Mang e Ma Ta’ e Yafas nib Ga’ Fan?

“Nguum par ni ba’ madgun Got u wan’um ma ga be fol ko thin rok.”​—Ekl. 12:13.

1, 2. Uw rogon nra fel’ rogodad ni faan gad ra fal’eg i lemnag fare babyor ni Eklesiastes?

MU LEMNAG be’ nib moon nib dake urngin ban’en ma bay rok. Be’ ni goo yimanang u lan binaw maku ir be’ u roy u fayleng nri boor ban’en rok, ma ir e th’abi ga’ e llowan’ rok ko birok e mfen. Machane, yugu aram rogon urngin ban’en ni ke thognag, ma ka be fith ir ko, ‘Mang e ma ga’nag fan e yafas?’

² Riyul’ ni immoy be’ nib moon ni aram rogon​—ni sogonap’an dalip biyu’ e duw ni ke yan. Solomon fithingan, mu lan fare babyor ni Eklesiastes e gad ra pirieg riy rogon ni i gay e tin ra fal’eg laniyan’. (Ekl. 1:13) Boor ban’en nrayog ni ngad filed ko tin ni i buch ku Solomon. Rriyul’ ni fare gonop ni bay ko babyor ni Eklesiastes e rayog ni ayuwegdad ni ngad nameged boch ban’en nra pi’ e bin riyul’ i fan e yafas rodad.

“Yibe Lol’og e Nifeng”

3. Mang ban’en u murung’agen e yafas ko girdi’ ni gad gubin ma gad ra mada’nag?

³ I weliy Solomon ni boor ban’en ni ke sunmiy Got nib fel’ yaan u fayleng​—bogi ban’en ndabi m’ay ma ra un gin ngay nra i par nib fel’ u wan’uy ma yibe ngat ngay ndabi m’ay fel’ngin u wan’uy. Machane, dabiyog ni ngarda fal’eged i gay murung’agen e tin ke sunmiy Got ni bochan e kaygi ngoch e yafas rodad. (Ekl. 3:11; 8:17) Rogon ni yog e Bible e pi rran rodad e ba lich ma be thumur nib papey. (Job 14:1, 2; Ekl. 6:12) Re n’ey e susun ni nge k’aringdad ngad fanayed e yafas rodad u fithik’ e gonop. De mom e re n’em, ni bochan e fayleng rok Satan e rayog ni soregdad nga bang nib kireb.

4. (a) Mang e be yip’ fan fare bugithin ni “m’ay fan”? (b) Mang e n’en ni yima lek u nap’an e yafas ni gad ra weliy?

⁴ Sogonap’an 30 yay ni fanay Solomon fare bugithin ni “m’ay fan” u Eklesiastes ni nge tamilangnag e riya’ riy nfaanra dabda fanayed e yafas rodad nib fel’ rogon. Fare thin ni Hebrew ni kan piliyeg ni “m’ay fan” e be yip’ fan ban’en ndariy angin, ara dariy fan, ara dariy rogon ara dariy fel’ngin nra par. (Ekl. 1:2, 3) Yu ngiyal’ e i fanay Solomon fare bugithin ni “m’ay fan” ntaareb rogon ko ‘yibe lol’og e nifeng.’ (Ekl. 1:14; 2:11) Ba gagiyel, ni ngan guy rogon ni ngan kol e nifeng e dariy angin. Be’ ni be guy rogon ni nge rin’ ere n’em e ra yan i aw ni be malle’ ko dariy. Ra un lek e pi n’en ni yibe nameg ndariy e gonop riy ma yira chalban ngay. Yafas ko re ngiyal’ i n’ey e kaygi ngoch ni ngan adbey i gay bogi ban’en nra taydad ndariy ban’en rodad. Ere, ra ngan ayuwegdad ngad pilo’gad ko binem e oloboch, ma ngad sapgad nga boch ban’en ni yog Solomon ni ir e ba ga’ ni yima lek u nap’an e yafas. Som’on e gad ra weliy rogon ni yima lek e felfelan’ nge chugum. Ma tomren e binem e gad ra weliy fel’ngin e maruwel.

Gad Ra Felfelan’ ni Faanra Da Leked e N’en ni Yima Felfelan’ Ngay, Fa?

