Ngan F’oth E Fl’eg Laniyan’ Ni Be Pi’ Jehovah

“Der maruwaran’mad ngomed; ya gamad manang nrogon ni kam uned ngomad ko tin ni gamad be gafgow riy, e ku aram rogon ni ba’ e f’oth romed ko fl’eg laniyan’ ni be pi’ Got ngomad.”​—2 KORINTH 1:7.

1, 2. Ngiyal’ ney ma uw rogon ni ke thil laniyan’ e girdi’ nap’an ni kar uned ko Kristiano?

BOOR e girdi’ ko ngiyal’ ney ni yad ma poy fare babyor ni Wulyang N’Tagil e Damit e kar ilalgad ma dar nanged e thin nriyul’ rok Got. Sana ku aram rogom. Faanra er rogon ma ga lemnag ko uw rogon u wan’um u nap’an ni be tamilangan’um iyan. Susun, nap’an ni ke tamilangan’um ni piin ni kar m’ad e gathi yad be gafgow ya dariy e chi’ n’en ni yad manang ma aram me baud lanin’um fa? Ma nap’an ni kam fil u morngaagen e athap ko piin ni kar m’ad ni yad bokum milyon ma yira fasegrad u lan e fayleng nib biech rok Got, ma aram me fel’ lanin’um fa?​—Eklesiastes 9:5, 10; John 5:28, 29.

² Ma uw rogon e n’en ni micheg Got ni nge chuweg urngin e kireb me paradisnag e fayleng? Nap’an ni kam fil e re n’ey ma gathi ke fl’eg lanin’um ma ke l’agan’um ngay fa? Uw rogon u wan’um u nap’an ni kam fil ni rayog ni mu par ndab kum mum’ ma ga magay nib fas iyan ngaram ko Paradis? Dabi siy ni kam falfalan’ ngay. Arrogon, kam fil e thin rok Got ni ma fl’eg lanin’uy me ir e n’en ni be machibnag e Pi Mich Rok Jehovah u gangin e fayleng.​—Psalm 37:9-11, 29; John 11:26; Revelation 21:3-5.

3. Mang fan ni piin ni ma wereg e thin rok Got u morngaagen e fl’eg lanin’uy e ku ma yib e gafgow ngorad?

³ Machane nap’an ni kam athamgil ni ngam wereg e thin ko Bible ngak yugu girdi’ ma kam guy ni “gathi urngin e girdi’ ma ma mich u wan’rad e re thin rok Got ney.” (2 Thessalonika 3:2) Ara boch e piin ni yad e fager rom faram e ur moningnaged gur ni bochan e kam weliy ni ke mich u wan’um e n’en ni ke micheg e Bible. Ma sana kan gafgownagem ya kam fil e Bible ma ga be chag ko Pi Mich Rok Jehovah. Sana ke gel iyan e togopuluw ngom ya kam thiliyeg e par rom ni nge puluw ko motochiyel ko Bible. Ere kam un ko fare gafgow ni ma yibnag Satan nge fayleng rok ngak e piin ni yad ma fanay e fl’eg laniyan’ rok Got.

4. Mang e ma rin’ boch e piin ni ka fin ra uned ko machib ni faanra yib e gafgow ngorad?

⁴ Ma bay e kireban’ riy ya rogon ni yiiynag Jesus ma boch e girdi’ e yad ra tal ni dabkur uned ko pi ulung ko Kristiano ni bochan e kan gafgownagrad. (Matthew 13:5, 6, 20, 21) Ma boch e girdi’ e ra athamgil u fithik’ e togopuluw ya yad ma yiluy owcherad ko pi n’en ni ma fl’eg lanin’uy ni yad be fil morngaagen. Ma aram mi yad ognaged yad ku Jehovah mar uned ko taufe ni kar manged pi gachalpen Fak ni Jesus Kristus. (Matthew 28:19, 20; Mark 8:34) Machane dabi tal e gafgow faanra un e Kristiano ko taufe. Susun, be’ ni ma un ko ngongol ndarngal faram e de mom ni ngi i par nib machalbog. Ma yugu boch e girdi’ e thingara k’adedan’rad u fithik’ e togopuluw ko girdi’ rorad ni de taareb e michan’ rorad. Yugu demtrug ko be mang gafgow ni ba’ machane urngin e piin ni ma par nib yul’yul’ ku Got e rayog ni ngari michan’rad nga taa ban’en. Aram e rayog ni ngar nanged rogon ni ma fl’eg Got laniyan’ e girdi’ ma ma ayuwegrad ni ta ta bagayad.

