Mang Fan ni Bay e Ulung rok Got?

1. Mang fan ni ke yarmiy Got fare ulung nu Israel?

Ke yarmiy Got e piin owchen Abraham ni ngar manged ba nam me pi’ e motochiyel ngorad ni ngar folgad riy. Ke dugliy fithingan e re nam nem ni “Israel,” me tay ni ir e ra ayuweg e bin riyul’ e liyor nge thin rok. (Psalm 147:19, 20) Ere, girdi’ u gubin e nam e ke fel’ rogorad ko fare nam nu Israel.​—Mu beeg e Genesis 22:18.

Ke mel’eg Got piyu Israel ni ngar manged pi mich rok. Pi n’en ni ur rin’ed kakrom i yib e be m’ug riy rogon ni ma yib angin e pi motochiyel rok Got ko girdi’. (Deuteronomy 4:6) Gad ra fil murung’agen piyu Israel kakrom, ma rayog ni ngad nanged boch ban’en u murung’agen e bin riyul’ e Got.​—Mu beeg e Isaiah 43:10, 12.

2. Mang fan ni kan yarmiy e ulung ko tin riyul’ e Kristiano?

Munmun ma daki fel’ piyu Israel u wan’ Got, ma aram me tay fare ulung ni Kristiano nga lorad. (Matthew 21:43; 23:37, 38) Kakrom e piyu Israel e yad e pi mich rok Jehovah. Ma ngiyal’ ney e tin riyul’ e Kristiano e kar manged e pi mich rok Jehovah.​—Mu beeg e Acts 15:14, 17.

Ke yarmiy Jesus pi gachalpen ni ngar machibgad mi yad pingeg e girdi’ u gubin e nam ngar manged pi gachalpen. (Matthew 10:7, 11; 24:14; 28:19, 20) Ke chugur ni nge m’ay e re maruwel ney. Ireray e som’on ni ke kunuy Jehovah bokum milyon e girdi’ ko pi nam ni ngar uned ko bin riyul’ e liyor. (Revelation 7:9, 10) Tin riyul’ e Kristiano e kan yarmiyrad ni ngar maruwelgad u taabang ya nge yog ni ngaur ayuweged yad. Taareb rogon ni kan yarmiy e muulung ni yad ma tay u ga’ngin yang e fayleng, ya yad be fanay e Bible.​—Mu beeg e Hebrews 10:24, 25.

3. Uw rogon ni ke tabab fare ulung ko Pi Mich Rok Jehovah e ngiyal’ ney?

Fare ulung ko Pi Mich Rok Jehovah e ngiyal’ ney e tabab u ba ngiyal’ u thilin e pi duw ni 1870 nge yan i mada’ ko 1879. Immoy ba ulung i girdi’ ni yad ma fil e Bible nra tamilangnaged e tin riyul’ u Bible ni ke n’uw nap’an ni ke par nib mith. Yad manang ni ke yarmiy Jesus e ulung ni Kristiano kakrom ya nge yog nra machibgad. Ere, aram fan nra tababgad i machibnag murung’agen Gil’ilungun Got ko girdi’, ma re maruwel nem e yira rin’ u ga’ngin yang e fayleng. Nap’an fare duw ni 1931, ma kar mel’eged fare ngachal ni Pi Mich Rok Jehovah ni ir e ngaun pining ngorad.​—Mu beeg e Acts 1:8; 2:1, 4; 5:42.

4. Uw rogon ni kan yarmiy e ulung ko Pi Mich Rok Jehovah?

Nap’an e bin som’on e chibog, ma boor e ulung ni Kristiano u boor e nam ni ke fel’ rogorad ko ayuw ni i pi’ fare ulung ni ma pow’iyey, ya yad ma tayfan Jesus ni ir e en Lolugrad. (Acts 16:4, 5) Ku er rogon e ngiyal’ ney ni ma yib angin ko Pi Mich Rok Jehovah rogon ni ma pow’iyrad fare Ulung ni Ma Pow’iyey. Re ulung i piilal ney e yad ma yaliy e maruwel ni yima tay ko pi branch ofis ko Pi Mich Rok Jehovah ni yima pilyeg boch e babyor riy, ni yibe wereg ko girdi’ u 600 mit e thin. Ere, fare Ulung ni Ma Pow’iyey e rayog ni ngar pied e athamgil nga laniyan’, mi yad pow’iy e pi ulung ni Kristiano u ga’ngin yang e fayleng ni ke pag 100,000. Ra reb e pi ulung ney ma bay boch e pumoon riy ni yad ma pigpig ni yad e piilal ara piin ni yad ma yaliy e ulung. Pi pumoon ney e yad ma ayuweg e ulung rok Got u fithik’ e t’ufeg.​—Mu beeg e 1 Peter 5:2, 3.

Ulung ko Pi Mich Rok Jehovah e kan yarmiy ni ngar machibnaged fare thin nib fel’ mi yad pingeg e girdi’ ngar manged pi gachalpen Jesus. Gad ma machib u mit e tabinaw i yan ni bod ni i rin’ e pi apostal. (Acts 20:20) Ku gad ma ognag e fol Bible ko girdi’ ni yad baadag e tin riyul’. Machane, gadad e Pi Mich Rok Jehovah e gathi kemus ni gad reb e ulung. Ya ku gad bod reb e tabinaw ni bay e Chitamangirad ni ma t’ufegrad. Gad bogi walag ni gad ma ayuweged gadad. (2 Thessalonika 1:3) Bochan ni kan yarmiy e pi tapigpig rok Jehovah ni ngar rin’ed e tin nib m’agan’ ngay mi yad ayuweg e girdi’, ma aram fan ni yad reb e ulung ni yad ba felfelan’ u roy u fayleng.​—Mu beeg e Psalm 33:12; Acts 20:35.