5. Uw e i gay Solomon e felfelan’ i yan ngay?

⁵ Solomon e i gay rogon ni nge fel’ laniyan’ ni aram e lek e yafas ni yima felfelan’ riy, ni bod rogon ni be rin’ boor e girdi’ e ngiyal’ ney. I gaar: “Dagu talegneg u gubin mit e felfelan’.” (Ekl. 2:10, NW) Uw e i gay e felfelan’ i yan ngay? Rogon ni bay ko Eklesiastes guruy ni 2 e i felfelan’nag ir ko wain​—machane ku be kol ayuw ndabi pag rogon,—​mi i lek boch ban’en ni bod ni, ngan fal’eg yaan e binaw, nge ngan ngongliy yaan tafen e pilung, nge ngan motoyil ko musik nge felfelan’ ko ggan nib fel’.

6. (a) Mang fan nde kireb ni ngaun felfelan’ nga boch ban’en ko yafas? (b) Mang e ba t’uf ni ngan thabthabel riy u rogon e fafel ni yima tay?

⁶ Be yog e Bible nib kireb ni ngaun un ko fager ko felfelan’ u taabang, fa? Danga’. Bod rogon, ni pirieg Solomon, ni ngan felfelan’ ko abich ni yibe toffan u tomren e maruwel nib gel u reb e rran e ba tow’ath ni yib rok Got. (Mu beeg e Eklesiastes 2:24; 3:12, 13.) Maku reb e, Jehovah e ir rok ma be pining e pi fel’ yangaren ni ngaur felfelan’gad mar paged lanin’rad nge rin’ e tin nib fel’ ngorad u reb e kanawo’ nib fel’. (Ekl. 11:9) Ba t’uf rodad e fafel nge pi n’en nib fel’ ni ma fal’eg lanin’uy. (Mu taarebnag ko Mark 6:31.) Machane, susun dabi m’on e fafel u lan e yafas rodad. Rogon riy, e fafel e bod e okas ni yima kay u tomren e abich, gathi ggan ni yima kay u nap’an e abich. Ga manang ndemtrug feni ga baadag lamen e okas ni ga be kay ma ra munmun ma gara dabuy lamen nfaanra kemus ni aram e n’en ni gabe kay, ma dabkiyog ni nge ayuweg fithik’ i dowam. Taareb rogon, ya Solomon e pirieg ni yafas ni ke ga’ fen nga daken e felfelan’ e bod ni “yibe l’ol’og e nifeng.”​—Ekl. 2:10, 11, NW.

7. Mang fan nthingar da gonopiyed rogon i mel’eg ere mit i fafel ni ngad uned ngay?

⁷ Ku reb e, gathi urngin mit e fafel mab fel’. Boor riy e rib kireb ngoyiy​—ya ra kirebnag e tha’ u thildad Jehovah nge ngongol rodad. Uw oren e milyon e girdi’ ni kar tayed e yafas rorad ndakuriy e athap riy ni bochan e ‘yad baadag ni ngar felfelan’gad,’ mar fanayed e falay ni kireb, mar uned ko muun rrum nib pag rogon ara gosgos ni ngan fek e salpiy riy? Jehovah e rib gol rogon ni ke yog ngodad ni faan gad ra pag lanin’dad ara changar rodad nge fekdad i yan ko tin nra kirebnigey, ma ngad nanged nra yib wenegan ngodad nib kireb.​—Gal. 6:7.

8. Mang fan nib fel’ ni ngad fal’eged i lemnag rogon kanawoen e yafas rodad?

⁸ Maku reb e, ra pag rogon nda nameged e tin yima felfelan’ ngay ma ra magawonnagdad ndab kud tedan’dad ko tin nib ga’ fan ban’en. Dabda paged talin, ni yafas e be yan nib papey, ma de mudugil nra par e yafas rodad ndariy e m’ar nge magawon riy. Aram fan, ni yog Solomon ni kab ga’ angin ni ngan yan ko gum’eyag​—nrib ga’ nfaanra ba walag ni Kristiano ni pumoon ara ppin—​ko bin ni ngan yan ngab “naun ni tafen e felfelan’.” (Mu beeg e Eklesiastes 7:2, 4, NW.) Mang fan ni aram rogon? Nap’an ni gad ra motoyil ko welthin ni yibe pi’ u nap’an fare gum’eyag ma gad lemnag rogon e yafas rok fare tapigpig nib yul’yul’ rok Jehovah ni ke yim’, ma sana ra k’aringdad ni ngad fal’eged i yaliy rogon kanawoen e yafas rodad. Ma angin nra yib e, sana gad ra lemnag nib t’uf ni ngad yarmiyed rogon e pi n’en ni gad be nameg nge yog nda fanayed e gin ka bay ko yafas rodad nib fel’ rogon.​—Ekl. 12:1.

Gur, Ra Felfelan’nagdad e Chugum nu Fayleng?