“Fare Got ko Urngin Mit e Fl’eg Laniyan’”

5. Uw rogon laniyan’ Paul ni yugu aram fene yoor e gafgow ni ke yib ngak?

⁵ Apostal Paul e ir be’ ni ke tay fan rogon ni ma fl’eg Got laniyan’uy. Tomren ni ke mit ko magawon u Asia ngu Macedonia, me baud laniyan’ faani rung’ag ni ke fol fare ulung nu Korinth ko fare babyor ni ke pi’ ngorad. Re n’ey e ke k’aring ni nge yoloy e babyor ngorad biyay ni be pining e magar ngorad ko pi thin ney ni gaar: “Ngad pininged e magar ngak Got ni Chitamangin e Somol rodad i Jesus Kristus, me ir e Chitamangiy nrib ta runguy e girdi’ ni ir faanem i Got ni urngin mit e fl’eg laniyan’ me ir e be yib rok ngodad ma ma fl’eg lanin’dad u urngin e gafgow nge kireban’ ni ma yib ngodad.”​—2 Korinth 1:3, 4.

6. Mang e gad be fil ko pi thin rok Paul u 2 Korinth 1:3, 4?

⁶ Pi thin ney ni ke thagthagnag Got e be tamilangnag boor ban’en ngodad. Ere ngad fl’eged i yaliy e pi thin nem. U lan e pi babyor rok Paul e ma pining e sorok ara magar ku Got fa ma yibilay ban’en ma baga’ ni ku ma uneg ngay e magar ku Jesus ni ir Lolugen e ulung ko Kristiano. (Roma 1:8; 7:25; Efesus 1:3; Hebrews 13:20, 21) Ere ke pining Paul e sorok ngak “Got ni Chitamangin e Somol rodad i Jesus Kristus.” Miki fanay reb e thin ni Greek ni puluw ko “ta runguy” ma aram e yay nsom’on ni yog e re thin nem. Re bugithin ney e sum ko yugu reb e thin ni yima yog ko kireban’ ko gafgow ni be tay be’. Ere ke tamilangnag Paul rogon ni ma runguy Got e pi tapigpig rok nib yul’yul’ ni yad be gafgow​—ma bochan ni be runguyrad ma be k’aring ni nge rin’ ban’en ni bocherad. Miki sap Paul ku Jehovah ni ir tapgin e re felngin ney ya ke yog ni ir “Chitamangin e runguy.”

7. Mang fan nrayog ni ngan nog ni Jehovah e ir “faanem i Got ni urngin mit e fl’eg laniyan’ e be yib rok”?

⁷ Bochan e “runguy rok Got” ma ra baud laniyan’ e en ni be gafgow. Ere ke yog Paul ni Jehovah e ir “fare Got ko fl’eg laniyan’.” Ere nap’an ni ra fl’eg e pi walagdad laniyan’dad ma aram e n’en ni yib rok Jehovah. Dakuriy yug reb e fl’eg laniyan’ nga bayang nra magay ni gathi yib rok. Maku ir e sunumiy e girdi’ ni bod yaan, ere aram fan nrayog ni ngad fl’eged laniyan’ e girdi’. Ma kan ni thothup rok Got e ma k’aring e pi tapigpig rok ni ngar runguyed e piin ni ba t’uf ni ngan fl’eg laniyan’rad.

Kan Skulnagey ni Fan e Ngan Fl’eg Laniyan’ e Girdi’

8. De sum rok Got e pi magawon ni ma yib ngodad machane mang angin ni ra yib ngodad nfaanra gad ra k’adan’dad u fithik’ e gafgow?

⁸ Ma pag Jehovah Got e pi skeng ni nge yib ko pi tapigpig rok, machane gathi ir e sum rok. (James 1:13) Ma ma fl’eg laniyan’dad u nap’an ni gad ma athamgil u fithik’ e gafgow ma aram e be skulnagdad ni ngad lemnaged yugu boch e girdi’. Mang angin ni yib riy? “Ma ayuwegdad u urngin e gafgow nge kireban’ ni ma yib ngodad, ni fan e nge yog nda fl’eged laniyan’ e piin ni ke yib urngin mit e gafgow nge kireban’ ngorad, ni gadad be maruwel ko fare ayuw ni yib ngodad rok Got.” (2 Korinth 1:4) Ere ma skulnagdad Jehovah ni ngad fl’eged laniyan’ e pi walag nge piin ni gad ma mada’ ko machib ma gad folwok rok Kristus “ma gad fl’eg laniyan’ urngin e piin ni be kireban’rad.”​—Isaiah 61:2; Matthew 5:4.

