Ba Gel e Felfelan’ ni Kug Tay ko Pigpig Rog Ngak Jehovah

ROGON E TABINAW ROG

Ni gargelnageg ko duw ni 1934 u Timmins nreb e binaw ni bay u Ontario u Canada, ma gallabthir rog e yow e girdi’ nu Switzerland. Bang ko duw ni 1939 me tabab e chitinag ni nga i beeg fare Wulyang ko Damit ma be un ko muulung ko Pi Mich Rok Jehovah. Ma fekeg nge pi walageg ni gamad medlip u gubin nggu uned ngak. De n’uw nap’an nga tomuren me mang reb e Pi Mich Rok Jehovah.

Dabun e Chitamag e n’en ni dugliy, machane ba ga’ fan e tin riyul’ u wan’ me dugliy ni nge par riy. Ku de digey e tin riyul’ u thilin e duw ni 1940 nge 1943 u nap’an ni kan taleg e maruwel ko Pi Mich Rok Jehovah u Canada. Ma gubin ngiyal’ ni ma dag e sumunguy nge tayfan ngak e Chitamag ni yugu aram rogon ni ma yog e thin nib kireb ngak. Ngongol nib fel’ ni i dag e ayuwegmad pi walageg ni ngkug uned ko tin riyul’. Rug felfelan’gad ya munmun me thil e lem ko Chitamag, me tabab ni nga i dag e sumunguy ngomad.

KUG TABAB KO PIGPIG U POLO’ E TAYIM

Nap’an e August ko duw ni 1950, mug un ko fare Assembly ni kenggin e Theocracy’s Increase nni tay u New York City. Tomuren nug mada’nag boch e walag ni kar bad u ga’ngin yang e fayleng mu kug motoyil ko n’en ni weliy boch e walag ni kar uned ko fare Skul u Gilead, ma aram ma rug adag ni nggu yoornag e tin gu be rin’ ni fan ko pigpig rog ngak Jehovah! Rug dugliy u wan’ug ni nggu un ko machib u polo’ e tayim rog. Nap’an ni yug gu sul ko gin gu ma par riy, mug fal’eg e babyor rog ni nggu un ko regular pioneer. Ere yol e branch ofis u Canada ngog ni yad be yog nib fel’ ni nggu un ko taufe som’on. Aram e n’en nug rin’ ko October 1, 1950. Reb e pul nga tomuren mug un ko regular pioneer min pieg nga Kapuskasing. Rib palog e re binaw nem ko gin gu ma par riy.

Nap’an e duw ni 1951, me yog e branch ofis ko Pi Mich ni yad manang e thin ni French ko yad baadag ni nga ranod ra pared nga Quebec ko gin yima non riy ni thin ni French fa danga’. Rib t’uf boch e tamachib u rom. Gu ilal nug ma non ni thin ni French nge Meriken, ere m’agan’ug ngay ni nggu wan ngaram, ma aram min pieg nga Rouyn. Dariy be’ u rom ni gu manang. Kemus ni gin nggu wan ngay e gu manang ni bod ni kug weliy aram ko tabolngin. Machane gubin ban’en ni yan nib fel’ rogon. Ri pach e thin romow Marcel, me munmun mug mang reb e special pioneer u lan aningeg e duw ni ug pigpig u Quebec, ma ri kug baadag e pigpig ni ug tay u rom.

GILEAD NGE BOCH BAN’EN NUG BAADAG NI NGGU RIN’ NUG TAY NGE BOCH NGA TOMUREN MUG RIN’

Nap’an nug bay u Quebec me taw e thin ngog ni nggu un ko bin 26 e class ko fare Skul u Gilead ni bay u South Lansing u New York. Gu mu’nag e re skul nem ko February 12, 1956, ma aram min pieg nga Ghanab ni bay u West Africa. U m’on nug wan ngaram, mab t’uf ni nggu sul nga Canada nge mada’ ko ngiyal’ ni ke fel’ e babyor rog nrayog ni nggu wan gu par nga Ghana. Gu lemnag ni kemus ni l’agruw ara dalip e wik nug ra par u Canada.

