“Kari Mus Fan Ni Sunumiy Got E Girdi”

“Nguum par ni ba’ madgun Got u wan’um ma ga be fol ko thin rok. Ya kari mus fan ni sunumiy Got e girdi’.”​—EKLESIASTES 12:13.

1, 2. Mang fan ni bpuluw ni ngad lemnaged e n’en nib t’uf ni ngad rin’ed ku Got?

“BE mang e be ning Jehovah chilen ngomed?” Aram e deer ni fith reb e profet nkakrom. Nge mu’ me weliy ko mang e ba t’uf ku Jehovah ni ngad rin’ed ni​—ngad rin’ed e tin nib yal’uw, ma ngad golgad ngak e girdi’, ma nguud folgad rok Got u fithik’ e sobut’an’.​—Mikah 6:8.

² Rogon e lem ko ngiyal’ ney ma ra be’ ma ir rok ma ma rin’ e tin ni ba adag, ere de fel’ u wan’ boor e girdi’ ni bay ban’en nib t’uf ku Got ni ngad rin’ed. Dubrad ni ngan nog ni thingara rin’ed ban’en. Machane uw rogon e tin tomur e thin ni yog Solomon u Eklesiastes? “Tungun e re babyor ney e be fonownag e girdi’ ni be gaar: Nguum par ni ba’ madgun Got u wan’um ma ga be fol ko thin rok, ya kari mus fan ni sunumiy Got e girdi’.”​—Eklesiastes 12:13.

3. Mang fan ni ngad lemnaged e babyor ni Eklesiastes?

³ Demtrug ko uw rarogodad nge uw rogon e lem rodad ma rayog ni nge yib angin ngodad nfaanra gad ra fl’eg i lemnag e pi thin nem. Ke yoloy Solomon ni Pilung e re babyor nem, me weliy morngaagen e pi n’en nib l’ag ko yafas rodad u reb e rran nge reb. Boch e girdi’ e ra lemnag ni n’en ni yog u tungun e de fel’. Machane kan thagthagnag nga laniyan’ Solomon ma rayog ni nge ayuwegdad ngad lemnaged e pi n’en ni gad ma rin’ nge pi n’en nib ga’ fan u wan’dad, ma rayog ni nge yoor e falfalan’ rodad.

Ngan Lubeg e Tin nib Baga’ Fan ko Par

4. Mang e fl’eg Solomon i yaliy me weliy morngaagen u Eklesiastes?

⁴ I fl’eg Solomon i yaliy ‘e pi n’en ni be rin’ e piin ni fak e girdi’.’ “Kug tay gumerchaeg ni nggu gayiy mu gu fl’eg i yaliy e gonop ni bay ko urngin ban’en ni kan rin’ u tan e tharmiy.” Fare thin ni “pi n’en ni yibe rin’” ni yog Solomon e gathi ke mus ni maruwel, ara employment, ya ba muun ngay urngin ban’en ni ma rin’ e piin pumoon nge piin ppin u n’umngin nap’an e yafas rorad. (Eklesiastes 1:13) Ngad lemnaged boch ban’en nib baga’ fan riy, ara boch ban’en ni yima rin’, nge mu’ ma gad taarebnag e tin ni gad ma rin’ nge tin ni baga’ fan u wan’dad.

5. Mang ban’en ni ri ma tiyan’ e girdi’ ngay?

⁵ Dabi siy ni salpiy e aram kenggin boor ban’en ni ma lemnag ma ma rin’ e girdi’. Gathi de ga’ fan e salpiy u wan’ Solomon ni bod boch e girdi’ ni bay boor e salpiy rorad. Ya ke yog ni salpiy e ba t’uf; ya kab fel’ ni ngan par ni bay e salpiy ko bin ni ngan par ndariy ban’en fa yibe gafgow. (Eklesiastes 7:11, 12) Machane sana kam guy ni salpiy nge tin nrayog ni ngan chuw’iy e kari mus ni aram e n’en ni ma nameg boch e girdi’​—ni piin nib gafgow nge piin nib fel’ rogon.

