Ba Pagan’ug Ya Gu Be Taga’ Ngak Jehovah

I TABAB NI NGE PAGAN’UG NGAK JEHOVAH

Ni gargelnageg ko duw ni 1948 u bochi binaw ni bay ko yimuch ni ngal u Nigeria. Aram e ngiyal’ nni taufenag Moustapha nreb e pumoon ni walagen e chitamag nib bitir ngak, nge Wahabi ni bin th’abi ilal e pagel ni walageg ni kar mangew l’agruw e Pi Mich Rok Jehovah. Nap’an ni gaman mereb e duw rog me yim’ e chitamag. Ri kireban’ug nib gel. I yog Wahabi ngog ni ku rayog ni ngguyew Papa’ bayay u nap’an ni yira faseg ko yam’. Re n’ey e ri fal’eg lanin’ug me k’aringeg ni nggu un ko fol Bible. Ma nap’an e duw ni 1963 mug un ko taufe. Ku arrogon dalip e pagel ni walageg ni kun taufenagrad.

Nap’an e duw ni 1965, ma aram mug wan nga Lagos ko gin bay Wilson riy nreb e pagel ni walageg nib ilal ngog, ma aram mu ug chaggow nga boch e regular pioneer ni yad bay u reb e Ulung u Igbobi. Bochan ni yad ba felfelan’ maku yad ba pasig, ma aram e n’en ni k’aringeg ni ngkug un ko pioneer ko January ko duw ni 1968.

Bay reb e walag ni pumoon ni ma pigpig u Bethel ni ka nog Albert Olugbebi ngak ni yarmiy ba muulung ni fan ngomad e piin kab fel’ yangarmad ni ngan weliy riy murung’agen e special pioneer nib t’uf u lel’uch u Nigeria. Ka be yib ngan’ug rogon ni non Brother Olugbebi u fithik’ e pasig ni gaar: “Kab fel’ yangarmed ma rayog ni ngam fanayed e tayim romed nge gelngimed ni fan ngak Jehovah. Boor e maruwel ni ngam rin’ed u rom!” Ere gu ngongliy e babyor rog nggu pi’ ni nggu un ko special pioneer ni bochan e gu baadag ni nggu folwok rok Isaiah ni profet ni nggu wan ko gin baadag Jehovah ni nggu wan ngay.​—Isa. 6:8.

Nap’an e May ko duw ni 1968, min pieg ni nggu pigpig u Kano nreb e mach ni bay ko lel’uch u Nigeria ni gag reb e special pioneer. I buch e re n’ey u nap’an reb e cham ni un tay ni ka nog e Biafran War ngay ni tabab ko duw ni 1967 nge mada’ ko duw ni 1970. Ba gel e gafgow nni tay u nap’an e re cham ney maku boor e girdi’ ko lel’uch u Nigeria ni yim’ riy, ngemu’ me ulul i yan ko ngek u Nigeria. Bay reb e walag ni pumoon ni n’igin ni nge dab gu wan ngaram ni bochan e dabun ni nge buch ban’en rog. Machane me lungug ngak: “Kammagar, machane faanra baadag Jehovah ni nggu pigpig u rom ma dariy e maruwar riy nra ayuwegeg.”

I PAGAN’UG NGAK JEHOVAH U NAP’AN NU UG PAR U REB E MACH NI KE MOGOTH NI BOCHAN E CHAM NI YIBE TAY

Ri kireban’ug ko pi n’en ug guy ni i buch u Kano. Ba gel e mogoth ni tay e re mach nem ni bochan e cham ni un tay riy. Bay yu ngiyal’ ni gamad ma guy e ldow rok e piin kan li’rad ko re cham ney u nap’an ni gamad be machib. Yugu aram rogon ni bay in e ulung ni ke sum u Kano, machane yooren e walag u rom e kar milgad kar chuwgad u rom. Daki gaman 15 e tamachib ni ke magey u rom, ma kar rusgad miki mulan’rad. Ri felfelan’ e pi walag ney u nap’an nug tawgad boch e special pioneer ngaram ni gamad nel’ u gubin. Gu pied e athamgil nga lanin’rad, ma aram mu kur felfelan’gad bayay. Gu ayuweged yad ni ngar yarmiyed bayay rogon e muulung nge machib ni ngan tay, mu kur tababgad i pi’ e report rorad ni fan ko machib maku yad be ning e babyor ko branch.

