Fa Bin Ni Baga’ E Rir Ko Naun Rok Jehovah

“Begaar Jehovah ko pi salthaw, ‘Gu ra suguy e re naun ney ko rir.’”​—HAGGAI 2:7.

1. Mang fan ni bay rogon e kan ni thothup ko michan’ nge maruwel?

NAP’AN ni be yan reb e Mich Rok Jehovah u mit e tabinaw iyan me mada’nag reb e ppin ni ma un ko Pentecostal ma ke yog ngak fare Mich ni gaar, ‘Gamad e bay e kan ni thothup romad, machane gimed e gimed e piin ni be rin’ fare maruwel.’ Ere kan weliy ngak nib fel’ rogon ni faanra bay e kan ni thothup rok be’ ma ra k’aring ni nge un ko maruwel rok Got. James 2:17 e begaar: “Faanra ke mus ni goo michan’ ngak Got ma de chag e ngongol ngay, ma aram e ba yam’ fare michan’.” Kan ni thothup rok Jehovah e ke ayuweg e Pi Mich Rok ni ngar ‘suguyed e naun rok nge par nib nib rir’ ya yad ma ngongliy e pi n’en nib mat’aw​—ni baga’ ni aram e yad ma ‘machibnag fare thin nib fel’ ko Gil’ilungun Got u gubin yang u fayleng ni nge urngin e girdi’ me nang.’ Nap’an nra fel’ rogon ni ke turguy Jehovah e ngiyal’ ni nge m’ay e re maruwel nem “ma aram mfini taw nga tomren e fayleng.”​—Matthew 24:14.

2. (a) Mang flaab ni ra yib ngodad nfaanra gad ra un ko maruwel rok Jehovah ni ke mus rogodad riy? (b) Mang fan ni susun ni ngad falfalan’gad ni ke “sagaal” e ngiyal’ ko tomur?

² Pi thin ney ni yog Jesus e ma tamilangnag ngodad ni thingarda tedan’dad ko maruwel nib mil fan ngodad ko ngiyal’ ney ni aram e ngad machibnaged yugu boch e girdi’ u morngaagen “fare thin nib fel’ ni yib rok Got ni ir ba falfalan’.” (1 Timothy 1:11) Faanra ri gad ra athamgil ni ngad uned ko pigpig ku Jehovah ma aram e ra m’ug riy ni kari pay ni be yib e ngiyal’ ko tomur. Bay e thin rok Jehovah u Habakkuk 2:2, 3 ni begaar: “Mu yoloy nga daken yungi tafel e pi n’en ni ku gog ngom, ya nge mom nni bieg. Mu yoloy, ya dawori taw nga nap’an ni nge yib i m’ug, machane ngalan’ e be yib nib machreg, ma n’en ni ku gog ngom e bay yib i m’ug. Bay mu lemnag nib sowath ni be yib, machane ngam sonnag; ya ra yib i m’ug ko ngiyal’ ni kug dugliy, ma dabi sowath.” Arrogon ri ra riyul’ e “pi n’en ni ke yog” ni mus ni “bay mu lemnag nib sowath ni be yib.” Ereray e bin 83 e duw ni be gagiyeg Jesus ko Gil’ilungun Got ma sana boch e girdi’ e be lemnag ni ereray e ngiyal’ ni ke sowath. Machane gathi susun ni ngad falfalan’gad ya dawori taw ko tomur fa? Ya ngiyal’ ney ko 1990 iyib ngaray ma kan pag ni ngan machibnag fare thin nib fel’ u boor e binaw ni bod u Eastern Europe nge yu yang u Africa. Kan lemnag ni “ke sowath” machane yibe pag boor e piin ni bod e “saf” ni ngar bad ko pi binaw ney ni aram e yu gin ni kan taleg e machib riy faram.​—John 10:16.

3. Mang fan ni susun ni kan pug lanin’dad ngad uned ko maruwel rok Got nib gur ni bochan ni kan tamilangnag fan fare thin ni baaray ni “re mfen ney”?

