U Uw e Gin Rayog ni Ngam Pirieg e Gapas Laniyan’ Riy?

Boor ban’en nib thil ko ngiyal’ ney ni gad bay riy ko ngiyal’ u nap’an Thoreau, ni kan weliy boch ko fare article ni ke yan. Bin som’on ko n’en nib thil e ngiyal’ ney e gathi ba lich e fanow ni yima pi’ u rogon ni rayog ni nge yib e gapas nga laniyan’uy. Girdi’ ni ma fil rarogon e lem nge ngongol ko girdi nge girdi ni ma yoloy e babyor ni rayog ni ngad fonownaged gadad ngay​—mus ko girdi ni ma yoloy fapi simbung—​e yad ma pi boch e thin u rogon e lem rorad. Pi fanow ni yad ma pi e rayog ni ayuwegdad machane ba ngoch nap’an; ma faanra ban’en nrayog ni nge ayuwegdad nib n’uw nap’an boch, ma kub t’uf ban’en nib toar boch ni fan ko pi n’em. Aram e n’en ni ke pirieg fapi girdi’ u lan e biney e article.

ANTÔNIO, Marcos, Vania, nge Marcelo e ba thilthil rarogon e yafas rorad ma kub thilthil e pi magawon ni keb ngorad. Machane bay dalip ban’en rorad ni taabrogon. Bin som’on, bay ba ngiyal’ ni ur lemnaged ni “dakuriy e athap rorad maku dakimoy Got u roy u fayleng.” (Efesus 2:12) Bin l’agruw, kar m’ad ni bochan ni nge gapas lanin’rad. Bin dalip, yad gubin e kar pirieged fare gapas laniyan’ ni yad baadag u tomren ni kar adaged ni ngar filed e thin u Bible ni yad be un ko Pi Mich Rok Jehovah. Nap’an ni ur mon’oggad i yan, ma kar naabgad ngay ni Got e baadag ni nge nang rarogorad. Taareb rogon, ko n’en ni yog Paul ngak fapi girdi’ nu Athen ko ngiyal’ ni immoy ni gaar, “dariy bagadad nib mal’af Got rok nga orel.” (Acts 17:27) Gad ra yul’yul’ nge michan’dad ko re n’ey ma aram e rayog ni nge gapas lanin’uy.

Mang Fan Nrib Buchuw E Gapas Ni Bay?

Bible e ke pi l’agruw i fan ni dariy e gapas u roy u fayleng​— ndemturug ko gapas u fithik’ey fa gapas u thilin e girdi’. Bin som’on e kan weliy u Jeremiah 10:23 (New World Translation) ni gaar: “De mil fan ngak e girdi’ ni ngar turguyed e kanawo’ rorad. Dariy mat’awrad ni ngar dugliyed rogon e yan rorad.” Girdi’ e dariy e llowan’ ara gelngirad ni ngar guyed ban’en nra buch nga m’on ni nge gagiyegnag ni de t’uf e ayuw rok, ma fare ayuw ni tha’bi ga’ fan e ma yib rok Got. Girdi’ ni der ma gay e ayuw rok Got e dabi yog e gapas ni dariy n’umngin nap’an ngorad. Bin migid fan ni dariy e gapas e ran guy ko thin rok apostle John ni be gaar: “Re fayleng ney ni ga’ngin e bay u tan gelngin faanem ni kireb.” (1 John 5:19, NW) Ra dariy e ayuw ni ma yib ko thin rok Got, ma ra mom’aw ko girdi’ ni ngar maruwelgad nib gel ni nge yog e gapas ngorad ya gubin e ngiyal’ ni ra i chalbrad ko maruwel rorad ni bochan facha’ ni dabni guy ma rib riyul’​—ma rib gel gelngin—​“ir faanem nib kireb”, ni Satan.

Bochan e gali n’ey​—ma boor e girdi’ e darur gayed e ayuw rok Got nge ku bochan Satan nri be maruwel nib elmirin u roy u fayleng—​ma aram e rib gel e gafgow ko girdi’ e ngiyal’ ney. Kari weliy apostle Paul nib fel’ rogon ni: “Gubin e tin ni ke sunmeg Got e yad be gel’gel’ ko amith ni kab kakrom i yib keb i mada’ ko chiney.” (Roma 8:22) Mini’ e rayog ni nge yog ni de riyul’ e re thin nem? U lan e pi nam nib fel’ rogon nge pi nam nib gafgow, ma magawon u lan e tabinaw, nge ngongol nib kireb, nge tin de mat’aw, nge ngongol ko girdi’ ni de puluw, ma dar pagan’uy ko am, nge fanenikay u thilin e pi nam, nge tolangan’, nge m’ar, nge ku boor boch ni ka bay, e ma chuweg e gapas u laniyan’ e girdi’.