9. (a) Mang e ra ayuwegdad ngad athamgilgad u fithik’ e gafgow? (b) Uw rogon ni gad be fl’eg laniyan’ yugu boch e girdi’ u nap’an ni gad be k’adan’dad ko gafgow?

⁹ I k’adan’ Paul u fithik’ boor e gafgow ni bochan e ke fl’eg Got laniyan’ u daken Kristus. (2 Korinth 1:5) Ku arrogodad ma ra fl’eg Got laniyan’dad nfaanra gad ra fl’eg i lemnag e pi n’en ni micheg Got, ma gad yibilay nge pi’ e kan ni thothup rok ngodad, ma gad guy ni ke fulweg taban e meybil rodad. Ma aram e ra gelnagdad ni nguud dogned nib sorok Jehovah ko gagiyeg ma ngad pied e mich riy ni fare Moonyan’ e ta malulfith l’igin. (Job 2:4; Proverbs 27:11) Nap’an ni gad ra par nib yul’yul’ u fithik’ e gafgow ma susun ni ngad boded Paul ni ke pining e magar ku Jehovah ya ir e ma fl’eg laniyan’ e pi Kristiano ni rayog ni ngar pared nib yul’yul’ u fithik’ e skeng. Ma pi Kristiano ni ur pared nib yul’yul’ e ma fl’eg laniyan’ e pi walag ma ma pi’ e athamgil nga laniyan’ yugu boch e girdi’ ni nge mudugilan’rad ni ngar “athamgilgad u fithik’ e gum’an’ e aram e re mit e gafgow ni ir e kar athamgilgad riy.”​—2 Korinth 1:6.

10, 11. (a) Mang boch ban’en ni ke n’igin nge gafgow fare ulung nu Korinth kakrom? (b) Uw rogon ni ke fl’eg Paul laniyan’ e ulung nu Korinth, ma mang e ke athapeg ni ngar rin’ed?

¹⁰ Ki un piyu Korinth ko pi gafgow ni ma yib ngak urngin e tin riyul’ e Kristiano. Kub t’uf rorad ni ngan fonownagrad ngar tharbogned be’ ko ulung ni ke un ko ngongol ndarngal nde kalngan’ riy. (1 Korinth 5:1, 2, 11, 13) Bochan ni dar rin’ed e re n’em ma dar taleged e ruw raba’ u lan e ulung ma aram e ke kireb thin e ulung. Machane munmun mar folgad ko fonow rok Paul ma kar kalgadngan’rad. Ere ke pining e magar ngorad me yog ni ke fel’ laniyan’ ni bochan ni kar folgad rok. (2 Korinth 7:8, 10, 11, 13) Miki kalngan’ fa en ni kan tharbog ko ulung. Ere yog Paul ngorad ni ngar ‘n’iged fan u wan’rad e tin ni ke rin’ mi yad fl’eg laniyan’, ya ri gel e kireban’ rok nge pag ir.’​—2 Korinth 2:7.

¹¹ Dabi siy ni fa bin l’agruw e babyor ni yoloy Paul ngak fare ulung nu Korinth e ke fl’eg laniyan’rad. Ma aram e n’en ni ke finey. Ke weliy ni gaar: “Ere der maruwaran’mad ngomed; ya gamad manang nrogon ni kam uned ngomad ko tin ni gamad be gafgow riy, e ku aram rogon ni ba’ e f’oth romed ko fl’eg laniyan’ ni be pi’ Got ngomad.” (2 Korinth 1:7) Tin tomren e thin ni yog Paul e gaar: “Mu athamgiliyed . . . ngam pared ni ke fel’ lanin’med, . . . mi Got ni gadad ba t’uf rok me ir e ma pi’ e gapas e bay i un ngomed.”​—2 Korinth 13:11.

12. Mang e ba t’uf ko urngin e Kristiano ni ngar rin’ed?

¹² Rib ga’ fan e n’en ni gad be fil ko re n’ey! Urngin e girdi’ u lan e ulung ko Kristiano e ba t’uf ni ngar ‘f’othed fare fl’eg laniyan’’ ni be pi’ Got u daken e Thin Rok, ngu daken e kan ni thothup rok, ngu daken e ulung rok u fayleng. Mus ko piin ni kan tharbograd ko ulung e ba t’uf ni ngan fl’eg laniyan’rad nfaanra kar kalgadngan’rad mar yaluw’eged e kanawo’ rorad. Ere ke dugliy “fare tapigpig nib yul’yul’ mab gonop” ban’en ni ngan ayuwegrad riy. Taab yay u reb e duw ma ra yan l’agruw e piilal ni ngar guyew e piin ni kan tharbog ko ulung. Sana dabki togopuluw e pi girdi’ ney ko ulung fa dakur uned ko denen nib ubchiya’ me ere ba t’uf ni ngan ayuwegrad ngar sulod ko ulung.​—Matthew 24:45; Ezekiel 34:16.

