Rogon Ni Ngam Pirieg Fare Teliw Nriyul’

Faanra ga baadag ni ngam mang reb e fager rok Got, ma ngam un i rin’ e tin yibe fil ko re teliw ni ke micheg. Ke gaar Jesus faram “piin riyul’ ni ma liyor ku Got e nge liyor ngak u fithik’ e “riyul’.” (John 4:23, 24) Kari mus ni taab pa’ e kanawo’ nib fel’ ni nguun liyor ku Got riy. (Efesus 4:4-6) Teliw nriyul’ e ma pow’iyey ko yafos ni manemus ma teliw ni googsur e ma pow’iyey ko magothgoth.​—Matthew 7:13, 14.

Rayog ni ngam poy e teliw nriyul’ ni faanra um fl’eg i yaliy rogon ni ma ngongol e girdi’ riy. N’umngin nap’an ni be par Jehovah nib fel’, ma piin riyul’ ni yad ma liyor ngak e thingara manged girdi’ nib fel’. Ni bod ba ke gurgur ni ma pi’ e gurgur nib fel’, ere teliw nriyul’ e ma yib wom’engin ni girdi’ nib fel’.​—Matthew 7:15-20.

Pi fager rok Jehovah e ri yad ma ta’ fan e Bible. Yad manang ni Bible e yib rok Got. Yad ma pag ni nge pow’iyrad e thin riy ni ngar pithiged ko magawon rorad, ma ir e ma ayuwegrad ngar filed murung’agen Got. (2 Timothy 3:16) Yad ma guy rogon ni nguur folgad ko n’en ni yad be machibnag.

Pi fager rok Jehovah yad ma dag e t’ufeg ngak e girid’. Ke dag Jesus ngak e girdi’ e t’ufeg rok ngorad, ko skul ni i tay ngorad u murung’agen Got, ma be golnag e piin ke m’ar. Piin ma fol ko teliw nriyul’ e ku yad ma dag e t’ufeg ngak e yug girdi’. Ni bod Jesus, ndab ur changargad nga but’ ngak e piin ni yad ba gafgow, ara bathil e yalen rorad ara tolangrad. Ke yog Jesus ni ra nang e girdi’ pi gachalpen ko t’ufeg ni yad ma dag ngak e yug girdi’.​—John 13:35.

Pi fager rok Got e ri yad ma ta’fan e ngochol rok Got ni Jehovah. Faanra dabun be’ ni nge pining fithingam, ma cha’nem e fager rom ni rib fel’ thilmew? Danga’! Faan ra bay e fager rodad, ma gadad ma pining fithingan ma gad ma weliy ko girdi’ e pi n’en nib fel’ u murung’agen. Ere piin ni yad ma finey ni ngar fagergad Got e dabi siy ni ra ur weliyed fithingan nge murung’agen ngak boch e girdi’. Ma ri baadag Jehovah ni ngad rin’ed ni aram rogon.​—Matthew 6:9; Roma 10:13, 14.

Bod Jesus, fager rok Got e ma fil ngak e girdi’ murung’agen Gil’ilungun Got. Gil’ilungun Got e fare am nu tharmiy nra fl’eg e fayleng nge paradis. Pi fager rok Got e yad ma yog ngak e girdi’ e re thin nib fel’ ney ni murung’agen Gil’ilungun Got.​—Matthew 24:14.

Pi Mich Rok Jehovah yad ma guy rogon ni ngar ra fagergad Got. Ri yad ma ta’fan e Bible ma bay e t’ufeg u fithik’rad. Maku yad ma ta’fan ma ur weliyed ngak e girdi’ fithingan Got nge Gil’ilungun. Pi Mich Rok Jehovah e yad ma ngongol nrogon e bin riyul’ e teliw u fayleng e ngiyal’ ney.