Uw e Yira Pirieg e Gapas Laniyan’ Riy

Ere nap’an ni fil Antônio, Marcos, Vania, nge Marcelo e Thin Rok Got, ni fare Bible, ma kar filed boor ban’en ni ke thilyeg rarogon e yafas rorad. Ni aray rogon, kar filed ni pi n’en ni be buch u fayleng e ra thil ba ngiyal’. Re n’ey e aram e gathi yugub bugithin ni yibe athapeg ni ra reb e rran ma ra thil gubin ban’en u fayleng. Ya ba riyul’, ni kan pat ngay ni Got e bay e n’en ni ke lemnag ni fan ko girdi’ ni mus ko ngiyal’ ney ma rayog ni nge fel’ rogodad riy ni faanra gad ra rin’ e tin nib m’agan’ ngay. Kar fanayed e tin ni kar filed u lan e Bible ko yafas rorad, ma ke fel’ rogorad riy. Kar pirieged boor e falfalan’ nge gapas nda ur lemnaged nra buch.

Antônio e dakir un ko togopuluw nge cham u taban e maruwel. Ya manang ni pi n’em ni yima fl’eg ni aram rogon e dariy fel’ngin ma ba ngoch nap’an nra par. Cha’ ney ni ir e ga’ ko fare maruwel e ke fil morngaagen Gil’ilungun Got. Ereram fare Gil’ilungun ni ma meybilnag boor e million e girdi’ ni fan ko ngiyal’ ni yad ra fek fare Meybil Rok Somol (ara, Chitamangimad) mi yad yog ku Got ni gaar: “Nge yib Gil’ilungum.” (Matthew 6:10a, New International Version) Antônio e ke fil ni Gil’ilungun Got e ba riyul’ ni reb e am ni bay u tharmiy nra fek i yib e gapas ngak e girdi’.

Marcos e fil rogon ni nge rin’ e pi n’en ni ke fil u lan e Bible u morngaagen e mabgol. Ma wenegan ni ke yib riy, ngak e cha’ ney ni ma un ko politics kafram e rib falfalan’ e chiney ya kar sulow e ppin rok nga taabang. Ma ku be sap nga m’on ko re ngiyal’, ni kari chugur ni nge yib, fare Gil’ilungun Got ma ra par nga luwan e re fayleng ney nib sug ko chogow nge kireb meb reb nib fel’. Ma ke ga’ boch e llowan’ rok ko thin ko fare Meybil Rok Somol ni gaar: “Min rin’ e tin nib m’agan’um ngay u roy u but’ ni bod rogon u tharmiy.” (Matthew 6:10b, NIV) Nap’an ni ran rin’ e tin nib m’agan’ Got ngay u roy u but’, ma girdi’ e yad ra thamiy reb i fel’ngin e yafas ni dawor ni guy biid.

Gapas Laniyan’ u Lan Reb e Fayleng ni Boor e Magawon Riy

Cha’ ni ir e ga’ ko fare maruwel rok Got ni thingar da sapgad ngak e ir Jesus Kristus, ma girdi’ e faan yad ra un ko Pi Mich Rok Jehovah ni ngar filed e Bible, ma yad ra fil boor ban’en u morngaagen. Fare nep’ nni gargeleg, ma ke yin’ fapi engel e tang ni be pining e sorok ngak Got: “Ke sorok Got ni bay ko thal nth’abi tolang e tharmiy, ma nge yib e gapas nga fayleng ngak e piin yad be fel’ u wan’ Got.” (Luke 2:14) Ma faani ilal Jesus, ma ba t’uf uwan’ ni nge fel’ e yafas ko girdi’. Manang fan fiti lanin’rad ma i dag e runguy ngak e piin nib gafgow ko magawon rorad nge piin ni yad mm’ar. Maku bod fapi thin ni yog fapi engel, ke fek i yib e gapas laniyan’ ngak e girdi’ ni yad ba sobutan’. Tomren e machib ni tay, me yog ngak e pi gachalpen gaar: “Nggu tay e gapas nge par romed, nggu pi’ e gapas rog ngomed. Dab gu pi’ ngomed ni bod rogon ni ma rin’ e girdi’ nu fayleng. Dabi magafan’med ma dabi wagagey lanin’med ma dab mu tamdaggad.”​—John 14:27.

