Sap Ku Jehovah Ni Nge Fl’eg Lanin’uy

“I Got ni ir e ma yib e gum’an’ nge fl’eg laniyan’ rok ngodad e nge ayuwegmed nguum folwokgad rok Kristus Jesus mi gimed par ni ke taareban’med.”​—ROMA 15:5.

1. Mang fan nib t’uf ni ngari gel iyan rogon ni nguun fl’eg lanin’uy u reb e rran nge reb?

UREB e rran nge reb ma be gel iyan rogon nib t’uf ni ngan fl’eg lanin’uy. Ke pag 1,900 e duw faram ni yoloy be’ e pi thin ney nga Bible ni, “urngin e tin ni ke sunumiy Got e be gel’gel’ ko amith, ni kab kakrom iyib ke mada’ ko chiney.” (Roma 8:22) Ma kari gel e “gel’gel’” nge “amith” ko ngiyal’ ney. Ka nap’an e World War I iyib ngaray ma yugu be yib e gafgow ni ra yib reb nge m’ay miki yib reb ni bod e mahl nge bugel nge pi n’en ni bod e yoko’ ni be sum ni bochan ni be kirebnag e girdi’ e fayleng.​—Revelation 11:18.

2. (a) Mini’ e ba kireb ko pi magawon ko girdi’ ko ngiyal’ ney? (b) Mang thin e ma fl’eg lanin’dad?

² Mang fan ni kari gel e gafgow ko ngiyal’ ney? Be pi’ e Bible e fulweg riy faani weliy ni kan nin’ Satan nga wuru’ e tharmiy u tomren ni sum Gil’ilungun Got ko duw ni 1914 me gaar: “Ri bayi gafgow e fayleng nge day! Ya ke yib fare Moonyan’ ngomed, ni kari damumuw, ya manang ndaki n’uw nap’an ni nge par.” (Revelation 12:12) Rib gagiyel ni ke lebug e re thin ko profet nem ma aram e mich riy ni ke chugur nga tungun e gagiyeg rok Satan nib kireb. Ke fel’ lanin’uy ya kan nang ni dabki n’uw nap’an ma ra sul e fayleng nga rogon me gapas ni bod fa ngiyal’ u m’on ni ke wawliy Satan e gali ga’ rodad ngar togopuluwgow ku Got!

3. Wuin e de t’uf ko girdi’ ni ngan fl’eg lanin’rad?

³ Som’on ko tabolngin me fl’eg e An Tasunumiy e girdi’ reb e milay’ nib fel’ yaan ni nge par e gal som’on e girdi’ riy. Immoy ko gin ni ka nog Eden ngay ma fan e re thin nem e “Felan’” ara “Falfalan’.” (Genesis 2:8, footnote) Ba fel’ fithik’ i dow Adam nge Efa ya yow bflont, ma rayog ni ngar parew ndabkur m’ow. Mu lemnag u urngin ban’en ni rayog ni ngar salapgow riy​—milay’, nge art, nge dimow naun, nge musik. Ku mu lemnag urngin ban’en ni kan sunumiy ni rayog ni ngar yaliyew u nap’an ni ngar ayuwegew e fayleng nge mang paradis. (Genesis 1:28) Arrogon, susun ni ra par Adam nge Efa ni ke fel’ lanin’row ko yafas mi yow falfalan’ ma gathi yow ra gel’gel’ ko amith. Faan manga arrogon ma de t’uf ni ngan fl’eg lanin’row.

4, 5. (a) Mang fan ni de gel Adam nge Efa ko fare skeng? (b) Ke diin ma ke t’uf ko girdi’ ni ngan fl’eg lanin’rad?

⁴ Machane ba t’uf ku Adam nge Efa ni ngar t’ufegew mar tew fan e Chitamangirow nu tharmiy ni ir ba gol. Ma aram e ra k’aringrow ni ngar folgow ku Got u urngin ban’en. (Mu taarebnag ko John 14:31.) Ba kireban’uy ya yow l’agruw e gali ga’ rodad ni dar folgow ku Jehovah ni ir e An bay mat’awun ni nge gagiyegnagrow. Machane ur pagew ni ngar tew yow nga tan pa’ e gagiyeg ku Satan ni Moonyan’ ni ir e engel ni ke mul. Ke wawliy Satan Efa ni nge denen me kay fare waamangin ni kan falownag. Miki denen Adam faani kay waamgin fare gek’iy ni ke yog Got morngaagen ni gaar: “Rofen ni ga ra kay e ga ra yim’.”​—Genesis 2:17.