Gafgow ni Yib Ngak Paul u Asia

13, 14. (a) Mang e yog Paul u morngaagen ba ngiyal’ nib gel e gafgow ni kan tay ngak u Asia? (b) Sana mang e re ngiyal’ i n’en ni be weliy Paul morngaagen?

¹³ Gafgow ni yib ngak piyu Korinth ko ngiyal’ nem e de chugur ni nge taareb rogon ko pi gafgow ni yib ngak Paul. Ere ke gaar ngorad: “Ya gamad ba adag ni nggu puged u ran ngomed, pi walagmad ni girdien Kristus, e gafgow ni yib ngomad u lan e nug nu Asia. Ya gafgow ntay ngomad e rib gel nib gel nda kug fineyed ni ka gamad ra fos. Gu lemniged ni gamad e girdi’ ni ke m’ay i turguy ni ngan thang e pogofan romad. Machane ni yodoromnagmad ni bochan e gathi gamad e nggu torgad ngomad, ya ke mus ni Got ni ir e ma faseg e girdi’ ko yam’ e ir e nggu torgad ngak. Susun e nggu m’ad, machane ir e ayuwegmad nda gu m’ad, ma bay i ayuwegmad i yan; me ir e ke l’agan’mad ngak ni bay ki ayuwegmad ko riya’ bayay.”​—2 Korinth 1:8-10.

¹⁴ Piin ni yad e Bible scholar e yad ma yog ni be weliy Paul u morngaagen fare wagey u Efesus ni ke chugur ni nge math e pogofan rok nge pogofan rok Gayus nge Aristarkus, ni yow e girdi’ nu Macedonia ni kar unew ngak ko milekag. Kan towarsariy e gal Kristiano ney kan fekrow nga lan tafen e gosgos nib sug e girdi’ riy ni yad be “tolul u lan l’agruw e awa ni be lungurad: ‘Ba sorok Artemis [fare got ni ppin] nu Efesus!’” Me munmun me yog ni nge gapasnag e en ntayol ko fare binaw fapi girdi’. Dabi siy ni kari maga’fan’ Paul ni bochan ni ke yib e riya’ ku Gayus nge Aristarkus. Ma ba adag ni nge yan nga p’eowchen e pi girdi’ nem ni be wagey ni nge weliy fan ngorad, machane dan pag ni nge rin’ ya ri chey min li’ ngem’.​—Acts 19:26-41.

15. Mang e kan weliy nib ubchiya’ u 1 Korinth 15:32?

¹⁵ Machane sana pi thin nem ni weliy Paul e ma sor fan ko yugu ba ngiyal’ ni kab gel e riya’ riy. U lan e bin som’on e babyor ni yoloy Paul ngak yu Korinth e be fith ni gaar: “Rogon e n’en ni kug rin’ e susun e kug chamgad e gamanman ni maloboch u roy u Efesus, machane mang e re n’en nib fel’ nra yib riy ngog ni faanra dab ni faseg e yam’?” (1 Korinth 15:32) Be m’ug riy ni ke chugur ni nge thay e pogofan rok Paul ni gathi ke mus ni bochan e girdi’ ni yad bod e gamanman ni maloboch ya ku bochan e gamanman ni maloboch ni riyul’ u lan e tafen e gosgos u Efesus. Ya ngiyal’ nem ma rogon ni yima gechignag e piin nib kireb e yima towarsariyrad ngar chamgad e pi gamanman nib maloboch ma bay e tayengeng ni be guy. Ere faanra be weliy Paul ni riyul’ ni ke cham ko gamanman ni maloboch ma aram e kan ayuweg e pogofan rok ko maangang ni bod rogon ni kan ayuweg Daniel ko layon ndar longuyed.​—Daniel 6:22.