9. Mang e pirieg Solomon u rogon ni nge yoor ban’en ku be’?

⁹ Solomon e immoy ni ir be’ nth’abi yoor ban’en rok u fayleng ko ngiyal’ ni yoloy fare babyor ni Eklesiastes. (2 Kron. 9:22) Demtrug e n’en ni baadag ma rayog ni nge yognag. I yoloy ni gaar, “Demtrug e n’en ni ning lan owcheg ma da ug taleg.” (Ekl. 2:10, NW) Ma yugu aram rogon, me pirieg ni chugum ni boor e dabi yibnag e felfelan’. I yog ni “be’ nri baadag e silber e dabi gaman ko silber, maku er rogon be’ nri baadag ni nge yoor bogi ban’en rok ni ku bay e salpiy ni ku be yib riy.”​—Ekl. 5:10, NW.

10. Mang e ra yibnag e bin nriyul’ e felfelan’ nge fel’ rogon?

¹⁰ Yugu aram rogon ni be thil thil i yan puluwon e chugum, machane fel’ rogon e kab gel chogowen. Reb e survey ni kafin tay u Meriken, e 75 pasent ko urngin e bitir ni skul ko bin som’on e duw ko university e rogned ni n’en th’abi ga’ ni yad be nameg ko yafas e “ngari fel’ rogorad ko salpiy.” Mus nfaanra yog ngorad e tin ni yad be nameg, ma gur riyul’ ni yad ra felfelan’? Danga’. Piin ni yad ma gay murung’agen ban’en e kar pirieged nra par ni goo chugum e ir e ba ga’ fan u lan e yafas ku be’, ma ra mo’maw’ rok ni nge pirieg e felfelan’. Ke n’uw nap’an ni ke nang Solomon ni aram rogon. I yoloy ni gaar: “Ku er rogon ni kug ulunguy e silber nge gol ni fanag nge chugum ni fan ko pilung . . . Ma am sap! Urngin nib m’ay fan, ma yibe l’ol’og e nifeng.”a (Ekl. 2:8, 11, NW) Ba thil, ya faan gad ra fanay e yafas rodad ko pigpig ngak Jehovah u polo’ i gum’irchadad ma aram e ra yog ngodad e tow’ath rok, me yog e bin nriyul’ e fel’ rogon ngodad.​—Mu beeg e Proverbs 10:22.

Ba Miti Mang Maruwel e Ma Yibnag e Bin Riyul’ e Felfelan’?

11. Mang e be yog e Bible u murung’agen fel’ngin e maruwel?

¹¹ I gaar Jesus: “Chitamag e gubin ngiyal’ ni be maruwel ere ku er rogog.” (John 5:17) Dariy e maruwar riy ni Jehovah nge Jesus e yib e felfelan’ ngorow ko maruwel. Bible e be weliy murung’agen e felfelan’ rok Jehovah ko maruwel rok ni sunmiy ban’en u nap’an ni gaar: “Par Got nge guy urngin e n’en ni ke ngongliy ma rib fel’ u wan’.” (Gen. 1:31) Ma pi engel “e ur tolulgad u fithik’ e felfelan’” u nap’an nra guyed urngin e tin ke rin’ Got. (Job 38:4-7) Ku er rogon Solomon nib fel’ u wan’ fel’ngin e maruwel nib ga’ fan.​—Ekl. 3:13.

12, 13. (a) Uw rogon ni ke yog l’agruw ni’ rogon e felfelan’ rorow ni bochan e maruwel u fithik’ e yul’yul’? (b) Mang fan ni ma chalbay ko maruwel nu fayleng yu ngiyal’?

¹² Boor e girdi’ ni yad manang fel’ngin e maruwel u fithik’ e yul’yul’. Bod ni José ni be’ ni ma yoloy yaan ban’en e gaar, “Tomren ni kam yoloy e n’en ni bay yaan u lanin’um nga daken e mad ni yima fanay ni ngan yoloy yaan ban’en ngay ma lanin’um e bod ni kam man nga daken bburey nib tolang.” Miguelb ni be’ nib ta fol chuway’ e gaar: “Maruwel e ma yibnag e felfeflan’ ni bochan e ra ayuwegem ni ngam pi’ e tin nib t’uf ko tabinaw rom. Maku rayog ni nge yibnag e lem ngom ni kam yognag ban’en.”