Machane medlip e pul nug par u Toronto nggu sonnag e pi babyor nem ni nge fel’. Nap’an e re ngiyal’ i n’em mu ug par u tafen Brother nge Sister Cripps, me munmun me fel’ e thin romow Sheila nreb e rugod ni fakrow. Rug adagew gamow. Nap’an nug be lemnag ni nggog ngak nug baadag ni nggu mabgolgow, ma aram me fel’ e visa e rog. Gu yibilayew murung’agen e re n’ey ma gamow dugliy nib fel’ ni nggu wan ko gin kan pieg ngay. Machane gu dugliyew ni ngaug yolgow ngomow ma gamow be guy ko rayog ni nggu mabgolgow boch nga m’on fa dabiyog. De mom e re n’ey, machane boch nga tomuren ma gamow nang nib fel’ e n’en nug dugliyew.

Tomuren reb e pul nug milekag u train, nge barkow ko chugum, nge skoki, ma aram mug taw nga Accra ni bay u Ghana. Nni teg ni nggu pigpig u rom ni gag reb e district overseer. Ere ba t’uf ni nggu milekag u ga’ngin yang yu Ghana ni kub muun yu Ivory Coast (chiney e yima yog ni Côte d’Ivoire) ngay nge Togoland (chiney e yima yog ni Togo). Yooren e ngiyal’ e gu ma milekag ni yigoo gag nug be yan u ba karrow ni fen e branch. Rug ma felfelan’ ko pi milekag nem nug ma tay!

Ra Sabado nge Madnom ma gu ma pi’ e welthin ko pi circuit assembly ni yima tay. Dariy e Assembly Hall romad. Ere ma ngongliy e pi walag ni pumoon e piyuw ni nge par e girdi’ u tanggin ndabi mat e yal’ ngorad. Yima fek e gamanman ni kab fos e ngaram min li’ u rom ni nge kay e piin kar uned ko assembly, ya dariy e icebox ko gin yima lum riy.

Ku bay boch ban’en ni ma buch u nap’an e pi assembly nem nib mak’ak’ar. Immoy bayay ni be pi’ Herb Jenningsc ni ku ir reb e missionary ba welthin me thay ba garbaw ko gin yima lum riy, me yib i mil u thilin e gin yibe pi’ e welthin riy nge gin bay e girdi’ riy. I tal Herb ndaki non ma fare gamanman e bod ni ke balyangan’. Machane me yib aningeg e walag ni pumoon ra koled fare garbaw ngar sulweged ko gin yibe lum riy, me wayway gubin e girdi’.

Ra lan e wik ma gu ma pag fare kachido rodad ni kenggin e The New World Society in Action ko pi binaw nib chugur ngaram. Rogon nug ma rin’ e re n’ey e aram e gu ma fek bangi mad nib wechwech nggu wan gu m’ag nga l’agruw i ban’en ara l’agruw ken e gek’iy mug pag e re kachido nem riy. Ri baadag e girdi’ ni yad ma yaliy e re kachido ney! Boor i yad e ireray e bin som’on e kachido ni ke guy. Nap’an ni yira pag yaan e girdi’ ni yibe taufenagrad, ma ri yad ma wayway nib elmerin. Re kachido ney e ri ayuweg e piin nra guyed ni ngar nanged ni ulung rodad e bay u ga’ngin yang e fayleng ma gad ba taareb.

Tomuren sogonap’an l’agruw e duw nug par u Africa, ma rug felfelan’ ni nggu un ko fare international convention nni tay u New York City ko duw ni 1958. Rug felfelan’ u nap’an nug mada’gow Sheila ni ke yib u Quebec ni aram e gin be pigpig riy ni ir reb e special pioneer. Kafram e ug yolgow ngomow, ma chiney ni kug mada’gow bayay e gu fith ngak ko baadag ni nggu mabgolgow fa danga’, ma aram me m’agan’ ngay. Gu yol ngak Brother Knorrd nggu fith ngak ko rayog ni nge un Sheila ko fare skul u Gilead me lekeg nga Africa fa dabiyog, ma aram me yog nrayog. Tomur riy me taw Sheila nga Ghana, ma aram mug mabgolgow u Accra ko October 3, 1959. Gu nangew nriyul’ ni ke tow’athnagmow Jehovah ni bochan e kug m’onegew u lan e yafos romow.

UG PIGPIGGOW U TAABANG U CAMEROON

Nap’an e duw ni 1961, min pi’mow nga Cameroon. Ri boor ban’en ni ug rin’ u rom ya nog ngog ni nggu pi’ e ayuw u rogon ni ngan sunmiy reb e branch ofis nib beech u rom. Boor ban’en nib t’uf ni nggu fil ni bochan e nni teg ni ngaug yarmiy rogon e maruwel ni machib ni yibe rin’ u rom. Me yan i taw ko duw ni 1965 mug nangew ni ke diyen Sheila. Ba mo’maw’ ngomow ni nggu lemnagew yaamow ni kug mangew l’agruw e gallabthir. Machane nap’an e fin be yan ni nge fel’ u wan’mow e re n’ey maku gamow be fal’eg rogomow ni nggu sulow nga Canada, ma aram me buch ban’en romow nri kireban’mow ngay.