³ Begaar fare profet, “Dabi sowath.” Yog Jesus ni “bay yib urngin e pi n’ey” u m’on ko ngiyal’ ndawori yim’ urngin e girdi’ ko re mfen ney nib kireb. (Matthew 24:34) Ma chiney ma kan tamilangnagan’dad ko pi thin ney me ere ke aw ni gathi rib baga’ fan ni ngad machibnaged e girdi’ ko ngiyal’ ney fa?a Boch ban’en e ma dag ni ri gathi arrogon! Be gel iyan e kireb ko re mfen ney ni dakuriy yugu ba ngiyal’ ni aram rogon. (Mu taarebnag ko Acts 2:40.) Ere susun ngad rin’ed e maruwel rodad ni kane’. (2 Timothy 4:2) Urngin e thin ko profet u morngaagen e ngiyal’ nra yib fare gafgow nib baga’ e be dag ni ra yib nib tomgin, mab machreg ma dariy be’ ni ra nang​—ni bod ba moro’ro’. (1 Thessalonika 5:1-4; Revelation 3:3; 16:15) “Ereray fan ni ngkum pired ni gubin ngiyal’ ni kam fal’eged rogomed kam pired, ya en ni Fak e Girdi’ e ra yib u reb e awa ndamur fineyed nra yib riy.” (Matthew 24:44) Girdi’ ko re mfen ney e der ma lemnag Got ma yad bay u thatharen e riya’ ere dabi siy ni dubdad ni ngad n’aged e athap rodad ko yafas ni manemus ma gowa “nga darod da piggad u fithik’ e bar” ko pi n’en ko fayleng ma aram e kad sulod ko pi n’en nem!​—2 Peter 2:22; 3:10; Luke 21:32-36.

4. Mang e buch ma ke t’uf ni nge yoor e “ggan ko ngiyal’ ni yima pi’ riy,” ma uw rogon ni kan rin’ e re n’ey?

⁴ Ke riyul’ e thin ni yiiynag Jesus ya nap’an e 1914 ma ke tabab e “bin som’on e amith ni ma yib ngak be’ ni nge gargel” ya ke taw ko “ngiyal’ ni tomren e re m’ag ney.” Ke mada’ ko ngiyal’ ney ma ke yoor iyan e pi n’en ni ma k’aring e kireban’ nge pi n’en ni bay e riya’ riy, nge rogon ni ma dariy fannag e girdi’ e motochiyel. (Matthew 24:3-8, 12) Ma ngiyal’ ni be buch e pi n’ey ma ke tay Jehovah chilen ko fare tapigpig nib yul’yul’ mab gonop ni ngar pied e “ggan nib spiritual ko ngiyal’ ni yima pi’ riy” ngak girdien e tabinaw rok Kristus ni ir e Masta rorad. (Matthew 24:45-47) Fare Pilung ni Messiah e bay u tharmiy ma be pow’iy e re maruwel ney ni ngan pi’ e ggan nib spiritual nga gangin e fayleng.

Boor e “Ggan”

5. Uw rogon ni yibe ayuweg fare “ggan” nth’abi ga’ fan?

⁵ Mu lemnag rogon ni yibe fl’eg fare “ggan.” (Luke 12:42) Fa bin th’abi ga’ fan e ggan ko Kristiano e aram e Bible ni Thin Rok Got. Ni ngan machibnag e girdi’ ngay nib fel’ rogon ma ba t’uf ni ngan fl’eg ba ken e Bible nib mom ni ngan nang fan e thin riy mab puluw. U lan in e duw ma kan mon’og iyan ko re n’ey, ya nap’an e 1950 ma kan fl’eg fare New World Translation of the Christian Greek Scriptures ko thin ni Meriken. Ma nap’an e 1961 ma kan fl’eg ba ken e Bible ni polo’ ni New World Translation, ma de n’uw nap’an nga tomren ma kan piliyeg e thin riy nga yugu mit e thin ni baga’ ni yima fanay. Nap’an e duw ni 1996 ma kan fl’eg 3 ken e Bible ma aram ma ke gaman 27 oren ma 14 iyad e aram fare Bible ni polo’ ni kan fl’eg. Ra nge yog ni ngan piliyeg e thin ko Bible nge yugu boch e babyor ma bay 1,174 e Kristiano ni kar ognaged yad ni yad be maruwel u lan 77 e branch ofis ko Watch Tower Society.

