Yafas Rom​—Ri Mand Fan?

“Kug par ni gu be pow’iy gumerchaeg u fithik’ e gonop . . . nge yan i mada’ ko ngiyal’ ni kug nang ko be mang felngin e piin ni pi fak e girdi’ . . . u n’umngin nap’an e yafas rorad.”​—EKLESIASTES 2:3.

1, 2. Mang fan ni dariy e kireb riy ni ngam lemnagem?

GA ma tiyan’um ngom fa? Ya aram rogon gubin e girdi’. Ere gubin e rran ma gad ma abich, ma gad ma mol ko ngiyal’ ni ke yib e chuchuw ngodad, ma gad ba adag ni ngad chaggad e pi fager rodad nge piin nib t’uf rodad. Yu ngiyal’ ma gad ma un ko gosgos, nge nong, fa yugu boch ban’en ni gad ma falfalan’ ngay, ya aram rogon nib fel’ ni ngad tedan’dad ngodad.

² Ra tiyan’ be’ ngak e bpuluw ko n’en ni thagthagnag Got nga laniyan’ Solomon ni nge yoloy ni gaar: “Dakuriy ban’en nib kab fel’ ni nge rin’ e girdi’ ko bin ni nge abich ma nge garbod, me rin’ e tin nib fel’ ko yaal rok ya aram angin e maruwel nib gel.” Ma bochan ni un Solomon ko pi n’en ney miki gaar: “Ku arrogon e re n’ey ni kug guy, ni mus ni gag e kug guy, ni ereray e n’en ni yib u pa’ fa bin riyul’ e Got. Ya mini’ e en ni kab fel’ rogon ngog ko abich nge garbod ni ma tay?”​—Eklesiastes 2:24, 25.

3. Mang boch e deer ni baga’ ni de nang e girdi’ e fulweg riy?

³ Machane goo ga manang ni yafas e gathi ke mus ni ngan abich nge garbod, nge mol, ma ngan rin’ boch ban’en nib fel’. Ya gad ma amith ko boch ban’en, ma yu ngiyal’ ma ma mulan’dad u ban’en, ma gad ma maga’fan nga boch ban’en. Ma be m’ug riy ni kayigi yoor pa’ u puluwdad me ere dariy e tayim ni ngad fl’eged i lemnag ko ri mang fan e yafas rodad. Aram rogom fa? Vermont Royster, ni ir e editor faram ko fare shimbung ni The Wall Street Journal, e ke weliy u morngaagen e mon’og ni tay e girdi’ ko llowan’ nge pi n’en ni yad ma ngongliy me yoloy ni gaar: “Baaray ban’en nib mit rogon. Nap’an ni gad ra lemnag salpen e girdi’ nge pi magawon rodad, nge rogon tagil’dad u palpal th’ib, ma ke mus ni boch uw e mon’og ni kad ted ko ngiyal’ ni baaram ni sum e yafas. Ya ka daworda nanged ko ri gad mini’ ma mang fan ni gad bay ma dad nanged e gin ni gad be sor iyan ngay.”

4. Mang fan ni susun ra bagadad e ba adag ni nge pi’ e fulweg ko pi deer ni gad ba l’ag ngay?

⁴ Uw rogon ni ngam fulweg e pi deer ney ni: Ri gad mini’? Mang fan ni gad bay? Gad be sor iyan ngan? Yim’ Mr. Royster fa binem e duw ko July. Ga be lemnag ni ke pirieg e fulweg ko pi deer nem me pufan’ ngay? Ma ra diin ma ga nang? Ma uw rogon nra ayuwegem ngam par nib falfalan’ ko yafas rom ma bay fan? Ngada guyed.

