Mang E Ba Th’abi Ga’ Fan Ko Yafas Rom?

“Mu tamilangnagan’ug ko uw rogon ni susun nggu wan.”​—PSALM 143:8, New World Translation.

1. Mang e yog Solomon ni Pilung u morngaagen e pi n’en ni ma lek e girdi’ nge tin ni yad ma rin’?

GOO ga manang ni bay boor ban’en ni ngan rin’ ma boor ban’en ni ngan lemnag ko par. Ma nap’an ni ngam fl’eg i lemnag e re n’em ma rayog ni ngam turguy e tin nib baga’ fan ko pi n’en nem. Ma bay boch ban’en ni gathi ri baga’ fan ya m’ay fan. Faanra ga manang e re n’ey ma aram e bpuluw e lem rom ku be’ ni ir e girdi’ nth’abi gonop, ni Solomon ni Pilung. I fl’eg i lemnag ko uw rogon e pi n’en ni yima rin’ ko par, me gaar: “Nguum par ni ba’ madgun Got u wan’um ma ga be fol ko thin rok, ya kari mus fan ni sunumiy Got e girdi’.” (Eklesiastes 2:4-9, 11; 12:13) Mang fan e re n’ey ngodad ko ngiyal’ ney?

2. Mang deer ni susun ni ngan fith ko piin ni bay madgun Got u wan’rad, maku mang boch ban’en nib l’ag ngay?

² Faanra ga ba adag ni “nguum par ni ba’ madgun Got u wan’um ma ga be fol ko thin rok,” me ere mu fithem ko re deer ney: ‘Mang e ba th’abi ga’ fan ko yafas rog?’ Rriyul’ ni gathi gubin e rran ma ngu um lemnag e re deer nem, machane mang fan ni baga’ fan ni ngan lemnag e chiney? Ma ka bay boch e deer nib l’ag ngay ni bod e tin baaray ni, ‘Gu be ga’nag fan e maruwel rog fa chugum fa? Uw fene ga’ fan u wan’ug e tabinaw rog, nge girdi’ rog, nge piin nib t’uf rog?’ Ma be’ nib fel’ yangaren e rayog ni nge lemnag e re deer ney ko ‘Uw fene gel rogon ni gu be tiyan’ug ko skul nge tayim ni gu be fanay riy? Fa n’en th’abi ga’ fan u wan’ug e aram reb e hobby fa gosgos fa fafel fa ban’en nib l’ag ko technology fa?’ Demtrug yangardad fa salpdad ma susun ni ngad fithed gadad ko ‘Uw rogon e pigpig ku Got ko yafas rodad?’ Dabi siy ni ga ra yog ni ba t’uf ni ngan turguy ko mang e ngan mon’eg. Me ere uw rogon nge u uw e bay e ayuw riy ni ngad turguyed e re n’em u fithik’ e gonop?

3. Mang e ba l’ag ngay ko piin Kristiano ni ngar turguyed e pi n’en ni ngar mon’eged?

³ Fare bugithin ni “th’abi ga’ fan” e ma sor fan ko ban’en ni ke m’on ko urngin e tin ka bay ban’en fa ban’en nib t’uf ni ngan lemnag ko som’on. Demtrug ko gur reb e Pi Mich Rok Jehovah fa gur bagayad fa bokum milyon e piin nib yul’yul’ ni be fil e Thin Rok Got ni be un ngorad, ma ngam lemnag e re thin riyul’ ney: “Urngin ban’en ni ma yib u roy u fayleng e ma yib ko ngiyal’ ni ke dugliy Got.” (Eklesiastes 3:1) Ma re n’em e ba muun ngay ni ngan dag e t’ufeg ko girdien e tabinaw. (Kolose 3:18-21) Ma n’en nib l’ag ngay e ngan un ko maruwel ni fan ni ngan ayuweg e tabinaw. (2 Thessalonika 3:10-12; 1 Timothy 5:8) Ma rayog ni ngan un ko bin ri ga ba adag e hobby fa fafel fa gosgos. (Mu taarebnag ko Mark 6:31.) Machane ngam lemnag ma ga ra nang u wan’um ni pi n’en nem e gathi aram e n’en nth’abi ga’ fan ko yafas fa? Ka bay ban’en ni kab baga’ fan.

