Pi Deer Ni Bay E Fulweg Riy U Bible

Bay e athap ko piin ni kar m’ad, fa?

Ra yim’ be’ ma bod ni ke mol ni bochan e piin ni kar m’ad e dariy ban’en ni yad manang maku dariy ban’en nrayog ni ngar rin’ed. Machane, rayog rok e En ni Ke Sunmiy urngin ban’en ni nge faseg e piin ni kar m’ad. Immoy in e girdi’ kakrom ni pi’ Got gelngin Jesus ni nge fasegrad ko yam’ ni bochan e nge micheg e re n’ey.​—Mu beeg e Eklesiastes 9:5; John 11:11, 43, 44.

Ke micheg Got nra faseg urngin e piin ni yad bay u laniyan’ mi yad par ko bin nib beech e fayleng ni tin nib mat’aw e bay riy. Piin ni kar m’ad e thingar ra pared ni yad ba yam’ nge taw ko ngiyal’ ni bayi fasegrad Got riy. Ri baadag Got ni Gubin Ma Rayog Rok ni nge maruwel nga gelngin ni nge faseg e piin ni kar m’ad.​—Mu beeg e Job 14:14, 15.

Uw rogon e piin ni yira fasegrad ko yam’?

Nap’an nra faseg Got e piin ni kar m’ad, ma ra bagayad ma ka manang ko ir mini’, nge mini’ e fager rok, nge chon e tabinaw rok. Yugu aram rogon nnap’an nra yim’ be’ me wod e dowef rok nge m’ay, ma rayog rok Got ni ngki faseg facha’ me pi’ reb e dowef nib beech ngak.​—Mu beeg e 1 Korinth 15:35, 38.

Kari mus ni in e girdi’ e yira fasegrad mi yad yan nga tharmiy. (Revelation 20:6) Machane, yooren e piin ni yira fasegrad ko yam’ e yad ra par u paradis u fayleng. Pi girdi’ ney ni yira fasegrad e aram e ku ra tabab bayay e yafas rorad, ma bay e athap rorad ni ngar pared ni yad ba fas ndariy n’umngin nap’an.​—Mu beeg e Psalm 37:29; Acts 24:15.