6. Mang e rin’ e Society nge yog nge gaman e pi babyor ko Bible ni ni yad be fl’eg?

⁶ Ma bay 24 e branch ko Watch Tower Society ni yad ma ngongliy ara printnag e babyor ni yima piliyeg e thin riy ma be yoor iyan oren e babyor ni yima fl’eg. Ere ka yibe tay boch e high-speed rotary preses u lan boch e branch. Gubin e pul ma be yoor iyan oren e Watchtower nge Awake! ni yibe fl’eg, ma ke gaman 943,892,500 oren ni aram 13.4 percent ni ke mun ngay u lan e re duw nem. Ka nap’an 1995 ma ke mun 40 e percent ke gaman 76,760,098 oren ken e Bible nge pi babyor nib elel keru’ ni kan fl’eg ko duw ni 1996 u Meriken, nge Brazil, nge Finland, nge Germany, nge Italy, nge Japan, nge Mexico. Maku ka bay yugu boch e branch ni byoor ken e babyor ni yad ma fl’eg.

7. Mang fan ni kari m’ag ko ngiyal’ ney e thin ni bay ko Isaiah 54:2?

⁷ Bochan ni kan pithig rogon e machib ko Pi Mich Rok Jehovah u Eastern Europe nge Africa ma ar fan ni ba t’uf ni ngan yoornag ken e babyor ni yibe fl’eg. Ko pi binaw ney ma girdi’ riy e rib gel e bilig rorad ko tirok Got ban’en. Ere yibe yog ni kane’ e pi thin ney ni gaar: “Re tent ney ni ga be par u lan e ngam ga’nag. Mu n’uwnag gafan ma ga gelnag e ren riy ni kan richibiy nga fithik’ e but’ ngan m’ag gafan ngay. Ma dab mu tal i rin’.”​—Isaiah 54:2.

8. Uw rogon ni yibe pi’ e ayuw?

⁸ Ere bay 104 e branch ofis ko Society ma ba t’uf ni ngan ga’nag boch e naun riy. Bochan ni ke gafgow e girdi’ ko pi binaw ni ka fin pithig rogon e machib riy ma baga’ ni girdi’ ko pi binaw nib fel’ rogon e yad be pi’ e ayuw ni nge yoor e machib u fayleng iyan. Ma bay e falfalan’ riy ya pi ulung nge girdi’ e yad be pi’ e ayuw ngay ni bod ni be yog ko Exodus 35:21 ni gaar: “Ma aram mar bad ni gubin e girdi’ ni gumercha’rad e ke k’aringrad ma kar feked iyib e ayuw ni ngan pi’ ngak Jehovah ko fare maruwel.” Ma chiney ma gamad ma pining e magar ko urngin e girdi’ ni be pi’ e ayuw ko re maruwel ney.​—2 Korinth 9:11.

9. Uw rogon ni be lebug e thin ko Roma 10:13 ko ngiyal’ ney?

⁹ Nap’an e 1996 ma riyul’ ni kan rirnag e ngochol rok Jehovah ke taw ko gin ni mus e fayleng ngay ni bochan e pi babyor ni ke fl’eg fare Watch Tower Society. Bod rogon ni yiiynag apostal Paul. Ke weliy e thin ni bay ko thin ko Joel ni profet nge thin ni bay ko guruy ni 19 ko Psalm me yoloy ni gaar: “‘En nra pining fithingan Jehovah ni nge ayuweg e ra fos ni ke thap ngak.’ Machane nggu fith ni nge lungug, Gur riyul’ ndar rung’aged e re thin rok Got nem? Ya bin riyul’ riy e ‘lamrad e wer nga urngin yang u daken e fayleng thin rorad e ke taw ko gin ni mus e fayleng riy.’” (Roma 10:13, 18) Bochan ni kar n’ufed e ngochol ni JEHOVAH ma girdi’ rok e kar ted nib rir e naun rok. Machane uw rogon ni kan ga’nag rogon ni kan n’uf fithingan Got u nap’an e 1996? Amu yaliy fare chart ni bay ko page 18 nge mada’ ko 21.

