Mu Chuchugur Ngak Got

En Nrayog ni Nge Sulweg e Yafas Nga Rogon

Luke 7:11-15

BAY BE’ nib chugur ngom ni ke yim’, fa? Faanra ba’, ma ke buch ban’en rom nri ma k’aring e kireban’ u lan e yafas. Manang e En ke Sunmiydad e kireban’ rom. Gathi kemus ni manang, ya ku rayog ni nge chuweg wenegan e yam’. U lan e Bible e ke weliy riy ngodad murung’agen boch e girdi’ ni un fasegrad ko yam’ ni fan e nge dag ni gathi kemus ni ma Pi’ e yafas ngodad ya ku rayog ni Sulweg nga rogon. Ngad guyed reb e fos ko yam’ ni pi’ gelngin Fak ni nge rin’, ni aram Jesus Kristus. Re maang’ang ney e bay murung’agen ko Luke 7:11-15.

Fare duw e 31 C.E. Ke milekag Jesus i yan ko fare binaw u Galile ni Nain fithingan. (Verse 11) Sana ke chugur ni nge balayal nap’an ni ke taw nga reb e binaw u tooben fare binaw. Be gaar e Bible: “Ma nap’an ni yig mada’ nga langan e garog ko fare binaw, me guy e girdi’ ni kar bad ni nga ranod ko gum’eyag. Ma re pagel ni baaram ni ke yim’ e bochi cha’ ni kari maagirag rok be’ ni ppin ni ku ke yim’ e pumoon rok, ma boor e girdi’ ni kar uned ngak u lan e binaw i yib.” (Verse 12) Rayog ni mu lemnag e kireban’ ni ke tay e re matin nem ni kem’ figirngin? Bochan ni kem’ fare pagel ni fak ni kari mus rok ma ke thamiy ko yay ni l’agruw nga’ e kireban’ ni keb ngak ni bochan e kem’ e en ni be pi’ ban’en ngak maku be ayuweg.

I tiyan’ Jesus ko fare matin ni ke kireban’ ni be yan nib chugur ko fare kahol ni bay fare pagel ni fak riy. Fare verse e be gaar: “Faani guy Somol e re pin nem, me taganan’ ngak me gaar ngak fare pin, ‘Dakumur yor.’” (Verse 13) Kari kireban’ Jesus ko n’en ni ke buch ko fare pin ni kem’ figirngin. Sana be lemnag e chitiningin, ni dabisiy ni kem’ figirngin e ngiyal’ nem, maku dab ki n’uw nap’an miki kireban’ ni bochan e yam’ nra tay Jesus.

Me chugur Jesus i yan​—ni gathi bochan e nge un ko fare thelep. I “math ko kahol rok fare yam’,” me tal fapi girdi’. Ma aram me non u reb e lam ni laman be’ ni kan pi’ gelngin, ni gaar: “‘Fachi cha’! Be lungug ngom, mu suwon!’ Me suwon fare yam’ nga lang me non, ni aram e ke fulweg Jesus fachi cha’ ngak e chitiningin.” (Verses 14, 15) Ke dar e re pagal nem ko chitiningin u nap’an ni ke yim’. Ere nap’an ni fulweg Jesus “fachi cha’ ngak e chitiningin,” ma aram mar sulow bayay nga taabang. Kireban’ u lan gum’irchaen e re pin ni kem’ figirngin nem e dabisiy ni thil nge ngal’ ni felfelan’.

Ri ga baadag ni nge yib e felfelan’ ngom ni aram rogon​—ni ngam sulow be’ nib t’uf rom nga taabang, fa? Dab mu pagtalin ni be lemnagem Got. Runguy rok Jesus ko re pin ni kem’ figirngin nem ni kari kireban’ e be dag e runguy rok Got, ya i dag Jesus rarogon e Chitamangin nib fel’ rogon. (John 14:9) Be fil e Bible nri baadag Got ni nge faseg e piin ni kar m’ad ni yad bay u laniyan’. (Job 14:14, 15) Thin Rok, ni fare Bible, e be pi’ e athap, ni aram e athap ni ngan par u paradis u fayleng min guy e piin ni kar m’ad ni kan fasegrad ko yam’. (Luke 23:43; John 5:28, 29) Ere mang ndam fil boch murung’agen e En nrayog ni Sulweg e yafas nga rogon nge rogon nrayog ni ngki yog e re athap nem ngom?

[Picture on page 29]

“Me suwon fare yam’ nga lang me non, ni aram e ke fulweg Jesus fachi cha’ ngak e chitiningin”