6. Mang e rayog ni ngad filed u morngaagen e salpiy ko reb e fanathin rok Jesus nge pi n’en ni rin’ Solomon?

⁶ Mu lemnag fare fanathin ku Jesus u morngaagen fare moon nib fel’ rogon ni de gaman u wan’ e tin ni bay rok me athamgil nge yoor e chugum rok. I pufthinnag Got e cha’ nem ni ir be’ nib balyang. Mang fan? Ya ‘bin riyul’ e yafas ku be’ e gathi ni ngongliy ko pi n’en ni ir e mmil suwon ngak faanem.’ (Luke 12:15-21) Pi n’en ni un Solomon ngay​—ni kab boor ko pi n’en ni kad uned ngay​—e ma micheg e thin rok Jesus. Mu bieg e thin ni bay ko Eklesiastes 2:4-9. I par Solomon ba ngiyal’ ni be athamgil nge yoor e chugum rok. I toy boch e naun nib fel’ nge boch e milay’ nib fel’ yaan. Ir be’ nib fel’ rogon me ere rayog ni nge fek boch e ppin nib pidorang. Ere ke falfalan’ ko pi n’en ney ma bay fan e yafas rok ni bochan ni boor e chugum rok ma boor ban’en nrayog rok fa? I fulweg ni gaar: “Mus ni gag e kug sap ko urngin ban’en ni kug ngongliy u paag nge urngin e maruwel ni kug tay nib elmirin, ma urngin ban’en ma goo m’ay fan ma bod ni yibe lek e nifeng ni ngan kol, ma dariy ban’en nib fel’ u tan e yal’.”​—Eklesiastes 2:11; 4:8.

7. (a) Mang e kan micheg u morngaagen e salpiy nge rogon fene ga’ fan? (b) Mang e kam guy ni be micheg e n’en ni yog Solomon?

⁷ Aram e thin riyul’ ni kan micheg ko yafas ko girdi’. Ya salpiy ni boor e dabi pithig urngin e magawon. Rayog ni nge pithig boch, ya ma yognag e ggan nge mad. Machane ke mus ntaareb e mad e rayog ni nge chuw be’ ngay u taab ngiyal’ ma mmutrug oren e ggan ni nge kay be’ nge garbod ni nge unum. Ma sana kam bieg boch e babyor ni be weliy ni boor e piin nib fel’ rogon e yad ba magawon ya ke dar e mabgol rorad, fa yad ba magawon ko muun rrum nib pag rogon, ara drug abuse, mab kireb thilin girdien e tabinaw rorad. Yog be’ ni multimillionaire ni J.P. Getty ni gaar: “Salpiy e de m’ag ko falfalan’. Ma sana ba l’ag ko kireban’.” Bpuluw e n’en ni yog Solomon ni nga un t’ufeg e silber e aram ban’en nib m’ay fan. Re n’ey e ba math keru’ ko ban’en ni guy Solomon me gaar: “Rib fel’ rogon e mol ni ma tay e en ni ir e tapigpig ndemtrug ko buch uw fa boor e ggan ni ma kay; machane urngin e chugum rok be’ nib fel’ rogon e dabi pag ni nge mol.”​—Eklesiastes 5:10-12.

8. Mang fan ndabni ga’ nag fan e salpiy u wan’uy?

⁸ Salpiy nge chugum e dabi fl’eg lanin’uy ko gabul nge langleth. Faanra ke yoor e salpiy nge chugum rom ma dabi siy ni ra maga’fan’um ngay ni ngam ayuweg, ma ku ka ga ra par ndam mu nang ko mang e ra buch gabul. Rayog ni nge aw ni ra thay u paam urngin e salpiy nge chugum rom nge yafas rom fa? (Eklesiastes 5:13-17; 9:11, 12) Ere susun nde mo’maw ni nge tamilang u wan’dad ni gathi ke mus ni salpiy nge chugum e susun ni ngad nameged ko yafas rodad nge tin ni gad ma rin’.