Woldug ni Ngan Kunuy u Gangin e Fayleng

10. Mang boch ban’en ko maruwel ko girdi’ rok Jehovah ni ba lingagil ni bay ko fare chart ko page 18​—21?

¹⁰ Ngiyal’ ney ma kari ga’ fan e thin rok Jesus ni bay ko Luke 10:2 ni begaar: “Woldug e baga’ ni baga’ yang, machane piin ni girdien e maruwel ni nge kunuy nge tay nga naun e ba lich. Ere mmeybilgad ngak e en ni ir e suwon e woldug ngki pi’ boch girdien e maruwel ngar muruwliyed e re woldug rok nem nge af nga naun.” Ga be fulweg e re pong nem fa? Bokum milyon e girdi’ u polo’ u fayleng e yad be fulweg. Ya ke taw ko 5,413,769 e piin ni yad e publisher ko Gil’ilungun Got ni kar pied e report ko machib u nap’an e 1996. Maku 366,579 e pi walag nib biech ni pumoon nge ppin e kar uned ko taufe. Ri gad ma chaariy e “pi n’en ney nib fel’ ni yib u fithik’ e pi nam,” ma yad be ‘n’igin nge par e naun rok Jehovah nib rir’!​—Haggai 2:7.

11. Mang fan ni gad gubin ma bay tapgin ni ngad falfalan’gad?

¹¹ Ri yibe ngat ngay ko pi report ni be dag ni kari yoor iyan e machib ni yibe tay u lan e pi binaw ni ka fin pithig e thin ngorad ko machib. Ma gad ba awan’ ko Pi Mich u yu yang nem ni bochan ni yad be yoor iyan fa? Danga’ ya gad ma falfalan’ ngay. Tabolngin e machib u urngin e binaw ma ba achig. Immoy Zekariah ni profet u nap’an Haggai me yoloy ni gaar: “Mini’ e en ni ke dariy fannag e tin ba achig ban’en?” (Zekariah 4:10) Gad ba falfalan’ ni boor e binaw ni ke n’uw nap’an boch e machib ni kan tay riy ma bay bokum milyon e publisher ko Gil’ilungun Got riy, ma yibe sul ko territory ni boor yay, ma boch e mach nib baga’ e gubin e wik ma yibe sul ko taab territory. Ere bay tapgin ni ngad sagaalgad ko ngiyal’ ney ni be pithig Jehovah e kanawo’ ko girdi’ u lan e pi binaw ni dan machib riy faram fa? Ri danga! I gaar Jesus, “Fare gi milay’ e aram e fayleng.” (Matthew 13:38) Thingarni machibnag urngin e girdi’, ni bod rogon ni rin’ e tin som’on i gachalpen Jesus ko ngiyal’ ni tungun fare m’ag ko piyu Jew.​—Acts 2:40; 10:42; 20:24; 28:23.

Nguun Yan Nga M’on

12. Mang e be k’aringad “nga darod ma dabda chelgad u luwdad”?

¹² Arrogon, thingarda pared ni gad be yan u taabang ko karro rok Jehovah u tharmiy ni pi engel e be girngiy, ma nga darod “ma dabda chelgad u luwdad.” (Ezekiel 1:12) Thingarda tedan’dad ko n’en ni yog Peter ni gaar: “Daworiy sowath Jehovah ni nge rin’ e tin ni ke yog nra rin’, ni bod rogon ni be lemnag boch e girdi’. Ya be gum’an’nag ir u puluwmed, ni fan e dabun ni nge n’ag be’, ya ba adag ni nge urngin e girdi’ mi yad pi’ keru’rad ko urngin e denen ni yad be rin’.” (2 Peter 3:9) Ere nge k’aringdad e passig ni be tay e pi walagdad ko pi binaw nib gafgow. Faanra be m’ug riy ni ke sagaal e ngiyal’ nra yib Armageddon ma aram bochan ni yibe pag ni ngan kunuy bokum biyu’ e girdi’ ko pi binaw ney nge boor e girdi’ ni bay ko pi territory ni yima machib riy u gubin ngiyal’. Dariy e maruwar riy: “Ke chugur iyib e rran rok Jehovah. Kari chugur ni nge yib ma yibe gurnag ni nge taw.” (Zefaniah 1:14) Ku arrogon gadad e susun ni ngad gurgad ni ngad machibnaged urngin e girdi’!

13, 14. (a) Mang e rayog ni ngan nog u morngaagen e pi babbyor ni kan wereg u nap’an e 1996? (b) Mang e rayog ni nge rin’ e pi ulung u gubin e duw, ma mang e ga ra rin’ ni ngam un ngay?