Jesus e boor boch e n’en ni rin’ ko bin ni i pi’ e chugum nge salpiy ngak e girdi’. I taareb rogon nag ir ku be’ ni ma gafaliy e saf, ma i puluweg pi gachalpen ni yad ba sobutan’ ko saf faani gaar: “Me gag e ku gub ni bochan e nge yog e yafos ngorad, ni yafas ni ke yan ni mus nga rogon. I gag faanem nib fel’ rogon ni gu ma gafaliy e saf. En ni ma gafaliy e saf nib fel’ rogon e dabi siyeg ni nge yim’ ni fan ko fapi saf.” (John 10:10, 11) Ri arrogon, i Jesus e ba thil ko piin ni yad e tayog e thin e ngiyal’ ney ni goo yad e yad be lemnagrad, ya ki pi’ e yafas rok ni fan ko pi saf rok.

Uw rogon rayog ni fel’ rogoy ko pi n’en ni i rin’ Jesus? Boor e girdi’ ni yad manang e pi thin ni baaray ni gaar: “Yi Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram a dab kur m’ad, ya ke yog e yafos ndariy n’umngin nap’an ngorad.” (John 3:16) Ra ngad maruweliyed e michan’ rodad ngak Jesus ma kub t’uf boch ban’en ni ngad nanged, ni bin som’on, thingar da nanged morngaagen Jesus nge Chitamangin, ni Jehovah. Tamilangan’ rodad ku Jehovah nge Jesus Kristus e ra pacheg e thin rodad Jehovah Got ma ra ayuwegdad nge yog e gapas nga laniyan’dad.

Yog Jesus ni gaar: “Saf rog e yad ma rung’ag lungug, ma gu manangrad, ma yad ma lekeg. Kug pi’ e yafos ni dariy n’umngin nap’an ngorad ni aram e dab kur m’ad; ma dariy be’ nrayog ni nge lagrad rog.” (John 10:27, 28) Uw fene gel e athamgil ni ke pi’ e pi thin ney ngodad! Riyul’, Jesus e weliy e pi thin ney ni ke chugur ni nge gaman l’agruw i biyu’ e duw kafram, machane kab gel gelngin e ngiyal’ ney ni bod e ngiyal’ nem. Dab mu pagtalin ni kab fos Jesus ma kab gel gelngin ni be maruwel, be gagiyeg e chiney ni ir e kan teelyawnag ni ir e Pilung ko fare Gil’ilungun Got ni bay u tharmiy. Bod rogon fa ngiyal’ ni immoy u fayleng kakrom, ma ku be lemnag e piin ni yad ba sobutan’ ni yad be yim’ nibchan e gapas laiyan’. Maku, ir e ma Gafaliy e pi saf rok. Faanra gad ra lek, ma ra ayuwegdad nge yog e gapas nga fithik’dad, nib muun ngay e athap ni rayog ni ngad guyed e gapas nib polo’ nga m’on​—ni aram e be yip fan ni ra m’ay e bugel, cham, nge ngongol nib kireb.

Tin riyul’ e fel’ rogoy e ma yib ko tamilangan’ nge michan’ rodad ngak Jehovah, u daken Jesus, ma ra ayuwegdad. Ka ga manang Vania, ir reb e buliyel ni yima pi e maruwel ngak nib tomal ma i lemnag ni ke pag Got talin? Chiney ma ke nang Vania ni Got e dawori digey. Ke yog ni gaar: “Ku fil ni Got e riyul’ ni ir be’ ni bay e t’ufeg rok. T’ufeg rok e k’aring ni nge pi’ Fak ngaray nga fayleng ni nge pi e yafos ngodad. Ma rib baga’ fan ni ngad nanged e re n’ey.”

Marcelo e ki micheg ni tafager rok ngak Jehovah e ba riyul’. Cha’ ney nib ta yan ko party kafram e yog ni gaar: “Piin ni fel’ yangaren e baga’ ni dar nanged e n’en ni ngar rin’ed, ma baga’ ni yad ma kireb niged yad. Boch e ma un i fek e drugs, ni bod gag. Gu be athapeg ni mang e yoor boch e piin rayog ni fel’ rogorad, ni bod gag, ni aram e ngar filed e thin riyul’ u morngaagen Got nge Fak.”