Tabinaw, nge Sorok, nge Ga’ Lunguy

9. Mang fan ni bpuluw ni nge weliy Solomon u morngaagen e par u tabinaw?

⁹ Ki fl’eg i yaliy Solomon rogon e par ko tabinaw ni bay ko yafas ko girdi’. Be weliy e Bible morngaagen e par ko tabinaw ma bay e falfalan’ riy ko chugul bitir. (Genesis 2:22-24; Psalm 127:3-5; Proverbs 5:15, 18-20; 6:20; Mark 10:6-9; Efesus 5:22-33) Machane kari mus aram e n’en nib baga’ fan ko yafas? Aram rogon ni ma lemnag boor e girdi’ ya bay boor e binaw ni baga’ fan ko yalen rorad ni ngan un ko mabgol, min fakay e bitir, ma ngan ayuweg e tabinaw. Machane pi thin ko Eklesiastes 6:3 e be tamilangnag ni ran fakay raay e bitir ma gathi aram e n’en nra yibnag e falfalan’ ko yafas. Bay boor e piin gallabthir ni ur paged farad ni fan ko bitir rorad ni nge yog ni nge fel’ e par rorad me mom boch. Rib fel’ e re n’em, machane dabi siy ni de lemnag e Ani Sunumiydad ni kenggin e yafas rodad e kari mus ni ngad fl’eged rogon e bin migid e mfen, ni bod rogon ni ma rin’ e gamanman ko n’en ni kan tay ko man’ey rorad ni ngar rin’ed ni fan ni nge dabi m’ay urngin mit e gamanman.

10. Mang fan nib m’ay fan ni ngan lemnag e par u tabinaw nib mus rogoy riy?

¹⁰ I tamilangnag Solomon boch e thin riyul’ u morngaagen e par u tabinaw. Susun, sana be nameg reb e pumoon ni nge ayuweg e bitir rok nge bitir rorad ko tin nib t’uf rorad. Machane yad ra ngongol u fithik’ e gonop? Fa yad ra balyang mar adbeyed e tin ni ke athamgiliy ni nge yog ngorad? Faanra arrogon, ma aram ban’en nib “m’ay fan ma rib gel e gafgow riy”!​—Eklesiastes 2:18-21; 1 Kings 12:8; 2 Kronicles 12:1-4, 9.

11, 12. (a) Mang boch ban’en ni i mon’eg boch e girdi’ ko yafas rorad? (b) Mang fan nrayog ni ngan nog ni nga un athamgil nge yog e sorok ngom ma aram bod ni ga be “lol’og e nifeng ni ngam kol”?

¹¹ Ma ban’en nib palog nga orel ko re n’em e boch e girdi’ e kar mon’eged e sorok ni un nog ngorad fa rogon ni ra ga’ lungurad ko boch e girdi’ me tomur e tabinaw rorad u wan’rad. Baga’ ni aram rogon e piin pumoon. Kam guy e re n’ey ko piin ni gimed ma skul fa piin ni gimed ma maruwel u taabang, fa piin buguli yoror romed fa? Boor e girdi’ e ri yad ma athamgil ni ngan nog e sorok ngorad fa nge gilbuguwrad, fa nge ga’ lungurad ko yugu boch e girdi’. Machane ri bay fan e re n’ey ngodad fa?

¹² Mu lemnag e piin ni ur athamgilgad ni nge gilbuguwrad, ndemtrug ko tin ba achig fa tin ni baga’ ban’en. Gad ma guy e re ngongol ney u skul, ngu lan e binaw rodad, ngu lan boch e ulung ko girdi’. Ku aram ban’en ni ma k’aring e girdi’ ni ngar adaged ni ngar lingagilgad ko art, nge entertainment, nge politics. Machane gathi aram ban’en nib m’ay fan? Yog Solomon e thin nib puluw ngay ni bod ni “yibe lol’og e nifeng ni ngan kol.” (Eklesiastes 4:4) Mus nfaanra ke lingagil be’ ni fel’ yangaren ko reb e club ko skul, fa sports team, fa reb e ulung ni ma musik​—fa faanra ke lingagil reb e pumoon ara ppin ko company ara binaw rok​—ma ri in e girdi’ ni manang e re n’em? Ma manang e piin ni bay u ba’ nem e fayleng (fa mus ni girdi’ ko re nam nem) u morngaagen e cha’ nem fa? Fa yugu yad be un ko par rorad ma dariy e naab rorad u morngaagen e cha’ nem ni ke gil boch buguwan? Ku rayog ni ngan nog e re n’em u morngaagen e piin ni baga’ lungurad u tabon e maruwel fa u lan e mach, fa u lan reb e ulung.

13. (a) Uw rogon ni ma ayuwegdad e pi thin ko Eklesiastes 9:4, 5 nge puluw e lem rodad u morngaagen e athamgil ni yima tay ni ngan par nib gilbuguwan fa nge ga’ lunguy? (b) Mang boch e thin riyul’ nsusun ni ngad lemnaged nfaan mang kari mus ni biney e yafas e ba’? (Mu guy fare footnote.)