¹³ Fare report ni service chart e der weliy urngin ban’en ma kari ga’ rogon ni ke yoor oren e Bible nge babyor nge magazine ni kan wereg fa binem e duw. Susun, ke mun 19-percent oren e magazine ni kan wereg ko girdi’, ma aram e ke gaman 543,667,923 ni gubin. Pi magazine rodad e ba puluw ko urngin mit e machib​—ni machib u kanawo’, nge gin ni ma tal e bus riy, nge yu yang ni bay e business riy. Kan reportnag ni boch e territory ni yibe machib riy ni boor yay ma girdi’ ni ta fol nchuway’ e yad ba adag e pi magazine rodad ya fel’ yaan mab fel’ rogon ni kan fl’eg e thin ni bay riy, ma boor iyad e ba adag e study.

¹⁴ Nap’an e pul ni April u gubin e duw ma ma yarmiy e pi ulung ni ngan wereg e pi magazine ni mus rogon, ma ran dugliy reb e rran ni ngan yan u mit e tabinaw iyan nge gubin yang ni bay e girdi’ riy min wereg e magazine ni kakadabul nge mada’ ko balayal’. Ra un e ulung romed ko re n’ey u nap’an e April ko 1997 fa? Kan fl’eg rogon boch e magazine ni rib manigil, ma dabi siy ni yira gin ngay ni yibe wereg e re ke babyor ney ni taab ken u gubin yang u fayleng ntaab yay! U lan e donguch ni Cyprus ma pi ulung e ur feked e re thin ney ni gaar, “ngan weliy e thin ko Gil’ilungun Got ngak gubin e girdi’,” ma gubin e pul ma kar yarmiyed e ngiyal’ ni ngan wereg e pi magazine, ma aram e ke gaman 275,359 ni kar wereged ni aram 54-percent ni ke mun.

Bin Tomur e Thin Rok Haggai

15. (a) Mang fan ni ki pi’ Jehovah boch e thin u daken Haggai? (b) Susun ni mang e gad be fil ko fa bin dalip e thin ni yog Haggai?

¹⁵ Ke yan 63 e rran u tomren ni ke weliy Haggai e bin l’agruw e thin, me l’og Jehovah ni nge weliy e bin dalip ni aram e thin ni fel’ ni ngad tedan’dad ngay ko ngiyal’ ney. I non Haggai ni ba dake ni be ngongliy piyu Jew e def ko fare tempel, ni aram e n’en ni kan rin’ 17 e duw faram. Ma biyay ma ke fel’ u wan’ Jehovah ni nge biechnag ban’en. Ya pi prist nge girdi’ e dar tedan’rad ko tin nib mil fan ngorad ni ngar rin’ed: ere yad ba alit u p’eowchen Jehovah. Rayog ni nge aw ni aram rogon boch e girdi’ ku Jehovah ko ngiyal’ ney ni dar rin’ed e tin nib mil fan ngorad, ma boch iyad e be un ko pi n’en ko fayleng ni ngongol nib pag rogon nge chogowen e chugum fa? Ri baga’ fan ni gad gubin e ngad tedan’dad “ko rorran ney iyan ngaram” ni ngad feked iyib e rir ko ngochol rok Jehovah, ma ngari mich u wan’dad ko thin ni yog ni gaar: “Ka rofen ney ma gu ra pi’ e flaab.”​—Haggai 2:10-19; Hebrews 6:11, 12.

16. Be mang fare “rurug” ni kari chugur iyib, ma mang wenegan riy?

¹⁶ Ka rofen nem ma ke weliy “Jehovah ko pi salthaw” e thin ku Haggai ni aram e yayn aningeg nge yayn tomur. Ke tamilangnag ko uw rogon ni ra “rurug e tharmiy nge fayleng” me gaar: “Gu ra gothey tagil’ e pi nam ma gu ra thang gelngin e gagiyeg ko pi nam; ma gu ra chuweg e pi karro ni yima girngiy e os nge girdi’ riy, ma pi walagrad e ra be’ me li’ be’ ko sayden rok nge fapi os nge piin ni bay u daken.” (Haggai 2:6, 21, 22, NW) Ma ngari gel ni yira “rurug” u nap’an ni ra biechnag Jehovah e fayleng ni ke mus rogon u nap’an Armageddon. Ma aram ma “pi n’en nib fel’ u fithik’ e pi nam” e goo kar bad, ni yad kenggin e girdi’ ni ra par u lan e bin nib biech e fayleng. Aram tapgin ni ngan falfalan’ min nog e sorok ku Jehovah!​—Haggai 2:7; Revelation 19:6, 7; 21:1-4.

