Be’ u Lan e Tabinaw ni Bay e Magawon Rok ko Chingaw

“Faanra bay be’ u reb e tabinaw ni bay e magawon rok ko chingaw ma gubin i chon fare tabinaw ni ke l’ag ko fare magawon.”​−Dr. Vernon E. Johnson.

ALICE e bochi buliyel ni lal e duw rok ni ke maad’ad ay ma kaygi par u bet ya ke gafgow ko amith ya kan cemennag ay nrib mache’che’, ke thow. Be wenig ko gallabthir rok ni ngan fek nga aspital, machane dabiyog ya ke m’ar e chitamangin ko chingaw ma daki nang e chitiningin ko mini’ rorow e nge ayuweg.

In e rran nga tomren ma daki thamiy Alice ay. Nap’an ni tabab ni nge yib e racha’ ni kireb ko bugul ni ga’ i ay nga but’ mfin aram e fek e gallabthir rok nga aspital. Nap’an nni tawnag nga aspital, nni luf fare cemen u ay me thig reb e nurse nga but’. Ma aram mi nog ni ngan th’ab fare raba’ i n’en ni ay ni bochan e dabki fel’.

En ni Bay e Magawon Rok ko Chingaw nge En Ke L’ag Ngay

Magawon e gathi kemus ni kan th’ab ay fachi buliyel ya chitamangin e reb e ta chingaw. Nap’an ni t’uf e ayuw rok fak ma dabiyog ni nge ayuweg. Reb e tafonow ni Toby Rice Drews fithingan e yog ni gaar: “Girdi’ ni bay e magawon rorad ko chingaw e aram e n’en ni ke m’on u wan’rad ma ke tomur e tabinaw rorad nge tin nib ga’ fan.”

Ma uw rogon e chitiningin Alice? Ku bay a magawon rok machane gathi magawon ko chingaw, ya pumoon rok e ke mang magawon rok. Ke par ni yugu be lemnag e n’en nra rin’ me tal e pumoon rok ko chingaw nge rogon ni nga i k’adan’. Ere yugu aram rogon ndar chingaw fare pin machane ki l’ag ko fare magawon ko pumoon rok. Aram fan ni girdi’ ni bod e chitiningin Alice e magawon ko pumoon rorad ni ta chingaw e ki mang magawon rorad.

Faen ni bay e magawon rok ko chingaw nge en ni ke l’ag ko fare magawon e bay be’ fa ban’en ni be gagiyegnagrow, machane dab rognew nriyul’ ni aram rogon. Yow l’agruw ndabkiyog ni ngar ayuwegew e bitir rorow ma ke chalbarow ko magawon rorow ya faen ni bay e magawon rok ko chingaw e ke mo’maw’ ni nge tal, ma faen ke l’ag ko fare magawon e dabkiyog ni nge ayuweg faen ke magawon ma ku dakuriy bagayow nrayog rok ni nge ayuweg e bitir rorow ni nge dabi yib wenegan e re magawon nem ngorad.

Machane bay ban’en nrayog ni nge ayuweg faen bay e magawon rok ko chingaw nge tabinaw rok. Gad ra weliy e re n’ey ko bin migid e thin.a

[Footnote]