Ere gu tababgad e pi special pioneer nem ni nggu filed fare thin ni Hausa. Boor e girdi’ ko re binaw nem nra motoyilgad ngomad ni bochan e yad be rung’ag ni gamad be machibnagrad ko thin rorad. Machane girdien e bin baaram e teliw nib ga’ lungun u rom e dubrad e machib ni gamad be tay, ere thingar gu kol ayuwgad. Bay bayay ni chel be’ nib pumoon nge lol’ogmow reb e walag ni gamow be machib nga bangi yar. Machane gamow ba tow’ath ya gu milgow rok ma de yag ni nge kolmow! Yugu aram rogon e riya’ ni ug warod u fithik’, machane me ‘ayuwegmad Jehovah nde buch ban’en romad’ ma aram me yoor e pi tamachib u rom. (Ps. 4:8) Chiney e ke pag 500 e tamachib ni yad be pigpig u 11 e ulung u Kano.

KE YIB E TOGOPULUW NGOMAD U NIGER

Boch nga tomuren u nap’an e August ko duw ni 1968 u tomuren ni kug par u Kano u lan in e pul, ma aram min pi’mad l’agruw e special pioneer nga Niamey ni tochuch ko fare nam ni Republic of Niger. De n’uw nap’an nga tomuren mug nanged ni fare nam nu Niger ni bay u West Africa e aram bang nrib gel e gowel riy u roy u fayleng. Gathi kemus nib t’uf ni nggu filed rogon e par u rom nib gel e gowel riy, ya kub t’uf ni nggu filed e thin ni French ni aram e thin ni yima yog u rom. Yugu aram rogon nib mo’maw’ e re n’ey, machane me pagan’mad ngak Jehovah ma gamad tabab in e tamachib ni ma par u rom ko machib ko tochuch ko re nam nem. De n’uw nap’an nga tomuren ma ba dake gubin e girdi’ ni yad manang e beeg babyor ni yad ma par u Niamey ni ke yag ba ken fare babyor ngorad ni yima fil e Bible riy ko girdi’ ni kenggin e Thin Nriyul’ Ni Ma Pow’iy I Yan Ko Yafas Ni Manemus. Ma yib e girdi’ ni yad be gaymad ni nge yag ba ken e re babyor ney ngorad!

De n’uw nap’an nga tomuren ma gamad nang ndabun girdien e am u rom daken e Pi Mich Rok Jehovah. Ma nap’an e July ko duw ni 1969, ma gamad muulung nga taabang ni nggu ted e bin th’abi som’on e circuit assembly nni tay ko re nam nem nsogonap’an 20 e girdi’ nra uned ngay. Gu felfelan’gad ya bay l’agruw e tamachib ni yow ra un ko taufe. Machane nap’an e bin som’on e rran ko re assembly nem me yib e polis i taleg e muulung ni yibe tay. Ra feked e pi special pioneer nge re walag ni baaram ni ma lekag e ulung nga tafen e polis. Tomuren nni fith boch e deer ngomad ma aram mi nog ngomad ni nge bin migid e rran ma ka gamad sul e ngaram. Gu nanged nrayog ni ku ra magawonnagmad girdien e am. Ere gu yarmiyed ni ngan pi’ e welthin ni fan ko taufe u tafen be’, ngemu’ ma gamad mith nggu taufenaged e gali cha’ ni baaram ni ngar unew ko taufe u lan ba lul’.

In e wik nga tomuren, me yog e am ngomad lal e special pioneer ni nggu chuwgad u Niger. Ra pied 48 e awa ngomad ni nggu chuwgad ko re nam nem, ma gamad e nggu gayed kanawo’emad ni nggu chuwgad u rom. Ere gu folgad ma gamad yan ko branch ofis u Nigeria ni aram e gin kun pi’ boch e maruwel riy nib beech ngomad.

Ni pieg nga reb e binaw u Nigeria ni ka nog yu Orisunbare ngay, ma ug felfelan’ ko machib ni ug ted in e tamachib ni yad ma par u rom. Machane nel’ e pul nga tomuren me yog e branch ofis ni ngkug sul nga Niger. Som’on e kug gin ko re n’ey mu kug rus, machane gub felfelan’ ngay ni ngkug mada’eg e pi walag u Niger bayay!