Bochan e ni fil e Bible nib fel’ rogon, ma ke gel e michan’ rok Vania nge Marcelo ngak Got ma ki gel e michan’ rorow ni ra ayuwegrow Got nge yog nra gelgow ko magawon rorow. Faanra gad ra rin’ e pi n’en ni kar rin’ew​—ni ngad filed e Bible ma gad rin’ e tin kad filed—​ma gad ra pirieg e gapas u fithik’ey nib ga’, ni bod yow. Ma aram e ra riyul’ fapi thin rok apostle Paul ni be pi’ e athamgil nga lanin’dad ni gaar: “Ma dariy ban’en ni nge magafan’med ngay, machane faan gimed ra meybil ngak Got mi gimed ning ngak e tin ni nge yog ngomed; ma gapas rok Got ndabi chuchugur ni nge nang e girdi’ fan e ra yororiy gum’ircha’med nge tafinay romed ngii par rok Kristus Jesus”​—Filippi 4:6, 7.

Rogon ni Gad Ra Pirieg e Gapas nib Riyul’ e Ngiyal’ Ney

Jesus Kristus e ir e be pow’iy e girdi’ ni yad be gay e thin nriyul’ ko fare kanawo’ ni be yan ko yafas ni dariy n’umngin nap’an u paradis u fayleng. Nap’an ni be pow’iyrad ko pigpig nib machalbog rok Got, ma yad ra thamiy e gapas ni bod rogon ni yog e Bible ni faani gaar: “Girdi’ rog e thingara pared u lan e gin bay e gapas riy ma dabi buch ban’en rorad, ma ke m’ay e magafan’ rorad.” (Isaiah 32:18, NW) Ma ereram e n’en ni kan dag u morngaagen e gapas ni bay nga m’on ni yad ra falfalan’ ngay. Gad ra bieg: “Piin ni yad mmunguy e bay ra pired u daken e nam, mu ur pired u fithik’ e gapas ni yad ba falfalan’. Piin ni yad mmat’aw e bay ra pired u daken e binaw, me par ni taferrad ni dariy n’umngin nap’an.”​—Psalms 37:11, 29.

Ere rayog e gapas laniyan’ e ngiyal’ n’ey fa? Arrogon. Maku, rayog ni nge mudugilan’dad ni tin baaram e rran nga m’on, e Got e ra fal’eg waathan e piin ni ke fol rok ko gapas ndawori pi’ biid. Ere, mang ndab mu meybil ngak ni nge pi’ e gapas rok ngom? Faanra bay e magawon rom ni be momaw’nag e gapas rom, mu meybil ni bod rogon ni meybil David ni Pilung ni gaar: “Mu chuwegneg u urngin e magafan’ rog ni kug par nga fithik’. Mu lemnag urngin e gafgow ni ke tay lanin’ug nge gafgow ni kug tay, ma ga n’ag fan urngin e denen rog.” (Psalms 25:17, 18) Nge michan’um ni Got e ma motoyil ko meybil ni bod e tiney. Ma k’iyag pa’ ngak e urngin e piin ni nri bay u gum’ircha’rad ni ngar gayed e gapas rok me pi e gapas ngorad. Kan pi e michan’ u fithik’ e t’ufeg ngodad ni gaar: “Jehovah e ba chugur ngak urngin e piin ni yad ma non ngak, ni yad be non ngak u fithik’ e yul’yul’. Piin ni bay madgun u wun’rad e ma pi’ ngorad e tin ni nge yog ngorad, ma rung’ag e tin ni yad ma wenignag ngak me ayuwegrad.”​—Psalms 145:18, 19, NW.

[Blurb on page 5]

Girdi’ e dariy e llowan’ ara gelngin ni gagiyegnag e yan rok ndariy e ayuw rok, ma re ayuw ni riyul’ ni bay fan e ma yib rok Got

[Blurb on page 6]

Nangan’ rok Got nge Jesus Kristus e rayog ni nge pow’iydad nge pach e tafager rodad ngak Jehovah Got ma rayog ni nge ayuwegdad nge yog e gapas ngodad

[Picture on page 7]

Gad ra fol ko fanow u lan e Bible ma rayog e gapas u lan e tabinaw