Tapgin e Tamilangan’uy nib Baga’ Fan

5. Mang fan ni susun ni ngad sapgad ku Got nge tamilangnagan’dad ko pi deer u morngaagen e yafas?

⁵ Faan manga ra bagadad ma ir rok ni nge gay ko mang fan e yafas rok, ma sana dabki pat ngay, ya baga’ ni aram rogon e piin ni pumoon nge piin ni ppin ni ur gayed, ni mus ko piin nib tolang e skul rorad. Machane gathi kan digeydad. Ya Ani Sunumiydad e ke pi’ e ayuw ngodad. Ngam mu lemnag ma gathi ir Tapgin e Tamilangan’uy nge Gonop, ya ra par “ndabi math biid” ma kari mus rogon e tamilangan’ u morngaagen chepin e palpal th’ib? (Psalm 90:1, 2) Ir e sunumiy e girdi’ ma ke guy urngin ban’en ni ur rin’ed, me ere ir fa En ni susun ni ngad sapgad ngak ni nge tamilangnagan’dad, ma gathi girdi’ nde flont ya llowan’ rorad nge gonop rorad e bay e gin ni ma mus riy.​—Psalm 14:1-3; Roma 3:10-12.

6. (a) Uw rogon ni ke pi’ e Ani Sunumiydad e tamilangan’ ngodad? (b) Uw rogon nib l’ag Solomon ngay?

⁶ Dabda lemnaged ni An Sunumegdad e ra kathkath nga lan teldad me yog ngodad ko ri mang fan e yafas, ya ke pi’ ban’en ni tapgin e tamilangan’​—ni aram e Thin Rok ni ke thagthagnag. (Psalm 32:8; 111:10) Fare babyor ko Eklesiastes e ri baga’ fan ko re n’ey. I thagthagnag Got nga laniyan’ e en ni ke yoloy me ere ke yan i aw ni “Gonop rok Solomon e kab gel nga urngin e gonop ko piin ni yad e Oriental.” (1 Kings 3:6-12; 4:30-34) Yib reb e pilung ni nge guy e “gonop rok Solomon” ma kari ngat ngay me yog ni tin ni ke rung’ag e de gaman e baley riy ma rib falfalan’ e piin ni yad be rung’ag e thin rok nib gonop.a (1 Kings 10:4-8) Ku arrogon gadad e ra yog e tamilangan’ ngodad nge falfalan’ ni yib ko gonop rok e An Sunumiydad ni ke thagthagnag nga laniyan’ Solomon.

7. (a) Mang e yog Solomon u morngaagen e pi n’en ni yibe rin’ u tan e tharmiy? (b) Mang e be tamilangnag fene riyul’ e n’en ni yog Solomon?

⁷ Gonop rok Got e bay ko Eklesiastes, ma aram e ke gagiyegnag gumerchaen Solomon nge man’ey rok. Bay e tayim rok Solomon nge urngin ban’en nib t’uf rok, nge gonop ni nge yog ni nge yaliy “urngin ban’en ni kan rin’ u tan e tharmiy.” Ma ke guy ni urngin ban’en e “mm’ay fan ma gowa yibe lol’og e nifeng ni ngan kol,” ma aram e thin ni kan thagthagnag nga laniyan’ ma susun ndabda paged talin u nap’an ni gad be fl’eg i lemnag ko ri mang fan e yafas rodad. (Eklesiastes 1:13, 14, 16) Rib tamilang rogon ni weliy e pi thin nem mab riyul’. Susun, mu lemnag e pi thin ni yog u Eklesiastes 1:15, 18. Goo ga manang nu lan in e chibog e ke fl’eg e girdi’ boor mit e am, ma yu ngiyal’ ma yad ba yul’yul’ ni yad ba adag ni ngar pithiged e pi magawon ko girdi’ me ayuwegrad ko par rorad. Machane bay reb e am ni ke yal’uweg urngin ban’en nib “leplep” ko re m’ag ney nde flont? Ma sana kam nang ni rogon fene yoor e tamilangan’ ku be’ ma aram meri tamilang u wan’ ni dabiyog ni ngan yal’uweg urngin ban’en nib fel’ rogon ya kayigi ngoch nap’an e par ko girdi’. Re tamilangan’ nem e ma k’aring e kankanan’ ko girdi’, machane gathi aram rogodad.