Boch e Thin ko Ngiyal’ Ney

16. (a) Mang fan ni rayog ni nge nang fan boor e Pi Mich Rok Jehovah e pi gafgow ni un Paul ngay? (b) Mang e kari mudugil ni fan ko piin ni kar m’ad ni bochan e michan’ rorad? (c) Mang angin nib fel’ ni yib u nap’an ni kan ayuweg e pogofan rok e pi Kristiano ni kari chugur ni nge aw e fan rorad?

¹⁶ Boor e Kristiano ko ngiyal’ ney e taareb rogorad Paul ko gafgow ni ma yib ngorad. (2 Korinth 11:23-27) Ku arrogon e ngiyal’ ney ni pi Kristiano e gafgow ntay ngorad e “kub gel nda kur fineyed ni ka yad ra fos.” (2 Korinth 1:8) Boch i yad e kan li’rad kar m’ad ni bochan e piin tatogopuluw. Gelngin Got e ke fl’eg laniyan’rad mar k’adedan’rad riy ma nap’an ni yad ra yim’ ma ke l’agan’rad ko par u tharmiy ara fayleng nga m’on. (1 Korinth 10:13; Filippi 4:13; Revelation 2:10) Ma bay yu ngiyal’ ni ke n’igin Jehovah ndabkun thang e fan rok e pi walagdad. Dabi siy ni piin ni kan ayuweg e fan rorad ni aram rogon e kari pagan’rad ku “Got ni ir e ma faseg e girdi’ ko yam’.” (2 Korinth 1:9) Nge mu’ ma rayog ni ngari gel rogon ni ngar wereged e thin rok Got ni ma fl’eg laniyan’uy ngak yugu boch e girdi’.​—Matthew 24:14.

17-19. Mang boch ban’en ni buch u Rwanda ni be dag ni ke fl’eg Got laniyan’rad?

¹⁷ Pi walagdad nib t’uf rodad u Rwanda e kar uned ko gafgow ni bod rogon chon Paul. Boor iyad e kar m’ad, machane de yog rok Satan ni nge kirebnag e michan’ rorad. Ya boor ban’en ni rin’ Got ni fan ko pi walagdad ko re binaw nem me fl’eg laniyan’rad. Nap’an ni kan guy rogon ni ngan thang mit e girdi’ ni Tutsi nge girdi’ ni Hutu u Rwanda, ma bay e girdi’ ni Hutu ni ke chugur ni nge aw e fan rorad ni bochan e kar ayuweged e girdi’ ni Tutsi ma bay e girdi’ ni Tutsi ni kar ayuweged e girdi’ ni Hutu. Kan li’ boch i yad kar m’ad ni bochan e kar ayuweged pi walagrad. Gahizi ni ir e girdi’ ni Hutu ma ir e Mich Rok Jehovah e kan li’ kem’ ya ke ayuweg e walag ni ppin ni Tutsi ni Chantal fithingan ni mithag. Ma pumoon ku Chantal ni Jean ni ku ir e Tutsi e ke par nib mith u bang ma reb e walag ni ppin ni Charlotte fithingan e be ayuweg. U lan 40 e rran mi i par Jean nge reb e walag ni Tutsi u lan e tafen e ath, ma ke mus ni ba ngiyal’ nib ngoch nap’an ko nep’ e kar bow nga wen. Ma be pi’ Charlotte garow ma be ayuwegrow ni yugu aram rogon ni be par ko gin nib chugur ko gin ni bay e salthaw ni Hutu riy. Bay e sasing ku Jean nge Chantal ko re page ney ni yow be pining e magar ko pi walag ni Hutu ni ‘ra paged fan e pogofan rorad’ ni bocherow, ni bod ni rin’ Priska nge Aquila ni fan ku apostal Paul.​—Roma 16:3, 4.

¹⁸ Ma bay reb e Mich Rok Jehovah ni Hutu ni Rwakabubu fithingan, ma kan pining e sorok ngak u lan e shimbung ni Intaremara ya ke ayuweg e pi walag ni Tutsi.a Begaar: “Rwakabubu, ni ir e Mich Rok Jehovah ke ayuweg e girdi’ ke mithegrad ko yu gin ni bay pi walagen riy (aram rogon ni yad ma piningrad ya taab michan’ e bay rorad). U polo’ reb e rran ma ma fek iyib e ggan nge rran ni fan ngorad ni yugu aram rogon nib m’ar ko mutungfan. Machane Got e ke pi’ gelngin.”