¹³ Ma mang wenegan riy ni ngan par nib lingagil ara baga’ lunguy? Nap’an ni be yan reb e mfen me yib reb, ma piin nib gilbuguwan fa baga’ lungurad e yad ma yim’ min pag tilrad. Aram rogon e piin ni ma toy ban’en, nge piin ni ma musik, nge piin ni ma art, nge piin ni social reformer nge yugu boch e girdi’. Urngin e pi maruwel nem ma in e girdi’ ni ga manang ni ur pared u thilin e pi duw ni 1700 nge 1800? Bpuluw e n’en ni yog Solomon u morngaagen e re n’em ni gaar: “Kab fel’ e pilis nib fas ko ba layon ni ke yim’. Ya piin ni kab fas e yad manang ni yad ra yim’; machane piin ni kar m’ad e dariy e chi n’en ni yad manang, . . . kan pag tilrad.” (Eklesiastes 9:4, 5) Ma faanra kari mus ni biney e tamilang e ba’ ma rriyul’ nib m’ay fan ni nge athamgil be’ riy nge gilbuguwan fa nge ga’ lungun.a

N’en ni Baga’ Fan u Wan’dad nge N’en nib Mil Fan Ngodad

14. Mang fan ni ra bagadad ma susun ni nge yib angin ngak ko pi thin ni bay ko Eklesiastes?

¹⁴ De yoor e thin ni weliy Solomon u morngaagen e pi n’en nib baga’ fan u wan’ e girdi’ nge pi n’en ni ma rin’ e girdi’ nge pi n’en ni yad ma nameg, nge pi n’en ni yad ma falfalan’ ngay. Machane ba gaman e tin ni ke yoloy morngaagen. Dabda lemnaged ni pi thin ko re ke babyor nem e ba kireb ya aram reb e babyor ko Bible ni Jehovah Got e ke thagthagnag ni fan ni nge yib angin ngodad riy. Rayog ni nge ayuwegdad nge yal’uw e lem rodad u morngaagen e yafas rodad nge n’en nib baga’ fan u wan’dad. (Eklesiastes 7:2; 2 Timothy 3:16, 17) Ri aram rogon ko tin tomur e thin ni yog Solomon ni Jehovah e thagthagnag nga laniyan’.

15, 16. (a) Uw rogon u wan’ Solomon e par nib falfalan’? (b) Mang e yog Solomon nib t’uf ni ngan par nib falfalan’ ko yafas?

¹⁵ Ban’en ni weliy Solomon morngagen ni boor yay e pi tapigpig ko fa bin riyul’ e Got e susun ni ngar falfalan’gad ko pi n’en ni yad ma rin’ u p’eowchen. “Kug nang ni n’en ni nge rin’ be’ e nge par nib felan’ me tiyan’ ko tin ni be rin’ u nap’an e ngiyal’ ni be par nib fas ko biney e tamilang; ma gadad gubin ndabi siy ni ngad abichgad ma gadad garbod nge felan’dad ko tin ni kad muruweliyed; ya pi n’ey ni gubin e taw’ath rok Got ngodad.” (Eklesiastes 2:24; 3:12, 13; 5:18; 8:15) Gathi be yog Solomon ni ngan un ko mur nib pag rogon; maku de yog ni ngan lemnag ni aray rogon ni ‘Marod nguud abichgad ma gadad be garbod, ya bayi gabul ma kad m’ad.’ (1 Korinth 15:14, 32-34) Ya ke yog ni susun ni ngad falfalan’gad ko pi n’en ni yugu yima rin’, ni bod rogon e abich nge garbod, u nap’an ni gad ma ‘rin’ e tin nib fel’ ban’en u n’umngin nap’an e yafas rodad.’ Re n’em e bpuluw ko ngan rin’ e tin nib m’agan’ e An Sunumiydad ngay, ni ir e ma turguy ko ri mang e tin nib fel’ ban’en.​—Psalm 25:8; Eklesiastes 9:1; Mark 10:17, 18; Roma 12:2.

¹⁶ Yoloy Solomon ni gaar: “Mmarod, mu ked e ggan romed u fithik’ e falfalan’ mi gimed garbod nib fel’ rogon u gumerchamed, ya ke felan’ e bin riyul’ e Got ko tin ni kam maruweliyed.” (Eklesiastes 9:7-9) Arrogon, be’ ni pumoon ara ppin ni be maruweliy e tin ni ma falan’nag Jehovah e ra falfalan’ ko yafas rok. Ere ba t’uf ni ngad lemnaged Got u gubin ngiyal’. Rib thil e re n’em ko girdi’ ni boor ni yad ma par u rogon e lem ko girdi’!

