Mang e Ma Buch Rodad u Nap’an ni Gad Ra Yim’?

Bay be’ nib t’uf rom ni ke yim’, fa? Nap’an nra buch ban’en rom ni aray rogon nib gel e amith ni ma tay lanin’uy riy, ma sana ra lungum u wan’um: ‘Mang e ma buch rodad u nap’an ni gad ra yim’? Ka rayog ni ngad mada’gad e piin yad ba t’uf rodad ni kar m’ad, fa?’ Rayog ni ngam guy e fulweg ko gal deer ney ni be pi’ e Bible ko re guruy ney nge bin migid nra fal’eg lanin’uy.

1. Mang e ma buch rodad u nap’an ni gad ra yim’?

I taarebrogonnag Jesus be’ ni ke yim’ ngak be’ ni kari mol. Be’ ni kari mol e der nang e n’en be buch u tooben. Uw rogon nra yim’ be’ ma bod ni ke mol? Tomuren nra yim’ be’, ma dabki thamiy e amith ara i gafgow. Be gaar e Bible: “Piin nib yam’ e dariy ban’en ni yad manang.”​—Mu beeg e Eklesiastes 9:5, BT.

2. Faan gad ra nang e tin riyul’ u murung’agen e yam’, ma uw rogon nra yib angin ngodad?

Boor e girdi’ ni yad ma rus ni ngar m’ad, maku yad ma rus ko piin kar m’ad! Machane n’en be yog e Bible u murung’agen e yam’ e rayog ni nge fal’eg lanin’um. I gaar Jesus: “Tin riyul’ e ir e bayi ayuwegmed nge dab kum pired ni gimed e sib.” (John 8:32) Bay boch e teliw ni yad ma fil nu tomuren nra yim’ be’ ma ka bay ban’en rok ni ma par nib fos, machane gathi ireray e n’en be yog e Bible. Ere dariy be’ ni ma gafgow u tomuren nra yim’. Maku reb e, bochan ni piin kar m’ad e dariy ban’en ni yad manang, ma aram fan ndabiyog ni ngar gafgownaged gadad. Ere dariy rogon ni ngaud fal’eged laniyan’ e piin kar m’ad ara ud liyorgad ngorad, maku de t’uf ni ngaud pied e meybil ni fan ngorad.

Bay boch e girdi’ ni yad ma yog nrayog ni ngaur nonad ko piin kar m’ad. Machane dabiyog ni ngan rin’ e re n’ey, ya ka fin da filed ni piin kar m’ad e “dariy ban’en ni yad manang.” Piin yad ma lemnag ni yad be non ngak e piin nib t’uf rorad ni kar m’ad e bin riyul’ riy e yad be non ngak e pi moonyan’ ni yad ma dake yad e piin kar m’ad. Ere faan gad ra nang e tin riyul’ u murung’agen e yam’, ma ra ayuwegdad rok e pi moonyan’. Be yog Jehovah ndab da guyed rogon ni ngaud nonad ngak e piin kar m’ad ni bochan e manang ni faanra ud rin’ed boch ban’en ni fan ko moonyan’, ma ra yib wenegan ngodad.​—Mu beeg e Deuteronomy 18:10-12.

3. Mu fil e tin riyul’ u rarogon e piin kar m’ad

Ba thilthil rogon ni ma lemnag e girdi’ u ga’ngin yang e fayleng e n’en ma buch rodad u nap’an ni gad ra yim’. Machane dabiyog ni gubin e pi n’ey nib riyul’.

• Uw rarogon e piin kar m’ad u wan’ e girdi’ ko gin ga ma par riy?

VIDEO: What Is the Condition of the Dead?​—Excerpt (1:19)

Mu beegew e Eklesiastes 3:20, mi gimew weliy e fulweg ko gal deer ni baaray:

• Mang e ma buch rok be’ u nap’an nra yim’ nrogon ni be yog e re thin ney?

• Gur, tomuren nra yim’ be’ ma ka bay ban’en rok ni ma par nib fos, fa?