⁵ Ara’ rogon ni denen fagali mabgol me tabab ni ngar m’ow. Nap’an ni be gechignag Got Adam me gaar ngak: “Bochan e tin ni kam rin’ ma aram e nge kireb e but’. Ma n’umngin napan e yafos rom ni bay um maruweliy e but’ nib gel nge yog ni pi’ e ggan ngom nib gaman. Ma bayi tugul e pan ni ba’ rachangalen nge pan nib kireb ni bocham, ma bay um koy e woldug nu mapan.” (Genesis 3:17, 18) Ere dakiyog ku Adam nge Efa ni ngar maruweliyew e fayleng nge paradis. Kan tulufrow u Eden, ma aram thingara tiyan’row ko maruwel nib elmirin nge yog e ggan ngorow ya kan bucheg waathan e but’. Ma ke af ko pi fakrad rarogon e denen nge yam’ me ere ke t’uf rorad ni ngan fl’eg lanin’rad.​—Roma 5:12.

Ban’en ni Kan Micheg ni Ma Fl’eg Lanin’uy

6. (a) Mang e ke micheg Got ni ma fl’eg lanin’uy u tomren ni ke denen e girdi’? (b) Mang e yiiynag Lamech ni ma fl’eg lanin’uy?

⁶ Nap’an ni pi’ Jehovah e gechig ku fa en ni ke n’igin nge togopuluw e girdi’ me micheg ni ir ‘fare Got ni ma yib e fl’eg laniyan’ rok.’ (Roma 15:5) Ya ke micheg ni ra pi’ reb e “owchen” ni ra chuweg pi fak Adam ko pi n’en nib kireb ni sum ni bochan ni ke togopuluw Adam ku Got. (Genesis 3:15) Munmun me tamilangnag Got ko uw rogon ni ra thapeg e girdi’ ngak. Lamech e reb e girdi’ ko ganong rok Seth ni fak Adam me thagthagnag Got nga laniyan’ me yiiynag ko n’en nra rin’ be’ ni fak ni gaar: “Cha’ ney e ra fl’eg lanin’dad ko maruwel rodad nge amith u pa’dad ni bochan e but’ ni ke bucheg Jehovah waathan.” (Genesis 5:29) Kan tunguy Noah ko re pagal ney ya nge puluw ko n’en ni kan yiiynag u morngaagen ma fan e re ngochol nem e “Toffan” ara “Ayuw.”

7, 8. (a) Uw rarogon e fayleng ma aram e kolngan’ Jehovah ni ke sunumiy e girdi’, ma mang e ke m’agan’ ngay ni nge rin’ ni bochan? (b) Uw rogon ni ke ngongol Noah nib puluw ko ngochol rok?

⁷ Ma ngiyal’ nem ma be un boch e engel u tharmiy ku Satan. Kar fanayed downgin e girdi’ mar leengiyed boch e ppin nib pidorang ni yad pi fak Adam. Re ngongol nem ni de yalen e ke gelnag e kireb u fayleng me sum e piin ni yad e Nephilim, ara “fellers,” ni kar suguyed e fayleng ko bugel. (Genesis 6:1, 2, 4, 11; Jude 6) “Faani guy Jehovah ni kari gel e kireb rok e girdi’ u gubin yang. . . me kalngan’ ngay ni ke sunumegrad ke ta’ rad nga daken e fayleng. Me par ni kari taganan’ nib gel.”​—Genesis 6:5, 6.

⁸ I m’agan’ Jehovah ngay ni nge thang e re m’ag nib kireb nem ko day ni ra tharey e fayleng, machane u m’on riy me yog ku Noah ni nge toy e arke ni ngan ayuweg boch e pogofan riy. Ere kan ayuweg e yafas ko girdi’ nge gamanman ni gubin mit. Kari gapas lanin’rad Noah nge tabinaw rok u tomren ni yib fare day mar bad nga wuru’ fare arke nga but’ ni kan biechnag e fayleng! Kari fel’ laninyan’rad ya kar guyed ni daki buch waathan e but’, ma aram ma ke mom boch ni ngan fl’eg e milay’ riy! Arrogon, ke riyul’ e thin ni yiiynag Lamech, me puluw e n’en ni rin’ Noah ko ngochol rok. (Genesis 8:21) Noah e reb e tapigpig rok Got nib yul’yul’ ma ir e ke yibnag e “fl’eg laniyan’” e girdi’. Machane de taleg fare day Satan nge pi engel rok ni ngar wawliyed e girdi’, ma ka be ge’gel’ e girdi’ ni bochan e denen, nge m’ar, nge yam’.