8. Mang boch e cycle ni immoy nkakrom iyib ngaray?

⁸ Ku ban’en ni ngan lemnag e pi cycle ni ma sor fan ngodad, ni bod rogon ni ma yib e yal’ me aw nge rogon ni ma yan e nifeng nge ran. Immoy e pi n’em u nap’an Moses, nge Solomon, nge Napoléon, nge girdi’ rodad kakrom. Ma ka be ulul iyan e pi n’en nem. Ku aram rogon ni “be chuw reb e mfen me yib reb.” (Eklesiastes 1:4-7) U p’eowchen e girdi’ ma ri buch uw ban’en ni ke thil. Ya girdi’ nkakrom nge girdi’ ko ngiyal’ ney ma taareb rogon e tin ni yad ma rin’, nge taareb rogon e tin ni yad ma athapeg, nge taareb e tin ni yad ma nameg, nge rogon e tin ni yad ma lubeg. Ni mus ni ke lingagil be’ ni bochan yaan fa rarogon, ma ba uw e cha’ nem e chiney? Dakuriy ma sana goo kan pag talin. Ma pi thin nem e gathi yigoo tin nib tagan ni yibe yog. Ya rriyul’ ni baga’ ni de nang e girdi’ fithingan e girdi’ rorad kakrom fa dabiyog ni ngan nog e gin ni kan gargelnagrad riy nge gin ni kan k’eyagrad riy. Ere ba tamilang ko mang fan ni yog Solomon nib mm’ay fan e pi n’en ni ma ngongliy e girdi’ nge pi n’en ni yad ma athamgiliy.​—Eklesiastes 1:9-11.

9. Mang angin nra yib ngodad nfaanra ke tamilang u wan’dad salpen e girdi’?

⁹ Dabi chalbadad ko pi thin ney ya aram e tamilangan’ rok Got u morngaagen salpen e girdi’ ma rayog ni nge yib angin ngodad riy me n’igin ni ngad siyeged i nameg ara da leked boch ban’en ni dabi n’uw nap’an me m’ay min pag talin. Re tamilangan’ ney rok Got e susun ni nge ayuwegdad ngad gonopiyed ko mang angin ni be yib ngodad ko yafas rodad, ma be mang e gad be athamgiliy. Ere dabda pared ni bod e ascetics ya rayog ni ngad falfalan’gad ko abich nge garbod nde pag rogon. (Eklesiastes 2:24) Ma gad ra guy ni tin tomur e thin ni yog Solomon e ffel’ ni ma pi’ e athap ko girdi’. Ya be weliy ni susun ni ngad ted fan rogon thildad e Ani Sunumiydad, ya ir e rayog ni nge ayuwegdad ngad pared ndariy n’umngin nap’an u fithik’ e falfalan’ ma bay fan e par rodad. Gaar Solomon: “Tungun e re babyor ney e be fonownag e girdi’ ni be gaar: Nguum par ni ba’ madgun Got u wan’um ma ga be fol ko thin rok, ya kari mus fan ni sunumiy Got e girdi’.”​—Eklesiastes 12:13.

