Guruy ni 14

Rogon e Yaram ko Ulung ko Pi Mich Rok Jehovah

Wuin e ke tabab e ulung ko Pi Mich Rok Jehovah ngiyal ney? (1)

Uw rogon e pi muulung ni ma ta’ e Pi Mich Rok Jehovah? (2)

Ma uw rogon ni yima pi’ puluwon e tin nib t’uf riy? (3)

Mini’ e ma pow’iy reb e ulung nge reb? (4)

Mang boch e muulung nib ga’ ni yima ta’ u reb e duw nge reb? (5)

Mang maruwel e yima fl’eg u tochuch nge pi branch ofis rorad? (6)

1. Ke tabab e Pi Mich Rok Jehovah ko duw ni 1870. Som’on e unog e Bible Student ngorad. Machane kar mel’eged ni ngar faned fare ngochol ni bay u Bible ni ka nog e Pi Mich Rok Jehovah ngay ko duw ni 1931. (Isaiah 43:10) Ke tabab ni ka ba achig ni som’on me munmun ma be ga’ iyan fare ulung ke bokum milyon e Pi Mich riy ni ri yad be tiyan’rad ko machib ma ke pag 230 e nam.

2. Baga’ ni ma muulung e Pi Mich Rok Jehovah ni dalip yay u reb e wik. Yibe piningem ni nga mub ngam un nga reb. (Hebrews 10:24, 25) Bible e ir kenggin e tin yima fil riy. Meybil e ir tabolngin nge tungun e muulung. Baga’ ni yima yin’ e tang ko pi muulung ni pi tang ni ma sor fan ko “tirok Got ban’en.” (Efesus 5:18, 19) Ba puf mat’awey ngay ma dariy e mokun salpiy.—Matthew 10:8.

3. Baga’ ni yima muulung nga Kingdom Hall. Boch e pi naun ney e ke toy e Pi Mich ni kar ognaged yad ngay ndariy puluwrad. Dab mu gu reb e yaan yug ban’en, fa kuruth fa boch ban’en ni bod e pi n’ey u Kingdom Hall. Yad ma chuw’iy boch ban’en ko salpiy nra be’ ma ke pi’ reb nrogon ni ke m’agan’ ngay. Ma piin ba adag ni nge pi’ e salpiy e ra pi’ nrogon ni ba adag, ma ba’ bochi kahol ni ngan nin’ ngay.—2 Korinth 9:7.

4. Ra reb fapi ulung ma ba’ e pi piilal ara pi overseer riy. Yad e piin ma pow’iy e ulung ko tin ngan fil. (1 Timothy 3:1-7; 5:17) Ma ayuwegrad e pi ministerial servant. (1 Timothy 3:8-10, 12, 13) Pi pumoon ney e gathi kan tolangnagrad ko tin ka bay ni girdien e ulung. (2 Korinth 1:24) Gathi kan pi’ yugu reb e liw ngorad. (Matthew 23:8-10) De thil rogon e munmad ni yad ma ta’ ngak yugu boch e girdi’. Ma gathi yima pi’ puluwrad ko maruwel rorad. Ma fapi piilal e ke m’agan’rad ngay ni ngar ayuweged fare ulung ko tirok Got ban’en. Yu ngiyal’ ni ba’ e magawon ma yad ma pi’ e ayuw ma yad be pow’iyey ma ku yad ma fl’eg lanin’uy.—James 5:14-16; 1 Peter 5:2, 3.

5. Pi Mich Rok Jehovah e yad ma ta’ boch e muulung nib ga’ u lan reb e duw ni kan nog e assembly ara convention ngay. Aram e ngiyal’ ni ma yib boor e ulung ngar pared u taabang ni fan nga boch e thin ko Bible ni kan fl’eg rogon. Taufe e bang ko pi n’en ni kan fl’eg rogon ni fan ko piin ka fin ra manged pi gachalpen.—Matthew 3:13-17; 28:19, 20.

6. Tagil’ e tochuch ko Pi Mich Rok Jehovah u fayleng e bay u New York. Ran pirieg u rom fare Governing Body, ni aram ba ulung i piilal nib gel e tamilangan’ rorad ni yad ma yaliy e pi ulung u fayleng ni polo’. Bay e branch ofis nib pag 100 u fayleng iyan. Ma pi tagil’ ney e bay e piin ma pi’ e ayuw riy ni ngan yoornag e pi babyor ni ma weliy e thin ko Bible min pi’ boch nga yu yang u fayleng ni kar ognaged yad ko pi maruwel ney ni yad ba adag. Maku yibe pi’ e thin ni ba sor fan ko maruwel ko machib. Mang fan ndab mu ta’ talpem nga mub mu guy boch e re branch ofis nib chugur ngom?