4. Uw rogon ni ma sor fan e thin ni bay ko Filippi 1:9, 10 ko pi n’en ni ngad turguyed ni ngad mon’eged?

⁴ Dabi siy ni ga manang ni thin ko Bible e ri baga’ fan ni ngan ayuwegey ni ngan turguy boch ban’en u fithik’ e gonop min turguy e n’en ni ngan mon’eg. U Filippi 1:9, 10 ma yibe pining e piin Kristiano ni ngar “nanged e bin riyul’ i fan e thin rok Got nge yog ni ngam nanged e tin nib mat’aw ko tin nde mat’aw.” Ko mang fan? Ki yog apostal Paul ni gaar: “Nge yog ni ngam mel’eged e tin ni ir e ba th’abi ga’ fan.” Ba tamilang e re n’em fa? Ya u daken e nangan’ nib puluw ma rayog ni nge turguy e Kristiano ko mang e susun ni nge mon’eg ko yafas rok​—ni n’en th’abi ga’ fan.

Kan Dag Rogon ko Mang e Ba Th’abi Ga’ Fan

5. Rogon ni kan dag ko pi Kristiano ma uw rogon ni be dag e Thin Rok Got ko mang e ba th’abi ga’ fan ko yafas ku Jesus?

⁵ Ke tamilangnag apostal Peter ban’en nib baga’ fan ni gaar: “Ereray e re n’en ni ir e ke piningmed Got ngay; yi Kristus e ir e gafgow ni bochmed me dag ngomed rogon ni ngam folwokgad rok, ni aram e nguum leked luwan ay.” (1 Peter 2:21) Arrogon, faanra gad ra yaliy ko uw rogon u wan’ Jesus Kristus e re n’em ma aram e rayog ni ngad nanged ko mang e ba th’abi ga’ fan ko yafas. Kan yiiynag u morngaagen u Psalm 40:8 ni gaar: “Got rog, ri gub adag ni nggu rin’ e tin nib m’agan’um ngay! Thin rom e be par u fithik’ i lanin’ug.” Ma aram rogon ni ke yog ni gaar: “Ggan rog e nggu fol ko tin ni be finey e en ni l’ugeg ku gub, ma nggu mu’nag e maruwel ni ke pi’ ngog ni nggu muruwliy.”​—John 4:34; Hebrews 12:2.

6. Uw rogon nrayog ni nge yib angin ngodad ni bod rogon Jesus ni bochan ke mon’eg e tin nib m’agan’ Got ngay?

⁶ Ere fare n’en nth’abi ga’ fan riy e​—ngan rin’ e tin nib m’agan’ Got ngay. Kanawo’ ni tay Jesus e ma tamilangnag ko pi gachalpen ko mang e susun e ba th’abi ga’ fan ko yafas rorad, ya ke yog ni “gubin e girdi’ ni yibe sukulnagrad nrogon e faanra mu’nag bagayad e sukul ni yibe tay ngak, ma aram e ke bod rogon e cha’ ni ir e be sukulnag.” (Luke 6:40, NW) Ma nap’an ni ke fol Jesus ko kanawo’ nib m’agan’ e Chitamangin ngay ma ke dag ni yira “suguyey ko falfalan’” nfaanra ngan mon’eg e tin nib m’agan Got ngay. (Psalm 16:11, NW; Acts 2:28) Ga manang fan e re n’em fa? Faanra turguy pi gachalpen Jesus ni ngar ted ni tin nib m’agan’ Got ngay e ba th’abi ga’ fan ko yafas rorad ma aram e yad ra “sug ko falfalan’” mi yad un ko bin riyul’ e yafas. (1 Timothy 6:19) Ere ku aram fan ni ngad ted ni ngan rin’ e tin nib m’agan’ Got ngay e ba th’abi ga’ fan ko yafas rodad.