¹³ Maku reb e, boor e maruwel nib chalban ya yugu taa ban’en e yibe rin’ riy maku gathi ri yibe bing e kanawo’ ni ngan salap i rin’ ban’en. Yu ngiyal’ ma tamaruwel e yima chalban riy maku aram bang nde puluw e ngongol ko girdi’ riy. Bod ni tamilangnag Solomon ni en nib malmal​—nsana bochan ni be fanay e tha’ u thilrad e piin ba’ gelngirad—​e ra t’ar wom’engin e flaab rok e en ni ma maruwel nib gel. (Ekl. 2:21) Ka bay boch ban’en nrayog ni nge kirebnag lanin’uy. Bod ban’en ni tabab ni ka nog nib maruwel nrib manigil e rayog nra ni aw nde fel’ ni bochan e magawon ko salpiy ara tin nda un nang nra buch. (Mu beeg e Eklesiastes 9:11.) Boor yay ni bayi n’en ma facha’ nri be athamgil ni nge fel’ rogon e ma yan i aw ni kari ngochngochan’ me ni nang ni ka i “maruwel nib gel ni fan ko nifeng.”​—Ekl. 5:16, NW.

14. Mang maruwel e yugu ma yibnag e felfelan’ ni gubin ngiyal’?

¹⁴ Gur bay ba mit e maruwel nder ma chalbay ngay? José, ni faen ma yoloy yaan ban’en ni kad weliyed murung’agen buchuuw kafram e gaar: “Ra yan boch e duw ma rayog ni yan nga bayang ara kireb e yungi n’en ni kan yoloy yaan. Gathi aram rogon e tin ni gad ma rin’ ko pigpig rodad ku Got. Bochan ni kug fol rok Jehovah gu be un ko fare maruwel ni ngan machibnag fare thin nib fel’, ma kug un i maruweliy fare maruwel ni ngan ayuweg boch e girdi’ ngar manged Kristiano ni ba’ madgun Got rorad ndabi m’ay biid. Re n’em e dabiyog puluwon.” (1 Kor. 3:9-11) Miguel e ki yog ni ngan machibnag fare thin nib fel’ ko Gil’ilungun e kab gel e felfelan’ ni be yib riy ngak ko maruwel ni be fek e salpiy riy. I yog ni, “Dariy ban’en nrayog ni yan nga lon e felfelan’ ni gara tay u nap’an ni gara un i yog e tin nriyul’ nu Bible ngak be’ mag nang ni ke taw nga gum’irchaen faanem.”

“Mu Pag e Flowa Rom Nge Man’”

15. Mang e ra yibnag angin e yafas?

¹⁵ Tomur e, mang e n’en nri be ta’ e yafas nib fel’? Ra yib e bin riyul’ e felfelan’ ngodad ni faan gad ra fanay e tayim rodad nib ngoch ko re m’ag ney ngaud rin’ed e tin nib fel’ mu ud felan’naged Jehovah. Rayog ni ngad fal’eged rogon e tha’ u thildad Jehovah, ma rayog ni ngad pied fel’ngin e tirok Got ni ba’ rodad ngak pi fakdad, ma rayog ni ngad ayuweged boch e girdi’ ngar nanged Jehovah, ma rayog ni ngad gelniged e tha’ u thildad pi walagdad ni pumoon nge ppin. (Gal. 6:10) Urngin e pi n’ey nra un gay rogon e bay fel’ngin ndabi m’ay biid ma ra yibnag e tow’ath ngak e piin nrayog rorad. Fare n’en ni yima taareb rogonnag ban’en nga ban’en e fanay Solomon reb nrib fel’ nge weliy fel’ngin ni yima rin’ e tin nib fel’. I gaar: “Mu pag e flowa rom nge man’ u daken e ran, ya rani yoor e rran ma ka gara pirieg bayay.” (Ekl. 11:1, NW) I ta’ Jesus ir ngak pi gachalpen ni gaar: “Mu golgad ngak e girdi’ me gol e girdi’ ngomed.” (Luke 6:38, NW) Maku reb e, ke micheg Jehovah nra tow’athnag e piin ni yad ma rin’ e tin nib fel’ ngak boch e girdi’.​—Prov. 19:17; mu beeg e Hebrews 6:10.

16. Mingiyal’ e ba fel’ ni ngad lemniged rogon kanawoen e yafas rodad?

¹⁶ Be ta’ e Bible chilen ngodad ni ngaud gonopgad i dugliy rogon ni ngad fanayed e yafas rodad ko ngiyal’ ni kab fel’ yangardad. Ra aram rogon ma rayog ni nge dabi chalbdad ko tin tomur e duw rodad. (Ekl. 12:1) Uw feni rib kireban’ ni faan gadra adbey e tin th’abi fel’ e duw ko yafas rodad ngaud l’ol’oged bogi ban’en ko fayleng ni yira guy mab fel’ yaan, me tomur riy ma gad pirieg ni bogi ban’en ndariy fan!

