Uw Rogon Nra Pi’ e Tabinaw e Ayuw?

“Som’on e ra unum reb, ngemu’ ngki unum reb, me munmun ma dabkiyog ni nge tal me yan i par ni aram e n’en ni be gagiyegnag.”​—Bbugithin ni yima yog u ngek u Asia.

CHINGAW e ma kirebnag e tabinaw. Ya faen leengiy e ke gay rogon gubin ban’en ni nge ayuweg e pumoon rok ma dawori thil. Ke yog ngak ni nge tal ma dabi tal. Ma ra mithag e rrum rok mi ki yan i chuw’iy boch. Ma ra mithag e salpiy rok me yan i ning e salpiy ku be’. Ke yog ngak ni nge lemnag e tabinaw rok nge yafas rok nge Got, machane der rin’. Ere gowa dakuriy e n’en nrayog ni ngan rin’. Machane faanra ngan ayuweg faanem ni bay e magawon rok ko chingaw ma som’on e thingari nang chon e tabinaw rok rarogon e girdi’ ni aram rogon e magawon rok. Thingar ra nanged ko mang fan nder yib angin boch ban’en ni yad be gay rogon ni ngar rin’ed nge n’en ni yad ra rin’ meb angin.

Magawon ko chingaw e gathi ngar ni ching. Ya faanra bay e magawon ku be’ ko chingaw ma aram e ke par ni yugu aram e n’en ni be lemnag ma nap’an nra unum buchuuw ma dabkiyog ni nge taleg. Boor e girdi’ ni manang murung’agen e re n’ey ni yad ma yog ndabiyog ni ngan pag, machane bin riyul’ riy e rayog ni faanra dab kum unum buchuuw.​—Mu taarebrogonnag ko Matthew 5:29.

Re n’ey e rayog ni ngan taarebrogonnag ngak be’ nib m’ar ko suga. Yugu aram rogon ndabkiyog ni nge thilyeg rarogon, machane rayog ni nge ayuweg ir ni faanra dabki kay e suga. Ere ku er rogon be’ ni bay e magawon rok ko chingaw. Dabkiyog ni nge thilyeg e lem rok u murung’agen e chingaw, machane rayog ni nge ayuweg ir ni faanra dabki unum buchuuw e alkul.

Machane, re n’ey e ba mom ni nga nog mab mo’maw’ ni ngan rin’. Ya faen ni bay e magawon rok ko chingaw e dar nang ni aram e magawon rok. Rayog ni nge gaar, ‘Gathi yug gu ma chingaw.’ ‘Girdi’ u tabinaw rog e yad ma k’aringeg ni nggu chingaw.’ ‘Gu ma chingaw ni bochan e kaygi gel e maruwel ni ma pi’ e en ga’ ko maruwel ngog.’ Ba dake gubin ngiyal’ ni yugu aram e n’en ni ma yog, ere gubin e girdi’ u lan fare tabinaw ni ke riyul’ e thin rok u wan’rad. N’en ni yad ma yog e, ‘Ba gel e maruwel ni ke tay e chitamangimed e daba’, ere ba t’uf ni nge unum buchuuw ya nge toffan.’ ‘Be chingaw papa’ ni bochan e ke chalban ku nina’ ni yugu be non non.’ Ere yad ma tawey nga bogi ban’en ma dab rogned ni chitamangirad e bay e magawon rok ko chingaw. I yog reb e togta ni Susan Forward fithingan ni gaar: “Kemus rogon me yog nra pired u taabang. Ya kar mechamgad ko ban nge tawey nge tin nib mith ban’en.”

Som’on e thingari nang girdien e tabinaw rogon ni ngar ayuweged yad mfini yog nra ayuweged faen bay e magawon rok. Machane sana ra gaar boch i yad, ‘Ir e ba t’uf e ayuw rok, gathi gag!’ Uw rogon ni ke magawon lanin’um ni bochan e ngongol rok e en bay e magawon rok ko chingaw u tabinaw rom? Uw urngin yay ni ma k’aring e damumuw ngom nge magafan’ nge chalban nge marus? Uw urngin yay ni ga ma digey boch ban’en nib ga’ fan ya ngam par u tabinaw ngam ayuweg? Faanra gay e girdi’ u tabinaw rogon ni nge fel’ boch e par rorad ma dabisiy ni ku aram e n’en nra rin’ faen bay e magawon rok ko chingaw.

Dab kum lemnag ni gur e ba kireb e rom. Sana ra gaar faen bay e magawon rok ko chingaw, ‘Faan manga ba fel’ e ngongol rom ngog, ma da gur chingaw.’ Machane rogon ni yog Toby Rice Drews nreb e ta fonow e gaar: “Baadag ni ngam lemnag ni gur e ba kireb e rom ya nge yib e tawey rok ni nga i par ma be chingaw.” Machane dab mu aw ko re ban ney, ya faen ni bay e magawon rok ko chingaw e gathi kemus ni alkul e be taga’ ngay ya ku er rogon e girdi’ u tabinaw rok ni manang ni yad ra ayuweg. Ma faanra mu ayuweg ma aram e dabiyog ni nge tal.

Bay reb e thin nu Bible u murung’agen e girdi’ nib papey e damumuw ngak ni ku rayog ni ngan taareb rogonnag ngak be’ ni bay e magawon rok ko chingaw ni gaar: “Ma ga digey nge sul wenegan e tirok ngak. Ma faan ga ra ayuweg ko oloboch rok taab yay, ma ke mudugil ni ka ga ra ayuweg bayay.” (Proverbs 19:19, Bible ni Thothup) Arrogon, mu digey nge mang ir e non ko en ga’ ko maruwel rok, me klinnag aban me yan i mol. Faanra gur e ngam rin’ e pi n’ey ni fan ngak ma aram e ga be ayuweg ni ngki ulul ko n’en be rin’.

Mu ning e ayuw, ya magawon ni aray rogon e dariy be’ nrayog ni nge pithig rok ni goo ir. Mu taga’ ngak e pi tafager rom ni ga manang ni yad ra ayuwegnem.

Rib gel e felfelan’ riy ni faanra m’agan’ faen bay e magawon rok ngay ni ngan ayuweg. Machane aram tabolngin, ya rayog ni nge digey be’ e chingaw u lan in e rran machane ba mo’maw’ ni nge dabuy.