I maraggil Sheila. I yog e togta ngomow ni bochi pagel e re tir nem. Ke pag 50 e duw ni ke buch e re n’ey, machane dawor gu pagew talin. Yugu aram rogon nri kireban’mow ko n’en ke buch, machane mug parew ko gin kan pi’mow ngay ya ri gamow baadag e maruwel ni gamow be rin’.

Ba ga’ ni un gafgownag e pi walag u Cameroon ni bochan e ur pared u mathilin ngongolen e am. Ri ma mo’maw’ e re n’ey ngorad u nap’an ni yibe towaliy e en nge mang president. Nap’an e May 13, 1970, me buch ban’en ni ug athapeged ndabi buch ni aram e nni taleg e maruwel ko Pi Mich Rok Jehovah u rom. I fek e am fare naun ni ka fin gu warod gu pared ngay lal e pul u m’on riy ni aram e bin nib beech e branch ofis rodad. De gaman reb e wik nga tomuren mi nog ni nge chuw gubin e missionary u rom ni ka gamow ba muun Sheila ngay. Ba mo’maw’ ni nggu digeyew e pi walag ni bochan e ri yad ba t’uf romow ma i magafan’mow ko n’en nra buch rorad.

Nel’ e pul nug parew ko branch ofis u France. Aram e gin nug ulul i rin’ e tin nrayog rog riy ni nggu ayuweg e pi walagdad u Cameroon ko tin nib t’uf rorad. Nap’an e December ko re duw nem min pi’mow ko branch u Nigeria ni aram e re branch ni tabab ni nga i yaliy rogon e maruwel ni yibe rin’ u Cameroon boch nga tomuren. Rib gol e pi walag u Nigeria ngomow mu ug felfelan’gow ko pigpig nug tew u rom u lan in e duw.

BAN’EN NIB MO’MAW’ NI NGGU DUGLIYEW

Bay ban’en nib mo’maw’ nib t’uf ni nggu dugliyew ko duw ni 1973. Ke n’uw nap’an ni ke m’ar Sheila nib ubchiya’. Nap’an ni gamow bay u New York ni nggu unew nga reb e convention, mi ri yor nib gel me gaar ngog: “Dabkiyog rog! Dakuriy gelngig ma yooren e ngiyal’ e gub m’ar.” Ke pag 14 e duw ni kug pigpiggow u West Africa. Ri gub felfelan’ ngak nga rogon e pigpig ni i tay u fithik’ e yul’yul’, machane ba t’uf ni nggu thilyegew boch ban’en ko par romow. Tomuren nug weliyew murung’agen e magawon romow u taabang mu kug meybilgow nib gel, ma aram ma gamow dugliy nib fel’ ni nggu sulow nga Canada ko gin nrayog ni ngan tafalaynag Sheila riy nib fel’ rogon. Re n’ey nug chuwgow ko gin nni pi’mow ngay ni gamow l’agruw e missionary, mu kug talgow ko pigpig u polo’ e tayim e aram l’agruw ban’en nrib mo’maw’ nug dugliyew u lan e yafos romow ma ri kub gel e kireban’ nug tew riy.

Tomuren nug tawgow nga Canada, me fekeg reb e fager rog ni nggu maruwel rok u bang ni yima pi’ e karrow riy ni chuway’ ni bay u reb e binaw ni bay ko lel’uch u Toronto. Ug piew puluwon reb e apartment ni nggu parew riy, ma gamow chuw’iy boch e chugum ni ka un fanay, me yag ni nggu parew u rom ndariy e malfith romow. Gamow baadag ni nggu momnagew rogon e par romow ya gamow be athapeg ni nge ba ngiyal’ me yag ni ngkug pigpiggow bayay u polo’ e tayim romow. Kug gingow nga feni papey ni yag ni nggu rin’ew e re n’ey nga rogon nug lemnagew.