Be yog e Bible murung’agen e yam’ ni tay Lazarus nreb e fager rok Jesus nrib pach e thin rorow. Nap’an ni gimew be beeg e John 11:11-14, mag tay fanam i yan ko n’en ni yog Jesus u rarogon Lazarus. Tomuren mi gimew weliy e fulweg ko pi deer ni baaray:

• Uw rarogon be’ ni ke yim’ nrogon ni yog Jesus?

• Mang e be yog e re n’ey ngodad u rarogon e piin kar m’ad?

• Uw rogon u wan’um e n’en be yog e Bible u murung’agen e yam’?

4. Ra yib angin ngodad e tin riyul’ u murung’agen e yam’

Gad ra nang e tin riyul’ u murung’agen e yam’, ma aram e rayog ni nge dab kud rusgad ko piin kar m’ad. Mu beegew e Eklesiastes 9:10, mi gimew weliy e fulweg ko re deer ni baaray:

• Rayog ni nge gafgownagdad e piin kar m’ad fa dabiyog?

Tin riyul’ u Bible e ku ra ayuwegdad ni nge dabi mich u wan’dad fare ban ni aram e thingar un fal’eg laniyan’ e piin kar m’ad ara un liyor ngorad. Mu beegew e Isaiah 8:19, 20 nge Revelation 4:11, mi gimew weliy e fulweg ko re deer ni baaray:

• Ga be lemnag ma uw rogon u wan’ Jehovah be’ ni ma liyor ngak e piin kar m’ad ara ma ning e ayuw ngorad?

5. Tin riyul’ u murung’agen e yam’ e ra fal’eg lanin’dad

Boor e girdi’ ni kan fil ngorad nnap’an ni yad ra yim’, ma yira gechignagrad ko kireb ni ur rin’ed. Machane gad ba felfelan’ ni kad nanged ndariy be’ ni ma gafgow u tomuren nra yim’, ni kub muun ngay be’ ni i rin’ boch ban’en nrib kireb. Mu beegew e Roma 6:7, mi gimew weliy e fulweg ko re deer ni baaray:

• Be yog e Bible nnap’an nra yim’ be’ ma ke chuw u fithik’ i gelngin e denen. Ere ga be lemnag ni be’ ni ke yim’ e ka be gafgow ni bochan e denen ni i rin’, fa?

Ra yoor ban’en nda nanged u murung’agen Jehovah, ma aram e gad ra nang ndariy ba ngiyal’ nra gafgownag e piin kar m’ad. Mu beegew e Deuteronomy 32:4 nge 1 John 4:8, mi gimew weliy e fulweg ko pi deer ni baaray:

• Gur, ra m’agan’ ba Got ngay ni bay fa gal fel’ngin rok ni kan weliy murung’agen ko gal thin ney ni ngaun gafgownag e piin kar m’ad, fa?

• Be fal’eg lanin’um e tin riyul’ ni kam fil u murung’agen e yam’ fa danga’? Mang fan?

N’EN KAN FIL

Nap’an nra yim’ be’, ma aram e ke mus e yafos rok. Piin kar m’ad e darur gafgowgad, maku dabiyog ni ngar gafgownaged e piin kab fos.

Ngan Sul u Daken

• Mang e ma buch rodad u nap’an ni gad ra yim’?

• Faan gad ra nang e tin riyul’ u murung’agen e yam’, ma uw rogon nra yib angin ngodad?

• Faan gad ra nang e tin riyul’ u murung’agen e yam’, ma uw rogon nra fal’eg lanin’dad?

MU GAY MURUNG’AGEN

Mu guy ko bay ban’en rok be’ ni ma par ni kab fos u tomuren nra yim’ fa danga’.

“What Is the Soul?” (Article ni bay ko website)

Mu guy ko ma gechignag Got e piin nib kireb u infierno fa danga’.

Is Hell a Real Place of Torment? (3:07)

Bay rogon ni ngad rusgad ngak e piin kar m’ad, fa?

Spirits of the Dead​— Can They Help You or Harm You? Do They Really Exist? (brochure)

Mu beeg rogon ni fel’ laniyan’ be’ nib pumoon u nap’an ni fil e tin riyul’ u murung’agen e n’en ma buch rodad u nap’an ni gad ra yim’.

“I Was Impressed by the Bible’s Clear, Logical Answers” (The Watchtower, February 1, 2015)