7, 8. Mang boch e gafgow ni yib ngak Jesus ma mang e rayog ni ngad filed ko re n’ey?

⁷ Chingiyal’ nem ni ke dag Jesus ni ke ognag ir ni nge rin’ e tin nib m’agan Got ngay, ma ke guy rogon fare Moonyan’ ni nge pingeg. Uw rogon? Ke wawliy ko dalip ban’en. Ma rab yay me fulweg Jesus ko Thin Rok Got me par nib mudugil. (Matthew 4:1-10) Machane ka bay boch e gafgow ni kii yib ngak​—ni togopuluw, nge moning, ma Judas e ra yognag, nge mu’ min thang e fan rok u daken baley i ren. Machane dariy reb e pi n’ey e ke n’igin e en Fak Got nib yul’yul’ ni nge thiliyeg e kanawo’ rok. Nap’an e ngiyal’ ni rib baga’ fan me meybil ni gaar: “Gathi tin ni gub adag e ngam rin’, ya tin ni gab adag . . . Mu rin’ e tin nib m’agan’um ngay.” (Matthew 26:39, 42) Susun ni ra bagadad e ngari mithmithegdad e kanawo’ ni kan dag rogon ngodad ma aram ma “nguuda meybilgad ni gubin ngiyal’” fa?​—Roma 12:12, NW.

⁸ Arrogon, ayuw nu tharmiy e ra ayuwegdad ngad turguyed ko mang e gad ra mon’eg ma ri aram rogon nfaanra be magawonnagdad e piin ni yad e toogor ko thin nriyul’ nge piin tatogopuluw ko tin nib m’agan Got ngay. Ngam lemnag David ni Pilung nib yul’yul’ ni ke ning e ayuw rok Got u nap’an ni kan togopuluw ngak. Aram e n’en ni gad ra guy ko Psalm 143. Re n’ey e susun nge ayuwegdad ngad nanged ko uw rogon nrayog ni ngad gelnaged thildad Jehovah ma nge mudugilan’dad nguuda mon’eged e tin nib m’agan’ ngay ko yafas rodad.

Ma Rung’ag Jehovah e Meybil Rodad Ma Ma Fulweg Taban

9. (a) Yugu aram rogon ni David e ir be’ ni ma denen machane mang e be dag ko thin rok nge ngongol rok? (b) Mang fan ni susun ndabda paged ni dabkuuda rin’ed e tin mat’aw ban’en?

⁹ David e girdi’ ni ma denen, machane ke mich u wan’ ni ra motoyil Jehovah ko wenig ni be tay ngak. I sobut’an’ me wenig ni gaar: “Am motoyil ko meybil rog, O Jehovah; ma ga tay telim ko n’en ni gu be ning. Mu yul’yul’ ngog ma ga fulweg taban rogon nib mat’aw. Ma dab mu pufthinnag e tapigpig rom; ya dariy be’ nib fas ni rayog ni nge sak’iy u p’eowchem ma ga yog nib mat’aw.” (Psalm 143:1, 2, NW) Kari nang David ni ir be’ nde flont, machane ke yul’yul’ ku Got u polo’ i laniyan’. Ere ke mich u wan’ ni ran fulweg taban e meybil rok rogon nib mat’aw. Re n’ey e be pi’ e athamgil nga lanin’dad fa? Yugu aram rogon ni dabiyog ni ngad pared nib mat’aw rogon ni ba adag Got machane rayog ni nge mich u wan’dad ni ma motoyil ngodad nfaanra gad ba yul’yul’ ngak u polo’ i lanin’dad. (Eklesiastes 7:20; 1 John 5:14) Thingar uda meybilgad u gubin ngiyal’ maku thingarda “ngongliyed e ngongol nib fel’ ngad gelgad ngak e kireb” ko ngiyal’ ney nib kireb.​—Roma 12:20, 21; James 4:7.