Susun ko Mang Fan e Yafas Rodad ni Bochan e Pi Cycles ko Yafas

10. Uw rogon ni taarebnag Solomon e gamanman nge girdi’?

¹⁰ Pi thin nib gonop ni bay ko Eklesiastes e rayog ni nge ayuwegdad ngad fl’eged i lemnag ko mang fan ni gad bay. Uw rogon? Ya ke tamilangnag Solomon boch e tin nib riyul’ ni gathi ri gad ma lemnag morngaagen. Ma reb e morngaagen e girdi’ nge gamanman ni taareb rogorad. I taarebnag Jesus pi gachalpen ko saf, machane gathi ri ba adag e girdi’ ni nga un taarebnagrad ko gamanman. (John 10:11-16) Machane ke weliy Solomon boch e thin nib riyul’ ni gaar: “Fa bin riyul’ e Got e be sikengnag e girdi’ ni nge dag ngorad ni yad bod e gamanman. Ya taareb rogon e n’en ni nge yib ngak e girdi’ nge gamanman. Ya yad ra yim’ ni yad gubin; . . . Girdi’ e gathi ba fel’ rogon boch rok e gamanman, ya gubin ban’en ko biney e tamilang e mm’ay fan. . . . Bay ra sulod ngar ngal’gad ni fiyath ya ra sumgad ko fiyath.”​—Eklesiastes 3:18-20.

11. (a) Uw rogon e cycle ko yafas rok e gamanman? (b) Uw rogon e re n’em u wan’um?

¹¹ Mu lemnag ba mit e gamanman ni kam falfalan’ ni ngam yaliy, ni sana reb e rock badger ara usangi. (Deuteronomy 14:7; Psalm 104:18; Proverbs 30:26) Fa sana ga ba adag e squirrel; ma bay 300 mit e pi gamanman ney u gangin e fayleng. Ma uw rogon e cycle ko yafas rorad? Tomren nni gargeleg, ma ra unum e thuth ko chitingin in e wik n’umngin nap’an. Ma dabki n’uw nap’an me sum bunuen ma rayog ni nge chuw u tafen ngi i yanyan. Sana ga ra guy ni be fil rogon ni nge gayiy e ggan. Ma baga’ ni yigoo fafel ni be tay, ya kab bitir, ma ke falfalan’ ngay. Ma tomren reb e duw nge boch ma ra gayiy e an leengin. Ma aram ma thingari fl’eg tafen me ayuweg e bitir rorow. Ma faanra yira pirieg e waamangin e berry, nge kel, nge awoch nib gaman ma ra fel’ rogon e tabinaw ko re squirrel nem ma rayog ni nge ga’ e tabinaw rorad. Machane boch e duw nga m’on ma ra pillibthir e re gamanman nem ma rayog ni nge maadad ara m’ar. Ma sogonapan ragag e duw rok ma ra yim’. Urngin mit e squirrel ma aram rogon ma ke mus ni boch uw ban’en nib thil u thilrad, me ere aram e cycle ko yafas rorad.

12. (a) Mang fan ni taareb rogon e cycle ko yafas ko girdi’ nge gamanman? (b) Mang e rayog ni ngad lemnaged ko yay ni migid ni gad ra guy reb e gamanman?

¹² Baga’ ni dabi kireban’ e girdi’ ko re cycle nem ko gamanman, ma da ur lemnaged ni pi squirrel nem e ma lemnag ko mang fan e yafas rorad. Machane yafas ko girdi’ e gathi rib thil nga orel ko re n’em fa? Ya yibe gargelnagrad min ayuwegrad u nap’an ni ka yad bitir. Ma yad ma abich, ma yad ma ilal iyan, ma yad ma fafel. Ma nap’an ni kar ilalgad, mi yad gayiy e en leengirad ara figirngirad ma yad ma gayiy e gin ni ngar pared riy nge rogon ni nge yog e ggan ngorad. Ma faanra ke yog e pi n’en nem ngorad ma ra fel’ rogorad ma sana yad ra ga’nag taferad ni nge yog ni ngar chuguliyed e bitir rorad riy. Machane pi duw nem e ma yan nib pay, ma yad ma ilal iyan. Ma sana yad ra yim’ u tomren 70 ara 80 e duw yangarad fa boch u m’on riy ma pi duw nem e “be fek i yib ngorad e magafan’ nge gafgow.” (Psalm 90:9, 10, 12) Mu lemnag e pi n’en ney ko yay ni migid ni ga ra guy reb e squirrel (ara yugu reb e gamanman).