17. Uw rogon ni kan tay Jesus ni ir e “luwow ni hang”?

¹⁷ Tin tomur e thin ni i yiiynag Haggai e ke gaar: “Begaar Jehovah ko pi salthaw, ‘Rofen nem ma gu ra fekem i gur Zerubbabel . . . ma gu ra dugliyem ni ga bod e luwow rog ni hang, ya gur e en ni kug mel’egem,’ aram e n’en ni yog Jehovah ko pi salthaw.” (Haggai 2:23) Chiney me Jesus Kristus e ir e Pilung ni Messiah ni ke dugliy Jehovah maku ir e Prist nib Tolang, ma aram e ke fek e liw ku Zerubbabel ni Governor nge Joshua ni Prist nib Tolang ni ur moyew ko gal liw nem u fayleng u Jerusalem. Ma Jesus e bod e luwow ni hang ni bay u ba’ ni mat’aw i pa’ Jehovah, ya ir e en ni ke mang “Arrogon” ya u daken ma ke lebuguy Jehovah urngin e “tin ni ke yog ni bayi rin’” riy. (2 Korinth 1:20; Efesus 3:10, 11; Revelation 19:10) Urngin e thin ni kan yiiynag u lan e Bible e ma sor fan ko uw rogon ni ra tay Jehovah Kristus ni ir e Pilung nge Ta Biyul’ ni prist.​—John 18:37; 1 Peter 1:18, 19.

18. Uw rogon nra lebug e tin tomur e thin ni “begaar Jehovah ko pi salthaw”?

¹⁸ Rriyul’ ni ngiyal’ ney ma gin th’abi rir e aram e tempel nib spiritual rok Jehovah! Ma dabki n’uw nap’an ma ra thang Jehovah urngin ban’en nib l’ag ko m’ag rok Satan ma aram ma ku ra lebug e thin ko Haggai 2:9 ni begaar: “Begaar Jehovah ko pi salthaw, ‘Gu ra pi’ e gapas ko gin ney.’” Ra magay e gapas!​—aram e gapas u gangin e palpal th’ib ma ra par ndariy n’umngin nap’an, ya kan micheg ko fare “luwow ni hang” rok Jehovah ni aram Jesus Kristus ni ir fare “Pilung ko Gapas” ma kan weliy morngaagen ni gaar: “Gelngin nib pilung e bay i ga’ iyan; gin ni bayi gagiyeg riy e yugu bayi par u fithik’ e gapas . . . I Jehovah ko pi salthaw e ke turguy ni nge rin’ urngin e pi n’ey.” (Isaiah 9:6, 7) Rogon ni ra par tafen e liyor ku Jehovah nib rir e ra tamilang iyan u gangin e gin nsuwon ndariy n’umngin nap’an. Ere nguud pared u lan e re naun nem!​—Psalm 27:4; 65:4; 84:10.

[Boch e Thin nra Tamilangnag Murung’agen]

Rayog ni Ngam Weliy?

◻ Uw rogon ni ‘kari gel rogon e rir’ ko naun rok Jehovah ko ngiyal’ ney?

◻ Mang fan ni kari ga’ fan ko ngiyal’ ney ni ngan machibnag fare thin nib fel’?

◻ Mang e bay ko fare 1996 Service Year Report ni be k’aringad ngad uned ko machib ni mus rogodad riy?

◻ Uw rogon ma Kristus e ir fare “luwow ko hang” rok Jehovah?

[Chart ko page 16-19]

1996 SERVICE YEAR REPORT OF JEHOVAH’S WITNESSES WORLDWIDE

(Mu guy e re ke babyor ney)

[Sasing ko page 14, 15]

Yibe kunuy e “pi n’en nib fel’ u fithik’ e pi nam” u Pi Donguch u Maday (1), South America (2), Africa (3), Asia (4), North America (5), nge Europe (6)