Gu tabab ni ngaug pi’ e ayuw ko Sabado ko gin yibe ngongliy reb e Assembly Hall riy nib beech u Norval ni bay u Ontario. Munmun mi nog ngog ni nggu pigpig ni gag e overseer ko re Assembly Hall nem. Ngiyal’ nem e be fel’ rogon Sheila i yan, ere gu lemnagew nrayog ni nggu rin’ew e re maruwel ney. Ere nap’an e June ko duw ni 1974, mug warow gu parew ko apartment ko Assembly Hall. Rug felfelan’gow ni ke yag ni nggu pigpiggow u polo’ e tayim romow bayay!

Gu felfelan’gow ya yag ni nge fel’ rogon Sheila ko m’ar rok. L’agruw e duw nga tomuren, me m’agan’mow ngay ni ngan pi’mow ni ngaug lekagew e ulung. Pi ulung ni ug lekagew e bay u Manitoba ni bangi ban’en ni bay u Canada ni ma aw e ayis riy nib gel. Machane rib gel e t’ufeg ni i dag e pi walag ngomow u rom. Gu filew ko re n’ey ndemtrug e gin gad be pigpig riy, ma n’en nib ga’ fan e ngad ululgad ko pigpig ni gad be tay ngak Jehovah.

BAN’EN NUG FIL NIB GA’ FAN

Tomuren ni ka ug lekagew e ulung u lan in e duw, ma aram min piningmow ni nggu pigpiggow u Bethel u Canada ko duw ni 1978. De n’uw nap’an nga tomuren ma bay ban’en nug fil nib mo’maw’ ngog, machane ba ga’ fan. Bay reb e muulung nni tay u Montreal mi nog ngog ni nggu pi’ reb e welthin ko thin ni French nreb e awa nge baley n’umngin nap’an. De yag ni nge motoyil e girdi’ nib fel’ rogon ko welthin nug pi’, ma nga tomuren me fonownageg reb e walag ni pumoon ko Service Department. Bin riyul’ riy e susun e nggu nang e ngiyal’ nem e n’en kug nang e chiney ni aram e gathi gag be’ ni gub salap ko welthin. Machane de m’agan’ug ko re fonow nem nni pi’ ngog. De yag ni nggu nonow nib fel’ rogon. Gu damumuw ni bochan e gu lemnag ni kaygi pag rogon ni ke lemnag e tin nde yag ni nggu rin’ nib fel’ rogon ma de yog ngog e n’en nib fel’ ni kug rin’. De fel’ e n’en nug rin’ ya gu lemnag rogon ni kan pi’ e fonow ngog nge n’en nug be lemnag u rarogon e en be fonownageg.

In e rran nga tomuren me yib i non reb i girdien e Branch Committee ngog u murung’agen e re n’ey. Gog ngak nriyul’ nde fel’ e n’en nug rin’ u nap’an nni fonownageg mu kug wenig ngak. Ngemu’ mug wan gu non ko fare walag ni fonownageg, me n’ag fan rog e n’en kug rin’. Re n’ey ni buch e fil ngog feni ga’ fan e sobut’an’, maku ban’en ndab gu pagtalin. (Prov. 16:18) Boor yay nug yibilay murung’agen e re n’ey ngak Jehovah, ma kug dugliy u wan’ug ndakuriy borran ni nggu sap nga thibngin e fonow ni kan pi’ ngog.

Chiney e ke pag 40 e duw ni kug pigpig u Bethel u Canada, ma ka nap’an e duw ni 1985 nug be pigpig ni gag reb i girdien e Branch Committee. Nap’an e February ko duw ni 2021 me yim’ Sheila. Rug ma tawrengnag nib gel, maku arrogog ni ku bay e m’ar rog. Machane bochan ni boor ban’en nug be rin’ ni fan ko pigpig rog ngak Jehovah maku gub felfelan’, ma bayi n’en ma da gur ma lemnag “feni ngoch e yafos rodad.” (Ekl. 5:​20, BT) Kab gel e felfelan’ nug ma tay ni yugu aram rogon ni boor e magawon ni kug mada’nag u lan e yafos rog. Ba gel e felfelan’ ni kug tay ni kug m’oneg Jehovah u lan e yafos rog, ma kug pigpig u polo’ e tayim rog u lan 70 e duw. Gu be yibilay ni manga yigi ulul e pi walag ni kab fel’ yangarrad ni ngar m’oneged Jehovah u lan e yafos rorad, ya ba mich u wan’ug ni yad ra pirieg e felfelan’ ni ma yib ngodad u nap’an ni gad ra pigpig ngak Jehovah.