorad e n’en bay ko babyor ni yad be fil nge pi thin nu Bible riy.

Kub mo’maw’ ni ngar uned ko muulung, ya dabiyog ni ngar milekaggad u lan 40 e minit nga ranod ko bin th’abi chugur e Tagil’ e Liyor ni yigoo yad. Machane i ayuwegrad e pi walag u lan e ulung ya nge yag ni ngaur uned nga gubin e muulung. Ma nap’an nra tababgad ni ngaur pied e welthin u nap’an e muulung u lan e wik, ma aram me ayuwegrad e pi walag ni ngaur filed e welthin rorad nge mit ngemu’ mar pied.

Nap’an e May ko duw ni 2019, ma aram min tabab ni ngaun tay e muulung ko binaw rorad. Bay ba wu’ i mabgol ni ka ranow ra parew ko re binaw nem u m’on riy. Ra namegew ni ngar filew ko re dalip i walag nem rogon ni ngar beeged e babyor ni fan ko piin nib malmit mu kur yolgad ni bod yad ni yugu aram rogon ndar nangew rogon ni ngar rin’ew e re n’ey. Ere ranow nga library ngar fekew boch e babyor ni bay murung’agen e yol ni ma fanay e piin nib malmit riy, ya nge yag nra nangew rogon ni ngar filew ngak yugu boch e girdi’.

In e pul nga tomuren ma ke salap fa dalip i walag i beeg e babyor ni fan ko piin nib malmit, ma ireray e n’en ni ayuwegrad ni ngkur mon’oggad boch ko tirok Got ban’en.a Chiney e be pigpig Yomara, nge Marcelo, nge Hiver ni yad boch e regular pioneer. Marcelo e ir reb e ministerial servant. Boor ban’en ni yad ma rin’ ni fan ko pigpig rorad ngak Jehovah u lan reb e wik. Bochan ni yad ba pasig, ma aram fan ni kub pasig e pi walag ni yad ma un ngorad.

Ba ga’ fan u wan’ e re dalip i walag ney e ayuw ni ma pi’ e ulung ngorad. I yog Yomara ni gaar, “Ka nap’an e yay nth’abi som’on nug mada’gad e Pi Mich, ma ka yad be ulul ni ngar daged e t’ufeg ngomad ni ma dag e tin riyul’ e Kristiano.” Ki ulul Marcelo ngay ni gaar, “Kug pirieged boch e fager nib manigil u lan e ulung romad, ma kug manged bang u ba tabinaw ni bay u ga’ngin yang e fayleng nib taareban’ e girdi’ riy maku bay e t’ufeg u thilrad.” Be athapeg Yomara nge fal gal pagel ni walagen ni nge taw ko ngiyal’ ni yira paradisnag e fayleng.​—Ps. 37:10, 11; Isa. 35:5.