13. Mang e tomur riy ko yafas ko gamanman nge girdi’?

¹³ Aram fan ni taarebnag Solomon e yafas ko girdi’ nge gamanman. Ke yoloy ni gaar: “Urngin ban’en e ma yib ko ngiyal’ ni kan dugliy, . . . ba ngalan’ e gargel nge ngal’an e yam’.” Ma yam’ e aram ban’en ntaareb rogon ko girdi’ nge gamanman, “ya yad ra yim’ ni yad gubin.” Miki gaar: “Bay ra sulod ngar ngal’gad ni fiyath ya ra sumgad ko fiyath.”​—Eklesiastes 3:1, 2, 19, 20.

14. Mang boch ban’en ni ma rin’ e girdi’ ni ngar thiliyeged e cycle ko yafas ma mang angin ni yib riy?

¹⁴ Dabi mulan’dad ko pi n’en ney nib riyul’. Ya rriyul’ ni boch e girdi’ e ma guy rogon ni ngar thiliyeged rarogorad, ya boch e girdi’ e ma un ko maruwel nib elmirin ni nge fel’ boch rogorad ko gallabthir rorad. Ma sana yad ra un ko skul nib tolang u lan in e duw ni nge yog ni ngar uned ko par nib fel’ rogon mi yad guy rogon ni nge tamilangan’rad ko mang fan e yafas. Fa boch e girdi’ e ma un ko exercise ara diet ni nge fel’ fithik’ i dowrad mara pared nib n’uw boch nap’an. Ma sana ra yib angin e pi n’en ney. Machane mini’ e kari mudugil ni manang ko ra yib angin riy? Mus ni ra yib angin riy machane uw n’umngin nap’an nra par?

15. Mang e rayog ni ngan nog nib puluw u morngaagen e yafas ko girdi’?

¹⁵ I fith Solomon ni gaar: “Bochan ni bay boor ban’en nib m’ay fan, mang e ra fel’ rogon be’ riy? Ere mini’ ni ba’ ni manang ko mang e ba fel’ ko yafas rok be’ ko pi rran nib m’ay fan e yafas rok u napan ni ke fanay ni bod fon ban’en? Ere mini’ e rayog ni nge yog ko mang e ra buch ngak be’ u tomren?” (Eklesiastes 6:11, 12) Yam’ e ma m’aynag e athamgil ni be tay be’, me ere uw rogon nib fel’ boch ni nge athamgil ni nge yog e chugum ni boor ngak fa nge un ko skul nib n’uw nap’an ni nge yog e fel’ rogon ngak? Ma rib ngoch n’umngin nap’an e yafas ni bod fon ban’en ni be yan, me ere boor e girdi’ e ke tamilangan’rad ni dariy e tayim ni ngar thiliyeged e n’en ni yad be athamgiliy nga yugu ban’en u nap’an ni kar nanged ndabi yib angin e n’en ni yad be rin’; maku dabiyog ni nge pagan’ be’ ko ra uw rogon e bitir rok u “tomren ni ke chuw rorad.”

Ke Taw ko Ngiyal’ ni Ngan Ngongliy e Ngochol nib Fel’ u Thim

16. (a) Mang e susun ni ngad rin’ed ni dabiyog ni nge rin’ e gamanman? (b) Ku mang thin riyul’ e susun ni bay rogon ko lem rodad?