¹⁹ Ma bay ba wu’ i mabgol ni Hutu ni Nicodeme nge Athanasie ni yow ba adag e machib. U m’on ni tabab fare cham ma yow be fil e Bible u ta’ bang ku Alphonse ni ir e Mich Rok Jehovah ni Tutsi. Ma kar ayuwegew Alphonse ke par nib mith u tabinaw rorow. Munmun mar turguyew ni gathi rib fel’ ni nge par u rom ya piin buguli yoror rorow e yad e girdi’ ni Hutu ma yad manang morngaagen e fager rorow ni Tutsi. Ere kar mithagew Nicodeme nge Athanasie Alphonse u lan e low u tabgulen e naun rorow. Ma manigil e re n’ey ya ke tabab e piin bugul yoror rorow ni ngar gayed Alphonse u gubin e rran. U lan 28 e rran e par Alphonse u lan fare low ma ke fl’eg i lemnag e pi thin ko Bible u morngaagen Rahab, nge rogon ni ke mithag fagali pumoon nu Israel u daken e chigiy ko naun u Jeriko. (Joshua 6:17) Chiney ma ka bay Alphonse u Rwanda ma be wereg e thin nib fel’ u rom, ma be pining e magar ku fagali mabgol ni Hutu ni kar pagew fan e yafas rorow ni bochan. Ma ke diiy Nicodeme nge Athanasie? Kar unew ko taufe ma yow e Pi Mich Rok Jehovah mab pag 20 e girdi’ ni yow be fil e Bible ngorad.

20. Uw rogon ni ke fl’eg Jehovah laniyan’ e pi walag u Rwanda, machane ku mang e ba t’uf ni ngan rin’ ku boch iyad?

²⁰ Nap’an ni tabab fare cham u Rwanda ma immoy 2,500 e girdi’ ni be wereg e thin nib fel’ ko re binaw nem. Ma bokum miriay iyad e kar m’ad ara kan towarsariyrad ngar chuwgad u rom, machane ke yoor e Pi Mich Rok Jehovah u rom ke pag 3,000 u gubin. Aram e mich riy ni ke fl’eg Got laniyan’ e pi walag. Ma uw rogon e pi bitir ni dariy e gallabthir rorad nge pi ppin ni kem’ pi figirngirad ni yd e Pi Mich Rok Jehovah? Ka yad be gafgow ma ba t’uf ni ngan fl’eg laniyan’rad. (James 1:27) Ma ra chuw e lu’ u owcherad u nap’an ni ra faseg Got e yam’ u lan e fayleng nib biech. Machane bochan e ayuw ko pi walagrad ma bochan ni yad be liyor ku “Got ni ir e ma yib e fl’eg laniyan’ rok,” ma aram ma rayog ni ngar pared nib fel’ laniyan’rad ko par rorad.

21. (a) Ku bay u uw boch pi walagdad ni ba t’uf ni nge fl’eg Got laniyan’rad, ma uw rogon nrayog ni ngad ayuweged yad? (b) Wuin e ran fl’eg laniyan’dad nge yan ni mus nga rogon?

²¹ Ka bay yugu boch e binaw ni bod yu Eritrea, nge Singapore, nge Yugoslavia, ma pi walagdad e yad be pigpig ku Jehovah u fithik’ e gafgow. Ngad ayuweged e pi walagdad nguuda yibilayed ni ngan fl’eg laniyan’rad. (2 Korinth 1:11) Ma nguud pared nib yul’yul’ ngad k’adedan’dad nge mada’ ko ngiyal’ ni ra chuweg Got “urngin e lu’ u owchedad” u daken Jesus Kristus. Ma aram ma ra fl’eg Jehovah laniyan’dad nge mus rogon riy u lan e fayleng nib biech ni tin nib mat’aw ban’en e bayi par riy.​—Revelation 7:17; 21:4; 2 Peter 3:13.

[Boch e Thin nra Tamilangnag Murung’agen]

Ga Manang?

◻ Mang fan ni Jehovah e ir “faanem i Got ni urngin mit e fl’eg laniyan’ e yib rok”?

◻ Susun u rogon u wan’ dad e pi gafgow ni ma yib ngodad?

◻ Mini’ e rayog ni ngad fl’eged laniyan’rad?

◻ Uw rogon nran fl’eg laniyan’dad ni ngari mus rogon?

[Sasing ko page 15]

Nap’an fare cham u Rwanda ma Pi Mich Rok Jehovah ni Hutu e kar mithaged Jean nge Chantal, ni yow e Pi Mich ni Tutsi

[Sasing ko page 15]

Pi Mich Rok Jehovah u Rwanda e ka yad be wereg e thin rok Got ni ma fl’eg laniyan’uy ngak e girdi’ u rom