Guruy ni 13

Ra Diin Ma Ga Pateg e Baan Riyul’ e Teliw?

Urngin raba’ e teliw mab m’agan’ Got ngay, fa ri taabraba’? (1)

Mang fan ni boor raba’ e teliw ni yima yog ni Kristiano? (2)

Uw rogon ni ga ra poy e tin riyul’ e Kristiano? (3-7)

1. I tababnag Jesus e bin riyul’ e teliw ko Kristiano ni ri taareb. Me ere ke chiney ma dabi siy ni ke mus ni ri taareb e ulung fa boch e girdi’ ni riyul’ ni yad ma pigpig ku Jehovah Got. (John 4:23, 24; Efesus 4:4, 5) Be fil e Bible ngodad ni ke mus ni buch uw e girdi’ ni be yan ko kanawo’ nib wen’in ni yan ko yafas.—Matthew 7:13, 14.

2. Ke weliy e Bible kafaram ni yug nap’an nra yim’ e pi apostal ma ra sum boch e machib nib kireb nge boch e ngongol ni der ma rin’ e Kristiano nra yib nib sagaal nga lan e ulung ni Kristiano. Ma boch e girdi’ e ra chefeg e piin ni ke mich Got u wan’rad nga orel min fol rorad ni bod ni yima fol rok Kristus. (Matthew 7:15, 21-23; Acts 20:29, 30) Aram fan ni gad be guy ni ke yoor e teliw nib thilthil ma yima yog ni Kristiano. Uw rogon ni gad ra poy e tin riyul’ e Kristiano?

3. Bin th’abi lingagil e pow ni ba’ ko tin riyul’ e Kristiano e bay e t’ufeg nriyul’ u fithik’rad. (John 13:34, 35) Danir fil ngorad ni nga ur lemnaged ni yad ba fel’ ngak yug boch e girdi’ nib thil raen dowrad, ara ganong rorad. Ara yima fil ngorad ni ngar fanenikayed girdien yugu boch e nam. (Acts 10:34, 35) Ma darur uned ko mahl. Tin riyul’ e Kristiano e yad ma t’ufeged yad ni bod e walag ni pumoon nge ppin.—1 John 4:20, 21.

4. Maku reb e pow ko teliw nriyul’ e girdi’ riy e ri yad ma ta’ fan e Bible. Yad ma ta’ ni ri ereram e Thin Rok Got ma yad ma pagan’rad ko tin be yog. (John 17:17; 2 Timothy 3:16, 17) Yad ma ta’ ni Thin Rok Got e kab ga’ fan boch ko lem ko girdi’ nge yalen rorad. (Matthew 15:1-3, 7-9) Yad ma guy rogon ni ngar faned ko par rorad ni gubin e rran e thin ko Bible. Ar fan ni darur machibnaged ban’en mar rin’ed yug reb e ban’en.—Titus 1:15, 16.

5. Bin riyul’ e teliw e thingari ki ta’ fan fithingan Got. (Matthew 6:9) Jesus e ke yog fithingan Got ni Jehovah kan nang. Tin riyul’ e Kristiano e thingar ku ra rin’ed ni aram rogon. (John 17:6, 26; Roma 10:13, 14) Mini’ e piin bay u lan e binaw rom ni yad ma yog ko girdi’ fithingan Got?

6. Tin riyul’ e Kristiano thingara wereged morngaagen Gil’ilungun Got. Aram e n’en ni i rin’ Jesus. Gubin ngiyal’ ni ma weliy morngaagen fare Gil’ilungun. (Luke 8:1) Motochiyelnag ngak pi gachalpen ni ngar machibnaged ni aram rogon nga gangin yang e fayleng. (Matthew 24:14; 28:19, 20) Tin riyul’ e Kristiano e ke mich u wan’rad ni kari mus ni Gil’ilungun Got e ra fek iyib e bin riyul’ e gapas nge pagan’ ko re fayleng ney.—Psalm 146:3-5.

7. Pi gachalpen Jesus e thingari dabra manged bayang ko re fayleng nib kireb ney. (John 17:16) Dab ra uned ko ngongolen e am nge maluag thin ko yu ulung e girdi’. Yad ma palog ko ngongol ni ma kirebnagey nge boch e lem ni ke garer nge ngongol ni yibe rin’ ko re fayleng ney. (James 1:27; 4:4) Rayog ni mu poy reb e ulung ko teliw ko binaw rom ni bay e pi pow ko tin riyul’ e Kristiano ney riy?

[Sasing ko page 26, 27]

Tin riyul’ e Kristiano yad ma t’ufeged yad, mar ted fan e Bible, mar machibnaged morngaagen Gil’ilungun Got