Gubin Ngiyal’ ni Ma Fol Jesus

Ba mom ni ngaum fol ko gallabthir rom, fa?​— Yu ngiyal’ e ba mo’maw’. Ga manang ni Jesus e gubin ngiyal’ ni i fol rok Jehovah nge gallabthir rok?​— N’en ni rin’ e rayog ni nge ayuwegem ni ngaum fol ko gallabthir rom ni yugu aram rogon ni bay yu ngiyal’ nib mo’maw’. Ngad weliyed boch murung’agen e re n’ey.

U m’on ni nge yib Jesus nga fayleng, ma immoy rok Jehovah ni Chitamangin u tharmiy. Machane, ku immoy e gallabthir rok Jesus u roy u fayleng. Fithingrow e Josef nge Maria. Ga manang ko uw rogon nra mangew e gallabthir rok Jesus?​—

Ke ngongliy Jehovah reb e maang’ang ni aram e n’igin ni nge ngal’ Jesus ni bochi tir u yin Maria, ya nge yag ni ngan gargeleg nga fayleng nib girdi’. I ga’ Jesus u yin Maria ni bod e bitir ni ma ga’ u yin e chitiningin. Me yan i mereb e pul nga tomuren min gargeleg. Aram rogon ni mang Maria nge Josef ni pumoon rok e gallabthir rok Jesus.

Nap’an ni gaman 12 e duw rok Jesus, me rin’ ban’en ni be m’ug riy nrib t’uf Jehovah rok ni ir e Chitamangin. I buch e re n’ey u nap’an ni ka ranod chon e tabinaw rok nga Jerusalem ni ngar uned ko fare madnom ko Paluk’af. Nap’an ni yibe sul i yan nga tabinaw, ma daki pirieg Josef nge Maria Jesus. Ga manang e gin ni bay riy?​—

I gur Josef nge Maria ngar sulow nga Jerusalem ni ngar gayew Jesus. Kari magafan’row ni bochan e de yag ni ngar piriegew. Machane, tomuren dalip e rran mi yow pirieg u tempel! Ga manang ko mang fan ni bay u tempel?​— Bochan ni aram e gin nrayog ni nge fil murung’agen Jehovah ni Chitamangin riy. Rib t’uf Jehovah rok ma baadag ni nge nang rogon nrayog ni nge felfelan’nag. Mus ko ngiyal’ ni ke ilal Jesus ma i par ni be fol rok Jehovah. I fol Jesus ni yugu aram rogon nib mo’maw’ ngak mu kun gafgownag riy. I fol Jesus rok Josef nge Maria, fa?​— Arrogon, be yog e Bible ni i fol.

Mang e rayog ni ngam fil rok Jesus?​— Ba t’uf ni ngam fol ko gallabthir rom ni yugu aram rogon ni bay yu ngiyal’ nib mo’maw’. Ga ra rin’ e re n’ey, fa?​—