GURUY NI 6
Mang e Athap ko Piin ni kar M’ad?
1. Mang e gad ra nang u murung’agen e piin ni kar m’ad ma ra k’aring e felfelan’ ngodad?
Nap’an ni taw Jesus nga Bethany nreb e binaw nib chugur nga Jerusalem, ma ke gaman aningeg e rran ni ke yim’ Lazarus. Me un Jesus ngak Martha nge Maria ko gin ni kan k’eyag Lazarus ni walagrow riy. De n’uw nap’an me muulung e girdi’ ngaram. Am lemnag gelngin e felfelan’ ni tay Martha nge Maria u nap’an ni faseg Jesus Lazarus ko yam’!—Mu beeg e John 11:21-24, 38-44.
Bay ban’en ni ke fil Martha u murung’agen e piin ni kar m’ad ni ke k’aring e felfelan’ ngak. Manang nra faseg Jehovah e piin ni kar m’ad mar pared u fayleng.—Mu beeg e Job 14:14, 15.
2. Uw rarogon e piin ni kar m’ad?
I yog Got ngak Adam ni gaar: “Ni ngongliyem ko but’, ere bay kum ngal’ ni but’ bayay.”—GENESIS 3:19.
Kan sunumiy e girdi’ ko but’. (Genesis 2:7; 3:19) Ere, nap’an ni gad ra yim’ ma dakuriy ban’en u fithik’ i dowdad ni kab fas, ma ke tal e man’ey rodad ko maruwel, ma tin ni ud lemnaged e ke mus. Aram fan ni dariy ban’en ni yog Lazarus u murung’agen e yam’ ni tay, ya piin ni kar m’ad e dariy e chi n’en ni ka yad manang.—Mu beeg e Psalm 146:4; Eklesiastes 9:5, 6, 10.
Ma gafgownag Got e girdi’ u fithik’ e nifiy u tomuren ni kar m’ad, fa? Be yog e Bible ni piin ni kar m’ad e dakuriy ban’en ni yad manang, ere fare machib ni murung’agen e infierno e de riyul’, ma be t’ar e thin nga daken Got. Dabun Got ni ngan gafgownag e girdi’ u fithik’ e nifiy.—Mu beeg e Jeremiah 7:31.
3. Rayog ni nge non e piin ni kar m’ad ngodad, fa?
Piin ni kar m’ad e dabiyog ni ngar nonad, maku dabiyog ni ngar rung’aged ban’en. (Psalm 115:17) Machane, bay boch e engel ni yad ba kireb ni ku rayog ni ngar nonad ngak e girdi’ ni yad be dake yad e piin ni kar m’ad ni yad be non. (2 Peter 2:4) Dabun Jehovah ni ngad nonad ko piin ni kar m’ad.—Mu beeg e Deuteronomy 18:10, 11.
4. Mini’ e piin ni yira fasegrad ko yam’?
Bokum milyon e girdi’ ni kar m’ad e yira fasegrad ko yam’. Mus ko piin ndar nanged Got ma ur rin’ed boch ban’en nib kireb e ku yira fasegrad.—Mu beeg e Luke 23:43; Acts 24:15.
Piin ni yira fasegrad ko yam’ e yad ra fil e tin riyul’ u murung’agen Got mar daged nib mich Jesus u wan’rad ni aram e ngar folgad rok. (Revelation 20:11-13) Piin ni yira fasegrad ko yam’ mar rin’ed e tin nib fel’ e ra yog e yafas ni manemus ngorad u fayleng.—Mu beeg e John 5:28, 29.
5. Bochan nra faseg Jehovah e yam’, ma mang e be fil ngodad u murung’agen?
Bay e athap ko piin ni kar m’ad ni bochan e ke pi’ Got Fak ni nge yim’ ni fan ngodad. Ere, fare fas ko yam’ e gad ra fil riy murung’agen e t’ufeg nge runguy rok Jehovah. Mini’ e ga baadag ni ngam guy u nap’an ni yira faseg e piin ni kar m’ad?—Mu beeg e John 3:16; Roma 6:23.