17, 18. (a) Uw rogon e par ko boch e girdi’ ni bochan e n’en ni kar nanged ko yafas? (b) Mang wenegan riy ni susun ndabda paged talin?

¹⁷ Yugu aram rogon ni bay boch e teliw ni ma machibnag morngaagen e par ko yugu reb e tamilang, machane boor e girdi’ e ma lemnag ni kari mus ni biney e tamilang e rayog ni nge p’agan’rad ngay. Sana kam guy boch iyad ni ur ngongolgad nrogon ni yog Solomon ni gaar: “Bochan ndan pi’ e gechig nib pay ko tin nib kireb ni rin’ be’ ma aram fan ni ke turguy e girdi’ u gumercha’rad ni ngar rin’ed e tin nib kireb ban’en.” (Eklesiastes 8:11) Mus ko piin ni gathi ri yad ma un ko ngongol nib kireb e yad ma dag ni kari mus ni biney e tamilang e baga’ fan u wan’rad. Ar fan ni kayigi pag rogon fene ga’ fan u wan’rad e salpiy nge chugum nge liw nib tolang nge rogon ni nge ga’ lungurad ko boch e girdi’, nge tabinaw, nge yugu boch ban’en. Ma aram gathi ke mus e n’en ni yog Solomon u morngaagen e re n’em. Ye gaar: “Yugu aram rogon ni be’ nib tadenen e be rin’ e tin nib kireb ni raay yay ma ka be ul’ul’ iyan nib n’uw nap’an ma be rin’ e tin ni ba adag, machane kug nang ni tomur riy ma ra yan i aw nib fel’ ko piin ni bay madgun fa bin riyul’ e Got u wan’rad, ya bay madgun u wan’rad. Machane dabi yan i aw nib fel’ ko piin nib kireb, ma dabi n’uw boch nap’an e par rorad ya ra bod fon ban’en ya dariy madgun Got u wan’rad.” (Eklesiastes 8:12, 13) Ke mich u wan’ Solomon ni ra yan i aw nib fel’ ngodad nfaanra bay ‘madgun fa bin riyul’ e Got u wan’dad.’ Uw fene fel’? Bay e fulweg riy ko tin ni ke taarebnag nib math keru’ reb nga reb. Rayog rok Jehovah ni nge ‘n’uwnag n’umngin nap’dad.’

¹⁸ Piin ni kab fel’ yangarad e susun ni ngar fl’eged i lemnag e re thin ney nib mmutrug ni ri ra yan i aw nib fel’ ngorad nfaanra bay madgun Got u wan’rad. Sana kam guy ni be’ ni th’abi pay ni ma mil ko sagreng e rayog ni nge dol’ me lus. Ma ba ulung i salthaw nib gel e rayog ni ngan gel ngorad mar wargad. Ma be’ nib salap ko shiyobay e rayog ni nge aw me gafgow ko par. Ma boor ban’en nde mudugil ko yafas nrayog ni nge maruwaran’uy ko yafas. Machane rayog ni ngari mich u wan’um ko re n’ey: Kanawo’ nth’abi gonop ma th’abi mudugil e ngam falfalan’ ko yafas rom u nap’an ni ga be rin’ e tin nib fel’ ban’en ma dab mu thum’ nga wuru’ e pi motochiyel rok Got nge tin nib m’agan’ ngay. (Eklesiastes 9:11) Re n’ey e ba muun ngay ni ngan fil e tin nib m’agan’ Got ngay ni bay ko Bible, ma ga ognagem ngak, ma ga un ko taufe ko Kristiano.​—Matthew 28:19, 20.