17. Mang e ra ayuwegem ngam mel’eg e bin th’abi fel’ i kanawoen e yafas?

¹⁷ Jehovah e bod reb e matam ni ma t’ufegey ni baadag ni ngam felfelan’ ko yafas, mag rin’ e tin nib fel’, mag pilo’ ko tin ra yibnag e kireban’ ngom. (Ekl. 11:9, 10) Mang e ra ayuwegem ngam rin’ e re n’em? Mu nameg boch ban’en ni fan ko tirok Got ban’en, mag maruwel nib gel nge yog nim taw ngay. Ke chugur i 20 e duw ni ke yan, ma Javier e thingari mel’eg reb u l’agruw ban’en, ba maruwel ko aspital nrib fel’ nge machib ni polo’ e tayim. I gaar: “Yugu aram rogon ni maruwel ko togta e ra yibnag e felfelan’, ma dabiyog ni ngan taarebnag ko felfelan’ nib ngog u nap’an ni gu ayuweg boch e girdi’ ngar nanged e tin nriyul’. Pigpig ni polo’ e tayim e ke ayuwegeg kug felfelan’ ko yafas nib musmus rogon. Kemus ni n’en ni ke kalngan’ug riy e dag tabab nib papey boch.”

18. Mang fan ni yafas rok Jesus u fayleng e ba mich nrib fel’?

¹⁸ Ere, mang ere n’en, nth’abi ga’ fan ni ngad athamgilyed nge yog ngodad? Fare babyor ko Eklesiastes e be gaar: “Ba ngochol e kab fel’ ko oil nib fel’ ma fare rran nnim’ e kab fel’ ko fare rran nni gargelegey.” (Ekl. 7:1, NW) Dariy ban’en ni ke dag e re n’ey ni kab fel’ nga rogon e yafas rok Jesus. Riyul’ ni ke fal’eg ba ngochol nib pag feni fel’ u p’eowchen Jehovah. Nap’an ni yim’ Jesus nib yul’yul’ me dag feni tolang nge feni gel gelngin e Chitamangin me pi’ fare maligach ni biyul ni ir e bing e kanawo’ ko yafas ngodad. (Matt. 20:28) Nap’an ni immoy u fayleng nib ngoch nap’an, me pi’ e bin th’abi fel’ e wok​—ban’en ni gad be athamgil ni ngad folwokgad riy—​ba yafas nriyul’ nib fel’.​—1 Kor. 11:1; 1 Pet. 2:21.

19. Mang fonow nib fel’ e pi’ Solomon?

¹⁹ Ku arrogodad ni ku rayog ni ngad fal’eged ba ngochol nib fel’ u p’eowchen Jehovah. Ngad pired nib fel’ thidad u p’eowchen Jehovah e ri kab ga’ fan u wan’dad ko fel’ rogon. (Mu beeg e Matthew 6:19-21.) Gubin e rran ma rayog ni ngad pirieged e pi n’en ni ngad rin’ed nib fel’ u p’eowchen Jehovah ma ra fal’eg rogon e yafas rodad. Bod nrayog ni ngad weliyed fare thin nib fel’ ngak boch e girdi’, ma gad gelnag e tha’ ko mabgol rodad nge tabinaw rodad, ma gad gelnag e tha’ u thildad Jehovah u daken e fol Bible nge muulung. (Ekl. 11:6; Heb. 13:16) Ere, ga baadag ni ngam felfelan’ ko yafas nriyul’ nib fel’? Faanra arrogon, ma ga ulul i lek e fonow rok Solomon ni gaar: “Nguum par ni ba’ madgun Got u wan’um ma ga be fol ko thin rok. Kari mus fan ni sunmiy Got e girdi’.”​—Ekl. 12:13.

[Footnotes]

Uw Rogon ni Ga Ra Fulweg?

• Mang e ra k’aringdad ni ngad lemnaged nib fel’ rogon e pi n’en ni ngad nameged ko yafas rodad?

• Uw rogon ni ngad sapgad ko ngan nameg e felfelan’ nge chugum?

• Mang e re mit i maruwel nra yibnag e felfelan’ ndabi m’ay biid?

• Mang e re n’en nrib ga’ fan nthingar da athamgilyed nge yog ngodad?

[Picture on page 28]

Mang e be k’aring e felfelan’ ko fare maruwel ni machib?