10. Mang fan ni yu ngiyal’ ni ke magafan’ David?

¹⁰ Immoy e pi toogor rok David, ma ku arrogodad. Bay yu ngiyal’ ni ke par David ni kari maga’fan’ u nap’an ni be mil rok Saul ma be par ko yu gin ni dariy be’ riy, ma nap’an ni ir e pilung ma pi toogor rok e yad be magawonnag. I weliy ko uw rogon e pi n’ey u wan’ ni gaar: “Fare toogor e ke lekeg . . . Ke n’igin nggu par ko yu gin nib talumor . . . Ma ke chugur ni nge m’ay gelngig; u fithik’ag ma bod ni ke gamig gumercha’eg.” (Psalm 143:3, 4, NW) Ku aram rogom yu ngiyal’ fa?

11. Mang boch ban’en ni ke yib ko pi tapigpig rok Got ko ngiyal’ ney ni ke k’aring e maga’fan’ ngorad?

¹¹ Boch e girdi’ rok Got e ma lemnag yu ngiyal’ ni ra m’ay gelngirad ni bochan e towasar ko pi toogor rorad, fa bochan ni yad ba magawon ko par, fa bochan e m’ar fa yugu boch e magawon. Ma yu ngiyal’ ma bod ni ke gamig gumercha’rad. Mar tolulgad ni lungurad: “Kam pag ni nge yib e gafgow nge magawon ngog, me ere ngam pi’ gelngig biyay . . . Ngam liyegeg ma ga ayuweg lanin’ug.” (Psalm 71:20, 21, NW) Uw rogon ni kan ayuwegrad?

Rogon ni Ngan Gel ko Togopuluw ko Pi Toogor

12. Uw rogon ni ke par David nib mudugil u fithik’ e riya’ nge gafgow?

¹² Psalm 143:5 e ma weliy ko mang e rin’ David u nap’an ni bay ko riya’ nge magawon ni gaar: “Kug lemnag mornaagen e ngiyal’ nkakrom; mu gu fl’eg i lemnag urngin ban’en ni kam ngongliy; mu gu par ni kar gu be lemnag e pi n’en ni kam fl’eg u paam.” I lemnag David u morngaagen rogon ni ayuweg Got e pi tapigpig Rok nge rogon ni kan ayuweg faram. I fl’eg i lemnag u morngaagen e pi n’en ni rin’ Jehovah ni fan ko ngochol Rok. Arrogon, i athamgil David ni nge par ni gubin ngiyal’ ma be lemnag e pi n’en ni ngongliy Got.

13. Nap’an ni ke yib e gafgow ngodad ma uw rogon nrayog ni ngad k’adedan’dad riy nfaanra gad ra lemnag morngaagen e pi tapigpig rok Got nib yul’yul’ kakrom nge ngiyal’ ney?

