Ban’en ni Gad Baadag ni Ngad Nanged Ndariy Be’ ni Manang

Ba’ bayay ni ke yog be’ ban’en ngom ndariy be’ ni manang?​—a Bay boch ban’en “ndan nang” ni yib rok Got ni be weliy e Bible murung’agen. Mus ko pi engel ma yad baadag ni ngar nanged ko mang e re n’em. Me gur, ga baadag ni ngam nang ko mang e re n’em?​—

Kakrom ni kakrom, me sunmiy Got reb e pumoon nge reb e ppin. Fithingan e gali cha’nem e Adam nge Efa. I pi’ Got bang ni ngar parew riy nrib fel’ yaan. Re gi n’em e ka nog fare milay’ nu Eden ngay. Faan gomanga fol Adam nge Efa rok Got, ma rayog ni ngar fal’eged pi fakrow e re fayleng ney nge mang paradis ni bod fare milay’ nu Eden. Ku rayog ni ngar pared u Paradis ndariy n’umngin nap’an. Machane, ka ga manang e n’en ni rin’ Adam nge Efa?​—

De fol Adam nge Efa rok Got, ma aram fan ndaki paradis e fayleng e chiney. Machane, ke yog Got nra fal’eg bayay e fayleng nge fel’ yaan, me par e girdi’ riy ndariy n’umngin nap’an ni yad ba felfelan’. Uw rogon nra rin’ e re n’ey? Ke n’uw nap’an nde nang e girdi’ rogon nra rin’ Got e re n’ey ni bochan e ba mith ndariy be’ ni manang.

Machane, nap’an ni yib Jesus nga fayleng me weliy murung’agen e re n’ey ko girdi’, ni aram Gil’ilungun Got. I yog ko girdi’ ni ngar meybilgad ni nge yib Gil’ilungun Got ara Am rok Got, ya aram e n’en nra fal’eg e re fayleng ney nge mang paradis.

Ga baadag ni ngam nang murung’agen fare n’em nib mith ndariy be’ ni manang?​— Dab mu pagtalin faram ni kemus ni piin ni yad ra fol rok Jehovah e yad ra un ko par u Paradis. Be weliy e Bible murung’agen boch e pumoon nge ppin ni ur folgad rok Jehovah. Ga baadag ni ngam fil murung’agen e pi cha’nem?​— Chiney e ngad filed murung’agen boch i yad nge rogon ni ngad folgad ko n’en ni ur rin’ed.