Ere gu sul bayay nga Niamey. Bin migid e rran nga tomuren e rofen nug taw ngaram ma bay reb e pumoon u Nigeria ni ma siyobay ni poyeg ni gag reb e Pi Mich, ma aram me tabab ni nge fith boch e deer ngog u murung’agen e Bible. Gu filew e Bible ma tomuren ni tal ko tamagow nge unum nib pag rogon, ma aram me un ko taufe. Tomuren e re ngiyal’ i n’em mug felfelan’ ni ke yag ni nggu pi’ e ayuw ni nge mon’og e machib u boch e binaw u Niger ni buchuuw ma buchuuw. Nap’an nug taw ngaram ma kemus ni 31 urngin e Pi Mich ko re mach nem, ma nap’an nug chuw ma ke gaman 69.

“GATHI RI GAMAD MANANG MURUNG’AGEN E MACHIB U GUINEA”

Nap’an e December ko duw ni 1977, mug sul nga Niger ni ngan skulnageg. Nap’an ni taw nga tungun e skul ni kan tay u lan dalip e wik, ma aram me yog reb e walag ni ka nog Malcolm Vigo ngak ni ir e ma yarmiy e Branch Committee u rom ni nggu beeg bangi babyor ni ke yib ko branch u Sierra Leone. Yibe gay reb e walag ni pumoon nib pioneer nib fel’ fithik’ i dow mab muchugbil ni manang e thin ni Meriken nge French ni nga i lekag e ulung u Guinea. I yog Brother Vigo ngog ni yibe skulnageg ni fan ko re maruwel nem. I tamilangnag ngog nre maruwel nem e ba mo’maw’. I yog ni gaar, “Mu lem nib fel’ rogon u m’on ni ngam dugliy e n’en ngam rin’.” Ka chingiyal’ nem me lungug ngak, “Gu ra yan ya Jehovah e ke l’ogeg.”

Ere gu fek e skoki nga Sierra Leone, ma gamad mada’ e pi walag ni pumoon ko branch ofis u rom. Bay reb i girdien e Branch Committee ni gaar ngog, “Gathi ri gamad manang murung’agen e machib u Guinea.” Yugu aram rogon ni branch u rom e ir e ma yarmiy rogon e machib ni yibe tay u Guinea, machane dabiyog ni ngar nonad ko pi tamachib u rom ni bochan e bay e magawon ko am ko re nam nem. Ma bay in yay ni kar guyed rogon ni ngar pied reb e walag ni pumoon ni nge yan ngaram, machane der yag. Ere nog ngog ni nggu milekag nga Conakry ni aram e tochuch u Guinea ni ngguy rogon ni nge pi’ e am mat’awug ni nggu par u rom.

Nap’an nug taw nga Conakry, mug wan ko embassy ni fan ko nam nu Nigeria ma gamow mada’ e ambassador. Gog ngak nug baadag ni nggu machib u Guinea. I yog ngog ndab gu par u rom ya rayog ni ngan koleg ara ni gafgownageg. I yog ni gaar, “Mu sul nga Nigeria ngam machib u rom.” Me lungug ngak, “Kug dugliy u wan’ug ni nggu par u roy.” Ere yoloy bangi babyor ngak reb e tolang ko am u Guinea ni be yog ngak ni nge ayuwegeg, ma aram me ayuwegeg fare tolang ko am.

De n’uw nap’an nga tomuren mug sul ko branch ofis u Sierra Leone mu gog ngak e pi walag ni pumoon u rom e n’en ke dugliy faen nib ga’ ko am. Nap’an nrung’aged rogon ni ke tow’athnag Jehovah e milekag ni kug tay, ma aram mar tolulnaged e felfelan’. Ke pageg e am ni nggu par u Guinea!

Nap’an e duw ni 1978 nge mada’ ko duw ni 1989, mu ug lekag e pi ulung u Guinea, nge Sierra Leone, mu kun pieg yu ngiyal’ nga Liberia ni nggu lekag boch e ulung u rom. Som’on e ba ga’ ni ug m’ar. Ba ga’ ni i buch e re n’ey ko yungi n’en ni ug wan riy nib palog ko mach. Machane ma athamgil e pi walag u rogon nrayog rorad ni ngar feked gag nga aspital.