Be’ ni Kab Ga’ ku Noah

9. Mang fan ni Jesus Kristus e ir e ta ayuw nge an ma fl’eg laniyan’ e girdi’ ni kar kalgadngan’rad?

⁹ Ke yan 4,000 e duw me yib fare Owchen ni kan micheg. Bochan fene gel nib t’uf e girdi’ rok Jehovah Got ma aram me pi’ Fak ni maagirag nga fayleng ni nge yim’ ni nge biyuliy e girdi’ ni yad e tadenen. (John 3:16) Ma fl’eg Jesus Kristus laniyan’ e piin tadenen ni kar kalgadngan’rad me michan’rad ko yam’ ni tay. Urngin e girdi’ ni kar ognaged yad ku Jehovah mar uned ko taufe ni yad pi gachalpen Fak e yad ra un ko toffan min fl’eg lanin’rad. (Matthew 11:28-30; 16:24) Yugu aram rogon ni bay thibngirad machane yad ba falfalan’ ko pigpig ku Got ma dariy ban’en nke methan’rad ngay. Kan fl’eg lanin’rad ya yad manang ni faanra nguura maruweliyed e michan’ rorad ku Jesus ma yira taw’athnagrad ko yafas ni manemus! (John 3:36; Hebrews 5:9) Ma faanra yad ra denen nib ubchiya’ ya yad mmeewar, machane bay e ta ayuw rorad ara en nra fl’eg lanin’rad ni aram Somol Jesus Kristus ni kan faseg ko yam’. (1 John 2:1, 2) Faanra yad ra weliy e denen rorad mar folgad ko Bible ni dabkuura ngongliyed e denen, ma yira fl’eg lanin’rad ya yad manang ni ‘rayog ni ngad pagedan’dad ngak Got ya tin nib mat’aw e ra rin’ ya ra n’ag fan u wan’ e denen rodad.’​—1 John 1:9; 3:6; Proverbs 28:13.

10. Mang e gad be fil ko pi maangang ni fl’eg Jesus u nap’an ni immoy u fayleng?

¹⁰ Nap’an ni immoy Jesus u fayleng me pi’ e toffan ko girdi’ ya ke tuluf e pi moonyan’ u fithik’rad ma ke golnag urngin mit e m’ar, me faseg e yam’. Rriyul’ ni angin ni yib ko pi maangang nem e de par ndariy n’umngin nap’an ya pi girdi’ nem ni kan flaabnag rad e goo kar pillibthirgad mar m’ad. Machane aram e ke tamilangnag Jesus e flaab ni bay nga m’on ni ra pi’ ko urngin e girdi’. Bay u tharmiy e chiney ni ir e Pilung nib gel ma boor ban’en nra rin’ ni gathi ke mus ni ra tuluf e pi moonyan’. Ya ra yin’rad nga lan e low nib toar ni yad e ani ga’ rorad ni Satan ma dakuriy ban’en ni rayog ni ngar rin’ed. Ma aram ma ra tabab fare Gagiyeg rok Kristus u lan reb e Biyu’ e Duw.​—Luke 8:30, 31; Revelation 20:1, 2, 6.

11. Mang fan ni yog Jesus ni ir e “Somol ko sabbath”?

¹¹ Yog Jesus ni ir “Somol ko sabbath,” ya boor e maangang ni fl’eg ko rofen ni Sabbath. (Matthew 12:8-13; Luke 13:14-17; John 5:15, 16; 9:14) Mang fan e re n’ey? Ya fare Sabbath e aram bang ko pi Motochiyel rok Got ngak piyu Israel ni aram “yaan e pi n’en nib fel’ ni bay fini yib.” (Hebrews 10:1) Fa nel’ i rran ko maruwel e be yip’ fan fa nel’ i biyu’ e duw ni immoy e girdi’ u tan e gagiyeg rok Satan. Ma fa rofen ni Sabbath u tomren e nel’ i rran nem e be yip’ fan e toffan ko girdi’ min fl’eg lanin’rad u nap’an fare Gagiyeg ko Biyu’ e Duw rok Jesus Kristus ni ir e Bin ni Baga’ e Noah.​—Mu taarebnag ko 2 Peter 3:8.