19. Mang e ma rin’ boch e fel’ yangaren ko yafas rorad, machane mang e bin th’abi gonop e kanawo’ ni ba’?

¹⁹ Ani Sunumiydad e dabi towasariy e piin fel’ yangarrad ara yugu boch e girdi’ ngar folgad ko thin rok. Rayog ni ngar mon’eged e skul rorad, ma boch iyad e ra un ko skul u lan in e duw mi yad fil boor e babyor ni bay e lem ko girdi’ riy. Re n’em e ra k’aring e kankanan’uy. Fa rayog ni ngar folgad ko n’en ni ba adag gumercharad ni ngar rin’ed ara ngar leked e tin ni be guy owcherad nib fel’ yaan. Aram e ra n’igin nge magawon lanin’uy, ma par ni aram rogon e ra yan i aw nib m’ay fan. (Eklesiastes 11:9–​12:12; 1 John 2:15-17) Ere ma pining Solomon ko piin fel’ yangaren​—ni aram ban’en ni susun ni ngad lemnaged ndemtrug ko uw yangardad, ni gaar: “Ere mu lemnag e en ni sunumiyem ko ngiyal’ ni ka gab pagel u m’on ndawor mu taw ko pi rran nge duw ni ka bay nga m’on ni bay mu taw ngay ma kam pillibthir, me lungum: ‘Ke chuwan’ug ko biney e tamilang.’”​—Eklesiastes 12:1.

20. Mang thin nib thabthabel ni aram kenggin e thin ko Eklesiastes?

²⁰ Ere mang e gad ra lemnag? Ma uw rogon e tin tomur e thin ni yog Solomon? Ke guy fa ke yaliy “urngin ban’en ni yima rin’ u tan e yal’, ma gubin ban’en ma goo m’ay fan ma bod ni yibe lol’og e nifeng ni ngan kol.” (Eklesiastes 1:14) Fare babyor ko Eklesiastes e dariy e thin riy ku be’ nib cynic ara goo tin nib kireb ni yima lemnag fa be’ nib kankanan’. Ya aram bang ko Thin Rok Got ni ke thagthagnag ma bay rogon ni ngad fl’eged i lemnag.

21, 22. (a) Mang boch ban’en ni i fl’eg Solomon i lemnag? (b) Mang e tin tomur e thin ni ke weliy? (c) Uw rogon u wan’um e pi thin ko Eklesiastes ni kad weliyed?

²¹ Ke yaliy Solomon e pi n’en ni ma athamagiliy e girdi’, nge pi n’en ni ma magawonnagrad, nge pi n’en ni yad ma nameg ni nge yog ngorad. Miki fl’eg i lemnag ko uw rogon e tomur ko pi n’em, nge rogon ni ma kankanan’ e girdi’ ma dariy e athap rorad. Ke weliy e thin nib puluw u morngaagen e girdi’ ndar flontgad nge wenegan ni yam’. Miki weliy e tamilangan’ rok Got u morngaagen rarogon e yam’ nge athap ko yafas nga m’on. Urngin e pi n’ey e aram e n’en ni fl’eg i lemnag e re moon nem ni ke pi’ Got e gonop ngak, arrogon, ir be’ nth’abi gonop ni immoy. Nge mu’ ma tin tomur e thin ni ke weliy morngaagen e pi n’ey e kan tay ko Thin nib Thothup ni fan ni nge yib angin ngak urngin e piin ni ba adag ni ngar pared ni bay fan e yafas rorad. Susun nge fel’ u wan’dad e re n’em fa?

²² “Tungun e re babyor ney e be fonownag e girdi’ ni be gaar: Nguum par ni ba’ madgun Got u wan’um ma ga be fol ko thin rok, ya kari mus fan ni sunumiy Got e girdi’. Ya fa bin riyul’ e Got e ra pufthinnag urngin ban’en ni kan maruweliy nge tin nib mith, min turguy ko ba fel’ fa ba kireb.”​—Eklesiastes 12:13, 14.

[Boch e Thin nra Tamilangnag Murung’agen]

Ka Ga Manang?

◻ Susun u rogon e chugum u wan’um?

◻ Mang fan ni dabi pag rogon ni gad ma lemnag morngaagen e tabinaw rodad, ara rogon ni nge gilbuguwdad, ara rogon ni nge ga’ lungudad ko yugu boch e girdi’?

◻ Mang lem nib puluw ko lem rok Got u morngaagen e falfalan’ ni ke weliy Solomon?

◻ Mang angin ni yib ngom ko fare babyor ni Eklesiastes?

[Sasing ko page 27]

De mudugil ni salpiy nge chugum e ra fl’eg lanin’uy

[Sasing ko page 29]

Rayog ni nge mich u wan’ e piin fel’ yangarad ni ra yan i aw nib fel’ ngorad nfaanra bay madgun Got u wan’rad