GURUY NI 10
Uw Rogon Nrayog ni Ngam Nang e Bin Riyul’ e Liyor?
1. Kemus ni taareb e teliw nib riyul’, fa?
“Mu ayuwgad ko profet nde riyul’.”—MATTHEW 7:15.
Kemus ni taareb e teliw ni fil Jesus murung’agen ngak pi gachalpen, ni aram e ba’ nriyul’ e teliw. Re n’ey e bod rogon ba pa’ i kanawo’ ni yan ko yafas. I gaar Jesus: “Ba lich e girdi’ ni be pirieg” e re kanawo’ nem. (Matthew 7:14) Kemus ni yigoo liyor ni yibe tay nib puluw ko Thin rok Got u Bible e ba m’agan’ ngay. Tin riyul’ e tapigpig rok Got e taab n’en e ba michan’rad ngay.—Mu beeg e John 4:23, 24; 14:6; Efesus 4:4, 5.
2. Mang e yog Jesus u murung’agen e tin nde riyul’ e Kristiano?
“Yad be yog ni yad manang Got, machane be m’ug u pangirad ndar nanged Got.”—TITUS 1:16.
I yog Jesus nra kirebnag e pi profet ni googsur e ulung ni Kristiano. Yad ma dake yad e tin riyul’ e Kristiano. Pi teliw rorad e yad ma yog ni yad e Kristiano. Machane, rayog ni ngam nang ni gathi yad e tin riyul’ e Kristiano. Uw rogon? Ya kemus ni yigoo piin ni yad ma un ko bin riyul’ e liyor e ma m’ug fel’ngin e tin riyul’ e Kristiano ko ngongol rorad.—Mu beeg e Matthew 7:13-23.
3. Uw rogon nrayog ni ngam nang e tin riyul’ e tapigpig rok Got?
Baaray lal e pow ko tin riyul’ e Kristiano:
Piin riyul’ ni yad ma liyor ngak Got e yad ma tayfan e Bible ni ir e Thin rok Got. Yad ma athamgil ni ngar folgad ko pi kenggin e motochiyel nu Bible. Ere, ba’ nriyul’ e teliw e ba thil ko pi yurba’ i teliw ni lem ko girdi’ e be gagiyegnagrad. (Matthew 15:7-9) Tin riyul’ e tapigpig rok Got e yad ma ngongol nib puluw ko n’en ni yad ma machibnag.—Mu beeg e John 17:17; 2 Timothy 3:16, 17.
Tin riyul’ i gachalpen Jesus e yad ma tayfan fithingan Got, ni Jehovah. Jesus e i tayfan fithingan Got ni aram e i weliy ngan nang. I ayuweg e girdi’ ni ngar nanged Got, ma be fil ngorad rogon ni ngar meybilgad ni ngan tayfan fithingan Got. (Matthew 6:9) Ba’ ni ngan e teliw ko binaw rom e yad ma weliy murung’agen fithingan Got ni ngan nang?—Mu beeg e John 17:26; Roma 10:13, 14.
Tin riyul’ e Kristiano e yad ma machibnag murung’agen Gil’ilungun Got. I l’og Got Jesus ni nge machibnag fare thin nib fel’ ni murung’agen Gil’ilungun. Kemus ni Gil’ilungun Got e athap ko girdi’. I weliy Jesus murung’agen e re n’ey nge yan i mada’ ko ngiyal’ ni ke chugur ni nge yim’. (Luke 4:43; 8:1; 23:42, 43) I yog nra machibnag pi gachalpen murung’agen e re n’ey. Faanra ke yib be’ ni nge guyem ni nge weliy murung’agen Gil’ilungun Got ngom, ma ba’ ni ngan e teliw e ba muun ngay?—Mu beeg e Matthew 24:14.
Pi gachalpen Jesus e gathi yad bang ko re fayleng nib kireb ney. Rayog ni ngam nangrad ni bochan e darur uned nga ngongolen e am ara ra uneged yad ko pi magawon u thilin yu ulung i girdi’. (John 17:16; 18:36) Ku darur folwokgad ko lem nge ngongol nib kireb ni yima rin’ u roy u fayleng. —Mu beeg e James 4:4.
Tin riyul’ e Kristiano e bay e t’ufeg u thilrad. Kar filed ko Thin rok Got ni ngaur ted fan urngin mit e girdi’. Yugu aram rogon ni ma pi’ e pi yurba’ i teliw ni googsur e ayuw ko mahl ni ma tay e pi nam, ma tin riyul’ e Kristiano e darur uned ngay. (Mikah 4:1-3) Tin riyul’ e Kristiano e yad ma fanay e tayim rorad nge pi n’en ni bay rorad ni ngar ayuweged boch e girdi’ mi yad pi’ e athamgil nga lanin’rad.—Mu beeg e John 13:34, 35; 1 John 4:20.
4. Rayog ni ngam nang e ba’ nriyul’ e teliw, fa?
Ba’ ni ngan e teliw e yad ma pulweg e machib rorad ko Thin rok Got, ma yad ma tayfan fithingan, ma yad ma machibnag ni kemus ni Gil’ilungun Got e athap ko girdi’? Ba’ ni ngan e teliw e yad ma dag e t’ufeg ma darur uned ko mahl? Uw rogon ni ga be lemnag?—Mu beeg e 1 John 3:10-12.