12. Mang e bay nga m’on rodad ni ra fl’eg lanin’dad?

¹² Ra baud laniyan’ e piin ni yad bay u tan e gagiyeg rok Kristus ya dabki suweyrad Satan! Ku ra fl’eg lanin’rad ya yad ra gol ko m’ar fithik’ dowrad ngu lanin’rad ngu tafinay rorad. (Isaiah 65:17) Ma aram mi yad falfalan’ u nap’an ni yad ra mada’nag e girdi’ rorad ni kar m’ad min fasegrad! Ngiyal’ nem ma ra chuweg Got “urngin e lu’ u owcherad.” (Revelation 21:4) Ra yib angin e biyul’ ni pi’ Jesus ni buch uw iyan, me ere ra flont iyan e girdi’ ni yad bay u tan’ pa’ Gil’ilungun Got, min pithigrad ko kirebun e denen ku Adam. (Revelation 22:1-5) Ma aram min pag Satan biyay u “ba ngiyal’ nib ngoch nap’an.” (Revelation 20:3, 7) Ran taw’athnag urngin e piin ni ra par nib yul’yul’ ko gagiyeg rok Jehovah ma ra pared ndariy n’umngin nap’an. Dabiyog ni ngan weliy fene falfalan’ nge fene baud laniyan’ ya “bay ra pared ni gathi yad e sib rok e wod”! Ma aram ma piin ni ma fol ku Got e ra “un ko flaab rok pi fak Got.”​—Roma 8:21.

13. Mang fan nib t’uf ko urngin e tin riyul’ e Kristiano ni nge fl’eg Got lanin’rad?

¹³ Machane chiney ma ka gad be un ko gel’gel’ nge amith ya gad be par ko m’ag rok Satan nib kireb. Urngin e girdi’ nib muun ngay e pi Kristiano nib yul’yul’ e goo yad ma m’ar ni dowrad nge lanin’rad. (Filippi 2:25-27; 1 Thessalonika 5:14) Maku bochan ni gad e Kristiano ma ma n’igin Satan ni nga un moningnagdad min togopuluw ngodad ya gad ma ‘fol rok Got ko bin ni ngad folgad rok e girdi’.’ (Acts 5: 29) Ere ba t’uf e ayuw rok Got nge fl’eg lanin’dad nge pi’ gelngidad ni fan ni nguud k’adedan’dad ma gad rin’ e tin nib m’agan’ ngay nge mada’ ko ngiyal’ nga tomren e m’ag rok Satan.

Gin ni Ngan Pirieg e Fl’eg Lanin’uy Riy

14. (a) Mang e micheg Jesus ko fare nep’ u m’on ni yim’? (b) Mang e ba t’uf ni fan e nge yib angin ngodad e ayuw ko kan ni thothup rok Got me fl’eg lanin’dad?

¹⁴ Fare nep’ u m’on ni yim’ Jesus me tamilangnag ko pi apostal rok ni dabki n’uw nap’an ma ra chuw rorad me sul ngak e Chitamangin. Ke maga’fan’rad ko re n’em me kireban’rad. (John 13:33, 36; 14:27-31) I nang Jesus nib t’uf rorad ni ngan fl’eg lanin’rad me ere gaar ngorad: “Bay gu wenig ngak e en ni Chitamangiy nge pi’ e n’en nra fl’eg lanin’med, me par romed ndariy n’umngin nap’an.” (John 14:16, footnote) Be weliy Jesus u morngaagen e kan ni thothup rok Got ni kan puog nga daken pi gachalpen 50 e rran nga tomren ni kan faseg ko yam’.a Kan ni thothup rok Got e ke fl’eg lanin’rad u nap’an ni kan magawonnagrad me gelnagrad ni nguur rin’ed e tin nib m’agan’ Got ngay. (Acts 4:31) Machane susun ndabda lemnaged ni yugu ra yib e re ayuw nem ngodad ndan ning. Ya ra nge yib angin ma ra reb e Kristiano e thingari yibilay e ayuw ni ma fl’eg lanin’uy ni ma pi’ Got u daken e kan ni thothup rok.​—Luke 11:13.

