Baadag Timothy ni nge Ayuweg e Girdi’

Timothy e ir reb e pagel ni ma felfelan’ ni nge ayuweg e girdi’. Boor yang ni i milekag riy ni be ayuweg e girdi’. Rib gel e felfelan’ ni i tay ni bochan e re n’ey. Ga baadag ni ngam nang murung’agen?​—

I ilal Timothy u reb e mach ni ka nog yu Lystra ngay. Nap’an ni kab bitir, me fil Lois ni titaw rok nge Eunice ni nina’ rok murung’agen Jehovah ngak. Nap’an ni be ilal Timothy ma baadag ni ngki ayuweg boch e girdi’ ni ngar nanged murung’agen Jehovah.

Nap’an ni kab pagel Timothy me yog Paul ngak ni nge un ngak ngar milekaggow nga boch e binaw ni ngar machibgow. I yog Timothy ni gaar: ‘Gu ra un ngom!’ Ke fel’ rogon nrayog ni nge yan nge ayuweg boch e girdi’.

I milekag Timothy nge Paul nga reb e binaw ni bay u lan yu Macedonia ni ka nog yu Thessalonika ngay. Ra nga ranow ngaram ma thingar ranow u but’ nib n’uw yang, ngemu’ mi yow un u reb e bowoch. Nap’an nra tawgow ngaram ma boor e girdi’ nra ayuwegew ni ngar filed murung’agen Jehovah. Machane, immoy boch e girdi’ nra damumuwgad ngorow mi yad guy rogon ni ngar lied yow. Ere, thingari chuw Paul nge Timothy ngku ranow nga yugu reb e binaw ngar machibgow u rom.

Boch e pul nga tomuren, me yog Paul ngak Timothy ni nge sul nga Thessalonika nge guy ko ke uw rogon e pi walag u rom. Thingari guy Timothy rogon ni nge dabi rus ni nge sul ko re binaw nem. Yugu aram rogon ma ke yan ni bochan ni be magafan’ ko pi walag u rom. Nap’an ni sul ko gin ni bay Paul riy, ma boor e thin nib fel’ ni fek i yib. I yog nrib fel’ e n’en ni be rin’ e pi walag u Thessalonika.

Boor e duw ni i maruwel Paul nge Timothy u taabang. Immoy bayay ni yog Paul u lan bangi babyor ni yoloy ni, Timothy e ir e rib fel’ ni nge pi’ ni nge ayuweg e pi ulung ni immoy e ngiyal’ nem. Rib t’uf Jehovah rok Timothy ma kub t’uf e girdi’ rok.

Ba t’uf e girdi’ rom ma ga baadag ni ngam ayuwegrad ni ngar filed murung’agen Jehovah, fa?​— Faanra arrogon, ma rayog ni ngam felfelan’ ni bod rogon Timothy!