¹⁶ Gathi bod e gamanman ya girdi’ e rayog ni ngar fl’eged i lemnag ko ‘Be mang fan ni gu bay? Kari mus aram e cycle nib mudugil ma bay ngalan’ ni nga un gargel nge ngalan’ ni nga un nim’?’ Mu lemnag e thin nriyul’ ni yog Solomon u morngaagen e re n’em ko girdi’ nge gamanman: “Bay ra sulod ngar ngal’gad ni fiyath.” Ere ra yim’ be’ ma aram ma kari m’ay e yafas rok fa? Be yog e Bible ni girdi’ e dariy e yaal rorad ndabi yim’ ni ma chuw ko dogur me par nib fas. Ya girdi’ e yad e yaal, ma yaal nra denen e aram e cha’ ni nge yim’. (Ezekiel 18:4, 20) Ki weliy Solomon ni gaar: “Piin ni kab fas e yad manang ni yad ra yim’; machane piin ni kar m’ad e dariy e chi n’en ni yad manang, ku dariy e tow’ath rorad; ya kan pag tilrad. Yugu demtrug e n’en nra pat paam ngay ni ngam rin’ ma ga rin’ ma ngam rin’ u gelngim; ya dariy e maruwel, dariy e tafinay, dariy e llowan’; dariy e gonop u lan e low ko yam’ ni aram e gini ga ra yan ngay.”​—Eklesiastes 9:5, 10.

17. Pi thin ko Eklesiastes 7:1, 2 e ra k’aringdad ngad fl’eged i lemnag e mang?

¹⁷ Ere bochan ndabiyog ni ngan siyeg e re n’em ma ga lemnag e re thin ni baaray: “Ba ngochol nib fel’ e kab fel’ ko tin nib fel’ e gapgep, ma ngiyal’ ko yam’ e kab fel’ ko ngiyal’ ni gargelnigey riy. Kab fel’ ni ngan yan ko naun ko dololoy ko bin ngan yan ko naun ko mur, ni bochan e ereray e tomur ko girdi’ ma be’ nib fas e thingari tay nga gumerchaen.” (Eklesiastes 7:1, 2) Rriyul’ ni yam’ aram “tomren urngin e girdi’.” Dariy be’ ni ke yog ni nge unum e falay, fa nge kay mit e vitamin, fa nge kay mit e ggan, fa nge un nga boch e exercise me yog e yafas ni manemus ngak. Ma baga’ ni “kan pag tilrad” nde n’uw nap’an u tomren ni kar m’ad. Ere mang fan ni “ba ngochol nib fel’ e kab fel’ ko gapgep nib fel’, ma ngiyal’ ko yam’ e kab fel’ ko ngiyal’ ni gargelnigey riy”?

18. Mang fan ni ngari mich u wan’dad ni ke pagan’ Solomon ni ran faseg e yam’?

¹⁸ Ke weliy Solomon e thin nib riyul’ mab puf rogon. Ma i nang u morngaagen e pi girdi’ rok nkakrom ni chon Abraham, nge Isaak, nge Jakob, ya ke fel’ e ngochol rorad u wan’ e An Sunumiydad. Kari fel’ thilrow Abraham me ere ke micheg Jehovah Got ngak ni ra flaabnag nge piin ni owchen. (Genesis 18:18, 19; 22:17) Arrogon, ke fel’ e ngochol rok Abraham u wan’ Got, me mang fager rok. (2 Kronicles 20:7; Isaiah 41:8; James 2:23) I nang Abraham u wan’ ni yafas rok nge yafas ku fak e gathi ke mus ni ba cycle ko gargel nge yam’ ma dabi mus. Ya bay boor ban’en nib l’ag ngay. Ya kan micheg ni yad ra par nib fas biyay ni gathi bay e yaal rorad ndabi yim’ ya bochan ni yira fasegrad ko yam’. Kari mich u wan’ Abraham ni “rayog rok Got ni nge faseg Isak ko yam’.”​—Hebrews 11:17-19.