15. Ku mang boch e kanawo’ ni ma fl’eg Jehovah lanin’dad riy?

¹⁵ Ku reb e kanawo’ ni ma pi’ Got e fl’eg laniyan’ riy e daken e Thin Rok ni Bible. I yoloy Paul ni gaar: “Urngin ban’en nni yoloy nga lan e babyor nib thothup e ni yoloy ni nge fonownagdad, ni bochan e nge yog e l’agan’ ngodad u fithik’ e gum’an’ nge fl’eg laniyan’ ni be pi’ e thin ko babyor nib thothup ngodad.” (Roma 15:4) Aram e be dag nib t’uf ni ngad filed e Bible nge boch e babyor u gubin ngiyal’ ma gad fl’eg i lemnag. Ku ba t’uf ni ngad uned ko urngin e muulung ko Kristiano, ya aram e gin ni yibe weliy e Thin Rok Got riy ni ma fl’eg laniyan’. Reb i fan e pi muulung nem e ra bagadad ma nge pi’ e athamgil nga laniyan’ bagadad.​—Hebrews 10:25.

16. Susun mang e ngad rin’ed ni bochan e pi n’en ni pi’ Got ngodad ni ma fl’eg lanin’dad?

¹⁶ Fare babyor ni yoloy Paul ngak piyu Roma e be dag angin nib fel’ ni ma yib ngodad u nap’an ni gad ma fanay e pi n’en ni pi’ Got ni ma fl’eg laniyan’uy. I gaar Paul: “I Got ni ir e ma yib e gum’an’ nge fl’eg laniyan’ rok ngodad e nge ayuwegmed nguum folwokgad rok Kristus Jesus mi gimed par ni ke taareban’med, ni fan e gimed gubin ni nge taareban’med nga mogned e sorok ngak Got ni ir e Got nge Chitamangnin e Somol rodad i Jesus Kristus.” (Roma 15:5, 6) Arrogon, gad ra fanay urngin ban’en ni pi’ Got ni nge fl’eg laniyan’dad, ma aram e gad ra bod e Ani be pow’iydad ni ir Jesus Kristus. Ma aram e ra k’aringdad nguud pininged e sorok ngak Got nap’an ni gad ra un ko machib, nge nap’an e pi muulung rodad, nge nap’an ni gad be sabethin boch e pi walag, nge nap’an ni gad ma meybil.

Ngiyal’ ni Kan Gafgownagey nib Gel

17. Uw rogon ni fl’eg Jehovah laniyan’ Fak ma mang angin ni yib riy?

¹⁷ Fare nep’ u m’on ni yim’ Jesus me “yib e taganan’ ngak nrib gel” me “thamiy ni gowa kan chuchuy nga but’.” (Matthew 26:37, 38) Ere ke yan buch uw nga orel ko pi gachalpen me yibilay ku Chitamangin ni be ning e ayuw. “Bochan ni bay madgun Got u wan’ ma aram fan ni fulweg Got taban e meybil rok.” (Hebrews 5:7) Be yog e Bible ni “yib ba engel nu tharmiy i m’ug ngak nge pi gelngin.” (Luke 22:43) Rogon ni dag Jesus ni de rus ko piin ta togopuluw ngak e ma micheg ni ke yib angin e ayuw ni pi’ Got ke fl’eg laniyan’ Fak.​—John 18:3-8, 33-38.

18. (a) Mang e buch ku apostal Paul ni ke magawonnag laniyan’? (b) Uw rogon nrayog ni ngad fl’eged laniyan’ e piin piilal ni yad ba gol ma yad e ba gel e maruwel ni yad ma tay?