Bay bayay ni yib ba mit e m’ar ngog ni ka nog e malaria ngay miki sug e fakl’ud u yal rog. Nap’an nug gol, mug nang ni ka i puruy’nag e pi walag e gin ngan k’eyageg riy! Yugu aram rogon e n’en ni i buch rog, ma dariy ba ngiyal’ nug lemnag ni nggu digey e maruwel ni kan pi’ ngog. Ba mich u wan’ug ni kemus ni yigoo Got e rayog rok ni nge yororiydad nib fel’ rogon ni bochan e mus ni faanra kad m’ad ma rayog ni nge fasegdad ko yam’.

I PAGAN’MOW LEENGIG NGAK JEHOVAH

Nap’an e duw ni 1988, mug mada’nag Dorcas nreb e walag nib pin nib pioneer nrib sobut’an’ mab t’uf Jehovah rok. Ere gu mabgolgow me un ngog ngaug lekagew e ulung. Dorcas e ir reb e ppin ni ma dag e t’ufeg ma ma pag fan ir u boch ban’en. Gamow ma yan u but’ u lan 15 e mayel ni gamow be lekag e pi ulung ni kug fekew e chugum romow nga pa’mow. Ma faanra ba palog e ulung ni nggu warow ngay, ma gamow ma gay e gin nrayog ni nggu milekaggow riy e ngaram ni gamow be yan u yu pa’ i kanawo’ nib barbar ma boor e low riy.

Dorcas e ir be’ nder ma rus. Bod ni bay yu ngiyal’ nib t’uf ni nggu th’abew yu pa’ i lul’ nib sug e gayuch u langgin nga barba’. Bay bayay nthingar gu milekaggow u lan lal e rran mab t’uf ni nggu warow u m’uw nggu th’abew ba lul’ nga barba’ ya ke m’ing e wethal ni yima yan riy. Nap’an ni be yan Dorcas ni nge chuw u lan fare m’uw me mul nga maran. Dariy bagamow ni manang e minong mab sug e gayuch u lan e re lul’ nem. Machane gamow ba tow’ath ya yib boch e pagel ra oggad nga maran ngan ayuweg. Ba n’uw nap’an ni ug lik’aynagew e re n’ey ni buch. Machane ma gamow ulul ko maruwel romow.

Nap’an e duw ni 1992, mug gingow ngay ni ke diyen Dorcas. Ba t’uf ni nggu dugliyew ko nggu ululgow ko special pioneer fa nggu talgow. I lungumow u wan’mow, “Ke pi’ Jehovah reb e tow’ath ngodow!” Ere gu dugliyew ni nggu tunguyew fithingan e chi pin nem ni fakmow ni Jahgift. Aningeg e duw nga tomuren nni gargeleg Jahgift, ma aram min gargeleg Eric nreb e pagel ni walagen. Gal bitir ni fakmow ney e riyul’ ni yow l’agruw e tow’ath ni ke pi’ Jehovah ngomow. I pigpig Jahgift u lan ba ngiyal’ ko gin yima pilyeg e babyor riy u Conakry, me Eric e ir reb e ministerial servant.

Yugu aram rogon ni munmun me t’uf ni nge tal Dorcas ko special pioneer, machane me ulul ko regular pioneer ni yugu aram rogon nib t’uf ni nge chuguliy e gal bitir ney ni fakmow. Bochan ni i ayuwegeg Jehovah ma aram me yag ni nggu ulul ko special pioneer. Tomuren ni ilal fakmow me yag ni ngki un Dorcas bayay ko special pioneer. Ma chiney e gamow ma pigpig ni gamow l’agruw e missionary u Conakry.

EN MA YIB E BIN RIYUL’ E PAGAN’ ROK

Gubin ngiyal’ nug be yan ko gin be fekeg Jehovah i yan ngay. Boor yay ni kug guyew leengig rogon ni ke yororiymow ma be tow’athnagmow. Bochan ni ke pagan’mow ngak Jehovah, ma ke yag ni nggu siyegew e magafan’ nge magawon ni ma yib ngak e piin ma pagan’rad ko chugum. Kug filew Dorcas ko n’en ke buch romow ni En Ma Yib e bin riyul’ e pagan’ rok e aram Jehovah ni ir e ‘Got ni Tabiyul rodad.’ (1 Kron. 16:35) Ba pagan’ug ngay ni piin be pagan’rad ngak e ‘bayi tayrad ndabi buch ban’en rorad, ni bod be’ ni pumoon ni be matanagiy ban’en nrib t’uf mab tolang puluwon.’​—1 Sam. 25:29.