¹³ Boor yay ni kad sulod nga daken e pi n’en ni rin’ Got ni fan ko girdi’ rok fa? Dabi siy! Re n’ey e ba muun ngay e thin u morngaagen e ‘pi mich ni yad bod e manileng ni baga’’ ko ngiyal’ u m’on ko Kristiano. (Hebrews 11:32-38; 12:1, NW) Kan pining e pi Kristiano ni kan dugliyrad u nap’an e bin som’on e chibog ni “nguura lemnaged rarogorad ko tin baaram e rran ni ke yan nga tomur” nge pi n’en ni kar k’adedanrad riy. (Hebrews 10:32-34, NW) Ma uw rogon e pi n’en ni be buch ko pi tapigpig rok Got ko ngiyal’ ney ni bod e pi n’en ni kan weliy ko fare babyor ni Jehovah’s Witnesses​—Proclaimers of God’s Kingdom?a Pi n’en ni be weliy ko re ke babyor nem nge yugu boch e babyor e ma ayuwegdad ngad lemnaged ko uw rogon ni ke ayuweg Jehovah e girdi’ rok ngar athamgilgad u nap’an ni kan taleg e machib, ma nap’an ni kan kalbusnagrad, ma nap’an ni kan wadmang ngorad, nge nap’an ni kan nin’rad ko gin ni kan nog e concentration camp ngay mar manged sib. Boor e magawon ni keb ngorad ko pi binaw ni kan mahl riy ni bod u Liberia, nge Burundi, nge Rwanda, nge fa gin ni Yugoslavia faram fithingan. Nap’an ni ke yib e togopuluw ma ke k’adan’ e pi tapigpig rok Got ma kari fel’ thilrad Jehovah. Pa’ Jehovah e ke ayuweg e piin ni ur ted ni tin nib m’agan ngay e ba th’abi ga’ fan ko yafas rorad.

14. (a) Mini’ reb e girdi’ ni ke ayuweg Got ko reb e magawon ni rayog ni nge aw ni aram rogodad? (b) Mang e ga be fil ko re n’em?

¹⁴ Machane sana ga ra fulweg ni dam un ko gafgow ni aram rogon fene gel, ma sana dab kaa yib ngom. Machane gathi ke mus ni ma ayuweg Got e girdi’ rok ko pi n’en nib lingagil. Ya boor yay ni ke ayuweg e girdi’ ko pi n’en ni gathi ri ba “mit rogon.” Susun: Kam poy fa gi sasing ni bay u lang fa, ma ma ayuwegem ngam lemnag u morngaagen rogon ni ma ayuweg Got e girdi’ rok fa? Kan tay u lan fare The Watchtower ko December 1, 1996. Kam poy fare thin u morngaagen Penelope Makris fa? Faanra dawor, mang ni dab mu bieg? Rayog ni nge yib ngan’um ko uw rogon ni ke k’adan’ ni bochan e piin ni yad ba bugli yoror, nge rogon ni ke cham ko boch e m’ar nib ubchiya nge athamgil ni ke tay ni ngki un ko pioneer fa? Ma uw rogon e n’en ni rin’ u Mytilene ni kari manigil? Ere ga ma nang fan ni pi thin ni aram rogon e fan ni ngan ayuwegdad ngad nanged ko mang e ngad mon’eged ko yafas rodad ni aram e tin nib m’agan’ Got ngay fa?

15. Mang boch ban’en ni rin’ Jehovah ni susun ni ngad fl’eged i lemnag?

¹⁵ Ra gelnagdad ni ngad boded David ma ngad fl’eged i lemnag morngaagen e pi n’en ni ke ngongliy. Be lebuguy Jehovah e tin nib m’agan’ ngay u daken e yam’ ni tay Fak, min faseg ko yam’, min tay nib rir. (1 Timothy 3:16) Ke dugliy Gil’ilungun u tharmiy, ma ke chuweg Satan nge pi moonyan’ rok riy, ma ke sulweg nga rogon e bin riyul’ e liyor u roy u fayleng. (Revelation 12:7-12) Ke fl’eg e paradis nib spiritual ma ke flaabnag e girdi’ rok kar yoorgad. (Isaiah 35:1-10; 60:22) Ma girdi’ rok e be micheg u morngaagen ko ngiyal’ ko tomur u m’on nra tabab fare gafgow nib baga’. (Revelation 14:6, 7) Arrogon, bay boor ban’en ni rayog ni ngad fl’eged i lemnag u morngaagen.

