Mu Liyorgad Chon e Tabinaw Rom ngak Jehovah

Kam fil ko re ke babyor ney ni boor e pi kenggin e motochiyel nu Bible nrayog ni nge ayuwegmed chon e tabinaw rom. Ma baadag Jehovah ni ngaum par ni gab felfelan’. Ke micheg ni faan ga ra m’oneg e tin nib m’agan’ ngay, ma ra ‘pi’ urngin e pi n’ey ngom.’ (Matthew 6:33) Riyul’ ni baadag Jehovah ni ngam mang fager rok. Ere, mu guy rogon ni nge fel’ e tha’ u thilmew, ya ireray e bin th’abi fel’ e tow’ath nra yag ngak be’.​—Matthew 22:37, 38.

1 MU GUY ROGON NI NGE CHUGUR E THA’ U THILMEW JEHOVAH

N’EN NI BE YOG E BIBLE: “Bay gu mang chitamangimed, ma bay mmanged pi fakag ni pumoon nge ppin.” (2 Korinth 6:18) Baadag Got ni ngam mang fager rok nrib chugur thilmew. Ma meybil e aram reb e kanawo’ nrayog ni nge chugur thilmew Got riy. Be yog Jehovah ni ngaum meybil ni “gubin ngiyal’.” (1 Thessalonika 5:17) Baadag ni nge motoyil ngom u nap’an ni ga be weliy ngak e pi n’en ni bay u lanin’um nge pi magafan’ rom. (Filippi 4:6) Ma faanra um meybilgad chon e tabinaw rom u taabang, ma aram e rayog ni ngar nanged nib riyul’ Got u wan’um.

Gathi kemus ni ngaum non ngak Got, ya kub t’uf ni ngaum motoyil ngak. Rogon ni ngam rin’ e re n’ey e aram e ngaum fil e Thin rok nge pi babyor ni kan ngongliy nib puluw e thin riy ko Bible. (Psalm 1:1, 2) Ngemu’, mag fal’eg i lemnag e pi n’en ni kam fil. (Psalm 77:11, 12) Ra ngam motoyil ngak Got ma kub t’uf ni ngaum un ko pi muulung ni yima tay ni gubin ngiyal’.​—Psalm 122:1-4.

Reb e kanawo’ ni ku rayog ni ngam gelnag e tha’ u thilmew Jehovah riy e aram e ngam weliy murung’agen ngak boch e girdi’. Faanra um rin’ e re n’ey, ma aram e ga ra thamiy ni be chugur e tha’ u thilmew i yan.​—Matthew 28:19, 20.

N’EN NRAYOG NI NGAM RIN’:

• Mu tay e tayim u gubin e rran ni ngaum beeg e Bible rom mag meybil

• Mm’oneged chon e tabinaw rom e tirok Got ban’en, ma gathi pi n’en ni yima chuweg e chalban ngay ara boch ban’en ni yima rin’ ni ngan felfelan’ ngay

2 MU FELFELAN’GAD KO FOL BIBLE NI TABINAW NI GIMED MA TAY

N’EN NI BE YOG E BIBLE: “Mu chugurgad ngak Got, me chugur ngomed.” (James 4:8) Ba t’uf ni ngam dugliyed chon e tabinaw rom e ngiyal’ ni ngaum ted e fol Bible ni tabinaw, mu um folgad riy. (Genesis 18:19) Machane, ku bay boch ban’en nib t’uf ni ngaum rin’ed. Thingari mang Got bang ko yafas romed. Ere, mu guyed rogon ni ngari fel’ e tha’ u thilmed Got ni aram e ngaum weliyed murung’agen “ko ngiyal’ ni gimed bay u tabinaw nge ngiyal’ ni gimed be milekag, nge ngiyal’ ni gimed be toffan nge ngiyal’ ni gimed be maruwel.” (Deuteronomy 6:6, 7) Mu nameged ni ngam boded Joshua ni faani gaar: “Gag nge girdi’ ko birog e tabinaw e nguug pigpiggad ngak Somol.”​—Joshua 24:15.

N’EN NRAYOG NI NGAM RIN’:

• Ngan yarmiy min tay e tayim ni ngan weliy e pi n’en nib t’uf ko tabinaw u taabang