¹⁸ Ku arrogon apostal Paul ni kan gafgownag nib elmirin. Machib ni ke tay u Efesus e “rin’ u fithik’ e sobut’an’ nge lu’ ni bochan e gafgow ni yib [ngak] ni bochan e makath ni tay piyu Jew.” (Acts 20:17-20) Tomur riy me chuw Paul u Efesus u tomren ni kari wagey e girdi’ ni ma liyor ku Artemis ni kan ni ppin ni bochan e machib ni tay u lan e re mach nem. (Acts 19:23-29; 20:1) Ma nap’an ni be yan Paul nga lel’luch ko mach ni Troas ma ka bay ban’en ni be tomalnag laniyan’. U m’on ni kan wagey u Efesus ma kan weliy ban’en ngak ni ke kireban’ ngay. Ya fare ulung nu Korinth ni fini sum e ke ruw raba’ ma yad be uneg e ngongol ndarngal ngay. Ere nap’an ni bay Paul u Efesus me yoloy e babyor ni bay e fonow nib gel riy ni fan ni ngan yal’uweg fare magawon. Ma aram ban’en ni gathi mmom ni ngan rin’. Ke yoloy u lan e bin l’agruw e babyor ni pi’ ngorad ni gaar: “Kug yoloy e babyor ngomed ni kari magafan’ug ngomed, ma kari kireban’ug ni be map’map’ e lu’ u owcheg.” (2 Korinth 2:4) Bod Paul ma piin piilal nib gol e de mom rorad ni ngar pied e fonow nib gel ya ku yad e yad mmeewar. (Galatia 6:1) Ere ngad fl’eged laniyan’ e piin ni ma pow’iy e ulung ma gad fol ko fonow ni yad ma pi’ ngodad ni bay ko Bible.​—Hebrews 13:17.

19. Mang fan ni yan Paul nga Macedonia u Troas, ma uw rogon ni kan fl’eg laniyan’?

¹⁹ Nap’an ni immoy Paul u Efesus me yoloy e babyor ngak e pi walag u Korinth miki l’og Titus ngaram ni nge ayuwegrad me yog ni nge sul nge weliy ko uw rogon u wan’rad fare babyor ni pi’ ngorad. I athapeg Paul ni nge mada’nag Titus u Troas. U rom ma ke yog ku Paul ni nge ayuweg boch e girdi’ ngar manged pi gachalpen Jesus. Machane ka be par nib maga’fan ni bochan dawori yib Titus. (2 Korinth 2:12, 13) Ere ke milekag iyan nga Macedonia, ma be athapeg ni ngar mada’gow Titus u rom. Ma kari maga’fan Paul ni bochan ni ke gel e togopuluw ko machib. Ke weliy ni gaar: “I mus ko ngiyal’ ni gu tawgad riy nga Macedonia ma ku de yog ni gu toffangad. Ya gubin yang ma ug pirieged e gafgow riy, ma gamad be maluag thin e girdi’, ma gamad be rus. Machane Got ni ma fl’eg laniyan’ e piin ni ke mulan’rad e fl’eg lanin’mad ni bochan Titus ni yib ngomad.” (2 Korinth 7:5, 6) Ke baud laniyan’ Paul faani yib Titus me weliy ni ke fol piyu Korinth ko n’en ni ke yoloy ngorad!

20. (a) Bod rogon ni kan ayuweg Paul maku mang kanawo’ e ma fl’eg Jehovah laniyan’ e girdi’ riy? (b) Mang e yira weliy ko bin migid e thin?

²⁰ N’en ni buch ku Paul e ma fl’eg laniyan’ e pi tapigpig rok Got ko ngiyal’ ney ya boor iyad e ba magawon ko boch ban’en ma ke “mulan’rad” ara ke “m’ingan’rad.” Arrogon, ‘fare Got ni ma fl’eg lanin’uy’ e manang e n’en nib t’uf rodad ni ra bagadad ma rayog ni nge fl’eg laniyan’ bagadad ni bod ni kan fl’eg laniyan’ Paul ni bochan e n’en ni weliy Titus u morngaan piyu Korinth ni kar kalgadngan’rad. (2 Korinth 7:11-13) U lan e bin migid e article, ma gad ra weliy e n’en ni yog Paul ngak piyu Korinth nge uw rogon nrayog ni ngan ayuwegdad ngad wereged rogon ni ma fl’eg Got laniyan’ e girdi’ ko ngiyal’ ney.

[Boch e Thin nra Tamilangnag Murung’agen]

Rayog ni Mu Fulweg?

◻ Ke diin me t’uf ko girdi’ ni ngan fl’eg lanin’rad?

◻ Mang e rin’ Jesus ni kab baga’ ko n’en ni rin’ Noah?

◻ Mang fan ni yog Jesus ni ir e “Somol ko sabbath”?

◻ Uw rogon ni ma fl’eg Got laniyan’ e girdi’ ko ngiyal’ ney?

[Sasing ko page 9]

Kan fl’eg laniyan’ Paul ni bochan e n’en ni weliy Titus u morngaagen piyu Korinth