16. Susun ngad lemnaged e mang ma aram ma ra mich u wan’dad ko mang?

¹⁶ Faanra nguuda lemnaged morngaagen e pi n’en ni ke ngongliy Got u pa’ ma gathi ngad lemnaged morngaagen e pi n’en ni ma rin’ e girdi’ ma aram e dabda paged talin fene gel gelngin Jehovah. Machane gathi ke mus ni ke sunumiy e pi n’en u tharmiy ngu fayleng. (Job 37:14; Psalm 19:1; 104:24) Ya pi n’en ni i ngongliy e ba muun ngay rogon ni ke thapeg e girdi’ rok u fithik’ e pi toogor rorad, ni bod rogon ni buch ko girdi’ rok kakrom.​—Exodus 14:31; 15:6.

Ngan Nang Rogon ni Ngan Yan

17. Uw fene riyul’ Jehovah u wan’ David ma uw rogon ni yibe fl’eg lanin’dad ni bochan?

¹⁷ I yibilay David e ayuw ya ke chugur ni nge milik e ran ko yafas u fithik’ i dow me gaar: “Kug k’iyag paag ngom; ma yaal rog e bod e binaw ni der tugul ban’en riy. O Jehovah, mu gurnigem ma ga fulweg taban ngog. Ke chugur ni nge m’ay gelngig. Dab kum mithag owchem rog, ya faanra er rogon ma gu ra bod e piin ni kar ranod ko low ko yam’.” (Psalm 143:6, 7, NW) Ku arrogodad ma yu ngiyal’ e gad ma lemnag ni kad wargad ko tirok Got ban’en. Machane dawori math e liyab ngodad. Ya ma rung’ag Jehovah e meybil rodad, ma rayog ni nge ayuwegdad u daken e piin piilal, nge boch e thin ni bay ko fare The Watchtower, fa u daken e thin ni kan weliy ko muulung ni be m’ug riy ni kan pi’ ni fan ngodad.​—Isaiah 32:1, 2.

18, 19. (a) Susun mang e ngad yibilayed ku Jehovah? (b) Mang e rayog ni ngari michan’dad ngay?

¹⁸ Ke pagan’dad ku Jehovah ere gad ma wenig ngak ni lungudad: “Mu n’igin ni nggu rung’ag e thin rom nib gol ma ma t’ufegey, ya ke pagan’ug ngom. Mu tamilangnag ngog ko uw rogon ni nggu wan.” (Psalm 143:8) Ma ke mulan’ Sister Makris ni bochan ni de ayuweg u nap’an ni ke par ko reb e donguch u Greece ni goo ir fa? Ere dabi ayuwegem nfaanra ga ra mon’eg e tin nib m’agan’ ngay ko yafas rom fa? Ba adag fare Moonyan’ nge piin ni bay rok ni ngar magawonnaged gadad fa ngar taleged e maruwel rodad ndabkuuda wereged e thin u morngaagen Gil’ilungun Got. Yug demtrug ko gad be par u lan e binaw ni rayog ni ngan un ko bin riyul’ e liyor nib puf rogon fa gad bay ko gin ni yibe gay rogon ni ngan taleg e machib rodad riy, machane gad ma yibil u taabang nib puluw ko n’en ni yibilay David ni gaar: “O Jehovah, mu thapegneg u fithik’ e pi toogor rog. Kug naf ngom ya gur e manab.” (Psalm 143:9, NW) Gad ra par nib gel ko tirok Got ban’en nfaanra gad ra par ko gin nib mith ko fa An Th’abi Tolang.​—Psalm 91:1.

¹⁹ Rogon ni kari mudugilan’dad ko mang e ba th’abi ga’ fan e bay fan. (Roma 12:1, 2) Ere dab mu pag e fayleng nge gagiyegnagem ko mang e be lemnag ni ba th’abi ga’ fan u wan’ e girdi’. Nguum par ni gubin ban’en ko yafas rom e be dag e n’en ni ba th’abi ga’ fan​—ni aram e ngan rin’ e tin nib m’agan’ Got ngay.​—Matthew 6:10; 7:21.

20. (a) Mang e kad filed u morngaagen David u Psalm 143:1-9? (b) Uw rogon ni ma dag e pi Kristiano ko ngiyal’ ney ni taareb rogorad David?