19. Mang e gad be fil u morngaagen Job ni be tamilangnag fan fare thin ko Eklesiastes 7:1?

¹⁹ Aram rogon ni nge tamilangan’uy ko mang fan ni “ba ngochol e kab fel’ ko gapgep nib fel’, ma ngiyal’ ko yam’ e kab fel’ ko ngiyal’ ni gargelnigey riy.” Bod Job ma i mich u wan’ Solomon i fa En ni ke sunumiy e yafas ko girdi’ e ku rayog ni nge sulweg e yafas. Rayog rok ni nge faseg e girdi’ ni kar m’ad. (Job 14:7-14) I par Job nib yul’yul’ me gaar: “Ga [Jehovah] ra piningeg ma ri gu ra fulweg. Ya tin ni kam maruweliy u paam e ri ga ra adag.” (Job 14:15, NW) Mu lemnag e re n’em! “Ri ba adag” e En sumumiydad e pi tapigpig rok ni kar m’ad. (“Ga ra adag ni ngam guy biyay e tin ni kam sunumiy.”​—The Jerusalem Bible.) Fa En Tasunumiy urngin ban’en e ra faseg e girdi’ ko yam’ u daken e maligach ni biyul’ ni pi’ Jesus Kristus. (John 3:16; Acts 24:15) Ere ba tamilang ni ba thil e girdi’ ko gamanman u nap’an nra yim’.

20. (a) Uw rogon ni rofen ni yim’ be’ e kab fel’ ko rofen ni kan gargelnag? (b) Mang angin ni yib ko girdi’ ya kar guyed Lazarus ni kan faseg ko yam’?

²⁰ Ere rayog ni nge aw ni rofen ni yim’ be’ e kab fel’ ko rofen ni kan gargelnag nfaanra ke ngongliy e ngongol nib fel’ u wan’ Jehovah, ya rayog ni nge faseg e piin nib yul’yul’ ni kar m’ad. Jesus Kristus ni ir fa bin ni Baga’ e Solomon, e ke micheg e re n’em. Ya ke faseg Lazarus ko yam’ ni ir be’ nib yul’yul’. (Luke 11:31; John 11:1-44) Boor e piin ni kar guyed Lazarus ni kan faseg ko yam’ e ke mich u wan’rad e en ni Fak Got. (John 11:45) Ga be lemnag ni dariy ban’en ni ke m’agan’rad ngay ko yafas rorad, ma dar nanged ko yad mini’ nge gin ni yad be sor iyan ngay fa? Danga’ ya kar guyed ni de t’uf ni ngar boded e gamanman ni goo yibe gargelnagrad, mi yad par nib fas nib ngoch nap’an, nge mu’ mi yad yim’. Ya fan e yafas rorad e ba l’ag ko tamilangan’ u morngaagen Chitamangin Jesus min rin’ e tin nib m’agan’ ngay. Me gur? Ke ayuwegnem e pi thin ney ni nge tamilang u wan’um ko uw rogon ni nge yog ngom ma nge yib fan e yafas rom?

21. Ku mang e gad ra weliy nra ayuwegdad ni bay fan e yafas rodad?

²¹ Machane ra nge yog ni ngam par ni bay fan e yafas rom, ma gathi ke mus ni ngan lemnag u morngaagen e yam’ nge fas ko yam’ u tomren. Ya ba muun ngay e n’en ni gad be rin’ ko yafas rodad u gubin e rran. I tamilangnag Solomon e re n’em u Eklesiastes, ma aram e n’en ni gad ra weliy u lan e bin migid e article.

[Boch e Thin nra Tamilangnag Murung’agen]

Ka Ga Manang?

◻ Mang reb e kanawo’ nrayog ni ngan taareb rogonnag e gamanman nge girdi’ riy?

◻ Mang fan ni yam’ e be tamilangnag nib m’ay fan e pi n’en ni ma rin’ e girdi’?

◻ Uw rogon ni nge aw ni ngiyal’ ko yam’ e kab fel’ ko ngiyal’ ni gargelnigey riy?

◻ Nge yib fan e yafas rodad e ma tor nga daken rogon thildad mini’?

[Sasing ko page 22]

Uw rogon nib thil e yafas rom ko yafas ko gamanman?