Mang E Ra Buch U Nap’an Ni Yira Yim’?

Yam’ e ba math’ keru’ ko yafos. Yam’ e bod ni kar ni mol. (John 11:11-14) Yam’ e dabki rung’ag ban’en, ara guy ban’en, fa non, ara nge lemnag ban’en. (Eklesiastes 9:5, 10) Ma teliw ni googsur e yima fil riy ni ra yim’ be’ me yan nga falraman nge chag ngak pi girdien ni kar m’ad kakrom. Gathi aram e n’en ni bay u Bible.

Piin kar m’ad e dabkiyog nra ayuweged gadad ara ra lied gadad. Ere baga’ ni ma rin’ e girdi’ boch ban’en ma ku yad ma pi’ e maligach ni fan ni nge fel’ laniyan’ e en ke yim’ ya aram e tin ke michan’rad ngay. Re n’ey e ri dabun Got ya bay rogon nga reb fapi ban rok Satan. Maku dabi falan’ e piin ni kem’ ngay ya dakuriy e yafos rorad. Ere dabda tamdaggad koyam’ fa ud ted fan. Kari mus ni go’ Got e nguuda ted fan.​—Matthew 4:10.

Pi yam’ e ku yad ra fos biyay. Jehovah e ra pugrad ngar fosgad nga reb e fayleng ni ke paradis. Machane bayi buch nga m’on. (John 5:28, 29; Acts 24:15) Got e rayog rok ni nge pug e piin kar m’ad ni bod rogon ni ga ma pug be’ ni ke mol.​—Mark 5:22, 23, 41, 42.

Fare lem ndabda m’ad e reb e ban ni ke garareg Satan ni fare Moonyan’. Satan nge pi moonyan’ rok e kar sunmiyed nga laniyan’ e girdi’ ni ngan lemnag ni bay ban’en ko girdi’ ni dabi yim’ u nap’an nra yim’ be’ ni re n’em e gelngin e yafos ara yaal nrayog ni nge k’aring boch e magawon ara nge m’arnag be’. Ma bannag Satan e girdi’ u lan e lik’ay fa pingeg e changar rorad. Jehovah e ke turguy nib kireb e piin ni yad ma guy rogon ni ngar nongad e pi yam’.​—Deuteronomy 18:10-12.