²⁰ Fa mereb e verse ni aram e tin som’on ko Psalm 143 e ma tamilangnag rogon ni kari fel’ thilin David nge Jehovah. Nap’an ni ke yib e pi toogor rok mu ur liyeged, ma de tel ni nge ning e ayuw rok Got. Ke weliy e n’en ni bay u gumercha’en me ning e ayuw ni nge nang ko uw rogon ni nge yan u rogon nib mat’aw. Ku aram rogon e ngiyal’ ney ni ka bay e girdi’ ni kan dugliyrad u fayleng nge piin ni ma un ngorad. Rib baga’ fan u wan’rad rogon thilrad Jehovah u nap’an ni yad be ning ni nge pow’iyrad. Yad ma mon’eg e tin m’agan’ Got ngay, ni yugu aram rogon ni be magawonnagrad fare Moonyan’ nge fayleng.

21. Mang fan nib baga’ fan ni ngad ngongolgad nib puluw ko n’en ni gad be fil ngak yugu girdi’ u morngaagen e n’en ni susun ni ba th’abi ga’ fan ko yafas rorad?

²¹ Bay bokum milyon e girdi’ ni yad be fil e Bible ko Pi Mich Rok Jehovah ma ba t’uf ni ngar nanged ni n’en ni ba th’abi ga’ fan e ngan rin’ e tin nib m’agan’ Got ngay. Rayog ni ngad ayuweged yad ngar nanged fan e re n’ey u nap’an ni gad ra fil ngorad guruy ni 13 ko fare babyor ni Knowledge That Leads to Everlasting Life, ya ma tamilangnag e pi n’en nib l’ag ngay ni ngan maruweliy e Thin Rok Got.b Maku susun ni yad ra guy ni gad be fol ko n’en ni gad be fil ngorad. Ma tomren ba ngiyal’ nib ngoch ma ku yad e yad ra nang ko uw rogon ni susun ni ngar ranod riy. Nap’an ni ra tamilang u wan’ e pi girdi’ ney ni yad bokum milyon ko mang e susun ni ngar mon’eged ko yafas rorad, ma aram e boor i yad e yad ra ognagrad ku Got mara uned ko taufe. Nge mu’ ma ra ayuwegrad fare ulung ni nguur ranod ko kanawoen e yafas.

22. Mang boch e deer e yira weliy u lan e bin migid e thin?

²² Boor e girdi’ e ra yog ni susun ni ngar mon’eged e tin nib m’agan’ Got ngay ko yafas rorad. Machane uw rogon ni be fil iyan Jehovah ko pi tapigpig rok ni nguur rin’ed e tin nib m’agan’ ngay? Ma mang angin ni ra yib ngorad? Ran weliy e fulweg ko pi deer ney ko bin migid e thin ma ran weliy e thin nib baga’ fan ko Psalm 143:10.

[Boch e Thin nra Tamilangnag Murung’agens]

Mang e Fulweg Rom?

◻ Uw rogon ni ngad dugliyed e pi n’en ni gad ra mon’eg nib puluw ko Filippi 1:9, 10?

◻ Uw rogon ni dag Jesus ko mang e ba th’abi ga’ fan ko yafas rok?

◻ Nap’an ni ke yib e gafgow ngodad ma mang e rayog ni ngad filed ko pi n’en ni rin’ David?

◻ Uw rogon ni ma ayuwegdad ko ngiyal’ ney e pi thin ko Psalm 143:1-9?

◻ Susun mang e ngad ted ni th’abi ga’ fan ko yafas rodad?

[Sasing ko page 22]

Ngongol rok David e ke micheg ni ke taga’ nga daken Jehovah

[Credit Line]

Reproduced from Illustrite Pracht-Bibel/​Heilige Schrift des Alten und Neuen Testaments, nach der deutschen Uebersetzung D. Martin Luther’s